Alu kaka kɔ naale nu dɔ ama gaa kɔ lo. Taāwo, a gaa kɔ nu akiiloo nɛɛ a dɔ bu keekee taāŋa ale etɛɛrɛloo sa tɛɛ̄ yeebah tɛ̄maloo egerebu.

I naa ɛp pya barakpaɛ̄ a le kpaɛ̄ lo dɔ ama: “O aa tɔɔ̄ baɛ doodoo nɛɛ bag dogo lo edoo kɛ̄ etɔɔ̄ nɛɛ kaāna dogo, o aa su e’agabah dooanu daā ye tɔ. Nyɔnɛbee nɛɛ kaāna dogo wee dɔ ɛrɛba sɔ̄ sa sinagekɛ̄ aakɛ̄, mɛ muɛ̄ pɔrɔ gaa le kiira sī pya bag dogo uukɛ̄. O aa ɛɛŋa sɔ̄ o dam baara dɔ, e o aa doo kɔ o beenyiɛ a ɛrɛ ɛɛbu sɔ̄ a lɛgara.”—Kam 24:15-17.

Pio nɛɛ kɛɛrɛ kɔ 16 barakpaɛ̄ gaa kɔ nu akiiloo nɛɛ a si pɔrɔ, mɛ a sikɛ̄ kiiya. Baɛ gbɛnɛ nɛɛ tɔbari alu Britain ɛm kɔ “pya zue ue a dee kere le bu ilii dee ama, wee baatɛ̄ lo dɔ bu sīdee ama.” Ba bee kɔ yereloo kɔ nu dua tap tap ama dap kura na kɔ “nɛɛ le dogo dap si gbɛnɛ . . . pɔrɔ, mɛ a naa lɛɛbaloo ye wereloo kuma kɛ̄ Bari le, sa aakɛ̄ ɛrɛgeba sɔ̄ a dɔ tɛ̄maloo e aaloo pya ekwɔ a bee tɛɛ̄ a.” Dua ekɔa ue ama dap nia nɛɛ a naa gbī e’ɔbɛ si pɔrɔ. A dap kɛɛrɛ kɔ kere a sie pɔrɔ gbɛnɛ-edo sɔ̄, mɛ Bari ekiisī lo e’aaloo ye nɛ.

Lo ama doo kɔ nu ye 16 barakpaɛ̄ gaa kɔ a pe.

Bee ue Hibru alu ekure “dɔ” a le bu ye 16 le 17 barakpaɛ̄ dap lu esu daānu bu keekee sīdee. Dap kura kunɛ dɔdɔ doodoo sɔ̄ nam dɔ bie nyɔɔ dee, sɔ̄ nɛɛ dɔ aa nyɔɔ tɔ, ale sɔ̄ ekpo dɛm kara kɛ̄. (Deut 22:4, 8; Amos 9:9) Dapnage kura dɔɔ̄na nu dookɛ̄ lo gah a nyɔɔnɛ ama tɔgɛ doo: “Tɛ̄ma bah Jɛhova na dɔ ekaɛtɔ nɛɛ eyira agɛrɛ a, e a wu ye agɛrɛ bu sīdee a ye nia. Kere a weadɔ naale kɛgɛrɛ ye bee kɛ̄, nyɔnɛbee Jɛhova gaa ye bɛɛŋɛ bah loo.”—Yɔɔ 37:23, 24; Kam 11:5; 13:17; 17:20.

Kɛ̄adoo, yere nukuādɛɛ̄loo nu Professor Edward H. Plumptre bee kɔ ama: “Bee ue Hibru a kura [“dɔ”] naa wee lu esu kɔāue kumaloo esia pɔrɔ.” Wo doo kɔ dɔɔ̄na nɛɛ enɔā kpa bee baatɛ̄ ye 16 barakpaɛ̄ kɔ: “Doo pɔrɔ nu loo pya kaāna dogo lu yɔrɔ, nyɔnɛbee ba ɛrɛ ekiisī, mɛ pya pɔrɔ naale ekiisī.”

Bu kaka, dɛ̄dɛɛ̄ pya nu ama tɔgɛ kɔ Kam 24:16 naa gaa kɔ nu akiiloo esia pɔrɔ, taāwo a gaa kɔ nu akiiloo taāŋa ale e’aga kɛ̄tɔɔ̄ nɛɛ tɛɛ̄ bu aā ziī sɔ̄ yii ziī. Bu pɔrɔ sɔ̄ nyɔuwe i le ama, nɛɛ kaāna dogo dap kpesī dumɛloo ale pya dɔɔ̄na taāŋa. A dapnage kura kɔ pya bɛbɛɛ etɛ̄ŋa ye loo. Mɛ a dap dɛrɛ nyiɛ nyɔɔ kɔ Bari gaa ye yerekpotɛ̄ sa eyerebah ye nɛ kɔ a tama sa be eebah. Bip aba ɔɔ kɔ, ‘Ekɔ m sii muɛ̄ge kɔ nu wee kiā leere loo pya nɛɛ Bari ni?’ E na anua a? Lu edoo kɔ i suā kɔ “Jɛhova bɛɛ̄ŋɛ baloo dɛ̄dɛɛ̄ pya a gaa dɔ, sa dana dɛ̄dɛɛ̄ pya a uulookɛ̄.”—Yɔɔ 41:1-3; 145:14-19.

“Nɛɛ kaāna dogo” naa wee ɛrɛ ɛɛbu sɔ̄ pya dɔɔ̄na le bu taāŋa. Taāwo, a wee ɛrɛ egbɔ̄nyiɛ aāloo susuā kɔ “a elu le nɛ pya a ɛrɛ bɔɔ loo Bari, nyɔnɛbee ba ɛrɛ bɔɔ ye kɛ̄ sī.”—Eklis 8:11-13; Job 31:3-6; Yɔɔ 27:5, 6.