Eeye, Baibol ale eloh kere naa tɔgɛ kɔ a bee sira doo wo.

Kɛ̄ alu etap ue ama doo bu gbɛnɛ-edo Baibol edora kɔ pya nɛɛ a yiga kɔ liamaā nyɔɔbee pya e’ua bee lu edoo bu dee Pɔɔl. Bu edoba, pio Baibol kɔ: “Nyaawo lo aakɛ̄ bu luh naa le, e na pya a liamaā nyɔɔbee pya e’ua edoo a?”—New International Version.

Kerewo, yere nukuādɛɛ̄ loo nu baɛ pya nɔ Baibol bee kɔ ama. Nɛɛ a wee nɔ Baibol a kura Dr. Gregory Lockwood bee kɔ a naa ɛrɛ lɔgɔ nu a le bu Baibol ale bu eloh kere a tɔgɛ kɔ pya nɛɛ bee liamaā “nyɔɔbee pya a e’ua.” Bu aba lo sīdee, Professor Gordon D. Fee ɛm kɔ: “Lɔgɔ nu eloh kere ale Baibol kɔ kumaloo dua liamaā ama naale. Aā T[estament] naa kɔnage lɔgɔ nu akiiloo lo ama; e a naa bee lunage emuɛ̄ kɔ a dooa doo wo bie lɔgɔ tɔbari ale bu ɛrɛgeba tɔbari ba lu pya a kue bee Kraist bu pya zua a nyɔɔnɛ sɔ̄ pya nɛɛ lɛɛratam e’ua sah.”

Baibol kɔ pya a nyɔɔnɛ dumɛ Jizɔs ɛrɛ edoo kɔ “dɛ̄dɛɛ̄ edonyɔɔ a lu pya [a ye] nyɔɔnɛ dumɛ sa wa doo baptism . . . , wa tɔgɛ kɔ ba a sere dɛ̄dɛɛ̄ nu” a bee nɛ bu lok. (Mat 28:19, 20) Lɛɛ ziī nɛɛ gae liamaā sa nyɔɔnɛ dumɛ Jizɔs, alu ebɛɛ̄ kɔ a nɔ nu akiiloo Jɛhova le Jizɔs, wa gbaɛ̄tɔ̄loo sa a ɛrɛ wa yira bu. Nɛɛ ebee u sa le bu li naale edap doo wo, ale kɔ Nɛɛ Kraist a le dum edoo ye nɛ.—Eklis 9:5, 10; Jɔn 4:1; 1 Kɔr 1:14-16.

E na Pɔɔl gaa bee kɔ a?

Pio Pya Kɔrint naa bee yiga kɔ pya e’ua e aakɛ̄ bu luh. (1 Kɔr 15:12) Pɔɔl bee tɔgɛ kɔ nu ba kɔ ama naa lu kaka. A bee kɔ ‘a kpe e sī luh dɛ̄dɛɛ̄ dee.’ Bu kaka, a bee le dum. Mɛ kaɛlɛɛ pya nu bɔɔ a bee kpesī, a bee suā leere kɔ lo a u e elu elɛɛe ye kɛ̄ bu luh kuma bunyɔɔ, dookɛ̄ a bee sira loo Jizɔs doo.—1 Kɔr 15:30-32, 42-44.

Bee lu ebɛɛ̄ kɔ pya Kɔrint a dābeeloo kɔ lu pya Nɛɛ Kraist alu etɔ̄ nɔɔ̄ bee kura kɔ ba ekpe e sī keekee doā-ɛp dɛ̄dɛɛ̄ dee sa u lɛɛ a gae lu elɛɛ wa kɛ̄ bu luh. Nu a le bu ‘liamaā bu Kraist Jizɔs’ na ‘liamaā yii bu ye luh.’ (Rom 6:3) Lo a kura kɔ doodoo Jizɔs, ba ekpesī doā-ɛp sa u lokwa alu elɛɛ wa kɛ̄ bu luh kuma bunyɔɔ.

Sɔ̄ baɛ zua etɛ̄na aā sɔ̄ Jizɔs bee liamaā, a bee kɔ nɛ baɛ pya ye nɛɛ lɛɛratam kɔ: “loo baptism mda bee doo baptism bui dooge.” (Maak 10:38, 39) Jizɔs naa gaa bee kɔ nu akiiloo liamaā bu maā. Nu a gaa bee kɔ na kɔ ye e’agatɛ̄ yira gaa le ture ye mmɛ loo luh. Pɔɔl bee ɛm kɔ pya alu etɔ̄ nɔɔ̄ bee gaa le ‘gbaa muɛ̄ pɔrɔ lokwa ba dap gbaa ɛrɛ ka.’ (Rom 8:16, 17; 2 Kɔr 4:17) Nyɔɔwo ba ɛrɛnage e’u lokwa ba dap aakɛ̄ bu luh sa kii bunyɔɔ.

Kɛ̄adoo, ue Pɔɔl kɔ dap lu etap doo wo ama kɔ: ‘Lo a naa bee le doo wo, e na a nua alu elimaā pio nɛɛ nyima bu luh a? Lo a naale elu edana pya a bee u lɛɛ kɛ̄, e na anua alu eli wa maā bu lo sīdee a?’