O WEE muɛ̄ge aba ɔɔ nua nɛɛ a para doo yaa ni? Ebip ama lu nu ziī ziī ii i kɛɛrɛbu loo. Baibol ebee kɔ sere kɛ̄ kɔ bu ilii dee ama pya nɛɛ elu pya “a naa ɛrɛ yaa.” (2 Tim 3:2) Naa daba o emɔna pya nɛɛ a gbī kɔ pya dɔɔ̄na ɛrɛ ewee wa sietam nɛ ale bee pya nɛɛ a wee wa dɔɔ̄e nu nɛ. Ba kɛɛrɛ kɔ a naa lu ebɛɛ̄ kɔ ba a tɔgɛ nia loo nu pya dɔɔ̄na wa doo nɛ. Wee a niage etɔɔ̄ kpaɛ̄ pya nɛɛ a le doo wo ni?

Bu kiiya sī, lu ekɔ nɛ pya zooro Jɛhova kɔ ba a: “Lu pya a doo yaa.” I ɛrɛ e “doo yaa bu dɛ̄dɛɛ̄ nu.” (Kɔl 3:15; 1 Tɛs 5:18) Bu kaka, a lee kɔ i wee tɔgɛ elap dogo doo yaa. Ɛrɛ gbɛnɛ-edo nu anua a bɔloo kɔ i wee doo wo.

Ziī kaāna nu anua i ɛrɛ elap dogo doo yaa na bee a doo kɔ i ɛp aba ii bu sīdee a bɔloo. Nɛɛ a ɛrɛ elap dogo doo yaa wee dap kɛɛrɛ nu kumaloo aba ɛɛ leere, e nɛɛ a lu edoo yaa a wee ɛrɛ nage ɛɛbu. E na anua le nu wee sira aabu doo yaa a? Kɛādoo, naa ɛp edoba ama: Lo pya dɔɔ̄na yerebah a nɛ, ba doo wo nyɔnɛbee ba muɛ̄ kɔ a bɔloo kɔ ba a dooe wo a nɛ. Ba kuū a dɛɛ̄loo. E sɔ̄ o muɛ̄ kɔ ba kuū a dɛɛ̄loo edoo kɔ o ɛp aba ɔɔ leere. I dap kɛɛrɛbu lo ama bu edoba Rut. Boaz bee dɔɔ̄nu nɛ Rut. Sa lo ama bee ɛɛrɛbu Rut sɔ̄ a muɛ̄ kɔ a lu ekuūe ye dɛɛ̄ loo.—Rut 2:10-13

A lu kaāna nu a bɔloo lo ewee doo yaa Bari. Bu kaka, o ebee dap kɛɛrɛ pya lele nu bu edɔɔ̄ le nu bu namloo lo a enɛā a sa gaa kiisī lo enɛ. (Deut 8:17, 18; Doonu pya Nɛɛ lɛɛratam 14:17) Mɛ taā o aadee doo yaa Bari bu ekpurubah, elee o su sɔ̄ ɛā ekɛɛrɛ nyɔɔ le le nu Bari edora a nɛ le pya o gbo ale pya o butɔ. Ɛrɛ ekɛɛrɛ nyɔɔ kɛ̄ Nɛɛ Dɛmnu para dɔɔ̄nu doo dap doo kɔ o tɔgɛ nia loo kɛ̄ a a wereloo sa a tɔgɛ nia loo doo. —1 Jɔn 4:9.

Naale aba kɛɛrɛbu loo kɛ̄ Jɛhova para dɔɔ̄nu doo le kɛɛrɛbu loo pya ye leelee na i doo a; mɛ i doo ye yaa loo ye le dogo. (Yɔɔ 100:4, 5) E bee lu ekɔ “doo yaa le tɔgɛ nia lu ziī sīdee a doo kɔ pya nɛɛ a ɛrɛ ɛɛbu.”

Dɔɔ̄na nu anua tɔgɛ doo yaa lee na bee a agɛrɛtɛ̄ nyinia gbo. Dɛ̄dɛɛ̄ ii wee gbī kɔ a lu edoo i yaa. Sɔ̄ o doo yaa dɔɔ̄na nɛɛ aābu nyiɛ a, doo kɔ baɛ bui a tɔɔ̄ waɛloo ziī. (Rom 16:3, 4) Gbaāloo wo, pya a doo yaa wee lu pya a para yerebah nɛ pya dɔɔ̄na. Ba wee tɔgɛ nia loo le nu pya dɔɔ̄na wa doo nɛ sa ba gbī nage edoo wo wa nɛ. Bu kaka, yerebah nɛ pya dɔɔ̄na wee nɛ ɛɛbu nɛɛ. A le dookɛ̄ Jizɔs bee kɔ doo kɔ: “Lu le eenyɔɔ lo enɛ ee susu.”—Doonu pya Nɛɛ lɛɛratam 20:35.

Robert Emmons, ziī nɛɛ a gaa kuūdɛɛ̄loo Gbɛnɛ Tɔkpa li California lo a bee nɔ nu akiiloo doo yaa bee kɔ: “Lo etɔgɛ doo yaa, i ɛrɛ edābeeloo kɔ i gbī yerebah aābah ɛnia ii, pio sɔ̄ i dɔɔ̄ nu nɛ pya dɔɔ̄na, e pio sɔ̄ ba dɔɔ̄ nu i nɛ.” Kaka ue na bee, lokwa i dap tɔɔ̄ dum i gbī yerebah a aabah pya dɔɔ̄na bu keekee sīdee. Bu edoba, ba dap i nɛ nuede ale pie e’ɔ̄ lo edap doo kɔ i tɔɔ̄ bu nwanaloo. (1 Kɔr 12:21) Nɛɛ a tɔgɛ nia wee doo yaa pya dɔɔ̄na loo nu ba ye doo nɛ.  Nyɔɔwo, o wee tɔgɛge nia loo nu pya dɔɔ̄na a doo nɛ ni?

Dɔɔ̄na nu anua a bɔloo kɔ i tɔgɛ doo yaa na bee a yerebah i nɛ kɔ i wee ɛrɛ le ekɛɛrɛ taā i ɛrɛ pɔrɔ ekɛɛrɛ. Bu ziī sīdee, i beenyiɛ le doodoo kuī a wee kuɛ̄ le nu lɛɛ loo lo pɔrɔ. I beenyiɛ dap i yerebah nɛ kɔ i wee sere ekɛɛrɛ nyɔɔ le nu taā i sere ekɛɛrɛ nyɔɔ pɔrɔ nu. Edoo kɔ o wee bie ekɛɛrɛ nyɔɔ pya nu a lee ee pya o taāŋa. Kɛ̄ o tɔgɛ doo yaa doo, kɛ̄ o wee muɛ̄ nage pya le le nu edoo kɔ o wee kiisī lo etɔgɛ doo yaa doolo. Tɔgɛ doo yaa kumaloo dum eyerebah a nɛ kɔ o doo nu nɛɛ lɛɛratam Pɔɔl bee kɔ lo a kɔ: “Ɛrɛaa ɛɛbu bu Nɛɛ-a-i-ɛrɛ dɛ̄dɛɛ̄ sɔ̄.”—Fil 4:4.

Tɔgɛ doo yaa eyerebah a nɛ kɔ o aa kɛɛrɛ pɔrɔ pɔrɔ nu. A aga kɔ ziī nɛɛ alu nɛɛ a tɔgɛ doo yaa sa aba lo sɔ̄ a lunage nɛɛ a wiibu, ɛrɛ biirabu sa bialoo wee si saŋ. Pya nɛɛ a tɔgɛ doo yaa naa wee wereloo ɛrɛ zɔ. Nu ba ɛrɛ wee wa gbɔɛ̄loo sa ba naa wee kɛɛrɛ kɔ ba ewee ɛrɛe yereloo.—Fil 4:12.

Doodoo Nɛɛ Kraist, o suā kɔ nu Setan gbī na kɔ o le bu biirabu sa ɛrɛ e’ɔaloo sɔ̄ o kpesī e’aga kɛ̄tɔɔ̄ bu kpɛdumɛ dee ama. Bu ye e’ɛɛ lo o ɛrɛ pɔrɔ dogo sa wee kpɛakpɛa loo dɛ̄dɛɛ̄ nu. Dua lo elap dogo edoo kɔ o aa lu nɛɛ a para aabaloo esiatam zue ue leere. Bu kaka, tɔgɛ doo yaa ɛrɛ nu edoo kiiloo eyuu edɔɔ̄ Bari, gbaāloo ɛrɛ ɛɛbu loo pya le le nu Bari enɛa a le yira o ɛrɛ bu pya ye yii.—Gal 5:22, 23

Doodoo nɛɛ a gaa taāŋabah Jɛhova, o dap yira pya nu elua ekɔ bu ekobee ue ama akiiloo tɔgɛ doo yaa. Kerewo, elap dogo tɔgɛ doo yaa le ɛmadɛɛ̄ nu bu sīdee a bɔloo naa lu nu nɛɛ aadee bugia ɛrɛ. Mɛ o aa doo kɔ lo ama a ɔɛ a loo. O dap ɛrɛ elap dogo doo yaa le ɛmadɛɛ̄ nu bu sīdee a bɔloo. Bu mɛ sīdee? Ziī ziī biradee, su sɔ̄ kɛɛ̄nɛbu pya nu o dap tɔgɛ doo yaa kumaloo. Kɛ̄ o kiisī lo edoo lo ama doo, kɛ̄ o ɛrɛ nage taɛ lo etɔgɛ doo yaa doolo. Lo ama edoo kɔ o ɛrɛ ɛɛbu ee pya nɛɛ a sere ekɛɛrɛ nyɔɔ wa taāŋa. Ɛrɛ ekɛɛrɛ nyɔɔ pya le le nu Bari le pya dɔɔ̄na edora a nɛ lo a a nia, sa a ɛɛrɛbu. O dap ɛm pya nu ama. O dap ɛm baɛ ale taa nu a a ɛɛrɛbu ziī ziī biradee.

Pio pya egbiātɛ̄ nu kɔ, “bialoo wee doo yaa pya dɔɔ̄na nyaana kɛ̄ i puī si tam doo sa doo kɔ a waɛ i bah e’ɛmadɛɛ̄ dum bu sīdee a bɔloo. Nɛɛ a tɔgɛ doo yaa wee ɛrɛ ɛɛbu dɛ̄dɛɛ̄ sɔ̄. Nyɔɔwo, kɛɛrɛbu pya leelee o e’ɛrɛ, ɛrɛ ɛɛbu loo pya lele nu esira a loo bu dum, sa o kiisī lo ewee tɔgɛ doo yaa! Taā o ɛp pya le le nu a lu edoo a nɛ tɛrɛ, “doo yaa Jɛhova, nyɔnɛbee a lee.” Aiī, “doo yaa bu dɛ̄dɛɛ̄ nu.”—1 Edoo 16:34; 1 Tɛs 5:18.