Lo nwī tɛm bee le kɛ̄ etɛɛ̄ yii loo kɛ̄ kaɛ loo lo tɔkaɛ. Dookɛ̄ aā edaābeeloo bu New World Translation of the Holy Scriptures a bee lu elɛɛ tɔ bu zua 2023 kɔ doo, “nwī tɛm nyima bu a le mmsī tɔ a bee le 20 cubit bu ye nyɔɔnyɔɔ, bee le kɛmkɛm loo bɛɛasī tɔ a; e ye gā-nyɔɔ bee le 120 cubit.” (2 Edoo 3:4) Pya dɔɔ̄na tatap kɔ lo nwī tɛm bee lu “120 cubit” bu gā-nyɔɔ, lo alu 53-mita (175-ft) be nyɔɔ!

Kerewo, aā New World Translation a bee lu elɛɛ tɔ 2023 a kɔ ue kumaloo nwī tɛm loo tɔkaɛ Solomon kɔ: “Ye gā-nyɔɔ bee lu 20 cubit,” ale nu aluge 9 mita (30 ft) nyɔɔnyɔɔ. a Naa kɛɛrɛbu loo pio nu alu ekwabahloo ama.

Gā-nyɔɔ lo nwī tɛm naa lu ekɔ bu 1 Mɛnɛ-Buɛ̄ 6:3. Bu lo barakpaɛ̄, Jeremaia bee ɛm nu akiiloo ye bɛɛasī le ye edo, naale ye gā-nyɔɔ. Bu pya dɔɔ̄na barakpaɛ̄ a nyɔɔnɛ, a baatɛ̄ nu akiiloo pya dɔɔ̄na nu a le bu lo tɔkaɛ, a bee lu ekwa Gbɛnɛ Pɛnɛ a bee lu elegere, lop nu sere nu nyɔɔ, e a bee tɔ̄ baɛ bā-be nwīkpɔrɔ nu dee lo nwī tɛm. (1 Mɛnɛ 7:15-37) Lo a le nyɔɔnyɔɔ lo nwī tɛm bee eegeloo 50 mita sa nyɔɔ ee dɔɔ̄na kɛ̄ a le lo tɔkaɛ, ena anua Jeremaia naa bee kɔ kuma ye gā-nyɔɔ a? Kere sɔ̄ booboo zua etɛ̄na, pya a bee kɔ eloh kere Juu bee ɛm kɔ lo nwī tɛm bee kii nyɔɔ ee pya dɔɔ̄na kɛ̄ a le lo tɔkaɛ.

Pya enɔā gbɛnɛ kpa bee ɛrɛ baɛbaɛ beenyiɛ akiiloo lo ekpadaɛ̄ kɔ ebee dap gbaaloo 120-cubit-nyɔɔnyɔɔ loo lo nwītɛm. Pya ekpodɛm le nu a bee lu etoma tɔ a dee kere wee nyɔɔ kaāna, doodoo nudee tɔkaɛ li Ijipt, ye ekatɛ̄ bee bɛɛa, e ye deenyɔɔ biiyasī. Mɛ tɔkaɛ Solomon bee lu kee. Pya a nɔ gbɛnɛ kpa bee kɔ ye ekpadaɛ̄ naa eenyɔɔ 6 cubit, ale 2.7 mita (9 ft), bu ye egbep. Theodor Busink a wee tɔ̄nu a dee kere a bee kɔ: “Dɛɛa nyɔɔ egbep [nudee lo tɔkaɛ], lo nwī tɛm naale ebee lu 120 cubit [ye nyɔɔnyɔɔ].”

Dap lu kɔ pya ue a le bu 2 Nu a bee lu edoo 3:4 naa bee lu e’ɛm leere. Kere pya nama kpa a bee lu e’ɛm Baibol bu kɔ “120” bu barakpaɛ̄ ama, pya e’ɛma alu edɛrɛ nyiɛ nyɔɔ, doodoo pya lo a bee lu e’ɛm bu o’oo sɔ̄ o’oo tup zua Codex Alexandrinus le ini’ī sɔ̄ o’oo tup zua Codex Ambrosianus, buū nua “20 cubit.” Ena anua nɛɛ ɛm kpa etɛɛ̄ dua ekwɔ ama sa ɛm “120” a? Pya ue alu esu kɔā “o’oo tup” le “cubit” bee ziī bu muɛ̄ ue Hibru. Nyɔɔwo lo nɛɛ ɛm kpa ebee dap ɛm bee ue “o’oo tup” taā a ɛm “cubit.”

Bu kaka, kuma sɔ̄ i gaa piiga lo edābeeloo e’ɛma ama sa tɔgɛ kɔ nu akiiloo tɔkaɛ Solomon lu kaka a, i sere ekɛɛrɛ nyɔɔ nu lo tɔkaɛ tɔɔ̄dɔ, lo a le gbɛnɛ tɔkaɛ bu edɔɔ̄. Naa ɛp kɛ̄ bu i ɛɛ doo kɔ Jɛhova kue dɛ̄dɛɛ̄ pya ye zooro kɔ ba alu wee taāŋa ye bah bu lo tɔkaɛ doo a!—Hib 9:11-14; Mum 3:12; 7:9-17.