Pya wuga a bee le Bɛtɛl bee si e’aga tam lo ekwa tɔ radio akura WBBR bu nu a eeloo ziī zua li Staten Island, New York City. Sɔ̄ ba ekwaa kɛnɛkɛ̄ sah, ba bee wu ziī gbɛnɛ tɔ pya esitam loo tɔ radio etɔɔ̄ bu le dɔɔ̄na tɔ ba eyere nu kɔāue lo tɔ radio bu. Sɔ̄ alu esi lo tam sah, pya wuga bee su pya nu edoo kɔ ue alu ekɔ “a yii bu radio yerebu.” Mɛ a bee lu ebɛɛ̄ kɔ ba a be eebah booboo gbānasī.

Pya wuga bee muɛ kɔ a bee aga gbɛnɛ lo eyere antenna ue etɛ̄ɛbu. Lo antenna bee kii nyɔɔ lu 91-meter (300-ft) lo a bee lu eyere yɛɛ baɛ eba te lo ziī ziī ɛɛ kii nyɔɔ lu 61 meter (200 ft). Tua sɔ̄ ba bee gbī eyere ue naa bee kiā leere. Pya wuga bee dɛrɛ nyiɛ nyɔɔ Jɛhova, ebu ye kpɛdumɛ ba bee dap yere ue tɛ̄mabu lo tɔ radio. Calvin Prosser, a bee sitam loo lo tɔ radio kɔ, “Lo i bee yere lo antenna leere tua sɔ̄, ‘i bee kaaga bu i loo!’” Pya wuga bee su ka a aāloo tam a nɛ Jɛhova, mɛ wa taāŋa sii bee tah.

Yere ue tɛ̄ma nyɔɔ radio bee le aā, e a bee aga e’ɛrɛ pya nu esu ye daā. Nyɔɔwo pya wuga bee yaɛ 500-watt transmitter ba bee muɛ lo barasī. Taā ba yaɛ microphone, ba bee kɔ ue tɛ̄mabu telephone. Ziī uunɛ bu Baɛ Enɔɔ̄, pya wuga wee biaɛfii lo ekɔ ue tɛ̄mabu lo tɔ radio bu ye tuā sɔ̄. Ba bee gbī nu ba ekɔ, nyɔɔwo pya wuga bee uɛ yɔɔ Buɛ̄-mɛnɛ tɛ̄mabu. Ernest Lowe kɔ kɛ̄ bu wa bee ɛɛ doo sɔ̄ pya wuga gaa bee uɛ yɔɔ. Wuga Judge Rutherford bee wa kue nyɔɔ fon sɔ̄ a dā wa yɔɔ nyɔɔ ye radio li, b Brooklyn nu alu, 25 kilometer (15 mi) aā kpaɛ̄ lo tɔ radio.

 Wuga Rutherford “bee wiikpa kɔ ɔbɛa kɔma ama, bui gaa wiikpa!’’ Kɛɛ bee bɔp pya wuga eba ɔbɛ, kerewo ba bee suā kɔ ba ekpɛ̄naeloo lo e’ɛrɛ wa tuā kɔ ue siā.

Nyɔɔ 24 biradee bu Baɛ Enɔɔ̄ bu zua, 1924 i bee ɛrɛ i tuā kɔ ue siā. Wuga Rutherford bee kɔ tɔ radio ama elu esu “siātam lo Kraist alu Mɛnɛ enɛā wa kɔ ba a si.” A bee kɔ nu anua alu eyere tɔ radio ama na “lo edoo kɔ pya nɛɛ a dābeeloo aābu Baibol nu sɔ̄ i le ama kura kaɛlɛɛ wa tɔgɛnu ale wa sīdee taāŋabah.”

Lo tuatua kɔ ue siā bee kiā leere. Tɔ radio ama bee lu esu kɔāue a aabah pya nɛɛ Jɛhova siā bu 33 zua.

Bu Ɛrɛba Enɔɔ̄ bu zua 1924, Pya a wee nɔ Kpa Kaɛ bee ɛrɛ kɔnvɛnsɔn li Columbus, Ohio. Pya nɛɛ bee aa dɛ̄dɛɛ̄ nyɔuwe si, e ba bee nɛ ekɔaue bu muɛ ue Arabic, Beke, French, German, Greek, Hungarian, Italian, Lithuanian, Polish, Russian, muɛ ue Scandinavian, le Ukrainian. Bee lu eyere pya lo ekɔaue nyɔɔ radio lokwa pya nɛɛ dap gbaɛ̄tɔ̄, e pya wuga bee kɔ nɛ pya a wee ɛm nius kɔ ba a ɛm nu akiiloo lo kɔnvɛnsɔn ziī ziī biradee.

Nyɔɔ nia dee loo kaɛ, 24 biradee bu Ɛrɛba Enɔɔ̄, nu a eeloo 5,000 pya wuga nɛɛdam le nɛɛwa bee kii ee wee zue kɛ̄ elu e’ɛrɛ lo kɔnvɛnsɔn. Ba nɛ nu aluge 30,000 ekpo kpa sa bɔātɛ̄ etɔgɛ Baibol gbɛnɛ-edo pya nɛɛ. Watch Tower bee su dee ama kure “gbɛnɛ sɔ̄ ɛɛbu loo lo kɔnvɛnsɔn.”

Nyɔɔ O’oo dee loo kaɛ, 25 biradee bu Ɛrɛba Enɔɔ, sɔ̄ wuga Rutherford bee le gaa nɛ ekɔaue a bee su e’agaloo kɔā nu akiiloo pya zaāsī yiga bari. A bee kɔ, pya bɛbɛɛ, pya zaāsī yiga bari, le pya uradu “Gaa ɔbɛ pya nɛɛ lɛɛloo nɔ kaka ue akiiloo Buɛ-mɛnɛ Bari lo Bari esu nɛa leelee pya miɔŋɔ nɛɛ.” Gbaāloo wo, a bee kɔnage kɔ pya nɛɛ ama gaa tɛɛ ekwɔ nyɔɔbee ba gaa “yerekpotɛ̄ bɛbɛɛ nyɔuwe sa kɛɛrɛ kɔ Bari na a gaa bɛɛ a.’” Pya a wee nɔ Kpa Kaɛ bee gbī e’agaloo lokwa ba dap zue ue nɛ pya nɛɛ.

Ena a bee sira sɔ̄ lo kɔnvɛnsɔn e i na kuma a, Watch Tower bee kɔ: “Lo kɔnvɛnsɔn a bee lu edoo bie Columbus bee yere mɛm loo pya wuga nɛɛdam le nɛɛwa ama . . . , bee wa nɛ e’agaloo kɔ ba a zue ue kaɛlɛɛ gbānasī  ba bee tɛɛ̄bu.” Leo Claus, lo a bee si lo kɔnvɛnsɔn bee kɔ: “Sɔ̄ lo Asɛmbli e i na kuma i bee ɛrɛ taɛ lo ezue lo ue siā.”

Bu Lop Enɔɔ̄, Pya Nɔ Baibol bee bɔātɛ̄ edɔɔ̄ miliɔn miliɔn epɛɛ kpa lo pio kɛ̄ a le bu bee kɔ ue bege dogo pya zaāsī yiga bari alu ue wuga Rutherford bee kɔ. Bu ziī gbagbara buɛ, Oklahoma, FrankJohnson bee dɔɔ̄ lo nwī epɛɛ kpa saa bah sa yira lo 20 minit lɛɛ pya dɔɔ̄na wuga gaa lu wee ye ezɔ̄ŋia. A bee tɔɔ̄ kɛ̄ pya nɛɛ naale e muɛgi ye nyɔɔbee ue a bee zue bee yere saŋ bu pya lo buɛ sa ba gaa bee ye gbī. Bee gɔā bu ziī tɔ bari a le lo kɛ̄. Sɔ̄ lɔgɔ nɛɛ naale bu lo tɔ bari a, a bee su pio eba lo nwī epɛɛ kpa akura Ecclesiastics Indicted sɔrɛ bu Baibol nɛɛ a wee zue ue sa serenage pio aba nyɔɔ ziī ziī kasi. A bee doo wo bu nwaanwaabah lɛɛ a aa lo tɔ bari. Nyɔɔbee sɔ̄ bee lege, a bee si baɛ dɔɔ̄na tɔ bari sa doonage wo.

Frank bee teera obia kiikɛ̄ pya dɔɔ̄na wuga ezɔŋia ye. A bee gɔā dumɛ fuel station, sa gaa nwaɛ̄dɛɛ̄ lo pya ba gaa gbī e aa ye. Ba bee teera fah tɛɛ̄, mɛ ba naa muɛ ye. Aba sɔ̄ ba aa na pya a gaa bee nyɔɔnɛ Frank zue ue bee lu a. Ba gaa bee zue ue kɛ̄ a waɛloo kɛ̄, ba zɔŋia ye sa ba yii bu fah aa.

“Sɔ̄ i gaa aa lo buɛ,” ziī wuga kɔ “i etɛ̄na kpaɛ taɛ lo tɔ bari,. Nu aluge 50 nɛɛ le eyira deesī ziī ziī tɔ bari ama. Pio aba gaa buū lo epɛɛ kpa, pio aba gaa su tɔgɛ nɛɛ a wee zue ue lo tɔ bari. I bee aa taɛ nyɔɔ sɔ̄ lokwa ii yii bu taāŋa! Mɛ i doo yaa i Bari Jɛhova kɔ a baɛ i loo sa i nɛ suānu lo e’emabah pya baa Buɛ̄-mɛnɛ ama.”

Bu pya dɔɔ̄na edo, pya nɔ Baibol bee zuenage ue bu e’agaloo. Bu northern France Józef Krett bee zue ue nɛ pya gbīnu aā bukɛ̄ ba aa Poland. Bee lu enɔɔ kɔ enɛ ekɔaue lo ye ekobee na “Sɔ̄ Sɔ̄ Naa Binia Elu Elɛɛ Pya E’ua Kɛ̄ Bu Luh.” Sɔ̄ a gaa bee lu ekue pya nɛɛ loo lo ekɔaue ziī gbɛnɛ nɛɛ tɔ bari bee kɔ nɛ pya ye tɔ bari kɔ ba aa si. Nu a sira bee lu kee loo nu a bee kɔ ba aa doo. Nu a eeloo 5,000 pya nɛɛ bee si wee gbaɛ̄tɔ̄ lo ekɔaue gbaāloo lo gbɛnɛ nɛɛ tɔ bari! Wuga Krett bee kɔ lo gbɛnɛ nɛɛ tɔ bari alu wee kɔ ue bee alɛɛ yira, mɛ a naa bee si. Wuga Krett bee nɛ dɛ̄dɛɛ̄ ekpo kpa a bee ye le bah, sa kɔ pya nɛɛ i bee zue ue nɛ ɛrɛ taɛ lo edā Muɛ̄ Ue Bari.—Amos 8:11.

Li Africa, Claude Brown na a bee su le yereue nua Gold Coast, alu ekure Ghana anii’ee a. Pya ekɔaue a bee nɛ le pya kpa a bee dɔɔ̄ bee doo kɔ kaka ue a nwaabah yaara bu lo edo. John Blankson, lo aa bee nɔ nu akiiloo pie bee si wee gbaɛ̄tɔ̄ ziī ekɔaue wuga Brown. A bee nwaabah suā kɔ egbiāe kaka ue muɛ. John kɔ “Kaka ue bee doo kɔ bu mɛ a ɛɛ, m bee nyɔɔnɛ pya nɛ mm le tɔkpa gaa nɔ pie kɔnia nu akiiloo.”

Ziī dee, John bee ina tɔ bari Anglican sa bip nu akiiloo tɔgɛnu Taa Ka Bari Bu Ziī wa gbɛnɛ nɛɛ. Nyɔnɛbee John e bee dābeeloo leere kɔ kpa kaɛ naa yerekpotɛ̄ lo tɔgɛnu. Wa gbɛnɛ nɛɛ bee ye wiikpāloo kpo sa kɔ: “Oo le Nɛɛ Kraist ɔɔ nɛɛ yɔ tɛɛ̄ aa!”

Sɔ̄ John ina be a bee ɛm kpa ma wa gbɛnɛ nɛɛ kɔ, ba ezɔ̄ŋiae bie taɛkɛ̄ sa a naa kɔ ue bee Taa Ka Bari Bu Ziī. Nu wa gbɛnɛ nɛɛ doo na ekue John nua kɛ̄sī nɛɛ bee wa tɔkpa a gaa nɔ pie a. E nɛɛ a wee wa tɔgɛnu bee bip lo a le a bee ɛmge kpa ma lo gbɛnɛ nɛɛ tɔ bari.

 John bee agara kɔ “a’iī m bee ɛm.”

Lo nɛɛ a wee tɔgɛnu bee kɔ nɛ John kɔ a ɛm kpa lo etaāŋaloo lo gbɛnɛ nɛɛ tɔ bari. Nyɔɔwo John bee ɛm kɔ:

“Sir, Na nɛɛ tɔgɛnu kɔ m ɛm kpa sa a taāŋaloo, m le ekpɛ̄naloo e’ɛm kpa a taāŋaloo lo a le o yiga kɔ o gaa tɔgɛ ekwɔ ekwɔ tɔgɛnu.”

A bee lu nyɛŋialoo wa nɛɛ tɔgɛnu e a bip kɔ, “Blankson, taɛ nu o gbī e’ɛm naa ama ni?”

“A’iī a Sir. Taɛ nu m gbī e’ɛm naa ama.”

“Gaa le lu ekpo a lɛɛ tɔ kpa ama. O tɛɛ̄ doodoo wa kɔ ue sī gbɛnɛ nɛɛ bu tɔ bari i bɛbɛɛ yerekpotɛ̄ sa kɛɛrɛ kɔ o lege gaa le a tɔkpa pya bɛbɛɛ yere ama ni?”

“Mɛ, Sir, . . . Sɔ̄ o wee i tɔgɛnu sa a ɛrɛ kɛ̄ ii dābeeloo ekɔ ii wee bip ebip loo ni?”

“Kɛ̄adoo bui wee bip.”

“Lee a Sir, taɛ nu m bee doonage lo. Gbara ama gaa bee i tɔgɛnu aābu Baibol, e m bip ye ebip nyɔɔ. Ena anua m ɛm kpa ye taāŋaloo lo a le a naa dap agara lo ebip a?”

Naa bee lu ekpo Blankson lɛɛ lo tɔ kpa. E a naa bee lu e’ɛm kpa ye taāŋaloo.

Sɔ̄ i ɛp kɛ̄ i esiatam bu lo zua bee kiā doo, The Watch Tower bee kɔ: “I dap nyɔɔnɛ Devid kɔ: ‘Olo bee mɛ nɛ ekpo ebeā be loo nɔ.’ (Yɔɔ 18:39) Nu a bee sira bu lo zua ama bee i yere mɛm loo gbɛnɛ, nyɔnɛbee i bee muɛ bah Nɛɛ-a-i-ɛrɛ . . . Pya nɛɛ a ye kiīloo nɛ kaāna . . . Bee ɛrɛ ɛɛbu bu ezue ue.”

Sɔ̄ lo zua e bee saa e’ina kuma, pya lo wuga bee nɔɔ lo eyɛgɛ wa zue ue nyɔɔ radio yereloo. Alu ebɔātɛ̄ tam nyɔɔ tɔ dɔɔ̄na radio a waɛkpaɛ Chicago. Aā tɔ radio ama bee lu ekure ye WORD nyɔnɛbee ba gaa le su zuema Muɛ̄ Ue Bari. Lo tɔ radio akura WORD bee ɛrɛ nu a wee yereue tɛrɛ ya aluge 5,000-watt lo a bee tɛ̄ma yereue Buɛ̄-mɛnɛ mmɛ booboo miles mmɛnage dee mmnyɔɔ li Canada.

Zua 1925, Jɛhova bee yerebah nɛ pya wuga kɔ ba a ɛrɛ ekpeloo aāloo aā edaābeeloo aābu kpa Mumuuna 12 ekobee. Lo ama elu dɛm kum tɔloo nɛ pio nɛɛ. Kerewo, enia gbɛnɛ-edo pya dɔɔ̄na lo esuā pya nu a gaa sira li bunyɔɔ lo ii mɔmadɛɛ̄ le kɛ̄ dādā wa beeloo dap ɛrɛ pah nyɔɔ pya nɛɛ Bari a nyɔɔ kɛnɛkɛ̄ doo.