M bee mɛā bu zua 1927 bu ziī nwīgbagbara buɛ̄ a waɛ kpaɛ̄ Chicago, Illinois, U.S.A. Na tɛ le na ka bee ɛrɛ o’oo miɔŋɔ—Jetha, Don, mda, Karl, le Joy. Dɛ̄dɛɛ̄ ii bee biaɛfii lo etaāŋabah Jɛhova aābu dɛ̄dɛɛ̄ i piogi. Jetha bee le yɛɛ eree baɛ eku pya a si Tɔkpa Gilead bu zua 1943. Don, bee kii Bɛtɛl li Brooklyn, New York, bu zua 1944, Karl kii li bu zua 1947, e Joy bee kii li bu zua 1951. Wa le edobah le lo na ka le na tɛ bee mɛ nia gbɛnɛ.

Na tɛ le na ka wee buū Baibol sa wereloo Bari sa su lo wereloo foh bu ili pya wa miɔŋɔ. Kerewo, na tɛ naa bee were na loo pya tɔbari sɔ̄ a bee aa wee be Tua Sɔ̄ Nɔ̄ Nyɔuwe. Bu na ka bee ɛɛ gbɛnɛ sɔ̄ a aadee le dum lu be, a kɔ ye nɛ kɔ: “Karl, doo i kii tɔbari dookɛ̄ i wee doo.” Na tɛ agara kɔ: “M ture a mmɛ li, mɛ mm le eyii tɔ.” Na ka bip ye kɔ: “ena anua a?” A agara kɔ: “Sɔ̄ nɔ̄ gaa bee dɔ, pya ba gaa zaāsī tɔbari lo ba yerekpotɛ̄ keekee sī loo bu lo nɔ̄ wee yere kara bee pya wa nɔ̄ le wa nu nɔ̄! Ekɔ Bari bee yerekpotɛ̄ baɛ sī loo ama ni?”

Sɔ̄ esaa, sɔ̄ na ka bee le tɔbari, baɛ Pya Ekeebee Jɛhova bee lu i tɔ. Ba bee nɛ na tɛ kpa akura Light, lo alu baɛ ekpo lo a wee lu esu nɔā Baibol lo a baatɛ̄ kpa Mumuuna. Na tɛ bee ɛrɛ nia bu sa a su pya lo kpa. Aba sɔ̄ na ka bee muɛ pya lo kpa a bee bɔātɛ̄ ebuū wa. Sɔ̄ esaa ziī dee na ka bee muɛ bu niuspepa kɔ a gaa lu ekue pya a ɛrɛ taɛ lo esu kpa akura Light nɔā Baibol. Na ka bee biaɛfii lo esi. Sɔ̄ a ina li, ziī nama wa lu ye loo nu tɔ. Aara ziī ekpo lo kpa bah ye. Na ka bip kɔ, “Bui gaa nɔ kpa ama a kɛ̄ ama ni?” A agara kɔ “Aiī, yii tɔ a mdaa le.” Lo kaɛ a nyɔɔnɛ na ka bee aara ili pya miɔŋɔ, e aā lo dee i wee si dɛ̄dɛɛ̄ sɔ̄.

Nɛɛ a gaa bee sere lo enɔānu bee mɛ kɔ nɛ ziī dee kɔ m buū Le-yɔɔ 144:15, lo a kɔ pya a taāŋabah Jɛhova wee le bu ɛɛbu. Dɔ Kpa ama gbaāloo baɛ dɔɔ̄na dɔ bee mɛ nia gbɛnɛ. Lo tuatua na—1 Timɔti 1:11, lo a kɔ Jɛhova na ‘Bari ɛɛbu,’ le Pya Ɛfɛsɔs 5:1, lo a  kɔ “luaa pya ba nɔ Bari.” M bee biaɛfii kɔ m sue ɛɛbu daānu m dap doo nɛ Nɛɛ a bee mɛ dɛm sa ye doo yaa kɔ a doo kɔ m muɛ kaka ue lo a nyaana na dum.

Bɔŋanaloo a bee i waɛloo bee lu 32 kilometer (20 mi) aā buɛ̄ Chicago. Kerewo, i wee si enɔānu, ena suānu Baibol bee yiiloo. A nyɛŋia mɛ bu kɔ ziī dee nɛɛ a gaa bee sere enɔānu bee tubobahloo Jetha kɔ a agara ebip. Sɔ̄ m ye gbaɛ̄tɔ̄loo m bee kɔ: ‘M suā ye ture a. M bee toore bah nyɔɔ sa agara.’ M bee kpɛ̄naloo lo e’agara ebip nyɔɔ na loo. Lo a kuī gbɛnɛ, m bee nyim bu taāŋabah Bari dookɛ̄ pya na wuga bee doo. M bee liamaā bu zua 1941.

Kɔnvɛnsɔn a bee lu e’ɛrɛ bie Cleveland, Ohio bu zua 1942 naale e’ibere mɛ. Bee lu esu tɛlɛfon tɛ̄ma ue aā nu a eeloo 50 dɔɔ̄na dɔ li United States. I butɔ bee tɔɔ̄ bu looh a waɛ kpaɛ̄ lo kɔnvɛnsɔn kɛ̄ “trailer wee le” lo pya wuga bee kwa. Lo sɔ̄ II Sɔ̄ Nɔ̄ Nyɔuwe gaa bee dɔ e a bee lu egbanasī Pya Ekeebee Jɛhova gbɛnɛ. Loo uunɛ ziī dee, m bee muɛ eku eku pya wuga ba ɔp wa fah nua sa naa doo kɔ miā fah a ɛɛrɛ kɛ̄ i bee tɔɔ̄. Dɛ̄dɛɛ̄ nɛɛ bee yiga kɔ ziī ziī nɛɛ a aabu ziī ziī fah ekaɛ daā yube lo uunɛ. Lo a ɛrɛ nu a tɔgɛ kɔ taāŋa gaa lu, pya lo wuga eyere miā wa fah nyɔɔ lokwa a eredɛɛ̄ pya a gbī enua taāŋa sa fuuri nu. Pya dɔɔ̄na dap teera lu wee yerebah. M bee kɛɛrɛ kɔ, ‘pya nɛɛ Jɛhova wee kpɛ̄naloo leere baɛ dɛ̄dɛɛ̄ nu!’ Nyɔɔwo nyiɛ mɛ bee su kɛ̄, M bee daa leere, e lɔgɔ taāŋa naa sira.

Sɔ̄ m kɛɛrɛbu loo lo kɔnvɛnsɔn sɔ̄ pio zua etɛ̄na m bee muɛ kɔ na ka naa bee ɛrɛ lɔgɔ bɔɔ. A bee dɛrɛ nyiɛ nyɔɔ Jɛhova le ye bɔŋanaloo mmɛɛ. Mm le e’ibere ye le edobah.

Na ka bee yii bu tam sɛmdee mmɛɛ sɔ̄ sɔ̄ lo kɔnvɛnsɔn ebee waɛloo kɛ̄. Nyɔɔwo a bee gbaɛ̄tɔ̄loo pya ekɔaue akiiloo esiatam mmɛɛ sɔ̄ kaāna. Sɔ̄ i gaa kii be a bee kɔ, “E bee mɛ nia lo ekiisī lo esitam sɛmdee, mɛ mm lee dap sa kuūdɛɛ̄loo i butɔ leere.” Lo sɔ̄ a bip lo i dap yerebah. I kɔ aiī, nyɔɔwo a bee i kɔ nɛ kɔ i wee kwa kɛ̄ bu ziī ale baɛ tɛm lɛɛ i gae denu lɔɔrɛ. Sɔ̄ i e kira tɔkpa a wee ɛp sɛh tɔ lege le lɛɛ akii uwe zue ue. Naa wee ɛrɛ sɔ̄ mɛ a naa wee ɛp pya ye miɔŋɔ tɛrɛ. Sɔ̄ i wee lu be wee denu sɔɔ̄pie le sɔ̄ i ekpana tɔkpa a wee tɔɔ̄ tɔ i baɛ. Pio dee sɔ̄ i e’aara tɔkpa i wee ye nyɔɔnɛ kii uwe zue ue. E lo ama bee i yerebah nɛ kɔ i dābeeloo nu tam sɛmdee kura.

M bee bɔātɛ̄ sitam sɛmdee sɔ̄ m elua 16 zua. Kereadoo na Tɛ sii bee lu nɛɛ Ekeebee, a bee ɛrɛ nia bu nu m gaa bee doo. Loo uunɛ ziī dee, m bee ye kɔ nɛ kɔ, kaɛlɛɛ kɛ̄ m gaa piiga doo m sii muɛ lɔgɔ nɛɛ a gbī enɔ Baibol. Sɔ̄ m eyira kina, m bee ye bip kɔ, “Eniage a lo enyɔɔnɛ mɛ nɔ Baibol ni?” A bee ɔb kina lɛɛ a agara kɔ, “Mm muɛ lɔgɔ nu  enua mm nɔ.” Aiī, tua nɛɛ m bee tɔgɛ Baibol na mdaa tɛ. Lo ama bee lu ka mɛ nɛ!

I bee nɔ kpa akura, “The Truth Shall Make You Free.” Sɔ̄ i enɔānu gaa kiisī, m bee muɛ kɔ na Tɛ gaa mɛ yerebah nɛ lo elu nɛɛ a para enɔnu sa tɔgɛ nu. Bu edobah, loo uunɛ ziī dee sɔ̄ i ebūna ziī dɔ sah, a bee kɔ: “M muɛ nu kpa ama kɔ. M tɛɛ̄ doodoo wa suā kɔ kpa ama gaa kɔ kaka ni?” Mm bee kpɛ̄naloo loo ebip ama, nyɔɔwo m bee kɔ, “Mm le e dap a kɔ nɛ a nyaawo, mɛ dɔɔ̄na dee i nɔnu m ɛrɛ ye ture.” M bee doo wo sa muɛ pya dɔ Kpa Kaɛ a yerekpotɛ̄ ue i gaa bee kɔnia. Sɔ̄ esaa, m bee kpɛ̄naloo leere loo enɔānu sa nɔ lo egbītɛ̄ nu. Lo ama bee doo kɔ mda le na tɛ a nyim kiisī bu edɔɔ̄. A bee su nu a gaa bee nɔ yere bu dogo sa liamaā a bu zua 1952.

M bee aa be sɔ̄ m elua 17 zua. Jetha a bee lu nɛɛ zue ue dɔɔ̄na edo, e Don, bee lu nɛɛ a sitam Bɛtɛl. Tam baɛ aba bee wa nia, e lo ama bee mɛ yere mɛm loo. Nyɔɔwo m bee yere bee kɔ m sie tam Bɛtɛl le lo esi Tɔkpa Gilead sa lɛɛbahloo bie bah Jɛhova. A bee sira kɔ alu ekue mɛ loo tam Bɛtɛl a bu zua 1946.

Aā lo zua, m esia keekee tam bie Bɛtɛl, e lo ama edoora kɔ m dap nɔ gbɛnɛ-edo aā nu. Bu kaka, m esiatam Bɛtɛl bu 75 zua sa elua etɔgɛ mɛ kɛ̄ ekwa kpa sa kuūdɛɛ̄loo kpugi doo. M bee nɔnage kɛ̄ eyaɛnu aā dɔɔ̄na edo sa oo nu dɔɔ̄na edo doo. Mɛ lo a eetɔɔ̄ na bee, pya nu bu edɔɔ̄ alu etɔgɛ i bie Bɛtɛl tɛ̄maloo taāŋabah alu edoo lɔɔrɛ le pya ekɔaue a dɛɛa nyɔɔ Baibol nia mɛ gbɛnɛ.

M bee nɔnage nu aābah na zege wuga, Karl, lo a bee kii Bɛtɛl bu zua 1947. A wee para enɔ sa tɔgɛ nu a le bu Baibol. A ɛrɛ sɔ̄ m bee gbī kɔ a yerebah mɛ nɛ loo ekɔaue a bee lu enɛ mɛ. M bee kɔ nɛ Karl kɔ m e muɛna gbɛnɛ-edo nu ekɔ, mɛ nu a mɛ agaloo na kɛ̄ esu ye kɔā ue doo. A bee doo kɔ m suā kɛ̄ e’aabahloo doo tɛ̄maloo ziī ebip kɔ, “Joel, ena alu o ekobee ue a?” M bee nwaabah dābeeloo nu a gaa mɛ kɔ nɛ kɔ m su aba pya ue a bɔloo sa lɛɛbahloo pya elua a. Mm le e’ibere nu a bee mɛ tɔgɛ ama.

Lokwa i le bu ɛɛbu li Bɛtɛl, alu ebɛɛ̄ kɔ i ɛrɛ mmɛɛ epoo bu tam zue ue, e lo ama  dap doo kɔ i ɛrɛ gbɛnɛ-edo le nu a dap sira aābu. Ziī nu a bee sira m nyɛŋiabu leere bee sira loo uunɛ li Bronx, New York City. Ziī wuga nɛɛdam le mm bee ina loo ziī wa lo ebee su The Watchtower le Awake! sɔ̄ akii adumɛ. I bee kuea loo i ye nɛ kɔ, “Loo uunɛ ama i gaa yerebah nɛ pya nɛɛ kɔ ba a nɔ pya nu edɔbiī wa nɛ aābu Baibol.” A bee ture kɔ, “yiraa tɔ lo bui ue aabu Baibol.” I bee buū gbɛnɛ-edo dɔ Kpa Kaɛ akiiloo Buɛ̄-Mɛnɛ Bari le aā nyɔuwe sa kɔnia ue nyɔɔ. A bee nia lo wa gbɛnɛ mmɛ kɛ̄ a kue gbɛnɛkpo pya ye gbo kɔ ba a gbaa i loo bu lo kaɛ a nyɔɔnɛ. Sɔ̄ esaa, alɛ le ye dam bee lu pya a taāŋabah Jɛhova bu yira.

M bee gbī wa loo nu alu 10 zua lɛɛ m gae zɔŋia na wa. Ena a bee mɛ yerebah nɛ kɔ m gbī wa a bɔloo muɛ a? M bee yere kara ɛrɛ ekɛɛrɛ nyɔɔ ebip a kɔ, ‘Ena m gbī edoo sɔ̄ m ira wa sah a?’

M bee zɔŋia ziī wuga nɛɛwa akura Mary Aniol bu zua 1953 bie kɔnvɛsɔn a bee su dɔ bie Yankee Stadium. Jetha le ɛɛ bee gbaa si lo eree baɛ sɔ̄ alu enɔnu bu Tɔkpa Gilead. Mary le na wuga nɛɛwa bee gbaa si tam zue ue dɔɔ̄na edo. Bu gbɛnɛ ɛɛbu, Mary bee kɔ nu akiiloo ye tam dɔɔ̄na edo li Caribbean le pya enɔānu Baibol a esere bu pio zua mɛ nɛ. Sɔ̄ i kiisī lo esuā loo ziī, i muɛ kɔ baɛ ii gbī ekiisī lo esitam mmɛ sɔ̄. Wereloo i bee ɛrɛ loo ziī bee nyim sa i iya ziī bu Nia Enɔɔ̄ bu zua 1955. Bu gbɛnɛkpo sīdee, Mary lu dɔɔ̄nu a aabah Jɛhova le nɛɛ a bɔloo enɔ nu aāloo. Ɛrɛgebah tam a bee lu enɛ ye a bee su ɛɛbu siā. A bee si e’agatam, kuūdɛɛ̄loo pya dɔɔ̄na bu wereloo sa su tam Buɛ̄-Mɛnɛ nua tuatua bu ye dum. (Mat 6:33) I bee sitam kuūdɛɛ̄loo sɛkiut bu taa zua, e bu zua 1958, a bee lu ekue baɛ ii lo esitam Bɛtɛl.

M bee nɔ gbɛnɛ-edo nu aābah Mary. Bu edobah, sɔ̄ i iya ziī aā i bee biaɛfii lo egbaa buū Baibol nu alu 15 barakpaɛ̄ ziī ziī sɔ̄. Sɔ̄ ziī ii ebuūna ziī ekpokɛ̄ sa, i wee kɔ ue nyɔɔ lo dɔ Kpa Kaɛ sa i kɔnia kɛ̄ i dap yere bu i dum doo. Mary wee mɛ kɔ pya nu a bee nɔ aā tɔkpa Gilead ale bu ye esiatam zue ue dɔɔ̄na edo nɛ. Pya ekɔaue ama wee mɛ yere mɛm loo sa mɛ yerebah nɛ kɔ m nyim yiiloo bu na ekɔaue le yere mɛm loo pya wuga.—Kam 25:11.

Na wa Mary m wereloo gbɛnɛ bee u bu zua 2013. M le gaa ɛmadɛɛ̄ sɔ̄ m muɛ ye bu aā nyɔuwe! E nyaawo, m ebiaɛrafii kɔ m kiisī lo enɔnu, sa dɛrɛ nyiɛ nyɔɔ Jɛhova aābu dɛ̄dɛɛ̄ na beenyiɛ. (Kam 3:5, 6) Sɔ̄ m kɛɛrɛ bu nu pya nɛɛ Jɛhova edoo bu aā nyɔuwe nɛ mɛ egbɔ̄nyiɛ le ɛɛbu. Bu kaka, lo ama kura kɔ i nɔnu aābah le kiiloo i Gbɛnɛ Nɛɛ Tɔgɛnu! Aiī, m doo ye yaa kaāna loo dɛ̄dɛɛ̄ ye tɔgɛnu le sīdee a mɛ tɔgɛ fɛgɛ dogo kumaloo.