YƆƆ bee lu ziī gbɛnɛ nu a kuī bu doonu pya Izrɛl a dee kere. Baibol kɔ nu akiiloo pya a bee para esu nu biā yɔɔ le uɛ yɔɔ. Bu kaka, gbɛnɛ-edo kɛ̄ a le bu Kpa Kaɛ lu yɔɔ, bu edobah Le-yɔɔ, Yɔɔ Solomon, le Yɔɔ-To. Nyɔɔwo, zii kpa a kɔ nu akiiloo kɛ̄ dum bee mɛā doo bu sɔ̄ Baibol a dee kere a kɔ, “Baibol tɔgɛ kɔ pya Izrɛl wee su yɔɔ daānu bu gbɛnɛ-edo nu ba wee doo.”

Yɔɔ bu dɛ̄dɛɛ̄ wa dee tɔɔ̄dum. Pya Izrɛl wee bira yɔɔ lo etɔgɛ kɛ̄ nu wa tɔɔ̄loo doo. (Ais 30:29) Pya nɛɛwa wee bira kere, su ɛɛbu uɛma yɔɔ sa yeb bie kɛ̄ ba gaa wu mɛnɛ, doodoo nu taāŋabah, le sɔ̄ pya nɔ be eeba. (Biaɛ 11:34; 1 Sam 18:6, 7; 1 Mɛnɛ 1:39, 40) Pya Izrɛl wee uɛ nage yɔɔ sa to sɔ̄ nɛɛ u. (2 Edoo 35:25) Bu sīdee lɔgɔ ebip naale loo, McClintock le Strong’s Cyclopedia kɔ, “Pya a le Hibru bee lu pya a wee uɛ yɔɔ,”.

Yɔɔ bu tɔ mɛnɛ. Yɔɔ wee ɛɛrɛbu pya mɛnɛ Izrɛl. Mɛnɛ Sɔɔl bee kue Devid nua ye tɔ mɛnɛ kɔ a si tam doodoo nɛɛ uɛ yɔɔ. (1 Sam 16:18, 23) Sɔ̄ Devid elua mɛnɛ, a bee ɛrɛ pya nu biā yɔɔ, a bee ɛm pya yɔɔ a kpe tɔ̄, sa nɔɔ pya ebira yɔɔ bie bu tɔ kaɛ Jɛhova. (2 Edoo 7:6; Amos 6:5) Mɛnɛ Solomon bee ɛrɛ pya nɛɛdam le nɛɛwa a wee uɛ yɔɔ bie ye tɔ biaɛ.—Eklis 2:8.

Yɔɔ lo taāŋabah. Lo alu gbɛnɛ na kɔ, pya Izrɛl wee su yɔɔ taāŋabah Jɛhova. Bu kaka, 4,000 pya uɛ yɔɔ wee uɛ yɔɔ bie bu tɔ kaɛ li Jerusɛlɛm. (1 Edoo 23:5) Ba wee bira nwī-gamma-eziī, gamma-eziī, baɛ nɔɔnɔɔ eba lala le dɔɔ̄ni. (2 Edoo 5:12) Mɛ pya nɛɛ a para bira yɔɔ ama naale aba pya a bee taāŋabah Jɛhova tɛ̄maloo yɔɔ. Gbɛnɛ-edo pya Izrɛl wee uɛ yɔɔ sɔ̄ ba le nyɔɔ dee gaa kii Jerusɛlɛm loo wa keebee doonu. Pya yɔɔ ama wee lu ekure Yɔɔ Pya Ascents. (Yɔɔ 120-134) Dookɛ̄ e’ɛma pya Juu le doo, pya Izrɛl bee uɛ Yɔɔ Hallel a bu sɔ̄ nuede Tɛɛ̄ Yee.

Yɔɔ lunage ebɛɛ̄ lo pya nɛɛ Bari anii’ee. (Jem 5:13) I uɛ yɔɔ nua ziī gah lo i taāŋabah. (Ɛfɛs 5:19) Sɔ̄ i nyɔɔnɛ pya i wuga nɛɛdam le nɛɛwa uɛ yɔɔ nɛ Jɛhova, doo kɔ i tɔɔ̄ bu gbaaloo. (Kɔl 3:16) A doo kɔ i ɛrɛ e’agaloo sɔ̄ i kpesī e’aga kɛ̄tɔɔ̄. (Doonu 16:25) Yɔɔ lu ziī le sīdee i tɔgɛ yira i ɛrɛ bu Jɛhova le kɛ̄ i ye wereloo doo.