1-2. Amunu kɛ̄tɔɔ̄ na edap doo kɔ i to a?

 AĀ ZIĪ sɔ̄ yii ziī, dɛ̄dɛɛ̄ ii e bee dap to. Maā-to ɛɛbu dap i aa dɛɛ̄ sɔ̄ i tɛɛ̄ bu kɛ̄tɔɔ̄ a i nɛ ɛɛbu. Naadabah o bee to sɔ̄ gbɛnɛ le nu ale nu alu keebee bee a siraloo bu dum. Bu edobah sɔ̄ o nwiī bee mɛā, sɔ̄ o nyɛŋiabu ziī nu a bee sira a bee a kpeloo, ale sɔ̄ o muɛ ziī o gbo oo bee muɛna bu pio zua akii adumɛ.

² Kerewo, dɛ̄dɛɛ̄ i maā-to tɔgɛ kɛ̄ nu i tɔɔ̄loo doo bu i beenyiɛ. Bu edobah, i dap to sɔ̄ ziī nɛɛ i lɔgara. I dap to nyɔɔ gbɛnɛ ezialoo a aaloo eyɔloo ale sɔ̄ nɛɛ i wereloo u. Bu pya sɔ̄ ama, nu dap i tɔɔ̄loo dookɛ̄ a bee tɔɔ̄loo nɛɛ mɔmanudɛɛ̄ Jeremia sɔ̄ Jerusalɛm bee dɔ kɛ̄ bah pya Babilɔn doo. Jeremia bee kɔ: “Na baɛ dɛɛ̄ bu tɛ̄maloo pɛnɛ maā-to . . . Na baɛ dɛɛ̄ gaa le bu e ba naa ɔb, ba naa ɔbɛloo.”—Yɔɔ-to 3:48, 49.

3. A tɔɔ̄loo Jɛhova doodoo wa sɔ̄ a muɛ pya ye zooro a gaa tɔga ni? (Aisaia 63:9)

³ Jɛhova suā kuma sɔ̄ i to nyɔɔ pɔrɔ kɛ̄tɔɔ̄ i gaa tɛɛ̄ bu. Kpa Baibol doo kɔ i suā kɔ a suā ɛrɛgebah ezialoo kɛ̄tɔɔ̄ i gaa tɛɛ̄ bu, e a dā i muɛ sɔ̄ i to kɔ a yerebah i nɛ. (Yɔɔ 34:15) Mɛ a naale aba e muɛ i sa i dā muɛ sɔ̄ i to na Jɛhova  doo a. Doodoo tɛ le ka a wereloo ye nwiī, a tɔa ye loo sɔ̄ a muɛ pya ye nwiī ba gaa to, e a taɛ ye eyerebah wa nɛ.—Buū Aisaia 63:9.

4. Ena i dap nɔ aāloo kɛ̄ nu tɔɔ̄loo Jɛhova doo aābu pio dɔ Baibol a?

⁴ Jɛhova kɔ i nɛ bu ye Muɛ̄ Ue kɛ̄ nu bee ye tɔɔ̄loo doo sɔ̄ pya ye zooro bee to le kɛ̄ a bee wa yerebah nɛ doo. I dap nɔ lo ama aāloo nu a bee siraloo Hana, Devid, le Mɛnɛ Hezekiah. Ena a bee doo kɔ ba a to a? Ena Jɛhova bee doo sɔ̄ ba bee to gbī yerebah a? Wa edobah dap i nɛ egbɔ̄nyiɛ doodoo wa sɔ̄ i to bu ekiɛ̄nu, bu tɛ̄ŋaloo, le sɔ̄ a bee kɔ ii ɛrɛ na lɔgɔ bɛābu ni?

MAĀ-TO EKIƐ̄NU

5. Nu bee tɔɔ̄loo Hana doodoo wa ni?

⁵ Hana bee kpesī gbɛnɛ etɛɛrɛloo a bee doo kɔ a to bu ekiɛ̄nu. Ziī nu a wee nua ye ekiɛ̄nu na bee ye dam bee ii baɛ wa, e bu ye dɛɛ̄na Penina bee ye biira loo. E lo dɔɔ̄na na bee Hana naa bee ɛrɛ nwiī, mɛ Penina ɛrɛ pya miɔŋɔ. (1 Sam 1:1, 2) Penina bee kiisī lo ekɛgɛ Hana nyɔɔbee a naa bee ɛrɛ nwiī. E bee a tɔɔ̄loo doodoo wa lo o bee le bu dua kɛ̄tɔɔ̄ ama ni? Bu Hana naa bee ɛɛ mmɛ loo dɔ a “toto sa naa tam ede nu,” e bu ye bee “biira gbɛnɛ.”—1 Sam 1:6, 7, 10.

6. Ena Hana bee doo lo e’ɛrɛ egbɔ̄nyiɛ a?

⁶ Ena a bee nɛ egbɔ̄nyiɛ Hana a? Ziī nu a bee ye yerebah nɛ na bee a wee kii bu tɔ-kpo wee taāŋabah Jɛhova. Bie kɛ̄ a waɛloo nudee lo tɔ-kpo, “a bee taāŋaloo Jɛhova sa to e’aga to.” A bee bara Jɛhova kɔ: “Ɛp nyɔɔ etɛɛraloo o zooro nɛɛwa bu kaka, sa mɛ kɛɛrɛbu.” (1 Sam 1:10b, 11) Hana bee kɔ kɛ̄ nu ye tɔɔ̄loo doo nɛ Jɛhova bu kara. Ɛp kɛ̄ a bee dap tɔɔ̄loo Jɛhova doo sɔ̄ a bee muɛ ye nwiī nɛɛwa a ye kuīloo a gaa to a!

7. Amunu egbɔ̄nyiɛ na Hana bee ɛrɛ sɔ̄ a bee kɔ dɛ̄dɛɛ̄ nu a bee ye le bu beenyiɛ nɛ Jɛhova a?

⁷ A bee tɔɔ̄loo Hana doodoo wa sɔ̄ a bee kɔ dɛ̄dɛɛ̄ nu a ye le bu beenyiɛ nɛ Jɛhova bu kara sa ɛrɛ egbɔ̄nyiɛ aābah Gbɛnɛ Nɛɛ Ewɔp Eli ni? Kpa Baibol kɔ: “Lo sɔ̄ wa a bee kiā nyɔɔ ye dee, sa de nu, e a naa sinakɛ̄ ɛrɛ be-sī.” (1 Sam 1:17, 18) Kereadoo ye e’aga kɛ̄tɔɔ̄ sii nyaa a, loo Hana bee su kɛ̄. A bee top dɛ̄dɛɛ̄ ye toh su tɛrɛ nyɔɔ Jɛhova. E Jɛhova bee muɛ dɛ̄dɛɛ̄ ye taāŋa, dā ye to, sɔ̄ esaa a nɛ ye leelee doo kɔ a ɛrɛ nwiī.—1 Sam 1:19, 20; 2:21.

8-9. Dookɛ̄ kpa Pya Hibru 10:24, 25 kɔ doo, ena anua i piiga lo esi pya i enɔānu a? (Ɛpnage foto.)

⁸ Nu i nɔ aāloo. O gaa tɛɛ̄ bu e’aga  kɛ̄tɔɔ̄ a doo kɔ o to bu ekiɛ̄nu ni? Naadabah, o gaa ɛrɛ ekiɛ̄nu nyɔɔ luh ziī o wuga ale o gbo. Bu pya sɔ̄ ama, a wee i taɛ etɔɔ̄ aba ii. Dookɛ̄ Hana bee ɛrɛ egbɔ̄nyiɛ le e’agaloo tɛ̄maloo ekii bu tɔ-kpo doo, olo dapnage ɛrɛ egbɔ̄nyiɛ tɛ̄maloo esi enɔānu Pya Nɛɛ Kraist, kereadoo o le bu e’ɔaloo. (Buū Pya Hibru 10:24, 25.) Sɔ̄ i gbaɛ̄tɔ̄loo ue egbɔ̄nyiɛ a aabu Baibol bie enɔānu, Jɛhova eyerebah i nɛ kɔ i lɛa pɔrɔ ekɛɛrɛ bu sa ɛrɛ le ekɛɛrɛ. Lo ama eyerebah i nɛ kɔ i baɛloo kɛ̄ nu i tɔɔ̄loo doo, kereadoo i kɛ̄tɔɔ̄ naa lee aba sɔ̄.

⁹ Bie pya i enɔānu, pya i wuga nɛɛdam le nɛɛwa wee i yere mɛmloo sa tɔgɛ kɔ ba were i loo. E loo i wee su kɛ̄ sɔ̄ i wa le yɛɛ. (1 Tɛs 5:11, 14) Naa kɛɛrɛ bu edobah ziī wuga nɛɛdam a wee sɛmdee bu keebee sīdee lo ye wa bee u. A bee kɔ: “Pio sɔ̄ m bee gbī etɔɔ̄ aba mm nyɔnɛbee m bee peere na wa kaāna sa mm dap bie wo to. Mɛ m bee ɛrɛ e’agaloo sɔ̄ m si enɔānu. Ue alu fɛgɛ pya na wuga nɛɛdam le nɛɛwa bee mɛ kɔ nɛ bee mɛ nɛ egbɔ̄nyiɛ. Loo mɛ wee su kɛ̄ sɔ̄ m ina enɔānu, kaɛlɛɛ kɛ̄ nu bee mɛ taɛŋɛ doo lɛɛ m gae kii enɔānu.” Sɔ̄ i le pya i enɔānu, Jɛhova dap su pya i wuga nɛɛdam le nɛɛwa i yeabah nɛ.

10. Bu mɛ sīdee na i dap nyɔɔnɛ edobah Hana sɔ̄ i gaa tɛɛ̄ bu ezialoo kɛ̄tɔɔ̄ a?

¹⁰ Hana bee ɛrɛnage egbɔ̄nyiɛ tɛ̄maloo ekɔ kɛ̄ nu ye tɔɔ̄loo doo nɛ Jɛhova bu kara. Bui dapnage top “dɛ̄dɛɛ̄ bui ekɛɛrɛ ebɛɛ̄ tɛrɛ nyɔɔ [Jɛhova],” sa dɛrɛ nyiɛ nyɔɔ kɔ alɛ gaa le yerebah i nɛ. (1 Pit 5:7) Ziī wuga nɛɛwa loo pya biu bee fɛ ye dam, bee kɔ: “A bee mɛ tɔɔ̄loo kɔ na beenyiɛ elua ebagi nua epɛɛ epɛɛ e a naale edapna lu ebo. Yere kara nɛ Jɛhova Bari a i wereloo bee mɛ nɛ egbɔ̄nyiɛ. Pio sɔ̄, mm wee dap suā ue ekɔ, mɛ alɛ suā pya nu m gbī ekɔ. Sɔ̄ loo mɛ bee le e’ɔ, m bee yere kara nɛ Jɛhova kɔ a doo kɔ loo mɛ a su kɛ̄. M bee muɛ kɔ loo mɛ bee su kɛ̄ sa m dap doo pya nu m gbī edoo lo bira dee.” Sɔ̄ o kɔ kɛ̄ nu a tɔɔ̄loo doo nɛ Jɛhova, o to ekiɛ̄nu wee ye tɔaloo, sa a dābeeloo o ezialoo bu beenyiɛ. Kereadoo nu a bee nua o ezialoo lege, Jɛhova dap a nɛ egbɔ̄nyiɛ sa a yerebah nɛ kɔ o ɛrɛ efɛɛloo bu beenyiɛ. (Yɔɔ 94:19; Fil 4:6, 7) E a gaa le nɛ ekpɛanu o tɔɔ̄ agara bu bɔ ture nyiɛ loo.—Hib 11:6.

MAĀ-TO SƆ̄ ALU ETƐ̄ŊA A LOO

11. Pya taāŋa Devid bee kpesī bee doo kɔ nu a tɔɔ̄ ye loo doodoo wa ni?

¹¹ Devid bee egerebu bu keekee bee taāŋa lo a bee doo kɔ a to. A bee kpesī baaloo a aabah pya dɔɔ̄na le tɛ̄ŋaloo a aabah pya nɛɛ a bee dɛrɛ nyiɛ nyɔɔ. (1 Sam 19:10, 11; 2 Sam 15:10-14, 30) Sɔ̄ nu bee ye zɔraloo gbɛnɛ bu ye dum, a bee ɛm kɔ: “Loo mɛ ɔ bu na nunum; ɛrɛgebah edɛɛ̄ m mmɛ maa-to nyɔɔ na daɛ; m su na maā-to dɛbɛ na nu ma nyɔɔ.” Ena anua nu bee tɔɔ̄loo Devid doo wo a? A bee baatɛ̄ kɔ “Nyɔɔbee dɛ̄dɛɛ̄ pya na dam baara.” (Yɔɔ 6:6, 7) Pɔrɔ nu pya dɔɔ̄na bee doo bee doo kɔ Devid a ɛrɛ ekiɛnu sa to.

12. Dookɛ̄ a le bu kpa Le-yɔɔ 56:8 kɔ doo, ena Devid bee suā leere a?

¹² Kaɛlɛɛ pya taāŋa Devid bee kpesī, a bee suā kɔ Jɛhova were ye loo. A bee ɛm  kɔ: “Jɛhova edaā muɛ na to.” (Yɔɔ 6:8) Bu dɔɔ̄na kɛ̄tɔɔ̄, Devid bee ɛm pya ekpeloo ue a le bu kpa Le-yɔɔ 56:8. (Buū.) Pya ue ama tɔgɛ taɛ kɛ̄ Jɛhova i kuūdɛɛ̄loo doo. A bee tɔɔ̄loo Devid kɔ Jɛhova gaa su ye maā-to yere bu elolo ale ɛm bu kpa sere. Devid bee suā leere kɔ Jɛhova yere nukuādɛɛ̄loo sa nyɛŋiabu dɛ̄dɛɛ̄ pya ye ezialoo. Devid bee suā kɔ ye wereloo Tɛ a le li bunyɔɔ suā kɛ̄ nu ye tɔɔ̄loo doo naale aba pya nu a gaa tɛɛ̄bu.

13. Sɔ̄ pya nɛɛ i lɔgara, ena i nyɛŋiabu a? (Ɛpnage foto.)

¹³ Nu i nɔ aāloo. O gaa egerebu kɛ̄bah ezialoo a aaloo sɔ̄ nɛɛ a lɔgara ale tɛ̄ŋaloo a aabah nɛɛ o bee dɛrɛ nyiɛ nyɔɔ ni? Dap lu kɔ o gaa ɛrɛ ezialoo bu beenyiɛ nyɔnɛbee nɛɛ o bee nɔɔ lo e’ii ale iya ale o dam ale o wa bie a, ale ziī nɛɛ o wereloo ɔbɛ etaāŋabah Jɛhova. Ziī wuga nɛɛdam lo ye wa bee kunagā sa ye teera aaloo bee kɔ: “Mm bee dap yiga kɔ nu ama sira mɛ loo. A bee mɛ tɔɔ̄loo kɔ mm le dɛɛ̄ lɔgɔ nu, loo mɛ bee ɔ, e bu mɛ bee biira.” Lo a le o gaa egerebu kɛ̄bah tɛ̄ŋaloo ale nɛɛ lɔgara a, ɛrɛ e’agaloo sa suā kɔ Jɛhova naale ebie a. Lo wuga nɛɛdam bee kɔ: “Nyaawo m esuā kɔ gbanialoo a le yɛɛ miɔŋɔ nɛɛ dap ina kuma, mɛ Jɛhova na alu i gbɛnɛ dɛm a. Kaɛlɛɛ ɛrɛgebah nu i tɛɛ̄bu, a gaa le eyerebah i nɛ dɛ̄dɛɛ̄ sɔ̄. A naa le elɛɛbahloo pya a ye tɔɔ̄ agara nɛ.” (Yɔɔ 37:28) Nyɛŋianage bu loo kɔ, Jɛhova were a loo ee kɛ̄ nwiī nɛɛ a wereloo doo. Sɔ̄ nɛɛ i tɛ̄ŋaloo a wee i ziloo gbɛnɛ, kerewo kɛ̄ Jɛhova a ɛp doo sii nyaa. O kuī ye loo kaāna. (Rom 8:38, 39) Nu i nyɛŋiabu na kɔ: Kaɛlɛɛ kɛ̄ nɛɛ a aara bu pɔrɔ sīdee doo, suā kɔ o Tɛ a le li bunyɔɔ were a loo.

14. Amunu ue agɛrɛ beenyiɛ na Le-yɔɔ 34:18 i nɛ a?

¹⁴ Sɔ̄ i gaa egerebu tɛ̄ŋaloo, pya ue Devid kɔ bu kpa Le-yɔɔ 34:18. (Buū.) dap i nɛ egbɔ̄nyiɛ. Ziī kpa a kɔ ue kumaloo pya wa “edɔɔ̄ lu ezag bii kɛ̄” kɔ a dap kiiloo “pya a naa ɛmadɛɛ̄ le nu li deesī.” Bu mɛ sīdee na Jɛhova yerebah nɛ pya a kɛɛrɛ nu doo wo a? Doodoo tɛ le ka a ɛrɛ wereloo lo ba nɛ egbɔ̄nyiɛ wa nwiī bu sɔ̄ etɛɛrɛ, Jɛhova “tɔɔ̄ i waɛ loo” i ɛrɛ kaāna toesaɛ̄ kumaloo sa le ekpɛ̄naloo eyerebah i nɛ sɔ̄ a i tɔɔ̄loo kɔ alu e bii i nɛ kɛ̄ tɛ̄mabah pya a i tɛ̄ŋaloo. A le ekpɛ̄naloo e nɛ i e agaloo sa i gbɔ̄ beenyiɛ. E a nɛ i gbɛnɛ-edo nu i ɛmadɛɛ̄  li deesī lo eyerebah i nɛ kɔ i egerebu bu pya i taāŋa i gaa tɛɛ̄bu a nyaawo.—Ais 65:17.

TO BIIRABU

15. Amunu kɛ̄tɔɔ̄ na Hezekaia bee kpesī lo a bee doo kɔ a to a?

¹⁵ Sɔ̄ Mɛnɛ Hezekaia a lu Juda bee le 39 zua, a bee ɛrɛ gbɛnɛ dumɛloo. Nɛɛ mɔmanudɛɛ̄ Aisaia bee kɔ ue Jɛhova bee ye lɛɛra kɔ Hezekaia gaa le u tɛ̄maloo dumɛloo. (2 Mɛnɛ 20:1) A bee bee kɔ Hezekaia naa ɛrɛ na lɔgɔ bɛābu. Sɔ̄ Hezekaia dā pya ue ama a bee to gbɛnɛ. A bee yere kara bara Jɛhova kɔ a yerebah ye nɛ.—2 Mɛnɛ 20:2, 3.

16. Bu mɛ sīdee na Jɛhova bee agara kara Hezekaia a?

¹⁶ Sɔ̄ Jɛhova bee dā kara Hezekaia sa muɛ ye maā-to, a bee ye ɛrɛ toesaɛ̄ loo sa ye kɔ nɛ kɔ: “M edaā o kara, m emɔna dɛ̄dɛɛ̄ o maā-to; ɛp, m gaa le bo a.” Tɛ̄maloo Aisaia, Jɛhova bee ye tɔgɛ toesaɛ̄ loo sa ye bo sa agara Jerusalɛm lɛɛ kɛ̄bah pya Asiria.—2 Mɛnɛ 20:4-6.

17. Bu mɛ sīdee na Jɛhova i yerebah nɛ sɔ̄ i le bu gbɛnɛ dumɛloo a? (Le-yɔɔ 41:3) (Ɛpnage foto.)

¹⁷ Nu i nɔ aāloo. Ena o doo lo o le bu gbɛnɛ dumɛloo lo a bee kɔ oo ɛrɛ na lɔgɔ bɛābu a? Kɔ kɛ̄ a a tɔɔ̄loo doo nɛ Jɛhova. Kere bu to a gaa le gbaɛ̄ a tɔ̄ loo. Kpa Baibol kɔ i nɛ kɔ “Lo Bari dɛ̄dɛɛ̄ toesaɛ̄ le Bari dɛ̄dɛɛ̄ e’aga beenyiɛ” gaa le gbɔ̄ i nyiɛ bu dɛ̄dɛɛ̄ i taāŋa. (2 Kɔr 1:3, 4) Nii’ee, ii dap ɛmadɛɛ̄ kɔ Jɛhova elɛɛ dɛ̄dɛɛ̄ i taāŋa, mɛ i dap ye dɛɛa nyɔɔ kɔ a gaa le yerebah i nɛ. (Buū Le-yɔɔ 41:3.) Tɛ̄maloo ye kaɛ edɔɔ̄, Jɛhova nɛ i mɛm, suānu, le efɛɛloo bu beenyiɛ lokwa i dap egerebu. (Kam 18:14; Fil 4:13) A gbɔ̄nage i nyiɛ tɛ̄maloo enɛ i bɛābu kɔ loo lɔgɔ nɛɛ naa le edumɛ na li deesī.—Ais 33:24.

18. Pya amumu dɔ Kpa Kaɛ o suā na edap a yerebah nɛ sɔ̄ o gaa kpesī e’agabah kɛ̄tɔɔ̄ a? (Ɛp ekpo akura “ Pya Ue A I Nɛ Egbɔ̄nyiɛ Sɔ̄ I Gaa To.”)

¹⁸ Nu Jɛhova bee kɔ nɛ Hezekaia bee ye gbɔ̄nyiɛ. Ili dapnage gbī egbɔ̄nyiɛ muɛ bu Muɛ̄ Ue Bari. Sɔ̄ i le bu etɛɛrɛloo, Bee Ue Jɛhova a le bu Baibol dap i nɛ egbɔ̄nyiɛ sa i yerebah nɛ doo kɔ loo i a su kɛ̄. (Rom 15:4) Sɔ̄ ziī wuga nɛɛwa a le li West Africa bee ɛrɛ dumɛloo kansa, a wee to gbɛnɛ. Lo wuga nɛɛwa bee kɔ: “Ziī dɔ Kpa Kaɛ a wee mɛ gbɔ̄nyiɛ na Aisaia 26:3. Kereadoo gbɛnɛ-edo sɔ̄ ii dap lɛɛ pya nu alu i taāŋa, lo dɔ kɔ i nɛ kɔ Jɛhova edoo kɔ i ɛrɛ efɛɛloo beenyiɛ sa egerebu bu pya i taāŋa.” A ɛrɛge pya dɔ Kpa Kaɛ o suā lo a dap a yere mɛm  loo sɔ̄ o gaa kpesī taāŋa, a bee kɔ oo ɛrɛ na lɔgɔ bɛābu ni?

19. Ena i ɛmadɛɛ̄ li deesī a?

¹⁹ I gaa tɔɔ̄ bu kpɛdumɛ dee, e i ɛmadɛɛ̄ kɔ pya i taāŋa ele gaa nyim yii loo. Dookɛ̄ i nɔ aāloo edobah Hana, Devid, le Mɛnɛ Hezekaia doo, Jɛhova muɛ i sɔ̄ i gaa to e a kiɛ̄ ye gbɛnɛ. Bu kaka, i maā-to kuī loo Jɛhova. Sɔ̄ i kpesī taāŋa, lu ebɛɛ̄ kɔ i kɔ kɛ̄ nu i tɔɔ̄loo doo aābu dɛ̄dɛɛ̄ i beenyiɛ nɛ Jɛhova tɛ̄maloo yere kara. Doraa ii le ekpooraloo lɛɛ loo pya i wuga nɛɛdam le nɛɛwa bu bɔŋanaloo ba i wereloo. E doraa i kiisī lo e’ɛrɛ egbɔ̄nyiɛ aāloo Muɛ̄ Ue Bari alu e’ɛm bu Baibol. I suā leere kɔ lo i kiisī lo e’egerebu, Jɛhova gaa le nɛ i ekpɛanu. Lo ama gbaaloo yii alu eyira kɔ a gaa le siŋana dɛ̄dɛɛ̄ maā-to i lɛɛ dɛɛ̄, sa lɛɛ baaloo, le pya nu a su maā-to ekiɛ̄nu i nua loo. (Mum 21:4) Lo sɔ̄ aba maā-to ɛɛbu na e aa i dɛɛ̄ a.