43 EKOBEE UE ENƆ
YƆƆ 90 Yereaa Mɛm Loo Ziī
Kɛ̄ Edap Be Eebah Baɛbaɛ Beenyiɛ Doo
“Aaraa nu a lee bii bahloo.”—1 TƐS 5:21.
NU I NƆ
I gaa le nɔ kɛ̄ edoo ɔbɛ ɛrɛ baɛbaɛ beenyiɛ kiiloo i taāŋabah Jɛhova.
1-2. (a) Pio pya amunu baɛbaɛ ekɛɛrɛ na pya zooro Jɛhova gaa kpesī a? (b) Ena i gaa le kɛɛrɛbu loo bu ekobee ue ama a?
DƐ̄DƐƐ̄ nɛɛ kere pya e’ana a le pya a le zege wee ɛrɛ baɛbaɛ ekɛɛrɛ a pio sɔ̄. Bu edobah, naa kɛɛrɛbu ziī zege wuga nɛɛdam lo a bee kɛɛrɛ lo a le Bari kuūge ye dɛɛ̄loo naa e. Nyɔɔwo a naa bee suā sɛh a bɔgeloo kɔ a liamaā naa e. Dɔɔ̄na edobah na wuga nɛɛdam lo a bee lɛɛbahloo kponia zɔ sa biaɛfii lo esu taāŋabah Jɛhova nua tuatua sɔ̄ a bee le zege. Nyaawo a e’ana sa ɛrɛ aba kpugi esu kuūa dɛɛ̄loo pya ye butɔ, a dap kɛɛrɛ lo a le biaɛfii a bee doo ama sɔ̄ a bee le zege bee leege ale a naa bee lee. Naa kɛɛrɛbu loo ziī wuga nɛɛwa lo e’ana sa naa ɛrɛ na mɛm. Loo ye dap ɔ nyɔnɛbee a naa dap na doo nu a wee doo tua sɔ̄. O ewee bip ge aba ɔɔ kɔ: ‘Ekɔ Jɛhova suāge mɛ loo ni? Ekɔ pya nu m doo nɛ Jɛhova bu ye taāŋabah dɔgɛ biī ni? Ekɔ m luge nɛɛ Jɛhova dap su siātam ni?’
2 Lo i ɛrɛ pya ebip a le doo wo, a sii lu e’agara dap ɛrɛ pah nyɔɔ i taāŋabah Jɛhova. Bu ekobee ue ama, i gaa le kɛɛrɛbu loo kɛ̄ sere ekɛɛrɛ nyɔɔ daākuu Baibol eyerebah i nɛ lo i ɛrɛ baɛbaɛ ekɛɛrɛ kɔ (1) Jɛhova tɔgɛ i nia bu, (2) i biaɛfii sɔ̄ akii adumɛ a bee lee (3) le kɔ i lege gaa kuī loo Jɛhova.
KƐ̄ EDAP DOO ƆBƐ ƐRƐ BAƐBAƐ EKƐƐRƐ
3. Ziī amunu sīdee na i dap ɔbɛ ɛrɛ baɛbaɛ ekɛɛrɛ a?
3 Ziī sīdee i dap ɔbɛ ɛrɛ baɛbaɛ ekɛɛrɛ na tɛ̄maloo e’ɛrɛ ture pya i ebip aābu Muɛ̄ Ue Bari. Lo a le i doo wo, i ɛrɛ mɛm, nyim agaloo bu edɔɔ̄, sa kpɛ̄naloo e “yira agɛrɛ bu yira.”—1 Kɔr 16:13.
4. Bu mɛ sīdee na i “doā ɛp dɛ̄dɛɛ̄ nu”a? (1 Pya Tɛsalɔnaika 5:21)
4 Buū 1 Pya Tɛsalɔnaika 5:21. Suā kɔ Baibol yere i mɛm loo kɔ i “doā ɛp dɛ̄dɛɛ̄ nu.” Bu mɛ sīdee na i dap doo lo ama a? Sɔ̄ ii dābeeloo zii nu, i dap su Baibol gbiātɛ̄ nu akiiloo. Bu edobah, naa kɛɛrɛbu loo zii zege nwiīnɛɛdam a bee kɛɛrɛ kɔ a naa dɔe biī kɛ̄dɛɛ̄ Bari. A yigage kɔ dua ekɛɛrɛ ama lu kaka ni? eeye, a “doā ɛp dɛ̄dɛɛ̄ nu” tɛ̄maloo esu Baibol gbiātɛ̄ nu alu ekɛɛrɛ Jɛhova.
5. Bu mɛ sīdee na i “muɛ” ture Jɛhova akiiloo pya i ebip a?
5 Sɔ̄ i gaa buū Muɛ̄ Ue Bari, i gaa “dā” sɔ̄ Jɛhova i kɔ ue nɛ. Lo i gbī ekɛɛrɛ Jɛhova kiiloo i ebip, naale aba buū Baibol na i doo a. Alu ebɛɛ̄ kɔ i gbī pya dɔ Kpa Kaɛ i nɔ nu nyɔɔ lo eyerebah agara pya i ebip. I dap gbītɛ̄ nu nyɔɔ pya lo ekobee ue, aābu pya i kpa. (Kam 2:3-6) I dap yere kara bara Jɛhova kɔ a baɛ i loo sɔ̄ i gaa gbītɛ̄nu sa i yerebah nɛ kɔ i muɛ pya ye ekɛɛrɛ akiiloo i ebip. I dapnage ɛp pya daakuū Baibol le ye ekɛɛrɛ a kiiloo pya i kɛ̄tɔɔ̄. A bɔnage loo kɔ i buū e’ɛma a le bu Baibol akiiloo pya zooro a bee bɔ ture nyiɛ loo ba bee kpesī dua kɛ̄tɔɔ̄ ama.
6. Ena enɔānu doo lo eyerebah kɔ i be eeba baɛbaɛ ekɛɛrɛ a?
6 I wee “dā” nage ue Jɛhova i kɔ nɛ bie pya i enɔānu. Lo i si enɔānu dɛ̄dɛɛ̄ sɔ̄, i dā pya nu alu ebɛɛ̄ kɔ i doo lo ebe eeba baɛbaɛ ekɛɛrɛ bu ekɔaue ale sɔ̄ pya nɛɛ gaa ture ebip. (Kam 27:17) Doraa i kɛɛrɛbu loo nu i dap doo lo ebe eeba baɛbaɛ ekɛɛrɛ.
SƆ̄ O ƐRƐ BAƐBAƐ EKƐƐRƐ LO A LE JƐHOVA ƐRƐGE A NIA BU
7. Amunu ebip na pio nɛɛ dap bip a?
7 O ebee kɛɛrɛge, ‘ekɔ Jɛhova yerege mɛ nukuādɛɛ̄ loo ni?’ Lo a le o kɛɛrɛ kɔ oo le dɛɛ̄ lɔgɔ nu, o dap kɛɛrɛ kɔ a naale ewaɛ eyii gbo Nɛɛ A Bee Dɛm dɛ̄dɛɛ̄ nu a le bu nyɔuwe. Mɛnɛ David ebee dap ɛrɛ duā ekɛɛrɛ ama. A bee ye lu nyɛŋia loo kɔ Jɛhova yere nukuādɛɛ̄ loo pya miɔŋɔ nɛɛ, e a kɔ: “Aa Jɛhova, e na nɛɛ a kɔ o yeere ye bu ekɛɛrɛ a, ale nwī nɛɛ kɔ o kɛɛrɛ ekɛɛrɛ ye kumaloo a?” (Yɔɔ 144:3) Mɛ kɛ̄ na o gbī ture pya ebip ama aā a?
8. Dookɛ̄ alu e’ɛm doo bu 1 Samuel 16:6, 7, 10-12, ena Jɛhova muɛ bu pya nɛɛ a?
8 Baibol tɔgɛ i kɔ, Jɛhova yere nukuādɛɛ̄ loo pya a bee kɔ ba naa kuī loo pya dɔɔ̄na. Bu edobah, Jɛhova bee yere Samuel kɔ a si tɔ Jesi wee tɔ̄ nɔɔ̄ bee ziī ye nwiīnɛɛdam lo elu mɛnɛ pya Izrɛl. Jesi bee kue ɛrɛba aāloo ɛrɛtaa pya ye miɔŋɔ sia loo Samuel mɛ a naa bee kue David, ye gbagbara nwiīnɛɛdam. b Kerewo, ɛɛ David na Jɛhova bee sagɛ a. (Buū 1 Samuel 16:6, 7, 10-12.) Jɛhova bee muɛ dua nɛɛ David lu, kɔ a bee wereloo Jɛhova kaāna.
9. Ena anua o suā kɔ Jɛhova ɛrɛ a nia bu a? (Ɛpnage foto.)
9 Naa kɛɛrɛbu kɛ̄ Jɛhova tɔgɛ kɔ a yere a nukuādɛɛ̄ loo doo. A nɛ i zuurabahtɔ̄ a lee eera loo i kɛ̄tɔɔ̄. (Yɔɔ 32:8) E tɛɛ doodoo wa doo lo ama lo a le a naa suā a loo leere ni? (Yɔɔ 139:1) Sɔ̄ o su pya zuurabahtɔ̄ Jɛhova a nɛ yerebu dogo, o suā leere kɔ Jɛhova ɛrɛ a nia bu. (1 Edoo 28:9; Doonu 17:26, 27) Jɛhova yere nukuādɛɛ̄ loo pya o epiaga. A muɛ pya le elap o ɛrɛ, sa a gbī elu o gbo. (Jer 17:10) E bu ye gaa le ɛɛ a loo lo o gbī elu ye gbo lo.—1 Jɔn 4:19.
“Lo a le o gbī [Jɛhova], o gaa le gbī ye muɛ.”—1 Edoo 28:9 (Ɛp 9 barakpaɛ̄) c
SƆ̄ O ƐRƐ BAƐBAƐ BEENYIƐ LOO BIAƐFII O BEE DOO SƆ̄ AKII ADUMƐ
10. Sɔ̄ i kɛɛrɛbu loo biaɛfii i bee doo sɔ̄ akii adumɛ, amunu ebip na a dap aakɛ̄ a?
10 Sɔ̄ esaa, pio nɛɛ dap kɛɛrɛbu loo sɛh ba bee dooge biaɛfii a lee sɔ̄ akii adumɛ. Naadabah ba bee lɛɛbahloo pya tam ba wee si ale lɛɛbahloo uradu lokwa ba dap taāŋabah Jɛhova mmɛɛ. Nyaawo sɔ̄ etɛ̄na, naadabah gbɛnɛ-edo zua etɛ̄na. Ba dap kɛɛrɛbu loo pio nɛɛ ba suāloo a bee doo biaɛfii alu kee loo alabah, e nyaawo bee kɔ pya lo nɛɛ ɛrɛ gbɛnɛ-edo kpugi sa tɔɔ̄dum a kpeloo. Nyɔɔwo, ba dap kɛɛrɛ kɔ: ‘Ekɔ na biaɛfii m bee doo lo etaāŋabah Jɛhova luge nu a kuī ni? Sɛh m bee sitam yereloo lokwa m ɛrɛ kpugi a nyaawo ni?’
11. Ena a bee nɛ taāŋa ekɛɛrɛ nɛɛ a bee ɛm Le-yɔɔ 73 a?
11 Lo pya ebip a le doo wo taɛ̄ŋɛ a, kɛɛrɛbu loo kɛ̄ nu bee tɔɔ̄loo nɛɛ a bee ɛm Le-yɔɔ 73 doo. A bee muɛ pya a naa taāŋabah Jɛhova ba le bu wanaloo, ba lu mɛnɛ, kiisī leere, sa ba naa le bu etɛɛrɛloo. (Yɔɔ 73:3-5, 12) Sɔ̄ a wa ɛp le kɛ̄ ba gaa kiisī leere doo, a bee kɛɛrɛ kɔ ye epiaga lo etaāŋabah Jɛhova lu pe. A bee lu esu nu ye “zima yube loo dee” tɛ̄maloo pya ekɛɛrɛ a ye ɔɛloo ama. (Yɔɔ 73:13, 14) Bu mɛ sīdee na a bee dap tama ye ekɛɛrɛ a ye taɛ̄ŋɛ ama a?
12. Dookɛ̄ Le-yɔɔ 73:16-18, ena a bee yerebah nɛ nɛɛ ɛm le-yɔɔ ama kɔ a kwabahloo ye ekɛɛrɛ a?
12 Buū Le-yɔɔ 73:16-18. Nɛɛ uɛ le-yɔɔ bee yii bu kɛ̄ kaɛ Jɛhova. Bie lo kɛ̄ kaɛ, a bee dap kɛɛrɛ nu leere. A bee muɛ kɔ kereadoo nu bee lee loo pya dɔɔ̄na, ba naa ɛrɛ bɛābu li deesī. Nyɔɔwo, a bee ɛrɛ efɛɛloo benyiɛ, suā kɔ kponia nu bu edɔɔ̄ na alu kaāna nu edoo a. Nu a sira aābu na kɔ, a bee sikɛ̄ nyaana ye biaɛfii lo ekiisī lo etaāŋabah Jɛhova.—Yɔɔ 73:23-28.
13. Ena o dap doo a lo a le o ɛrɛ̄ ekiɛ̄nu loo biaɛfii o bee doo sɔ̄ akii adumɛ a? (Ɛpnage foto.)
13 O dap ɛrɛ efɛɛloo benyiɛ aābu Muɛ̄ Ue Bari dookɛ̄ nɛɛ uɛ le-yɔɔ bee doo. Bu mɛ sīdee ni? Naa su pya zɔ o ɛrɛ li bunyɔɔ gbaāloo pya dɔɔ̄na nu o ɛrɛ dooreloo nu lo nyɔuwe ama nɛ pya a ye kponia. Nu a wa kuīloo gbɛnɛ na nu a aabu nyɔuwe ama nyɔnɛbee ba naa ɛrɛ lɔgɔ bɛābu akiiloo deesī. Mɛ kerewo, Jɛhova gaa a yerebah nɛ anyaawo sa eyiranage yii lo enɛ a leelee li deesī mmɛ deedee. (Yɔɔ 145:16) Naa kɛɛrɛ; O suāge kɛ̄ o dum ebee mɛā doo lo a le oo bee biaɛfii lo etaāŋabah Jɛhova ni? Bu kaka, pya wa biaɛfii dɛɛa nyɔɔ wereloo ba ɛrɛ loo Bari le pya nɛɛ le aba le naa wee peere lɔgɔ kaāna le nu.
Ɛmadɛɛ̄ pya leelee Jɛhova eyira yii loo li deesī (Ɛp 13 barakpaɛ̄) d
SƆ̄ O KƐƐRƐ KƆ OO DƆNA BIĪ NƐ JƐHOVA
14. Amunu kɛ̄tɔɔ̄ na pio nɛɛ le bu a, e amunu ebip na a gaa wa nɛ taāŋa a?
14 Pah a aaloo anna, dumɛloo, ale boh gaa nɛ taāŋa pio pya zooro Jɛhova. Lo ama dap doo kɔ ba a kɛɛrɛ kɔ ba naa le na edɛɛ̄ lɔgɔ nu kɛ̄dɛɛ̄ Jɛhova. Ba dap bip kɔ, ‘M lege gaa dɔbiī nɛ Jɛhova ni?’
15. Ena nɛɛ a bee ɛm Le-yɔɔ 71 bee suā leere a?
15 Nɛɛ a bee ɛm Le-yɔɔ 71 bee kɔnage dua ue ama siā. A bee yere kara kɔ: “O a mɛ top bie sɔ̄ anna; sɔ̄ na ekpo etaa mɛ loo.” (Yɔɔ 71:9, 18) Kerewo, nɛɛ uɛ le-yɔɔ bee suā leere kɔ lo a kiiesī lo etaāŋabah Bari bu bɔ ture nyiɛ loo Jɛhova ebaɛ yeloo sa ye yerekpotɛ̄. Aāloo nu a bee siraloo nɛɛ uɛ le-yɔɔ, i muɛ kɔ Jɛhova ɛrɛ nia loo pya a Ye taāŋabah aābu dɛ̄dɛɛ̄ wa ekpo kaɛlɛɛ taāŋa ba gaa kpesī.—Yɔɔ 37:23-25.
16. Bu pya amunu sīdee na Jɛhova muɛ kɔ pya nama nɛɛ dɔbiī a? (Yɔɔ 92:12-15)
16 Bɔɔlo pya nama nɛɛ, ɛbaa bui kɛ̄tɔɔ̄ dookɛ̄ Jɛhova ɛp doo. A dap a yerebah nɛ kɔ o kiisī bu edɔɔ̄ kere o namloo gaa a nɛ taāŋa. (Buū Le-yɔɔ 92:12-15.) Taā o kiisī lo ekɛɛrɛ pya nu oo dapna doo, wee kɛɛrɛ pya nu o dap doo. Bu edobah, o dap yerebah nɛ pya dɔɔ̄na tɛ̄maloo o edobah a bɔloo eture nyiɛ loo le kɛ̄ o wa ɛrɛ nia bu doo. O dap kɔ kɛ̄ Jɛhova eyerebah a nɛ doo bu gbɛnɛkpo zua akii adumɛ sa kɔnage kɛ̄ o ɛrɛ e’agatɛ̄ bɛābu kɔ pya yii Jɛhova ɛrɛge edooa doo. E o aa ɛpnage tɛrɛ kɛ̄ kara o yere bee pya dɔɔ̄na aābu o benyiɛ dap wa yerebah nɛ doo. (1 Pit 3:12) Kaɛlɛɛ ɛrɛgebah kɛ̄ i kɛ̄tɔɔ̄ mɛā doo, dɛ̄dɛɛ̄ ii ɛrɛ nu enɛ Jɛhova le pya dɔɔ̄na.
17. Ena anua ii le esu i loo dooreloo pya dɔɔ̄na a?
17 Lo a le o kɛɛrɛ kɔ oo dapnae sitam Jɛhova yereloo, suā leere kɔ a tɔgɛ nialoo ɛrɛgebah nu o kɛ̄tɔɔ̄ a nɛ dee kɔ o doo. O dap gbī esu tam o gaa si dooreloo nu pya dɔɔ̄na gaa doo. Ɔbɛ edoo wo! Ena anua a? Nyɔnɛbee Jɛhova naa su pya i tam dooreloo lo pya dɔɔ̄na. (Gal 6:4) Bu edobah, nu Meri bee dɔɔ̄nɛ Jizɔs na nɔɔ̄ a sī le nu loo. (Jɔn 12:3-5) Bu kiiyasi, waa ua dam a bee le bu naɛnu a bee dɔɔ̄ baɛ nwī gbagbara kpugi. (Luk 21:1-4) Kerewo, Jizɔs bee ɛp baɛ dɔɔ̄nu ama kɔ alu edoo tɛ̄maloo yira. Ye Tɛ, Jɛhova yere kaloo kaāna ɛrɛgebah nu o doo aābu o beenyiɛ le wereloo o ye ɛrɛ loo kere a tɔɔ̄ a loo kɔ a tera.
18. Ena eyerebah i nɛ kɔ i dap be eeba baɛbaɛ ekɛɛrɛ a? (Ɛpnage ekpo akura “ Muɛ̄ Ue Jɛhova Dap A Yerebah Nɛ Kɔ O Be Eeba Baɛbaɛ Beenyiɛ.”)
18 Dɛ̄dɛɛ̄ ii wee ɛrɛ baɛbaɛ ekɛɛrɛ pio sɔ̄. Kerewo, dookɛ̄ i emɔna doo, i dap dɛɛa nyɔɔ Muɛ̄ Ue alu kaka, lo a le Baibol, e a dap i yerebah nɛ lo elɛa baɛbaɛ ekɛɛrɛ bu. Nyɔɔwo, piiga lo e’ɛrɛ ture lo pya nu a anɛ taāŋa, e lo sɔ̄ loo a e’aga taā a doo o ɛrɛ e’ɔaloo. Jɛhova suā taɛ nɛɛ o lu. A tɔgɛ nialoo pya zɔɔ o waara sa le ekpɛ̄naloo e obara a kpɛ. Suā leere kɔ Jɛhova wereloo sa kuūdɛɛ̄loo zii ziī pya ye zooro ba ye wereloo sa ye tɔɔ̄ agara nɛ.
YƆƆ 111 Pya Nu A I Ɛɛrɛbu
a UE ALU EBAATƐ̄: Bu ekobee ue ama, i gaa kɔ nu akiiloo baɛbaɛ beenyiɛ lo a doo kɔ i aa suā leere kɔ i kuī kɛ̄dɛɛ̄ Jɛhova ale kiiloo biaɛfii i bee doo sɔ̄ akii adumɛ. Lo ama naale baɛbaɛ beenyiɛ alu ekɔ nu kumaloo bu Baibol lo a tɔgɛ kɔ ii ɛrɛ yira bu Jɛhova.
b Kereadoo, kpa Baibol naa kɔ i nɛ taɛ zua Devid bee le sɔ̄ Jɛhova bee ye tubobahloo, a bee le zege.—Ɛp The Watchtower September 1, 2011, p. 29, par. 2.
