1. Fituru bee lu ebɛɛ̄ sɔ̄ a bee lu e’ɛm Baibol doodoo wa?

 FITURU bee lu ziī nuede a mma kɛ̄ bu sɔ̄ a bee lu e’ɛm Baibol. (Jɛn 14:18; Luk 4:4) Bu kaka, a bee mma kɛ̄ mmɛ lo dɔ Baibol su “fituru” kɔā ue akiiloo ɛrɛgabah nuede. (Mat 6:11; Doonu 20:7) Fituru bee lenage yɛɛ baɛ nyɛŋiatam Jizɔs bee si. (Mat 16:9, 10) Ziī e’ɛma ama le bu Jɔn 6 ekobee. Kuma sɔ̄ i gaa nɔ nu akiiloo pya e’ɛma ama, i gaa le muɛ pya nu i dap nɔ aāloo le kɛ̄ i dap su yere bu dum doo.

2. Bu amunu kɛ̄tɔɔ̄ na nuede bee lu ebɛɛ̄ a?

² Sɔ̄ pya nɛɛ lɛɛratam Jizɔs ebee zue ue sah, Jizɔs le aba bee yii bu fah kii Galili lokwa ba dap seea. (Maak 6:7, 30-32; Luk 9:10) Ba bee lu ina kɛ̄ lɔgɔ nɛɛ naale li Betsaida. Sɔ̄ sɔ̄ naa binia, booboo nɛɛ bee dā kɔ Jizɔs bee le lo kɛ̄. Jizɔs naa bee wa kpo. A bee wa tɔgɛ nu akiiloo Buɛ̄-mɛnɛ bu fɛgɛ sa bo pya loo naa nwaɛ. Sɔ̄ a bee ina loo uunɛ, pya a wee ye nyɔɔnɛ dumɛ bee kɛɛrɛ nu gbɛnɛkpo nɛɛ a ede. Pio aba bee ɛrɛ nwīgbagbara nuede, mɛ pio aba ekii bu buɛ̄ wee yaɛ nu ba ede. (Mat 14:15; Jɔn 6:4, 5) Ena Jizɔs edoo a?

 JIZƆS BEE SU FITURU DAĀ NYƐŊIATAM

3. Ena Jizɔs bee kɔ nɛ pya ye nɛɛ lɛɛratam kɔ ba a doo nɛ gbɛnɛkpo nɛɛ a? (Ɛpnage eko.)

³ Jizɔs bee kɔ nɛ pya ye nɛɛ lɛɛratam kɔ: “Ba naa ɛrɛ ekii; bɔɔlo bui nɛa wa nu ba ede” (Mat 14:16) Lo ama bee lu gbɛnɛ taāŋa nyɔnɛbee ba bee luge 5,000 pya nɛɛdam. Sɔ̄ alu esu pya gbobia le pya gbomiɔŋɔ gbaāloo, ba luge 15,000 pya a gbī nuede. (Mat 14:21) Andru bee kɔ: “Ziī nwiīnɛɛdam le a kɛ̄ ama, lo a ɛrɛ o’oo bee fituru barley le baɛ eyuu bari; mɛ lo ba ama elu e yɛɛ gbɛnɛkpo nɛɛ ama?” (Jɔn 6:9) Fituru barley wee lu nu pya kporo le pya dɔɔ̄na wee de gbɛnɛ. Naadabah, lo nwīgbagbara bari ebee lu eyere loh loo sa ɔp. Kerewo, bari a bee le bah lo nwiī naale egbɔɛ̄loo gbɛnɛkpo nɛɛ ama, ale egbɔɛ̄ge ni?

4. Ena i dap nɔ aāloo Jɔn 6:11-13 a? (Ɛpnage foto.)

⁴ Jizɔs bee kɔ nɛ gbɛnɛkpo nɛɛ a kɔ ba a ɛŋɛtɛ̄kɛ̄ bu eku eku, nyɔnɛbee a gbī edoo wa fɛgɛ dogo loo. (Maak 6:39, 40; buū Jɔn 6:11-13.) Nyɔɔwo Jizɔs bee yere kara nɛ ye Tɛ nyɔɔ lo fituru le lo bari. Tɛ̄maloo edoo wo a tɔgɛ kɔ Bari na a nɛ lo nuede a, e a tɔgɛnage nia kumaloo. Alu ebɛɛ̄ kɔ i nyɔɔnɛ edobah Jizɔs tɛ̄maloo eyere kara lɛɛ i gae denu, kereadoo i le aba ii ale kɛ̄ pya dɔɔ̄na le. Lo sɔ̄ Jizɔs bee kɔ nɛ pya a wee ye nyɔɔnɛ dumɛ kɔ ba a dɔɔ̄nɛ pya nɛɛ, e dɛ̄dɛɛ̄ pya nɛɛ a bee de sa a mma wa bu. Pio lo fituru le lo bari bee siga, lo Jizɔs naa bee  kɔ alu etop bie. Nyɔɔwo a bee lu ebɔŋɛnɛloo lo a siga, lokwa alu esu daānu dɔɔ̄na sɔ̄. Jizɔs nɛ i edobah kɛ̄ esu pya nu i ɛrɛ daānu bu sīdee a bɔloo doo. Lo o ɛrɛ gbomiɔŋɔ, ena anua oo wa nyɔɔnɛ ɛp kpɛa ama sa bui kɔnia nu a dap lu enɔ akiiloo yere kara, aara saanɛɛ le dɔɔ̄nu yaaribah a.

5. Pya nɛɛ bee doo dogo doodoo wa kumaloo nu Jizɔs bee doo lo dee, e Jizɔs bee doodoo wa?

⁵ Kɛ̄ Jizɔs bee tɔgɛnu sa si nyɛŋiatam doo bee nia pya nɛɛ. Susuā kɔ Mozis e bee kɔ sere kɛ̄ kɔ Bari gaa le lɛɛ ziī nɛɛ mɔmanudɛɛ̄ kɛ̄, bee dap doo kɔ ba a kɛrɛɛ kɔ, ‘Ekɔ Jizɔs na lo nɛɛ ani?’ (Deut 18:15-18) Lo a le wo, e bee dap bee kɔ alɛ lu gbɛnɛ mɛnɛ adap nɛ nuede dɛ̄dɛɛ̄ nɛɛ bu Izrɛl. Nyɔɔbee wo, gbɛnɛkpo nɛɛ a ebee sah e “su ekpo ye aā [Jizɔs] sa ye nua mɛnɛ buɛ̄.” (Jɔn 6:14, 15) Lo Jizɔs lɛɛbahloo kɔ ba a doo wo, a gaa yere bee bu bɛbɛɛ a le kɛɛ̄ pya Rom. A bee dooge wo ni? Eeye. I buū kɔ Jizɔs bee biaɛfii sa ‘kpooraloo ye lɛɛ kii nyɔɔ kpokɛ̄.’ Nyɔɔwo kaɛlɛɛ nu ba bee gbī edoo a naa bee gbī eyere bee bu bɛbɛɛ. Ena i gaa nɔ aāloo a!

6. Mɛ sīdee na i tɔgɛ kɔ i gbī enyɔɔnɛ edobah Jizɔs a? (Ɛpnage foto.)

⁶ I suā kɔ, pya nɛɛ naale ekɔ i doo kɔ fituru a kuī kpo ale kɔ i bo nɛɛ bu nyɛŋia sīdee, eba naale e gbīnage esu i  nua mɛnɛ a bɛɛ ziī barasī ale edo. Mɛ ba dap i zū kɔ i tɛrɛ kpa ale yerekpotɛ̄ nɛɛ ba kɛɛrɛ kɔ e bɛɛ leere. Kerewo, edobah Jizɔs sira pie leere. A bee amana lo eyere bee bu bɛbɛɛ, sɔ̄ esaa a kɔnage kɔ: “Mdaa Buɛ̄-mɛnɛ naa aabu lo nyɔuwe ama.” (Jɔn 17:14; 18:36) Elee kɔ Pya Nɛɛ Kraist anii’ee a ɛrɛ ekɛɛrɛ sa doo dogo bee Jizɔs. I yerekpotɛ̄ Buɛ̄-mɛnɛ Bari, zue ue kumaloo, sa bara kɔ alu. (Mat 6:10) Doraa i obia kiiloo kpɛa akiiloo kɛ̄ Jizɔs bee nɛ fituru bu nyɛŋia sīdee doo sa kɛɛrɛ dɔɔ̄na nu i dap nɔ aāloo.

“SUĀ NU AKIILOO BEE FITURU”

7. Ena Jizɔs le pya ye nɛɛ lɛɛratam bee doo a? (Jɔn 6:16-20)

⁷ Sɔ̄ Jizɔs enɛā nuede gbɛnɛkpo nɛɛ a sah, pya a wee ye nyɔɔnɛ dumɛ le ɛɛ bee aa lo barasī obia kiī Kapanaum sa a gɔā kii nyɔɔ kpokɛ̄ lokwa pya nɛɛ a naa su ye nua mɛnɛ. (Buū Jɔn 6:16-20.) Sɔ̄ pya nɛɛ lɛɛratam aa bee ɔp fah, gbɛnɛ fii efɔp bee dɔ sa nua epaga maā. Lo sɔ̄ Jizɔs bee kiā nyɔɔ maā wa pii. Sa kɔ nɛ nɛɛ lɛɛratam Pita kɔ a kiānage nyɔɔ maā. (Mat 14:22-31) Aba sɔ̄ Jizɔs yii bu fah a, fii efɔp a bee ɔp. Kɛ̄ alu nyɛŋialoo pya a wee ye nyɔɔnɛ dumɛ doo bee doo kɔ ba a kɔ: “Kaka, olo na Nwiīnɛɛdam Bari” a. a (Mat 14:33) Kerewo, ba naa bee muɛ kɛ̄ nyɛŋiatam a ɛrɛ nu edoo kiiloo nu a bee sira tua sɔ̄ yɛɛ gbɛnɛkpo nɛɛ a doo. Maak kɔ yere loo kɔ: “Alu wa ziī dua bu dɛɛ̄ ereloo [pya nɛɛ lɛɛratam] sa a yee wa bee. Nyɔnɛbee ba naa bee suā nu akiiloo bee fituru, mɛ wa beenyiɛ bee ɔloo.” (Maak 6:50-52) Aiī, ba naa bee dābeeloo kɛ̄ ekpo Jɛhova nɛ Jizɔs kɔ a siā nyɛŋiatam kuī doo. Kerewo, sɔ̄ sɔ̄ naa pe loo, Jizɔs alɛɛ loo bee sikɛ̄ kɔ ue akiiloo nɛ fituru bu nyɛŋia sīdee sa kɔ nu akura i nɛ.

8-9. Ena anua gbɛnɛkpo nɛɛ bee gbī Jizɔs a? (Jɔn 6:26, 27)

⁸ Gbɛnɛkpo nɛɛ Jizɔs bee nɛ nuede a, bee tɔgɛ kɔ nu a wa kuīloo na wa taɛ le ebɛɛ̄ bu namloo. Bu mɛ sīdee ni? Lo dee a nyɔɔnɛ, ba bee muɛ kɔ Jizɔs le pya ye nɛɛ lɛɛratam e’aara lo kɛ̄. Nyɔɔwo, gbɛnɛ-edo nɛɛ bee yii bu fah aa Tiberias kii Kapanaum lo egbī Jizɔs. (Jɔn 6:22-24) Ekɔ a bee le nyɔɔ dā nu akiiloo Buɛ̄-mɛnɛ yere loo ni? Eeye. Taɛ wa ekɛɛrɛ na wa ebɛɛ̄ bu namloo, lo a le fiuturu. I tɛɛ̄ doodoo wa suā ni?

⁹ Yere nukuādɛɛ̄loo nu a sira sɔ̄ gbɛnɛkpo nɛɛ a muɛ Jizɔs waɛ kpaɛ̄ Kapanaum. Jizɔs lere bee wa kɔ nɛ kɔ nu a wa kuīloo na mmɛnɛ wa ebɛɛ̄ bu namloo bu ziī nwī sɔ̄. A kɔ nyɔɔbee bui bee “de fituru a e bu i mma” tɛ̄maloo “nuede lo a epe.” Taāwo, a zū wa kɔ ba a si tam loo “nuede lo a etɔɔ̄ mmɛloo dum a naatah.” (Buū Jɔn 6:26, 27.) Jizɔs kɔ ye Tɛ̄ enɛ wa lo dua nuede. A bee ɛrɛ elu wa nyɛŋialoo kɔ nuede edoo kɔ ba a ɛrɛ dum a naatah! Mɛ dua nuede na adap doo wo a, e pya Jizɔs gaa bee kɔ ue nɛ etɛɛ̄ doodoo wa ɛrɛ ni?

10. Amunu “tam Bari” na a bee lu ebɛɛ̄ kɔ pya nɛɛ a suā nu akiiloo a?

¹⁰ Sira pie kɔ pya Juu ama bee kɛɛrɛ kɔ ba ɛrɛ esitam ale a ɛrɛ nu ba edoo lo e’ɛrɛ dua nuede ama. Ba dap kɛɛrɛ kɔ ɛɛna lo “tam” kɛɛ̄ Lok Mozis. Mɛ Jizɔs bee wa kɔ nɛ kɔ: “Tam Bari na ama, kɔ  bui yira bu lo nɛɛ alɛ bee yere.” (Jɔn 6:28, 29) Alu ebɛɛ̄ kɔ i ɛrɛ yira bu nɛɛ a yira dɔ Bari lokwa i ɛrɛ “dum a naatah.” Bu kaka, Jizɔs ebee kɔ nu akiiloo lo ba ama (Jɔn 3:16-18, 36) E a ɛrɛ pya dɔɔ̄na nu esikɛ̄ kɔ kumaloo kɛ̄ i tɛɛ̄ doo ɛrɛ dum a naatah.—Jɔn 17:3.

11. Bu mɛ sīdee na pya Juu tɔgɛ kɔ wa ekɛɛrɛ bee lege nyɔɔ kɛ̄ ede fituru mmɛa bu doo a? (Le-yɔɔ 78:24, 25)

¹¹ Pya Juu ama naa bee su tɔgɛnu Jizɔs akiiloo aā “tam Bari.” Ba bee ye bip kɔ: “Edobah nu ena o dooa, lokwa i muɛ, sah a yira nɛ” (Jɔn 6:30) Ba kɔ pya wa nama tɛ bu dee Mozis bee ɛrɛ mana lo a dap lu esu dooreloo fituru. (Neh 9:15; buū Le-yɔɔ 78:24, 25.) Sira pie kɔ wa beenyiɛ bee lege gaa le nyɔɔ kasī fituru e’mma wa bu. Ba naa bee kɔnage nɛ Jizɔs kɔ a doo kɔ ba a dābeeloo sɔ̄ a bee sikɛ̄ kɔ nu akiiloo “kaāna fituru a aa bunyɔɔ,” lo a bee le doodoo mana a nɛ dum a aa bunyɔɔ. (Jɔn 6:32) Wa ekɛɛrɛ bee bia nyɔɔ wa ebɛɛ̄ bu namloo lo a doo kɔ ba a ɛp kaka ue bu edɔɔ̄ lo Jizɔs gaa bee gbī ekɔ wa nɛ tɛrɛ. Ena i dap nɔ aāloo kpɛa ama a?

TAƐ NU ALU ILII EKƐƐRƐ

12. Bu mɛ sīdee na Jizɔs tɔgɛnu a kuī gbɛnɛ a?

¹² I gaa le nɔ ziī gbɛnɛ nu aābu kpa Jɔn 6 ekobee. Taɛ nu alu i ekɛɛrɛ na i ebɛɛ̄ bu edɔɔ̄. Nyɛŋiabu kɔ Jizɔs bee kɔ ue ama sɔ̄ a gaa kɔgara ue sɔ̄ Setan bee ye doā ɛp. (Mat 4:3, 4) E bu ye zue ue nyɔɔ kpokɛ̄, a bee kɔ a lu ebɛɛ̄ lo e’ɛrɛ taɛ loo i ebɛɛ̄ bu edɔɔ̄. (Mat 5:3) Nyɔɔwo, i dap bip aba ii kɔ, ‘Kɛ̄ m tɔɔ̄dum doo tɔgɛge kɔ mmɛnɛ na ebɛɛ̄ bu edɔɔ̄ kuī mɛ loo ee mmɛnɛ na ebɛɛ̄ bu namloo ni?’

13. (a) Ena anua a bɔloo kɔ i dap ɛrɛ ekpeloo aāloo nuede a? (b) Amunu zuurabahtɔ̄ na a bɔloo kɔ i suā a? (1 Pya Kɔrint 10:6, 7, 11)

¹³ A naa bee piya lo eyere kara sa bara pya nu a i bɛɛ̄ le lo e’ɛrɛ ekpeloo aāloo. (Luk 11:3) Si e’agatam yerebah i nɛ kɔ i “de sa ɔ̄” lo a i nɛ ɛɛbu e “a aabah Bari.” (Eklis 2:24; 8:15; Jem 1:17) Kerewo, alu ebɛɛ̄ kɔ i nwaɛdɛɛ̄ lokwa nu bu namloo naa kuī i loo gbɛnɛ. Nɛɛ lɛɛratam Pɔɔl bee kɔ lo ama sɔ̄ a gaa ɛm kpa ma Pya Nɛɛ Kraist a bee tɔɔ̄ dee kuma sɔ̄ eku pya Juu. A bee kɔ pya nu a bee sira loo pya Izrɛl sɔ̄ akii adumɛ gbaāloo nu a bee sira kpaɛ̄ Kpokɛ̄ Sinai. A zuurabahtɔ̄ Pya Nɛɛ Kraist kɔ ba aa “gbīna pɔrɔ nu, dookɛ̄ [pya Izrɛl] bee gbī pɔrɔ doo.” (Buū 1 Pya Kɔrint 10:6, 7, 11.) Jɛhova bee nɛ nuede pya Izrɛl bu nyɛŋia sīdee. Mɛ nyɔɔ wa pɔrɔ taɛ lo nuede bee lu “pɔrɔ nu” wa nɛ. (Buā 11:4-6, 31-34) Sɔ̄ ba bee taāŋabah nwī nɛɛ pie gold ba bee kwa, pya Izrɛl bee tɔgɛ kɔ nuede, nu e ɔ̄ le ɛrɛ ekpeloo kuī wa loo ee Jɛhova. (A’aa 32:4-6) Pɔɔl bee kɔ nu a bee wa sira loo lu zuurabahtɔ̄ nɛ Pya Nɛɛ Kraist lɛɛ kuma sɔ̄ eku pya Juu gae lu a bu zua 70 C.E. Nyaawo i tɔɔ̄dum sɔ̄ kuma lo sɔ̄ eku ama ewara, nyɔɔwo a bɔloo kɔ i su zuurabahtɔ̄ Pɔɔl bee nɛ ama nua gbɛnɛ.

14. Kiiloo nuede, ena i dap ɛmadɛɛ̄ bu aā nyɔuwe a?

¹⁴ Sɔ̄ Jizɔs bee kɔ i yere kara bara “i nuede anii’ee,” a bee kɔnage kɔ i yere kara kɔ ekɛɛrɛ Bari a dooa “dookɛ̄ a le doo li bunyɔɔ alenage a kɛnɛkɛ̄.” (Mat 6:9-11) Ena lo ama doo kɔ o nyɛŋia bu a? Baibol tɔgɛ kɔ le nuede lenage yɛɛ ekɛɛrɛ Bari ɛrɛ kumaloo kɛnɛkɛ̄. Dookɛ̄ Aisaia 25:6-8 kɔ doo, gbɛnɛkpo nuede  bu namloo lo enɛ i ekpeloo ele bu Buɛ̄-mɛnɛ Bari. Le-yɔɔ 72:16 bee kɔ sere kɛ̄ kɔ: “Gbɛnɛ-edo kpakpaa le buɛ̄ a; doolo a nyɔŋa bu efɔp nyɔɔ dɛ̄dɛɛ̄ gbɛnɛ kpokɛ̄.” O gaa ɛmage dɛɛ̄ kɔ o sue pio kpakpaa ama kwaā dua fituru a wee a nia ale lo aā ni? Gbaāloo wo, o dap ɛrɛ ekpeloo aāloo nu o foh aābu o uwe vine. (Ais 65:21, 22) E dɛ̄dɛɛ̄ nɛɛ ale bu nyɔuwe e ɛrɛnage ekpeloo aāloo pya le nu ama.

15. Amunu tɔgɛnu na elu edoo sɔ̄ elu elɛɛ pya nɛɛ kɛ̄ bu luh li deesī a? (Jɔn 6:35)

¹⁵ Buū Jɔn 6:35. Naa kɛɛrɛ nu akiiloo pya nɛɛ ba bee de fituru sa ba bari Jizɔs bee wa nɛ a? O dap zɔ̄ŋia pio aba sɔ̄ ba e’aakɛ̄ bu luh li deesī. Kere ba naa bee tɔgɛ yira sɔ̄ akii adumɛ a, a dap lu elɛɛ wa kɛ̄ bu luh. (Jɔn 5:28, 29) Pya nɛɛ ama enɔ sa suā nu ue Jizɔs kura sɔ̄ a bee kɔ: “Mda na fituru dum; nɛɛ a mɛ lu loo, loo ye naale elɛɛ.” Bee lu ebɛɛ̄ kɔ ba a ɛrɛ yira bu waara zɔɔ a’agara Jizɔs, sa yira kɔ a bee nɛ ye dum lo e’agara wa. Bu lo sɔ̄, elu enɔɔ lo etɔgɛ Muɛ̄ Ue Bari pya a aakɛ̄ bu luh le ɛrɛgebah miɔŋɔ a mɛā lo sɔ̄. Ɛp kɛ̄ bu a e ɛɛ doo lo etɔgɛ wa nu a! Yerebah nɛ pya dɔɔ̄na kɔ ba a ɛrɛ le gbanialoo kumaloo Jɛhova ekpealoo ee dɛ̄dɛɛ̄ nuede bu aā nyɔuwe.

16. Ena i gaa le kɔ ue kumaloo bu ekobee ue i yii li a?

¹⁶ I ekɔa nu akiiloo pio kpɛa a le bu kpa Jɔn 6 ekobee, mɛ Jizɔs ɛrɛ pya dɔɔ̄na nu etɔgɛ akiiloo “dum a naatah.” Lo ama bee bɔloo kɔ pya Juu a nɛ ekɛɛrɛ, e a bɔnage loo kɔ ili i kɛɛrɛ bu a nyaawo. I gaa le kiisī lo ekɛɛrɛbu nu akiiloo kpa Jɔn 6 ekobee bu ekobee ue i yii li.