Ebip Pya A Buū Bip
Sɔ̄ Satan bee kɔ nɛ Iv kɔ lo a de bee a aaloo te suāloo le le pɔrɔ a mɛ a naale e’u, ekɔ a gaa bee kɔge kɔ e’ɛrɛ piogi a naa wee u dookɛ̄ alu ekɔ doo anii’ee ni?
Naale doowo. Pɔrɔ Edɔɔ̄ naa bee kɔ nɛ Iv kɔ lo a de bee a aaloo te Bari bee kɔ ba aa de a, mɛ lo gah a ye le loo a naa lu emɔma dɛɛ̄ a, (lo pya nɛɛ kure edɔɔ̄ nɛɛ anii’ee) ekiisī lo etɔɔ̄dum dɔɔ̄na kɛ̄. Setan bee tɛ̄maloo yɔɔ kɔ nɛ Iv kɔ lo a de bee a aaloo lo te, ‘a naale e’u’ doo pippip. Nu a gaa bee kɔ na bee a gaa le kiisī lo etɔɔ̄ dum, sa ɛrɛ ekpeloo loo dum a kɛnɛkɛ̄, tɔɔ̄ nyɔɔ wa loo aa kɛɛ̄ Bari.—Jɛn 2:17; 3:3-5.
Lo a le ekwɔ tɔgɛnu kɔ sɔ̄ nɛɛ u ye piogi naa u lo alu etɔgɛ anii’ee naa bɔātɛ̄ aābu gɔh Idɛn, mɛ kɛ̄ na a aa a? Ii dap suā leere. I suā kɔ dɛ̄dɛɛ̄ ekwɔ sīdee taāŋabah bee lu egbeesī bie bu Yii Maā dee Noa. Lɔgɔ ekwɔ sīdee yigabari naa bee tɛɛ̄ yeebah lo yii maā aba Noa le pya ye butɔ, lo a le pya a taāŋabah Bari bu kaka sīdee na ba bee tɛɛ̄ yeebah a.
Nyɔɔwo dap lu kɔ tɔgɛnu kɔ sɔ̄ nɛɛ u ye piogi naa u bɔātɛ̄ sɔ̄ lo Yii Maā etɛ̄na. Sɔ̄ Bari bee kwɔɔgɛ dɛ̄dɛɛ̄ muɛ̄ ue li Babel sa lagiri pya nɛɛ “nyɔɔ dɛ̄dɛɛ̄ sī nyɔuwe,” lo sɔ̄ na ba bee bɔātɛ̄ e ɛrɛ ekɛɛrɛ kɔ sɔ̄ nɛɛ u ye piogi naa u a. (Jɛn 11:8, 9) Kaɛlɛɛ ɛrɛgeba kɛ̄ ekwɔ tɔgɛnu ama bɔātɛ̄ aā, i suā leere kɔ Setan lo a le Pɔrɔ-edɔɔ̄ alu “tɛ dɛ̄dɛɛ̄ esah,” na a nyimɛ esah ama tɛ̄ma ɛŋɛnɛ kɛ̄ a.—Jɔn 8:44.