Nu lok ama tɔgɛ na kɔ ue naa bee lo nɛɛwa. Yere nu kuādɛɛ̄loo lo etaā ue ama.

Elua barakpaɛ̄ a kɔ nu akiiloo sɔ̄ ziī nɛɛdam māloo ziī nɛɛwa ebee yiga dam nɛ ziī nɛɛ bie “bu gbɛnɛ buɛ̄.” Bu dodoo wo, ue bee ye nyɔnɛbee ekora waa dɔɔ̄na nɛɛ, kuma sɔ̄ ebee lu ebuū kɔ lo nwiī nɛɛwa e’iya dam a. E lo nwiī nɛɛwa ni a? “Nyɔnɛbee a naa bee wiikpā bu gbɛnɛ buɛ̄.” Lo a bee doowo, alu kaka kɔ pya dɔɔ̄na ebee ye dap dā muɛ̄ sa ye yerebah nɛ. Mɛ a naa bee wiikpā. Nyɔɔwo, alu e biaɛ wa begee, nyɔbee baɛ aba gbaa kunagā.—Deut 22:23, 24.

Lo lok obia kɔ nu akiiloo dɔɔ̄na kɛ̄ tɔɔ̄ kɔ: “Mɛ lo a le ziī nɛɛdam zɔŋia ziī nwiī-emuā li bu wii lo a le wa nɛɛ bee yira kɔ a e’ii ye, e nɛɛdam a su ekpo ye aā sa ye nyɔɔnɛ makɛ̄, lo sɔ̄ aba nɛɛdam a bee ye nyɔɔnɛ makɛ̄ na a gaa le u a. Mɛ buii le doo lɔgɔ nu lo nwiī-emuā a, lɔgɔ doo gbee a bɔloo luh naale bu nwiī-emuā a, nyɔnɛbee a doodoo sɔ̄ nɛɛ bee aakɛ̄ wee doo ye nɛɛ yɛrɛ le sa ye fɛ, kɛ̄ ue ama le doolo; nyɔnɛbee a bee ye zɔŋia bu wii, e kere nwiī-emuā a, lo nɛɛ bee yira kɔ a e’ii ye bee wiikpā, lɔgɔ nɛɛ zuura lɛɛ naale.”—Deut 22:25-27.

Nyɔɔwo, pya biaɛ bee yira nu nwiī-emuā a kɔ. Bu mɛ sīdee? A bee lu esu kɔ nwiī-emuā a “bee wiikpā, lɔgɔ nɛɛ zuura lɛɛ naale.” Nyɔɔwo nwiī-emuā a naa bee kunagā. Mɛ, nɛɛdam a bee lu ebiaɛ ye begee kɔ a kunā gā, nyɔnɛbee “a su ekpo . . . aā [lo nwiī-emuā nɛɛ bee yira kɔ a e’ii ye a] sa ye nyɔɔnɛ makɛ̄.”

Nyɔɔwo, kere lo lok naa biaɛ lo wa begee, lo e’ɛma tɔgɛ kɔ ue bee nɛɛdam a bee ye su ekpo aā māloo a. I dap suā leere kɔ pya biaɛ a e “bip sa gbītɛ̄ leere” sa nɛ biaɛfii a gbaaloo daakuu Bari a bee lu e’ɛm sere kɛ̄.—Deut 13:14; 17:4; A’aa. 20:14.