Ekɔ o ebee suge sɔ̄ būma pya Ekpo Tɔ Baɛloo bu zua ama leere ni? Naa ɛp sɛh o dapge agara pya ebip a nyɔɔnɛ ama:

Amunu edobah na Jɛhova sere loo kɛ̄ e’aara pya nɛɛwa doo a?

A naa ɛp wa kumakɛ̄, e a naa ɛp pya nɛɛdam emanyɔɔ nɛɛwa. Bari gbaɛ̄tɔ̄loo pya nɛɛwa, sa tɔgɛ nia loo wa ekɛɛrɛ le kɛ̄ nu wa tɔɔ̄loo doo. E a dɛrɛ wa nyiɛ nyɔɔ kɔ ba edap si tam a wa nɛ leere.—w24.01, pp. 15-16.

Bu mɛ sīdee na i dap su ue a le bu kpa Pya Ɛfɛsɔs 5:7, lo a kɔ: “Bui aa wa gbaaloo” yerebu dogo a?

Nɛɛ Lɛɛratam Pɔɔl bee i zuurabahtɔ̄ kɔ i aa suloo gbaloo pya edoo kɔ a’aga i loo lo etɔɔ̄dum dookɛ̄ Bari gbī doo. I dap ɛrɛ dua pɔrɔ gbaaloo ama loo pya i le kpaɛ̄ sī le sī ale nyɔɔ intanɛt.—w24.03, pp. 22-23.

Mɛ dua esah ue na alu ebɛɛ̄ kɔ i nwaɛdɛɛ̄ loo a?

Lu ebɛɛ̄ kɔ i nwaɛdɛɛ̄ loo ue a sii lu egbītɛ̄ leere a aabah pya i gbo, ue bu email a aabah pya ii suāloo ale ii bee wa bip, le sɔ̄ pya anna yira daādaā doodoo bee ba tɔgɛ nia loo kaka ue.—w24.04, p. 12.

Ena i suā, e ena ii suā akiiloo kɛ̄ Jɛhova ebiaɛ Solomon le pya nɛɛ a bee u bie Sɔdɔm le Gɔmɔra le pya nɛɛ bu dee yii maā doo a?

Ii suā leere sɛh Jɛhova esere kɔ alu egbee wa sī mmɛ deedee. Kerewo, i suā kɔ a suā dɛ̄dɛɛ̄ nu a wa kiiloo sa ɛrɛ gbɛnɛ toesaɛ̄.—w24.05, pp. 3-4.

Nyɔɔbee Bari na “gbɛnɛ Dɛm” a doo kɔ i suā e? (Deut 32:4)

I dap gbī kpega aābah Jɛhova. A bɔloo e dɛɛa ye nyɔɔ, e a wee mmɛnɛ ye yii dɛ̄dɛɛ̄ sɔ̄. E a naa wee nyaa, bu ye dogo le ye ekɛɛrɛ.—w24.06, pp. 26-28.

Ena edap a yerebah nɛ kɔ o kwabahloo kɛ̄tɔɔ̄ sɔ̄ o kii aā bɔŋanaloo a?

Dɛɛa nyɔɔ Jɛhova, eyerebah a nɛ dookɛ̄ a bee yerebah nɛ pya ye zooro sɔ̄ akii adumɛ doo. Ɔbɛ esu o aā bɔŋanaloo dooreloo lo nama. Nyɔɔnɛ o aā bɔŋanaloo dānianu sa piiga lo eyii aā gbo.—w24.07, pp. 26-28.

Ena i nɔ aāloo taa kam a le bu kpa Matiu 25 ekobee a?

Kam naana pee le pee tɔ tɔgɛ kɔ i lu pya a ɛrɛ yira sa tɔɔ̄ agara. Kam miɔŋɔ emuā a suānu le pya lo a zuuga tɔgɛ kɔ i le ekpɛ̄naloo sa nwaɛdɛɛ̄. E kam talɛnt tɔgɛ kɔ alu gbɛnɛ kɔ i suloo sue kɛ̄ sa si tam.—w24.09, pp. 20-24.

Gānyɔɔ nudee nwītɛm loo tɔkaɛ Solomon bee kii nyɔɔ doodoo wa?

Bu pio nama kpa a bee lu e’ɛm Kpa Kaɛ bu, 2 Nu a bee lu edoo 3:4 buū kɔ, “120 cubit,” lo akura kɔ nudee lo nwītɛm bee kii nyɔɔ lu 53 mita (175 ft). Mɛ pya dɔɔ̄na e’ɛma alu eyere ka loo kɔ “20 cubit,” lo a le kɔ a nyɔɔ kii nyɔɔ lu ɛrɛnia mita (30 ft). Bee kɔ lo kpɛdumɛ kɛ̄ alu ekɔ doo ama bɔloo sɔ̄ i kɛɛrɛ bu kɛ̄ egbep ekpadaɛ̄ tɔkaɛ a bee kuī doo.—w24.10, p. 31.

Ena akura kɔ nɛɛ yerebahtam lu ‘dam aba ziī wa’ a? (1 Tim 3:12)

A kura kɔ e’ii aba ziī wa sa naale ekunagā. Gbaāloo wo, a naale e’ɛrɛ taɛ bu pya dɔɔ̄na nɛɛwa.—w24.11, p. 19.

Ena anua i dap kɔ Jɔn 6:53 naa lu edobah nɛ doonu Nuede Uunɛ Nɛɛ-a-i-ɛrɛ a?

Jɔn 6:53 kɔ alu ebɛɛ̄ kɔ a lu eba namloo sa ɔ̄ mii Jizɔs. Jizɔs bee kɔ ue ama bie Galili a bu 32 C.E., nɛ pya Juu lo a bee lu ebɛɛ̄ kɔ ba a ɛrɛ ye yira bu. Kerewo, doonu Nuede Uunɛ Nɛɛ-a-i-ɛrɛ bee lu ebɔātɛ̄ li Jerusalɛm sɔ̄ ziī zua etɛ̄na. Jisɔs gaa bee kɔ ue nɛ pya enyɔɔnɛ ye bɛɛ li bunyɔɔ bie lo kɛ̄.—w24.12, pp. 10-11.