Jɛhova bee nɛ lok Pya Izrɛl kɔ ba alu pya a le kaɛ. Lokwa ba dap le kaɛ, a bee wa kɔ nɛ kɔ: “Buii le kɛria doodoo nɛɛ gbee bee nɛɛ yɛɛ pya bui nɛɛ, e buii le yira mmsī lo edoo dum bui nɛɛ yiri le: Mda na Jɛhova a.”—Lev 19:2, 16.

Ue a kɔ “yira mmsī lo edoo” aadee kɔ taɛ nu ue a bee le lo dɔ bu muɛ̄ ue Hibru kura, mɛ taɛ ena a kura a? Ziī kpa pya Juu a baatɛ̄ nu a le bu kpa Levitikɔs kɔ: “Ue ama . . . aga etap taɛ nu a kura nyɔɔbee alu ue a tɔɔ̄dɔ nu bu muɛ̄ ue Hibru a aga edābeeloo, lo sɔ̄ alu e’aadee tap taɛ kɛ̄ a le doo, ɛɛ na, ‘o aa yira nyɔɔ, kpaɛ̄, waɛloo.’”

Pio pya enɔā gbɛnɛ kpa kɔ dɔ ama ɛrɛ nu edoo kiiloo nu a le bu ye 15 barakpaɛ̄, lo a kɔ: “Buii le biaɛ pɔrɔ biaɛ; buii le ɛp sī nɛɛ kporo ale su ue gbɛnɛ nɛɛ, mɛ bu kaāna dogo na bui biaɛ nɛɛ yiri le a.” (Lev 19:15) Lo a le wo, lok a le bu ye 16 barakpaɛ̄ lo a kɔ, o aa “yira mmsī lo edoo” ziī nɛɛ dap kura kɔ pya nɛɛ Bari naale edoo pɔrɔ pima ziī sɔ̄ ba aa biaɛ ue bie tɔ biaɛ, sɔ̄ ba aa uradu, ale bie butɔ, le kɔ ba aa bɛg kaāna biaɛ lo e’ɛrɛ biī nɛ wa loo. Lu kaka kɔ, ii ɛrɛ edoo pya nu ama, mɛ a ɛrɛnage dɔɔ̄na sīdee a dap lu edābeeloo ue a le bu 16 barakpaɛ̄ ama.

Naa kɛɛrɛ nu akiiloo ue a le bɔātɛ̄ dɔ ama. Bari bee nɛ lok pya ye nɛɛ kɔ ba aa kɛria gbee bee nɛɛ. Alu kaka kɔ, kɔ ue dumɛ nɛɛ wee nua taāŋa, mɛ gbee bee nɛɛ bee piya eewo. (Kam 10:19; Eklis 10:​12-14; 1 Tim 5:​11-15; Jem 3:⁠6) Gbɛnɛ-edo sɔ̄, gbee bee nɛɛ wee lu edoo tɛ̄maloo ekɔ ue loo lo nɛɛ lokwa pya nɛɛ ye ɛp bu pɔrɔ sīdee. Nɛɛ gbee bee nɛɛ dap yira ekeebee esah kumaloo dɔɔ̄na nɛɛ, kereadoo ye ekeebee esah edoo kɔ alu efɛ lo nɛɛ. Nyɛŋiabu kɔ pya gbee bee nɛɛ bee yira ekeebee esah loo Nabot, lo a bee doo kɔ alu ebiaɛ ye bu elɔ sīdee sa ye tobo dɛm fɛ. (1 Mɛnɛ 21:​8-13) Bu kaka, nɛɛ gbee bee nɛɛ dap siāsī lo elɛɛ dum dɔɔ̄na nɛɛ, dookɛ̄ alu ekɔ doo bu eree baɛ gah loo ue a le bu kpa Levitikɔs 19:⁠16.

Lo dɔɔ̄na, gbee bee nɛɛ dap tɔgɛ dogo baaloo a le bu ziī nɛɛ kumaloo dɔɔ̄na nɛɛ. Bu 1 Jɔn 3:​15, i buū kɔ: “Ɛrɛgeba nɛɛ a baaloo ye wuga lu nɛɛ fɛ nɛɛ, e bui suā kɔmɛ ɛrɛgeba nɛɛ alu nɛɛ fɛ nɛɛ naa ɛrɛ dum a naa tah a ye le bu.” Alu nu a bɔloo kɔ sɔ̄ Bari ekɔa pya ue a le bu ye 16 barakpaɛ̄ sah, a kɔ gbaāloo kɔ: “Oo le baaloo o wuga bu nyiɛ a.”​—⁠Lev 19:⁠17.

Nyɔɔwo, lok alu e’ɛm bu kpa Levitikɔs 19:16 nɛ e’agabah zuurabahtɔ̄ Pya Nɛɛ Kraist. I ɛrɛ ekiī ɛrɛgeba pɔrɔ ekɛɛrɛ a gbī eyii i bu sa aaloo egbee bee dɔɔ̄na nɛɛ. Nu aa lu ekɔ na bee, lo i “yira mmsī lo edoo” ziī nɛɛ tɛ̄maloo elɛɛbaloo emaānyiɛ kɔ a zū i kɔ i gbee ye bee, lo ama tɔgɛ kɔ i baaloo lo nɛɛ. Pya Nɛɛ Kraist ɛrɛ ekiī elap dogo ama.​—⁠Mat 12:​36, 37.