40 EKOBEE UE ENƆ
YƆƆ 30 Na Tɛ, Na Bari, Le Na Gbo
Jɛhova “Bo Pya Wa Beenyiɛ Ebaara”
“A bo pya wa beenyiɛ ebaara, sa bɔp dɛ̄dɛɛ̄ wa muu.” —YƆƆ 147:3.
NU I NƆ
Jɛhova kuūdɛɛ̄loo pya ba le bu taāŋa. Ekobee ue ama gaa le tɔgɛnage i kɛ̄ Jɛhova i nɛ egbɔ̄nyiɛ sɔ̄ i le bu taāŋa doo le kɛ̄ i dap gbɔ̄nyiɛ pya dɔɔ̄na doo.
1. A tɔɔ̄loo Jɛhova doodoo wa kiikɛ̄ pya ye zooro le ni?
ENA Jɛhova muɛ sɔ̄ a ɛp pya ye zooro a nyɔɔ kɛnɛkɛ̄ a? A muɛ sɔ̄ bu i ɛɛ le sɔ̄ bu i gaa biira. (Yɔɔ 37:18) Ɛp kɛ̄ a ye ɛɛrɛbu doo sɔ̄ a muɛ i gaa ye taāŋabah kaɛlɛɛ pya e’aga kɛ̄tɔɔ̄ i gaa tɛɛ̄ bu doo a! Lo a eenyɔɔ na kɔ, a le ekpɛnaloo eyere i kpotɛ̄ sa i nɛ egbɔ̄nyiɛ.
2. Ena Jɛhova doo nɛ pya wa beenyiɛ baara a, e bu mɛ sīdee na i ɛrɛ biī aāloo ye kuūdɛɛ̄loo a?
2 Le-yɔɔ 147:3 kɔ Jɛhova ‘bɔp dɛ̄dɛɛ̄ wa muu’ lo pya wa beenyiɛ baara. Dɔ kpa kaɛ ama tɔgɛ kɛ̄ Jɛhova kuūdɛɛ̄loo pya a le bu taāŋa doo. Ena i doo lokwa i ɛrɛ biī aāloo kɛ̄ Jɛhova i kuūdɛɛ̄loo doo a? Naa kɛɛrɛbu edobah ama. Dɔktɔ a para tam dap piiga lo eyerebah nɛ nɛɛ muu yiiloo kɔ a ɛrɛ boa. Lokwa a dap ɛrɛ biī aāloo, alu ebɛɛ̄ kɔ a nyɔɔnɛ dɛ̄dɛɛ̄ zuurabahtɔ̄ lo dɔktɔ nɛ. Bu ekobee ue ama, i gaa le muɛ nu Jɛhova kɔ bu ye Bee Ue kumaloo pya a gaa mɔna taāŋa, i gaa le nɔnage kɛ̄ i dap su pya ue ama yere bu dogo doo.
JƐHOVA DOO KƆ I SUĀ KƆ I KUĪ YE LOO
3. Ena anua pio nɛɛ kɛɛrɛ kɔ ba naa le edɛɛ̄ lɔgɔ nu a?
3 I tɔɔ̄bu nyɔuwe wereloo naa le, alu ekiɛ̄nu kɔ, alu e’aara pio nɛɛ bu pɔrɔ sidee sa doo kɔ ba a kɛɛrɛ kɔ ba naa le dɛɛ̄ lɔgɔ nu. Ziī wuga nɛɛwa akura Helen a bee kɔ: “M bee aabu tɔ ba naa ɛrɛ wereloo. Na tɛ wee doo dogo luh mii sa a wee i kɔ nɛ kɔ ii le dɛɛ̄ lɔgɔ nu.” Kerewo, doodoo Helen, edaba lu e’aara a bu pɔrɔ Sīdee, sa a gbɛ, ale doo kɔ o kɛɛrɛ kɔ a naa lu e were a loo. Lo a sira doo wo, a dap a agabah lo eyiga kɔ ziī nɛɛ were a loo.
4. Dookɛ̄ Le-yɔɔ 34:18 kɔ doo, amunu egbɔ̄nyiɛ na Jɛhova i nɛ a?
4 Kereadoo pio nɛɛ naa aara a leere, o dap suā leere kɔ Jɛhova were a loo sa o kuī ye loo. A “tɔɔ̄ waɛ loo pya beenyiɛ wa baara.” (Buū Le-yɔɔ 34:18.) Lo o kɛɛrɛ kɔ o “edɔɔ̄ lu ezag bii kɛ̄” nyɛŋia bu kɔ Jɛhova muɛ le a a le bu sa a zuura yaa loo. (Jɔn 6:44) A le ekpɛ̄naloo eyerebah a nɛ nyɔɔbee a were a loo kaāna.
5. Ena i dap nɔ aāloo sīdee Jizɔs bee aara pya nɛɛ alu e’ɛp kumkɛ̄ a?
5 I dap nɔ kɛ̄ a tɔɔ̄ loo Jɛhova doo tɛ̄maloo ekɛɛrɛbu loo edobah Jizɔs . Bu ye esiatam a nyɔɔ kɛnɛkɛ̄, Jizɔs bee yere nukuādɛɛ̄loo pya a bee lu ebii nɛ kɛ̄, e a’aara wa bu fɛgɛ. (Mat 9:9-12) Sɔ̄ ziī wa a bee ɛrɛ bɛābu kɔ elu ebo ye dumɛloo bee daabaloo ye bɛloo, Jizɔs bee ye ka nyɔɔ ye yira. (Maak 5:25-34) Jizɔs bee tɔgɛ elap dogo ye Tɛ. (Jɔn 14:9) Nyɔɔwo o dap suā leere kɔ Jɛhova yere nukuādɛɛ̄ loo pya o le elap, gbaāloo o yira le wereloo o ɛrɛ kiikɛ̄ a le.
6. Ena o dap doo lo a le a tɔɔ̄ a loo kɔ oo le dɛɛ̄ lɔgɔ nu a?
6 Ena o doo lo a le o kɛɛrɛ kɔ a naa lu e’ɛp a yere dɛɛ̄ lɔgɔ nu a? Buū sa ɛrɛ ekɛɛrɛ nyɔɔ pya dɔ Baibol a tɔgɛ kɛ̄ o kuī loo Jɛhova doo. b (Yɔɔ 94:19) Lo a le oo dap doo pya nu o bee seeasī, ale loo a ɔ nyɔɔbee oo dap doo dookɛ̄ pya dɔɔ̄na gaa doo, ɔbɛ esu o loo dooreloo pya dɔɔ̄na e o aa bie ekɛɛrɛ nyɔɔ pya nu oo dap doo. Jɛhova naa ɛmadɛɛ̄ kɔ o doo pya nu a naa waɛ abah edoo. (Yɔɔ 103:13, 14) Lo o ebee tɛɛ̄bu taāŋa a aabah pya dɔɔ̄na sɔ̄ akiiloo adumɛ, o aa bege ue aba ɔɔ nyɔɔ nu lo nɛɛ bee doo. A naa lu a bah! Nyɛŋiabu kɔ pya Jɛhova esu kpɔte nua loo na pya pɔrɔ dogo, naale pya alu edoo pɔrɔ dogo loo. (1 Pit 3:12) Sandra, a naa bee lu e’aara ye leere sɔ̄ a bee le nwiī, bee kɔ “m wee bara Jɛhova dɛ̄dɛɛ̄ sɔ̄ kɔ a yerebah mɛ nɛ kɔ m ɛp aba mm bu sīdee alɛ mɛ ɛp.”
7. Bu mɛ sīdee na i dap su pya pɔrɔ kɛ̄tɔɔ̄ a bee i sira loo bu dum daā le nu bu esiatam Jɛhova a?
7 O aa ɛrɛ baɛbaɛ beenyiɛ kɔ Jɛhova dap a su nyeabah nɛ pya dɔɔ̄na. A yere a ka loo nyɔɔbee a doo kɔ o nyɔɔnɛ ye sitam zue ue. (1 Kɔr 3:9) Aāloo pya e’aga kɛ̄tɔɔ̄ o etɛ̄na bu, dap a waɛbah lo esuā kɛ̄ nu tɔɔ̄ loo pya dɔɔ̄na doo. O dap wa yerebah nɛ kaāna. Bee lu eyerebah nɛ Helen, i bee kɔ nu akiiloo tua sɔ̄ a, sa alɛ gaa yerebah nɛ pya dɔɔ̄na anyaawo. A kɔ: “Jɛhova ekiira ‘nɛɛ a naa bee le dɛɛ̄ lɔgɔ nu’ nua nɛɛ alu ewereloo sa dap yerebah nɛ pya dɔɔ̄na.” Helen gaa sitam sɛmdee bu ɛɛbu anyaawo.
JƐHOVA GBĪ KƆ I SUĀ KƆ E’AARALOO I PƆRƆ I NƐ
8. Amunu ue agɛrɛ beenyiɛ na i ɛrɛ aābu kpa Aisaia 1:18 a?
8 Beenyiɛ pio pya nɛɛ Jɛhova le enɛ wa taāŋa gbɛnɛ nyɔɔ pɔrɔ ba bee si sɔ̄ akii adumɛ lɛɛ ba gae liamaā ale lo ba si sɔ̄ ba eliamaā sah. Mɛ e lee i nyɛŋiabu kɔ Jɛhova bee nɛ waara zɔɔ a’agara nyɔɔbee a were i loo gbɛnɛ. Bu kaka i suā leere kɔ a gbī kɔ i su ye dɔɔ̄nu. Jɛhova gbī kɔ i suā leere kɔ mɛ sɔ̄ i ye nyɔɔnɛ “gbaa yii bira,” c a aaloo dɛ̄dɛɛ̄ i pɔrɔ i nɛ. (Buū Aisaia 1:18.) Bu i ɛɛ gbɛnɛ kɔ i wereloo Tɛ Jɛhova ibere pya pɔrɔ i bee si sɔ̄ akii adumɛ! E a naa iberenage pya le i edoora.—Yɔɔ 103:9, 12; Hib 6:10.
9. Ena anua i piiga lo ebie i ekɛɛrɛ nyɔɔ nu i gaa doo anyaawo le deesī li taā i kɛɛrɛ nu i bee doo sɔ̄ akii adumɛ a?
9 Lo a le o gaa ɛrɛ ekiɛ̄nu nyɔɔ pɔrɔ o bee si sɔ̄ akii adumɛ, piiga lo elɛɛ nyiɛ nyɔɔ sa sere ekɛɛrɛ nyɔɔ pya nu o gaa doo anyaawo le pya nu o dap doo li deesī. Naa kɛɛrɛbu edobah nɛɛ lɛɛratam Pɔɔl. A bee ye kiɛ̄ kɔ a bee tɛ̄ŋae loo Pya Nɛɛ Kraist bu e’agabah ziī sɔ̄, mɛ a suā kɔ Jɛhova e’aaraloo ye nɛ. (1 Tim 1:12-15) Ekɔ a bee kiisī lo ekɛɛrɛ pya pɔrɔ a bee si sɔ̄ akii adumɛ ni? Bu kaka a naa bee doo wo, dookɛ̄ a naa bee kiisī lo ekɛɛrɛbu pya nu a bee doo sɔ̄ a bee le bu taāŋabah bari Judaism doo. (Fil 3:4-8, 13-15) Taāwo, Pɔɔl bee su mɛm zuema ue sa kɛɛrɛbu pya nu a gaa lu li deesī. Doodoo Pɔɔl, oo le edap nyaana nu e bee sira. Mɛ o dap nɛ ka Jɛhova anyaawo sa ɛmadɛɛ̄ le kɛ̄tɔɔ̄ a a yira yii loo nɛ li deesī.
10. Ena i dap doo lo a le i dogo sɔ̄ akii adumɛ bee nua taāŋaloo pya dɔɔ̄na a?
10 Pio nu o bee doo sɔ̄ akii adumɛ lo a bee nɛ taāŋa pya dɔɔ̄na dap a kiɛ̄. Ena edap a yerebah nɛ a? Doo kuma nu o dap lo ekwa lo taāŋa, e o dapnage bara kɔ ba a’aaloo a nɛ. (2 Kɔr 7:11) Bara Jɛhova kɔ a yerebah nɛ pya o dogo bee nua taāŋaloo. A dap a yerebah nɛ le pya o bee nua taāŋaloo kɔ ba a dap egerebu bu lo taāŋa sa sikɛ̄ ɛrɛ efɛɛloo.
11. Ena i dap nɔ aāloo edobah nɛɛ mɔmanudɛɛ̄ Jona a? (Ɛpnage foto a le eko.)
11 Nɔ nu aāloo pya ekwɔ o bee tɛɛ̄ sɔ̄ akii adumɛ, sa kpɛ̄naloo kɔ Jɛhova a su a daā ɛrɛgebah nu a ye nia. Naa ɛp edobah nɛɛ mɔmanudɛɛ̄ Jona. Taā akii Nineve dookɛ̄ Bari bee ye lɛɛra doo, Jona bee teera kii dɔɔ̄na barasī. Jɛhova bee kāmɛnɛ Jona, e a bee nɔ nu aāloo ye tɛɛ̄ ekwɔ. (Jona 1:1-4, 15-17; 2:7-10) Jɛhova naa bee ɔbɛ esu Jona siātam doodoo nɛɛ mɔmanudɛɛ̄. Bari bee sikɛ̄ ye lɛɛra ture Nineve, lo sɔ̄ ama a bee si sa doo dookɛ̄ a bee kɔ doo. A naa bee lɛɛbahloo ekiɛ̄nu a aaloo ekwɔ a bee tɛɛ̄ tua sɔ̄ kɔ a kpaɛ̄ ye lɛɛ loo tam Jɛhova ye nɛ.—Jona 3:1-3.
Sɔ̄ elua ekpɔā nɛɛ mɔmanudɛɛ̄ Jona lɛɛ bu edɛ bari sah, Jɛhova bee sikɛ̄ ye lɛɛra siā Nineve lo ezue Ye ue wa nɛ (Ɛp 11 barakpaɛ̄)
JƐHOVA GBƆ̄ I NYIƐ TƐ̄MALOO YE KAƐ EDƆƆ̄
12. Bu mɛ sīdee na Jɛhova i nɛ efɛɛloo sɔ̄ i kpesī e’aga kɛ̄tɔɔ̄ a? (Pya Filipai 4:6, 7)
12 Tɛ̄maloo kaɛ edɔɔ̄, Jɛhova nɛ i egbɔ̄nyiɛ sɔ̄ piya nu i siraloo bu dum. Naa kɛɛrɛbu nu a bee siraloo wuga Ron le Carol. Bu ekiɛ̄nu, wa nwiī nɛɛdam bee fɛ aba ɛɛ. Ba bee kɔ: “I etɛ̄na bu keekee taāŋa, mɛ lo ama aga ee dɛ̄dɛɛ̄ ɛɛ. Ii wee dap daā uunɛ sa i wee yere kara booboo sɔ̄, i bee ɛrɛ kaāna efɛɛloo alu ebaatɛ̄ bu kpa Pya Filipai 4:6, 7.” (Buū.) Lo o gaa tɛɛ̄bu pya kɛ̄tɔɔ̄ a a taɛŋɛ beenyiɛ, o dap kɔ taɛ kɛ̄ nu a tɔɔ̄loo doo nɛ Jɛhova bu kara ɛrɛgebah sɔ̄. (Yɔɔ 86:3; 88:1) Kiisī lo e wee bara Jɛhova kɔ a nɛ a ye kaɛ edɔɔ̄. E a naale e lɛɛ a bahloo.—Luk 11:9-13.
13. Bu mɛ sīdee na kaɛ edɔɔ̄ eyerebah i nɛ kɔ i kiisī lo etaāŋabah Jɛhova bu bɔ ture nyiɛ loo a? (Pya Ɛfɛsɔs 3:16)
13 O etɛ̄na bu e’aga kɛ̄tɔɔ̄ lo a doo kɔ loo a a ɔ ni? Kaɛ edɔɔ̄ dap a yere mɛm loo kɔ o kiisī lo etaāŋabah Jɛhova bu bɔ ture nyiɛ loo. (Buū Pya Ɛfɛsɔs 3:16.) Naa kɛɛrɛbu loo nu a bee sira loo ziī wuga nɛɛwa a kura Flora. Alɛ le ye dam bee le gaa sitam dɔɔ̄na edo, sɔ̄ ye dam naa bee ye tɔɔ̄na nɛ, a bee ye kiɛ̄ gbɛnɛ sa ba aaloo ziī. Lo wuga nɛɛwa bee kɔ: “Bu mɛ bee biira gbɛnɛ nyɔnɛbee a naa bee mɛ tɔɔ̄na nɛ e mm bee suā lɔgɔ nu edoo. M bee yere kara bara Jɛhova kɔ a nɛ mɛ ye kaɛ edɔɔ̄ lokwa m dap egerebu. Jɛhova bee mɛ nɛ egbɔ̄nyiɛ, kere a naa bee mɛ waɛbah tua sɔ̄, m bee ɛrɛ e’agaloo sa tɛ̄maloo ye yerebah m bee dap sikɛ̄ egerebu.” Flora bee suā kɔ Bari eyerebah ye nɛ kɔ a dɛrɛ ye nyiɛ nyɔɔ, sa suā leere kɔ a gaa le kpegae ye lɛɛ bu dɛ̄dɛɛ̄ ye doā-ɛp. A bee kɔnage kɔ,“ue a le bu Le-yɔɔ 119:32 tɔgɛ kɛ̄ Jɛhova ye yerebah nɛ doo: ‘M gaa le teera bu dee loo dɛ̄dɛɛ̄ o lok sɔ̄ o doo kɔ na suānu alu gbɛnɛ.’”
14. Bu mɛ sīdee na i dap lɛɛbahloo kaɛ edɔɔ̄ kɔ a yerebah i nɛ a?
14 Ena o doo sɔ̄ o ebara Jɛhova kɔ a nɛ a ye kaɛ edɔɔ̄ a? Doo pya nu eyerebah a nɛ kɔ o kiisī lo e’ɛrɛ kaɛ edɔɔ̄. Ziī lo nu na si enɔānu sa zue ue nɛ pya dɔɔ̄na. Buū Muɛ̄ Ue Bari dɛ̄dɛɛ̄ dee. Lo ama eyerebah a nɛ kɔ o kɛɛrɛbu loo nu alu ekɛɛrɛ Jɛhova. (Fil 4:8, 9) Sɔ̄ o gaa buū, yere nukuādɛɛ̄loo edobah pya nɛɛ alu e’ɛm bu Baibol lo ba bee kpesī taāŋa, sa ɛrɛ ekɛɛrɛ nyɔɔ pya sīdee Jɛhova bee wa yerebah nɛ kɔ ba a egerebu. Sandra, a bee lu ekɔ nu a kiiloo tua sɔ̄ a, bee tɛɛ̄ bu keekee e’aga kɛ̄tɔɔ̄. A bee kɔ: “Eloh akiiloo Josɛf bee mɛ yere mɛm loo. Naa bee lɛɛbahloo doā-ɛp le pɔrɔ biaɛ a bee tɛɛ̄ bu kɔ a ɔɛloo ye gbānialoo kiikɛ̄ Jɛhova le.”—Jɛn 39:21-23.
JƐHOVA NƐ I EBGƆ̄NYIƐ TƐ̄MALOO PYA WUGA NƐƐDAM LE NƐƐWA
15. Ba mɛɛ na edap i nɛ egbɔ̄nyiɛ a, e bu mɛ sīdee na ba edap i yerebah nɛ a? (Ɛpnage foto.)
15 Pya i wuga nɛɛdam le nɛɛwa dap i “agɛrɛ nyiɛ” sɔ̄ i gaa kpesī taāŋa. (Kɔl 4:11) Bu kaka, pya i wuga nɛɛdam le nɛɛwa lu ziī sīdee Jɛhova i tɔgɛ wereloo kumaloo. Pya wuga dap i gbɔ̄nyiɛ sɔ̄ ba i le kpaɛ̄ ale sɔ̄ ba gbaɛ̄tɔ̄ sɔ̄ i gaa kɔ kɛ̄ nu i tɔɔ̄loo doo wa nɛ. Ba dap i nyɔɔnɛ kɔnia pya dɔ Kpa Kaɛ eyere i mɛm loo ale nyɔɔnɛ i yere kara. d (Rom 15:4) Pio sɔ̄ ziī wuga nɛɛdam ale nɛɛwa dap i nyɛŋiabu kɛ̄ lo kɛ̄tɔɔ̄ tɔɔ̄loo Jɛhova doo, lo edoo kɔ i dap egerebu. Pya i wuga nɛɛdam le nɛɛwa dapnage i yerebah nɛ bu dɔɔ̄na sīdee, doodoo dɔɔ̄ nuede i nɛ.
Kaāna gbo a bɔloo eture nyiɛ loo, dap i nɛ egbɔ̄nyiɛ sa i yerekpotɛ̄ (Ɛp 15 barakpaɛ̄)
16. Ena i dap doo lokwa pya dɔɔ̄na i yerebah nɛ a?
16 Lokwa i ɛrɛ yerebah aābah pya dɔɔ̄na, i dap bara kɔ ba a yerebah i nɛ. Pya i wuga nɛɛdam le nɛɛwa were i loo sa gbī eyerebah i nɛ. (Kam 17:17) Pio sɔ̄ ba naa suā kɛ̄ nu i tɔɔ̄loo doo ale nu a i bɛɛ̄. (Kam 14:10) Lo a ɛrɛ nu a a taɛ̄ŋɛ, kɔ nɛ pya o gbo ba agaloo. Doo kɔ ba a suā kɛ̄ eyerebah a nɛ doo. O dap kɔ nɛ ziī ale baɛ pya kanɛɛ a a nia. Pio pya wuga nɛɛwa e’ɛrɛ egbɔ̄nyiɛ aāloo ekɔ wa taāŋa nɛ wuga nɛɛwa a agaloo.
17. Pio amunu taāŋa na a dap i kpaɛ̄ lɛɛ loo e’ɛrɛ yerebah a, e bu mɛ sīdee na i dap be eebah a?
17 Yiiloo pya wuga, o aa tɔɔ̄ aba ɔɔ. Nyɔɔbee bu a dap biira mmɛ kɛ̄ oo gbī e yiiloo lɔgɔ nɛɛ. Pio sɔ̄, pya o wuga nɛɛdam le nɛɛwa naa dā a bee loo ale ba dap kɔ ue bu sīdee a naa lee a nɛ. (Jem 3:2) O aa yiga kɔ dua taāŋa ama a kpaɛ̄ a lɛɛ loo e’ɛrɛ e’agaloo. Ziī wuga nɛɛdam alu nɛɛ kanɛɛ lo a kura Gavin lo a bee ɛrɛ gbɛnɛ ekiɛ̄nu, kɔ: “Gbɛnɛkpo sɔ̄ mm wee gbī eyiiloo pya na gbo ale kɔ ue wa nɛ.” Kerewo, Gavin naa bee doodoo wo e a bee ɛrɛ biī aāloo e yiiloo pya dɔɔ̄na. Ziī wuga nɛɛwa a kura Amy kɔ: “Aāloo pya nu a bee mɛ siraloo sɔ̄ akii adumɛ, wee doo kɔ m aa dɛrɛ nyiɛ nyɔɔ pya nɛɛ. Mɛ m gaa nɔ lo ewereloo sa dɛrɛ nyiɛ nyɔɔ pya na wuga nɛɛdam le nɛɛwa dookɛ̄ Jɛhova doo. M suā kɔ dodoo wo wee doo kɔ bu Jɛhova a ɛɛ, e a doonage kɔ bu mda a ɛɛ.”
PYA YII JƐHOVA AKIILOO DEESĪ DAP I GBƆ̄NYIƐ
18. Ena i dap ɛmadɛɛ̄ li deesī a, e ena i doo anyaawo a?
18 Sɔ̄ sɔ̄ naa binia, Jɛhova gaa le lɛɛ dɛ̄dɛɛ̄ nu a i nua ekiɛ̄nu le ezialoo loo. (Mum 21:3, 4) Lo sɔ̄, pɔrɔ pɔrɔ nu a gaa i siraloo anyaawo naale e “lu eyerebu ekɛɛrɛ.” (Ais 65:17) Dookɛ̄ i e mɔna doo, Jɛhova gaa ‘bo i muū’ anyaawo. Jɛhova enɛa i gbɛnɛ-edo nu lo eyerebah i nɛ sa i gbɔ̄nyiɛ. Muɛ kɔ o su lo yerebah. O aa ɛrɛ baɛbaɛ beenyiɛ lɔgɔ sɔ̄ kɔ Jɛhova ‘kuū a dɛɛ̄loo.’—1 Pit 5:7.
YƆƆ 7 Jɛhova Na Ilii Ekpo A
a Elua enyaana pio bee ama.
b Ɛp ekpo akura “ O kuī loo Jɛhova.”
c Lo enyɔɔnɛ Jɛhova “fii bee ue,” a bɔloo kɔ i tɔgɛ kɔ i ekiiyae lo edoo kɔ a aaloo i pɔrɔ i nɛ, le nyaana i elap dogo. Lo a le i si gbɛnɛ pɔrɔ, a bɔloo kɔ i gbī yerebah aābah pya kanɛɛ bu bɔŋanaloo.—Jem 5:14, 15.
