1. Pio amunu dɔɔ̄nu na i ɛrɛ aābah Jizɔs a?

 LƆGƆ nwiī nɛɛ sii para dɔɔ̄ nu doodoo Jizɔs. Sɔ̄ Jizɔs bee le a nyɔɔ kɛnɛkɛ̄, a bee su ye ekpo siā nyɛŋia tam lo eyerebah nɛ pya dɔɔ̄na. (Luk 9:12-17) A bee nɛ dɔɔ̄nu a kuī eera tɛ̄maloo enɛ ye dum i bee. (Jɔn 15:13) Aā sɔ̄ a bee lu elɛɛ Jizɔs kɛ̄ bu luh, aa kiisī lo eyerebah i nɛ. Dookɛ̄ Jizɔs bee yira yii doo, a ebara Jɛhova kɔ a nɛ i ye kaɛ edɔɔ̄ lo etɔgɛ i nu sa i gbɔ̄nyiɛ. (Jɔn 14:16, 17, 16:13) E tɛ̄maloo i enɔānu bu bɔŋanaloo, Jizɔs ekirasī lo enɛ i mɛm lokwa i dap doo kɔ pya nɛɛ alu pya a ye nyɔɔnɛ dumɛ tɛ̄ma ɛŋɛnɛ dɛ̄dɛɛ̄ nyɔuwe.—Mat 28:18-20.

2. Ba mɛɛ na alu ‘dɔɔ̄nu bu nɛɛ’ lo Pya Ɛfɛsɔs 4:7, 8 kɔ nu akiiloo a?

² Naa kɛɛrɛbu loo dɔɔ̄na dɔɔ̄nu lo Jizɔs enɛā i. Nɛɛ lɛɛratam Pɔɔl bee ɛm kɔ sɔ̄ Jizɔs ekira bunyɔɔ, a “su keekee dɔɔ̄nu nɛ nɛɛ.” (Buū Ɛfɛsɔs 4:7, 8.) Pɔɔl bee baatɛ̄ kɔ Jizɔs bee nɛ pya dɔɔ̄nu ama lo eyerekpotɛ̄ bɔŋanaloo bu keekee sīdee. (Ɛfɛs 1:22, 23; 4:11-13) Niī’ee, pya yerebahtam, pya kanɛɛ bu bɔŋanaloo, le pya kuūdɛɛ̄loo sɛkiut lunage ‘dɔɔ̄nu bu nɛɛ.’  a Kerewo, pya nɛɛ ama naa mmana, nyɔɔwo ba tɛɛ̄ ekwɔ. (Jem 3:2) Mɛ Nɛɛ-a-i-ɛrɛ Jizɔs Kraist su wa i yeābah nɛ; ba lu dɔɔ̄nu a i nɛ.

3. Naa nɛ edobah kɛ̄ dɛ̄dɛɛ̄ ii dap yerekpotɛ̄ tam pya ‘dɔɔ̄nu bu nɛɛ’ aa si.

³ Jizɔs bee tubobahloo pya ‘dɔɔ̄nu bu nɛɛ’ ama lo eyere mɛm loo bɔŋanaloo. (Ɛfɛs 4:12) Mɛ dɛ̄dɛɛ̄ ii dap wa yerebah nɛ kɔ ba a si tam a kuī ama. Bu edobah: Pio ii le  yɛɛ pya aa si tam wu Tɔ Nɔnu Buɛ̄-mɛnɛ. Pya dɔɔ̄na yerekpotɛ̄ lo tam tɛ̄maloo enɛ wa nuede, kpugi fah le pya lo dɔɔ̄na. Bu aba lo sīdee, dɛ̄dɛɛ̄ ii dap yerekpotɛ̄ epiaga pya yerebahtam, pya kanɛɛ le pya kuūdɛɛ̄loo sɛkiut tɛ̄maloo nu i kɔ le nu i doo. Dooraa i kɛɛrɛbu loo kɛ̄ wa tam i dɔbiī nɛ doo, le nu i doo lo etɔgɛ nialoo wa epiaga, le Jizɔs lo a bee i nɛ pya ‘dɔɔ̄nu bu nɛɛ’ ama.

PYA YEREBAHTAM GAA “YEREBAH”

4. Pio amunu “yerebah” na pya a bee lu nɛɛ yerebahtam bee doo bu tua sɔ̄ o’oo tup zua a?

⁴ Bu tua sɔ̄ o’oo tup zua, bee lu etubobahloo pio pya wuga nɛɛdam nua pya yerebahtam. (1 Tim 3:8) Bee kɔ alaba na a gaa bee “yerebah” tam lo Pɔɔl bee kɔ nu akiiloo a. (1 Kɔr 12:28) Pya yerebahtam wee si booboo tam lokwa pya kanɛɛ dap sere ekɛɛrɛ nyɔɔ tɔgɛnu le kuūdɛɛ̄loo pya wuga. Bu edobah, ba bee dapnage yerebah lo e’ɛm pio ekpo kɛ̄ a le bu Baibol ale doo kɔ a waɛbah lo e’ɛrɛ pya nu alu esu ɛma Baibol.

5. Pio amunu tam na pya yerebahtam gaa si anii’ee a?

⁵ Naa kɛɛrɛbu loo pio tam a kuī pya yerebahtam gaa doo bu o bɔŋanaloo. (1 Pit 4:10) Ba dap wa tubobahloo kɔ ba a kuūdɛɛ̄loo kpugi, le nɔɔ̄ kɛ̄ esitam zue uwe doo ale tɔm kpa sa doo kɔ pya zue ue bu bɔŋanaloo a ɛrɛ, le kɛ̄ bira yɔɔ le vidio, si tam buū nɛɛ, ale yerebah lo ekwa Tɔ Nɔnu Buɛ̄-mɛnɛ. Dɛ̄dɛɛ̄ pya tam ama lu ebɛɛ̄ lokwa bɔŋanaloo kiisī leere. (1 Kɔr 14:40) Gbaāloo wo, Pio pya yerebahtam wee aabahloo nu edoo bu Enɔānu Tɔɔ̄dum Le Tam Zue Ue sa nɛ ekɔaue taɛkɛ̄. Dapnage lu etubobahloo nɛɛ yerebahtam kɔ a yerebah nɛ pya kanɛɛ a gaa kuūdɛɛ̄loo ziī ziī eku tam zue ue. Pio sɔ̄, nɛɛ yerebahtam enyima tura wee nyɔɔnɛ pya kanɛɛ si wee yere mɛm loo pya wuga.

6. Pio ena anua i tɔgɛ nialoo e’aga tam pya yerebahtam gaa si a?

⁶ Bu mɛ sīdee na tam pya yerebatam gaa si dɔbiī nɛ bɔŋanaloo a? Wuga nɛɛwa a kura Beberly, b a le Bolivia kɔ: “M doo yaa pya nɛɛ yerebahtam bu i bɔŋanaloo, nyɔɔbee enɔānu kpe mɛ loo kaāna, nyɔɔ tam ba gaa si, m dap uɛ yɔɔ, agara ebip, gbaɛ̄tɔ̄loo ekɔaue, sa nɔnu aāloo vidio le foto alu etɔgɛ. Ba wee doo kɔ i le bu kpoogaloo bie enɔānu sa yerebah nɛ pya a naa dap lu enɔānu sī le sī kɔ ba a le tɛ̄ma nyɔɔ zoom. Sɔ̄ enɔānu e’ina kuma, ba wee yerebah loo kwakɛ̄, kuūdɛɛ̄loo kpugi bu bɔŋanaloo, doo kɔ i ɛrɛ pya kpa i gbī. M tɔgɛ nialoo dɛ̄dɛɛ̄ tam ba gaa si ama!” Leslie, a tɔɔ̄ Colombia lo ye dam lu nɛɛ kanɛɛ bee kɔ: “Na dam wee dɛɛa nyɔɔ pya yerebahtam lo ekuūdɛɛ̄loo keekee tam. Lo ba naa yerebah, edoo kɔ tam a ee ye loo, m doo wa yaa loo wa epiaga le wa taɛ lo eyerebah.” Bu sīdee baɛbaɛ beenyiɛ naale loo kɛ̄ olo kɛɛrɛnage doolo.—1 Tim 3:13.

7. Bu mɛ sidee na i dap tɔgɛ nia loo tam pya yerebahtam gaa si a? (Ɛpnage foto.)

⁷ Kereadoo tam pya yerebahtam gaa si nia i, Baibol yere i mɛm loo kɔ: “I lu pya a doo yaa.” (Kɔl 3:15) Krzysztof, alu ziī nɛɛ kanɛɛ li Finland, tɔgɛ doo yaa sɔ̄ a kɔ, “M bee yere kere kpa ale ɛm yereue lo m ɛm pio dɔ Baibol bu sa kɔ pio sīdee pya yerebahtam eyere mɛ mɛm loo ale nu anua m tɔgɛ nia loo wa tam.” Pascal le Jael, lo a tɔɔ̄ New Caledonia, wee yere  kara bee pya yerebahtam dɛ̄dɛɛ̄ sɔ̄. Pascal kɔ, “Bu dee ama, i bee le gaa yere kara bee pya yerebahtam, doo yaa Jɛhova lo eyerebah wa nɛ sa wa yere mɛm loo.” Jɛhova dā dua kara ama, e a dɔbiī nɛ dɛ̄dɛɛ̄ bɔŋanaloo.—2 Kɔr 1:11.

PYA KANƐƐ BU BƆŊANALOO ‘SI E’AGATAM I YƐƐ’

8. Ena anua Pɔɔl bee ɛm kɔ pya kanɛɛ bu tua sɔ̄ o’oo tup zua bee le gaa si “e’aga tam” a? (1 Pya Tɛsalɔnaika 5:12, 13)

⁸ Pya kanɛɛ bu tua sɔ̄ o’oo tup zua bee si e’aga tam bu bɔŋanaloo. (Buū 1 Pya Tɛsalɔnaika 5:12, 13; 1 Tim 5:17) Ba bee su zaāsī tɛ̄maloo esere enɔānu le biaɛnu fii bu bɔŋanaloo. Ba bee nɛnage zuurabahtɔ̄ pya wuga nɛɛdam le nɛɛwa bu wereloo lokwa ba kiisī lo e’ɛrɛ e’agatɛ̄ yira. (1 Tɛs 2:11, 12; 2 Tim 4:2) Kerewo, pya nɛɛ ama gaa si e’aga tam lo enɛ nu a bɛɛ̄ pya wa butɔ sa doo kɔ wa gbānialoo a agaloo.—1 Tim 3:2, 4; Taitɔs 1:6-9.

9. Pio pya amunu tam na pya kanɛɛ gaa si a nii’ee a?

⁹ Pya kanɛɛ anii’ee gaa lu kirikiri bu esiatam. Ba lu pya a gaa si tam zue le yereue. (2 Tim 4:5) Ba tɔgɛ le edobah tɛ̄maloo esu mɛm zuema le yereue, nɔɔ pya kɛ̄ elu ezue ue sa i kpɔā kɔ i lu pya a zue ue sa para tɔgɛnu. Ba sinage tam doodoo pya a ɛrɛ toesaɛ̄, sa naa ɛp sī nɛɛ bu biaɛ. Sɔ̄ ziī Nɛɛ Kraist si gbɛnɛ pɔrɔ, pya kanɛɛ wee ye yerebah nɛ kɔ a sikɛ̄ ɛrɛ le gbānialoo kiikɛ̄ Jɛhova le. Gbaāloo wo, ba gaa nwaɛdɛɛ̄ lo edoo kɔ bɔŋanaloo a le ɛɛ. (1 Kɔr 5:12, 13; Gal 6:1) Bu kaka, pya kanɛɛ lu pya kuūdɛɛ̄loo naana pee. (1 Pit 5:1-3) Ba wee kpɛ̄naloo ekɔaue sa su Baibɔl baatɛ̄ leere, ba wee piiga lo esuāloo dɛ̄dɛɛ̄ nɛɛ bu bɔŋanaloo, si wee yere mɛm loo pya nɛɛ. Pio pya kanɛɛ wee yerebah lo ewu Tɔ Nɔnu Buɛ̄-mɛnɛ sa kwaloo kɔ a bia le, nɔɔ pya i kɔnvɛnsɔn, le sitam Hospital Liaison Committees le Patient Visitation Groups, gbaāloo pya dɔɔ̄na tam. Pya kanɛɛ gaa si e’aga tam i bee!

10. Pio ena anua i tɔgɛ nia loo e’aga tam pya kanɛɛ gaa si a?

¹⁰ Jɛhova bee kɔ esere pya ekuū i dɛɛ̄loo leere le kɔ ii le e “sinakɛ̄ ɛrɛ bɔɔ, ale edɔbu.” (Jer 23:4) Ziī wuga nɛɛwa a le Finland a kura Johanna, bee muɛ kaka a le bu ue ama sɔ̄ ye ka bee le bu gbɛnɛ dumɛloo. A bee kɔ: “Kereadoo a wee mɛ agabah lo ekɔ kɛ̄ nu mɛ tɔɔ̄loo doo nɛ pya dɔɔ̄na, ziī nɛɛ kanɛɛ lo mm suāloo bee mɛ ɛrɛ egerebu loo sa mɛ nyɔɔnɛ yere kara, sa doo kɔ m suā leere kɔ Jɛhova were mɛ loo. Mm dapna nyɛŋiabu taɛ nu a bee kɔ, mɛ bɔɔ naa bee mɛ aa na. M sua kɔ Jɛhova yere ye mɛ ma kɔ a yerebah mɛ nɛ taɛ sɔ̄ a bɔloo.” Bu mɛ sīdee na pya kanɛɛ bu o bɔŋanaloo gaa a yerebah nɛ a?

11. Bu mɛ sīdee na i tɔgɛ nia loo pya kanɛɛ a? (Ɛpnage foto.)

¹¹ Jɛhova gbī kɔ i tɔgɛ nia loo pya kanɛɛ “nyɔɔ wa tam.” (1 Tɛs 5:12, 13) Henrietta, lo a bee tɔɔ̄nage Finland bee kɔ: “Pya kanɛɛ kpɛ̄naloo eyerebah nɛ pya dɔɔ̄na, lo ama naa kura kɔ ba ɛrɛ gbɛnɛ-edo sɔ̄ le mɛm ale bee ba naa ɛrɛ nu finiabah ba gaa kpesī bu wa dum. Pio sɔ̄ m wee wa kɔ nɛ, ‘O suāge ni? Ɔɔ le nɛɛ kanɛɛ. O suāge doo wo.’” Ziī wuga nɛɛwa a le Türkiye c ye bee kura Sera kɔ: “Pya kanɛɛ gbī ‘yere mɛm loo’ lokwa ba  kiisī bu wa esiatam. Nyɔɔwo i dap wa ɛm kere kpa ma, wa kue lo nuede, sa wa nyɔɔnɛ si uwe zue ue.” A ɛrɛge ziī nɛɛ kanɛɛ o tɔgɛ nialoo kaāna nyɔɔ ye epiaga ni? Gbī pya sīdee o doo kɔ a suā kɔ o tɔgɛ nialoo ye e’aga tam.—1 Kɔr 16:18.

PYA KUŪDƐƐ̄LOO SƐKIUT WEE I WU AGƐRƐ

12. Amunu nɔɔnɔɔnu na a bee wu bɔŋanaloo agɛrɛ bu tua sɔ̄ o’oo tup zua a? (1 Pya Tɛsalɔniaka 2:7, 8)

¹² Kraist Jizɔs bee nɛ “doonu bu nɛɛ” bɔŋanaloo lo eyerebah wa nɛ bu keekee sīdee. A bee su pya kanɛɛ yeā Pɔɔl, Banabas, le pya dɔɔ̄na nua pya a aa ziī edo yii ziī. (Doonu 11:22) Ena anua a? Nu anua alunage etubobahloo pya kanɛɛ le pya yerebahtam lo, lo ewu bɔŋanaloo agɛrɛ. (Doonu 15:40, 41) Pya nɛɛ ama gaa doo gbɛnɛ-edo nu lo edap si pya tam ama, sa su wa loo yere bu kɛ̄tɔɔ̄ a dap lɛɛ wa dum lo eyere mɛm loo pya wuga.—Buū 1 Pya Tɛsalɔnaika 2:7, 8.

13. Pya amunu tam na pya kuūdɛɛ̄loo sɛkiut aa si a?

¹³ Pya kuūdɛɛ̄loo sɛkiut wee aa ziī kɛ̄ yii ziī gbɛnɛ-edo sɔ̄. Pio aba kiā nu a eeloo o’oo tup kilomita kii ziī ziī bɔŋanaloo. Bu ziī ziī kaɛ, nɛɛ kuūdɛɛ̄loo sɛkiut wee nɛ keekee ekɔaue, si wee yere mɛm loo nɛɛ, zɔ̄zɔ̄ŋia pya sɛmdee, zɔ̄zɔ̄ŋia pya kanɛɛ, le zɔ̄zɔ̄ŋia lo si uwe zue ue. A kpɛ̄naloo ekɔaue sa nɔɔ sɛkiut asɛmbli le kɔnvɛnsɔn. Wee tɔgɛ nu tɔkpa a le nɛ pya sɛmdee, nɔɔ keebee zɔ̄zɔ̄ŋia a le nɛ pya sɛmdee bu lo sɛkiut. Gbaāloo pya tam ama a wee aabah loo dɔɔ̄na nu akuī, le pya dɔɔ̄na nu alu eyere ye ma aā tɔ naatam.

14. Pio ena anua i tɔgɛ nia loo pya kuūdɛɛ̄loo sɛkiut lo ba gaa si e’aga tam a?

 ¹⁴ Bu mɛ sīdee na bɔŋanaloo ɛrɛ biī aāloo tam pya kuūdɛɛ̄loo sɛkiut gaa si a? Ziī wuga nɛɛdam a le Türkiye bee kɔ nu kumaloo pya kuūdɛɛ̄loo kɔ: “Dɛ̄dɛɛ̄ sɔ̄ ba lu, ba wee mɛ yere mɛm loo kɔ m su gbɛnɛkpo sɔ̄ su yeābah nɛ pya wuga nɛɛdam le nɛɛwa. M ezɔ̄ŋia gbɛnɛ-edo pya kuūdɛɛ̄loo sɛkiut; kerewo, a sii mɛ tɔɔ̄loo kɔ ba naa ɛrɛ sɔ̄ ale ba naa gbī ekɔ ue mɛ nɛ.” Johanna i bee kɔ nu akiiloo tua sɔ̄ a, bee nyɔɔnɛ nɛɛ kuūdɛɛ̄loo sɛkiut kii uwe zue ue, mɛ ba naa bee muɛ lɔgɔ nɛɛ tɔ. “Kerewo,” a bee kɔ, “Taɛ lo biradee naale e’ibere mɛ. Baɛ pya na wuga nɛɛwa bee aa lo barasī, m bee wa peere gbɛnɛ. Lo nɛɛ kuūdɛɛ̄loo sɛkiut bee mɛ yere mɛm loo sa mɛ yerebah nɛ kɔ m muɛ kɔ nyaawo naa dap waɛ kɔ i tɔɔ̄ kpaɛ̄ pya i butɔ le i gbo, mɛ bu aā nyɔuwe i ɛrɛ dee lo etɔɔ̄ kpaɛ̄ dɛ̄dɛɛ̄ nɛɛ.” Gbɛnɛ-edo ii etɔgɛ nia loo tam pya kuūdɛɛ̄loo sɛkiut gaa si le sīdee ba i yerebah nɛ.—Doonu 20:37–21:1.

15. (a) Dookɛ̄ nu a le bu 3 Jɔn 5-8 kɔ doo, bu mɛ sīdee na i dap tɔgɛ doo yaa lo pya kuūdɛɛ̄loo sɛkiut a? (Ɛpnage foto.) (b) Ena anua i tɔgɛ nialoo wa pya wuga nɛɛdam a gaa si e’aga tam bu bɔŋanaloo a? (Ɛp ekpo a kura “ Nyɛŋiabu Loo Wa Pya A Gaa Su Zaāsī Bu Bɔŋanaloo.”)

¹⁵ Nɛɛ lɛɛratam Jɔn bee yere mɛm loo Gaius kɔ a aara saanɛɛ pya alu wee yere mɛm loo bɔŋanaloo sa wa “yere ture nyɔɔ wa kiā dookɛ̄ a bɔloo tam esi nɛ Bari doo.” (Buū 3 Jɔn 5-8.) Ziī sīdee i dap doo wo na tɛ̄maloo e kue wa nua i tɔ kɔ ba a gbaa i loo lo nuede. Dɔɔ̄na sīdee i dap wa yerekpotɛ̄ na tɛ̄maloo enyɔɔnɛ nɔɔnɔɔnu tam zue le yereue bu lo kaɛ. Leslie i bee kɔ nu akiiloo tua sɔ̄ a, bee  tɔgɛ ye doo yaa bu dɔɔ̄na sīdee. “M bee yere kara kɔ Jɛhova a doo kɔ ba a ɛrɛ nu a wa bɛɛ̄,” a bee kɔ. “Na dam le mm eyere gbɛnɛ-edo kpa wa ma, sa kɔ kɛ̄ wa lu lu eyerebah i nɛ doo.” Nyɛŋiabu kɔ, pya kuūdɛɛ̄loo sɛkiut ɛrɛnage nu a wa bɛɛ̄ le taāŋa ba gaa tɛɛ̄bu. Pio sɔ̄, ba wee ɛrɛ dumɛloo, ɛrɛ gbɛnɛ ekɛɛrɛ, sa ɛrɛnage e’ɔaloo. Nyɔɔwo kɛ̄ o wa kɔ ue nɛ bu fɛgɛ doo ale nu o wa dɔɔ̄ nɛ dap lu ture loo wa kara!—Kam 12:25.

ALU EBƐƐ̄ KƆ I ƐRƐ “DƆƆ̄NU BU NƐƐ”

16. Dookɛ̄ a le bu kpa Kam 3:27 doo, amunu ebip na pya wuga nɛɛdam ebip aba aba a?

¹⁶ Tɛ̄ma ɛŋɛnɛ̄ dɛ̄dɛɛ̄ nyɔuwe, alu ebɛɛ̄ kɔ i ɛrɛ pya wuga nɛɛdam ba esitam doodoo “dɔɔ̄nu bu nɛɛ.” Lo a le o lu ziī wuga nɛɛdam eliamaa, o dapge yerebah ni? (Buū Kam 3:27.) O ekpɛ̄nageloo lo elu ziī nɛɛ yerebahtam ni? O dapge nyim tura lo ekuūdɛɛ̄loo ebɛɛ̄ pya nɛɛ bu bɔŋanaloo lo elu ziī nɛɛ kanɛɛ ni? d O dapge kwabahloo o kɛ̄tɔɔ̄ lokwa o dap si Tɔkpa a le nɛ pya Zue Ue Buɛ̄-mɛnɛ ni? Lo tɔkpa ekpɔ̄a a sa eyerebah a nɛ kɔ Jizɔs a su a siā gbɛnɛ-edo tam. Lo a tɔɔ̄ a loo kɔ oo nyim tura lo esi lo tɔkpa, yere kara nɛ Jɛhova. Bara Jɛhova kɔ a nɛ a ye kaɛ edɔɔ̄ lokwa o dap aabahloo ɛrɛgebah nu alu enɛ a kɔ o doo.—Luk 11:13; Doonu 20:28.

17. Ena “dɔɔ̄nu bu nɛɛ” tɔgɛ akiiloo i Mɛnɛ, Jizɔs Kraist a?

¹⁷ Pya wuga nɛɛdam Jizɔs etubobahloo nua “dɔɔ̄nu bu nɛɛ” tɔgɛ kɔ Jizɔs gaa i zaāsī bu kpɛdumɛ dee ama. (Mat 28:20) Bu i ɛɛ kɔ i ɛrɛ Mɛnɛ a ɛrɛ wereloo, para dɔɔ̄nu lo a suā nu a i bɛɛ̄ sa i nɛ pya wuga nɛɛdam lo eyerebah i nɛ. Nyɔɔwo, gbī pya sīdee o dap tɔgɛ doo yaa lo pya nɛɛ a gaa si e’aga tam ama. Waa ɔbɛ edoo yaa Jɛhova nyɔnɛbee alɛ na a nɛ “dɛ̄dɛɛ̄ le dɔɔ̄nu le dɛ̄dɛɛ̄ gbɛnɛ dɔɔ̄nu a mma” a.—Jem 1:17.