Nɛɛ lɛɛratam Pɔɔl bee ɛm ma Timɔti lo ba gbaa lu nɛɛ kanɛɛ kɔ: “M gaa a kɔ agɛrɛ nɛ kɛ̄sī Bari le Kraist Jizɔs le pya ɛnjɛl a bee lu esagɛ kɔ mɛ o sere dɛ̄dɛɛ̄ lok ama e lɔgɔ ziā aa le loo.”—1 Tim 5:21.

Lo eyerebah kɔ i dābeeloo, i gaa le dasī kɔnia nu akiiloo pya ɛnjɛl a naa le yɛɛ pya lo eku ɛnjɛl a bee lu esagɛ ama. Bu kaka, pya ɛnjɛl ama naa le yɛɛ pya 144,000. Sɔ̄ Pɔɔl bee ɛm kpa ma Timɔti, aakɛ̄ bu luh Pya Nɛɛ Kraist a bee lu etɔ̄ nɔɔ̄ bee sii bee bɔātɛ̄ li bunyɔɔ. Pya nɛɛ lɛɛratam le pya dɔɔ̄na Nɛɛ Kraist alu etɔ̄ nɔɔ̄ bee sii bee kii bu edɔɔ̄, nyɔɔwo, ba naa le edap lu “pya ɛnjɛl a bee lu esagɛ.”—1 kɔr 15:50-54; 1 Tes 4:13-17; 1 Jɔn 3:2.

Gbaānageloo wo, “pya ɛnjɛl a bee lu esagɛ” ama, naale edap lu pya ɛnjɛl a bee lɛɛbeekɛɛ̄ bu sɔ̄ yii maā a. Pya lo ɛnjɛl bee gbaaloo Setan sa lu gbo yɔ, sa lu pya nɛɛ baa Jizɔs. (Jɛn 6:2; Luk 8:30, 31; 2 Pit 2:4) Deesī li, a gaa le lu e aa wa yere bu bana abyss bu 1,000 zua sɔ̄ lo sɔ̄ etɛ̄na elu e gbee wa sī gbaāloo Setan.—Jud 6; Mum 20:1-3, 10.

“Pya ɛnjɛl a bee lu esagɛ” lo Pɔɔl bee kɔ nu akiiloo elu pya ɛnjɛl a le li bunyɔɔ lo ba yerekpotɛ̄ “Bari le Kraist Jizɔs,” lo a lu ekɔ nu a wa kiiloo bu aba lo dɔ Kpa Kaɛ.

Booboo pya ɛnjɛl a tɔɔ̄ agara le. (Hib 12:22, 23) A naa bɔloo kɔ i kɛɛrɛ kɔ dɛ̄dɛɛ̄ aba ɛrɛ aba tam esi ale aba sɔ̄ esiā lo tam. (Mum 14:17, 18) Bu edobah, Jɛhova bee lɛɛra ziī ka ɛnjɛl kɔ a fɛ nu a lu 185,000 pya nɔ Asiria. (2 Mɛnɛ 19:35) Ebee dap lu elɛɛra gbɛnɛ-edo pya ɛnjɛl kɔ ba “a bɔŋɛnɛloo aābu Buɛ̄-mɛnɛ [Jizɔs’] dɛ̄dɛɛ̄ nu a doo kɔ ba a dɔ daa zaɛ̄, le dɛ̄dɛɛ̄ pya doo gbee.” (Mat 13:39-41) Dap lu elɛɛra pya lo dɔɔ̄na kɔ ba a bɔŋɛnɛloo “pya ɛnjɛl a bee lu esagɛ” kuma li bunyɔɔ. (Mat 24:31) E alu elɛɛra pya dɔɔ̄na ɛnjɛl kɔ ba a ‘kpega i bu dɛ̄dɛɛ̄ i dee.’—Yɔɔ 91:11; Mat 18:10; dooreloo Matiu 4:11; Luk 22:43.

“Pya ɛnjɛl a bee lu esagɛ” alu ekɔ bu kpa 1 Timɔti 5:21 na pya ɛnjɛl alu enɛ keebee esiatam lo pya nɛɛ Bari. Bu dɔ ama, Pɔɔl nɛ kaāna zuurabahtɔ̄ kɛ̄ pya kanɛɛ e’aabahloo wa esiatam bu bɔŋanaloo doo, le kɛ̄ pya dɔɔ̄na etɔgɛ enwadɛɛ̄loo wa kumaloo doo. Kiikɛ̄ pya kanɛɛ le, ba e’aabahloo wa esiatam bu sīdee “lɔgɔ ziā aa le loo” e ba edasī ɛrɛ ekɛɛrɛ nyɔɔ nu leere lɛɛ ba gae biaɛnufii. Ziī nu anua a lu ebɛɛ̄ kɔ ba a nyɔɔnɛ zuurabahtɔ̄ Pɔɔl na kɔ ba gaa si tam “kɛ̄sī Bari le Kraist Jizɔs le pya ɛnjɛl a bee lu esagɛ.” Alu kaka kɔ tam pio pya ɛnjɛl na lo eyerebah nɛ bɔŋanaloo, doodoo, kpega pya nɛɛ, zaāsī tam zue ue, sa obara kpɛa ma Jɛhova.—Mat 18:10; Mum 14:6.