1. Ena alu ziī nu anua Jizɔs su pya a wee ye nyɔɔnɛ dumɛ dooreloo naana pee a?

 JIZƆS bee su gbanialoo a le yɛɛ pya a wee ye nyɔɔnɛ dumɛ le ɛɛ dooreloo gbanialoo a le yɛɛ nɛɛ tɔɔ̄loo naana pee le pya ye gbo naana. (Jɔn 10:14) Nu a su dooreloo ama lee kaāna. Naana pee suāloo nɛɛ a wee ye tɔɔ̄loo sa gbaɛ̄tɔ̄loo ye muɛ̄. Ziī nɛɛ a wee si kiā bee muɛ kɔ lo ama lu kaka. A bee kɔ: “I bee gbī esu foto pio naana pee nyɔɔwo i bee gbī kɔ ba a tɔɔ̄ i waɛloo. Mɛ ba naa bee i nyɔɔnɛ nyɔnɛbee ba naa suāloo i muɛ̄. Lɛɛ ziī nwīgbagbara nwiīnɛɛdam a wee wa tɔɔ̄loo lu; e a naa bee wa kue sɔ̄ ba ye nwaabah nyɔɔnɛ.”

2-3. (a) Bu mɛ sīdee na pya a wee nyɔɔnɛ dumɛ Jizɔs bee tɔgɛ kɔ ba aa gbaɛ̄e tɔ̄ muɛ̄ Jizɔs a? (b) Ena i kɔ ue nyɔɔ bu lo ekobee ue ama le lo a nyɔɔnɛ a?

² Nu a bee sira loo nɛɛ a wee si kiā ama nyɛŋia i bu pya ue Jizɔs akiiloo naana pee, lo a le pya a wee ye nyɔɔnɛ dumɛ. A bee kɔ: “Ba egbaɛ̄tɔ̄ loo na muɛ̄.” (Jɔn 10:16) Mɛ Jizɔs le bunyɔɔ a. I tɛɛ̄ doodoo wa kɔ i aa ye gbaɛ̄e tɔ̄loo ni? Ziī gbɛnɛ sīdee i tɔgɛ kɔ i gbaɛ̄e tɔ̄loo muɛ̄ i Tɛtɔ na tɛ̄maloo esu pya ye tɔgɛnu yere bu dogo.​—⁠Mat 7:​24, 25.

³ Bu ekobee ue ama le lo enyɔɔnɛ, i kɔ ue nyɔɔ pio nu Jizɔs bee tɔgɛ. Dookɛ̄ i sah i muɛ doo, Jizɔs bee i tɔgɛ kɔ i ɔbɛ edoo pio nu le kɔ i doo pya lo dɔɔ̄na. Bu tua dɔ, i dasī kɔ ue nyɔɔ baɛ nu le nɛɛ tɔɔ̄loo naana pee bee i zuurabahtɔ̄ kɔ i ɔbɛ edoo.

4. Dookɛ̄ kpa Luk 12:29 kɔ doo, ena a dap doo kɔ i ɛrɛ “baɛ ekɛɛrɛ” a?

⁴ Buū Luk 12:29. Jizɔs bee kɔ nɛ pya a wee ye nyɔɔnɛ dumɛ kɔ ba aa “ɛrɛ baɛ ekɛɛrɛ” akiiloo wa ebɛɛ̄ bu namloo. I suā kɔ zuurabahtɔ̄ Jizɔs lee sa lu lo suānu le loo. I gbī esu yere bu dogo, mɛ pio sɔ̄ a dap i agabah edoo wo. Ena anua a?

5. Ena a dap doo kɔ pio nɛɛ a ɛrɛ gbɛnɛ ekɛɛrɛ akiiloo wa ebɛɛ̄ bu namloo a?

 ⁵ Pio nɛɛ dap ɛrɛ gbɛnɛ ekɛɛrɛ akiiloo kɛ̄ ba etɛɛ̄ doo ɛrɛ nu a wa bɛɛ̄ bu namloo, doodoo nuede, nu eyaa, le tɔ etɔɔ̄ bu. Ba dap tɔɔ̄ barasī kɛ̄ dum aga nyɔɔbee pya nɛɛ naa ɛrɛ tam esi. A dap wa agabah e’ɛrɛ kpugi ekuādɛɛ̄loo pya wa butɔ. Ale bee nɛɛ a gaa bee kuūdɛɛ̄loo lo butɔ e’ua, sa pya lo butɔ naa ɛrɛ lɔgɔ kpugi ekuādɛɛ̄loo aba aba. Nage, dap lu kɔ dumɛloo COVID-19 edora kɔ pio nɛɛ a peere wa tam. (Eklis 9:11) Lo i etɛ̄nabu ziī kɛ̄tɔɔ̄ ama ale lo dɔɔ̄na, bu mɛ sīdee na i dap su zuurabahtɔ̄ Jizɔs a kɔ i ɔbɛ e’ɛrɛ gbɛnɛ ekɛɛrɛ yerebu dogo a?

6. Naa baatɛ̄ ziī nu a bee siraloo nɛɛ lɛɛratam Pita.

⁶ A ɛrɛ sɔ̄ nɛɛ lɛɛratam Pita le pya dɔɔ̄na nɛɛ lɛɛratam bee le bu fah maā bie nyɔɔ Pɛnɛ Galili sɔ̄ gbɛnɛ efɔp gaa dɔ, e ba bee muɛ Jizɔs a gaa kiā nyɔɔ pɛnɛ. Pita bee kɔ: “Nɛɛ-a-i-ɛrɛ, lo a le a lege olo, doo kɔ m lu a pii nyɔɔ maā.” E sɔ̄ Jizɔs ekuera ye kɔ a “lu,” Pita bee aa bu fah sa “kiā nyɔɔ maā pii Jizɔs.” Yere nukuādɛɛ̄ loo nu a bee sikɛ̄ sira. “Sɔ̄ a emɔna efɔp, a ɛrɛ bɔɔ, e a bɔātɛ̄ edɛp, a wiikpā, ‘Nɛɛ-a-i-ɛrɛ, kpɔā mɛ!’” Jizɔs bee niina bah ye sa ye zuura. Bu  kaka, kuma sɔ̄ Pita gaa bee ɛpge Jizɔs, a bee dap kiā nyɔɔ maā a gaa bee toobi nyɔɔbee gbɛnɛ efɔp aa bee dɔ a. Mɛ sɔ̄ Pita ɛp lo efɔp a, bɔɔ bee ye aa sa a bɔātɛ̄ e’ɛrɛ baɛbaɛ ekɛɛrɛ; e a bee bɔātɛ̄ edɛp.​—⁠Mat 14:​24-31.

7. Ena i dap nɔ aāloo nu a bee siraloo Pita a?

⁷ I dap nɔ nu aāloo nu a bee siraloo Pita. Sɔ̄ Pita bee aabu lo fah sa bɔātɛ̄ ekiā nyɔɔ maā, a naa bee kɛɛrɛ kɔ a ɛrɛ ziī nu edabarae ye ekɛɛrɛ sa doo kɔ a bɔātɛ̄ edɛp. A bee gbī ekiā nyɔɔ lo maā mmɛ sɔ̄ ekiā ina kɛ̄ ye Tɛtɔ le. Kerewo, a naa bee bɔɔgɛ ye ekɛɛrɛ bie nyɔɔ nu a bee gbī edoo ama. Bu kaka, ii le edap kiā nyɔɔ maā, kerewo i gaa kpesī pya nu a doā-ɛp i yira. Lo ii bɔɔgɛ i ekɛɛrɛ bie nyɔɔ Jɛhova le pya ye yii, i dap bɔātɛ̄ edɛp bu edɔɔ̄. Kaɛlɛɛ ɛrɛgeba nu a bee gbɛnɛ fii efɔp lo a i siraloo bu dum, i dap bɔɔgɛ i ekɛɛrɛ bie nyɔɔ Jɛhova sa suā kɔ a ɛrɛ ekpo lo edap i yerebah nɛ. Bu mɛ sīdee na i dap doo lo ama a?

8. Ena edap i yerebah nɛ kɔ i aa ɛrɛ gbɛnɛ ekɛɛrɛ akiiloo pya i ebɛɛ̄ bu namloo a?

⁸ E lee i loo lo a le i dɛrɛ nyiɛ nyɔɔ Jɛhova taā i ɛrɛ gbɛnɛ ekɛɛrɛ akiiloo pya i taāŋa. Nyɛŋiabu kɔ Jɛhova alu i wereloo Tɛ, eyira yii kɔ edooe pya i ebɛɛ̄ bu namloo lo a le i su nu bu edɔɔ̄ nua tuatua bu i dum. (Mat 6:​32, 33) Pya nu esira tɔgɛ kɔ alu nɛɛ a naa wee lɔgara ye yii. (Deut 8:​4, 15, 16; Yɔɔ 37:25) Lo a le Jɛhova nɛ nu a bɛɛ̄ pya enuɛ̄ pɛɛ bunyɔɔ le flawa, bu kaka, ii ɛrɛ e’ɛrɛ gbɛnɛ ekɛɛrɛ akiiloo nu i de ale bɛloo i yaa! (Mat 6:​26-30; Fil 4:​6, 7) Dookɛ̄ wereloo wee zū pya tɛ le ka a kɛɛrɛ nu akiiloo pya wa miɔŋɔ kɔ ba a kuūdɛɛ̄loo wa ebɛɛ̄ bu namloo doo, kɛ̄ wereloo zūnage i wereloo Tɛ a le li bunyɔɔ kɔ a kuūdɛɛ̄loo nu alu ebɛɛ̄ pya ye nɛɛ bu namloo doolo. Bu kaka, i suā leere kɔ Jɛhova ekuū i dɛɛ̄loo!

9. Ena o dap nɔ aāloo nu a bee siraloo ziī dam le wa a?

⁹ Naa ɛp ziī edoba a tɔgɛ dua kɛ̄ Jɛhova dap kuūdɛɛ̄loo pya i ebɛɛ̄ doo ama. Ziī dam le wa a le bu esiatam mmɛɛ̄ sɔ̄, bee ɔp wa nama fah bu nu alu ziī hour lo edana pio pya wuga nɛɛwa a bee le kɛ̄ ba bee teera kii nyɔɔ ebea nɔ̄, lokwa ba wa ɔp kuma enɔānu. Lo wuga nɛɛdam bee baatɛ̄ kɔ: “Sɔ̄ lo enɔānu e’ina kuma, i bee kue pya lo wuga nɛɛwa kɔ ba alu i tɔ lokwa i gbaa denu sa ɛrɛ ɛɛbu, mɛ sɔ̄ i ekuera wa sah na i suā kɔ ii ɛrɛ lɔgɔ nuede enɛ wa a.” Ena lo dam le wa edoo a? Lo wuga nɛɛdam bee sikɛ̄ kɔ yereloo kɔ: “Sɔ̄ i bee ina tɔ, i muɛ baɛ bɛrɛ nuede a le i nutɔ. Ii bee suāloo nɛɛ a bee dɔɔ̄ lo nuede i nɛ. Jɛhova bee i kuūdɛɛ̄loo kaāna.” Sɔ̄ pio sɔ̄ etɛ̄na, wa fah bee gbe. Lo fah bee wa bɛɛ̄ lo esiā uwe zue ue, kerewo ba naa bee ɛrɛ lɔgɔ kpugi esu kwaā. Nyɔɔwo, ba bee su lo fah ture kɛ̄ a wee lu ekwa fah lokwa ba ɛp sa kɔ kuma kpugi edap lu esu kwaā. Sɔ̄ lo fah bee le lo kɛ̄, ziī gbara bee lu sa bip kɔ: “Mɛɛ na a ɛrɛ fah ama a?” Lo wuga nɛɛdam bee ture kɔ ɛɛ alɛɛ fah e a bee su nua a kɛ̄ ama lokwa a dabe kwa. Lo gbara bee agara kɔ: “Lɔgɔ taāŋa naale. Taɛ fah na wa aa bee gbī na ama, e taɛ lo dɛɛ̄ ama na a ye nianage a. Ku kpugi o gbī e’oo loo ni?” Lo gbara bee yaɛ lo fah e lo wuga nɛɛdam bee ɛrɛ gbɛnɛkpo kpugi esu yaā dɔɔ̄na fah. A bee kɔ: “Bu i bee ɛɛ kaāna lo dee. I bee suā kɔ siranu ama naale kunɛ nu a aadee sira. A bee le Jɛhova na a doo kɔ a sira a.”

10. Bu mɛ sīdee na Le-yɔɔ 37:5 i yere mɛm loo kɔ i aa ɛrɛ gbɛnɛ ekɛɛrɛ akiiloo pya i ebɛɛ̄ bu namloo a?

 ¹⁰ Sɔ̄ i gbaɛ̄tɔ̄loo le nɛɛ tɔɔ̄loo naana pee sa ii ɛrɛ gbɛnɛ ekɛɛrɛ akiiloo pya i ebɛɛ̄ bu namloo, i suā leere kɔ Jɛhova enɛ i pya nu a i bɛɛ̄. (Buū Le-yɔɔ 37:5; 1 Pit 5:⁠7) Naa kɛɛrɛ nu akiiloo pya kɛ̄tɔɔ̄ a bee lu ekɔ nu kumaloo bu ye  5 barakpaɛ̄ a. A dap lu kɔ Jɛhova bee su nɛɛ alu tɛ bee tɔ ale nɛɛ a bee i suloo tam i yeābah nɛ lo edap kuūdɛɛ̄loo pya i ebɛɛ̄ ziī ziī biradee. Mɛ lo a le lo tɛ bee tɔ naa dapna doo dookɛ̄ a wee doo ale i peere i tam, Jɛhova enɛnage pya nu a i bɛɛ̄ bu dɔɔ̄na sīdee ii bee ɛmadɛɛ̄. I suā leere kɔ edoo. Doraa i naa kɔ nu akiiloo ziī nu le nɛɛ tɔɔ̄loo naana pee i zū kɔ i ɔbɛ edoo.

11. Dookɛ̄ kpa Matiu 7:​1, 2 kɔ doo, ena Jizɔs bee kɔ i ɔbɛ edoo a, e ena anua lo ama dap lu nu finiābah a?

¹¹ Buū Matiu 7:​1, 2. Jizɔs bee suā kɔ pya a gaa bee ye gbaɛ̄tɔ̄loo a naa mmana ama ɛrɛ elap dogo bie dɛɛ̄ nyɔɔ tɛɛ̄ ekwɔ pya dɔɔ̄na. Yere nukuādɛɛ̄loo kɔ a bee kɔ: “Bui aa biaɛ.” I dap piiga kɔ ii lee biaɛe pya i wuga bu yira. Kerewo, a naa wee aadee waɛ dɛ̄dɛɛ̄ sɔ̄. Mɛ lo a le i muɛ kɔ a ɛrɛ pio sɔ̄ i biaɛ pya dɔɔ̄na, ena i doo ani? I gbaɛ̄tɔ̄loo Jizɔs, sa piiga lo e’ɔbɛ ebiaɛ.

12-13. Bu mɛ sīdee na ɛ’ɛrɛ ekɛɛrɛ nyɔɔ kɛ̄ Jɛhova bee ɛp Mɛnɛ Devid doo edap i yerebah nɛ kɔ i ɔbɛ ebiaɛ pya dɔɔ̄na a?

¹² Ɛ’ɛrɛ ekɛɛrɛ nyɔɔ edoba Jɛhova dap i dɔbiī nɛ. A wee ɛp le a le bu pya nɛɛ. I muɛ kɔ lo ama lu kaka aāloo kɛ̄ a bee nyɔɔnɛ Mɛnɛ Devid daniā nu doo, a bee le ziī gbara a bee tɛɛ̄ booboo ekwɔ. Bu edoba, a bee nyɔɔnɛ Bat-sheba kūnagā sa fɛnage ye dam. (2 Sam 11:​2-4, 14, 15, 24) Nu a bee sira aabu pɔrɔ Devid bee si ama naa bee zia aba alɛ, mɛ a bee zianage pya ye butɔ le dɔɔ̄na pya ye wa. (2 Sam 12:​10, 11) Bu dɔɔ̄na kɛ̄dɔ, Devid naa bee ture nyiɛ loo Jɛhova sɔ̄ a bee buū gbo nɔ̄ Pya Izrɛl sɔ̄ Jɛhova naa bee kɔ a doo wo. Naadaba, nu anua a bee doo wo na nyɔɔ eeloo nɛ nyɔɔ le kɔ a bee dɛrɛ nyiɛ nyɔɔ kɛ̄ pya ye gbo nɔ̄ kuī buā doo. Ena a bee sira aabu nu a bee doo ama a? Dumɛnu a wee nua luh bee fɛ 70,000 Pya Izrɛl!​—⁠2 Sam 24:​1-4, 10-15.

¹³ Lo olo bee le Izrɛl sɔ̄ nu ama bee sira, o bee ɛp Devid doodoo wa? Ekɔ o bee ye biaɛ kɔ a naa bɔloo kɔ Jɛhova a to ye esaɛ̄ ni? Jɛhova naa bee ɛp doo wo. Nu a bee ɛp na kɛ̄ Devid bee bɔ ture nyiɛ loo lɛɛ a gae lu lo sɔ̄ doo, le kɛ̄ a bee tɔgɛ kaāna kikiiya doo. Nyɔɔbee wo, Jɛhova bee aaloo gbɛnɛ pɔrɔ Devid bee si ama ye nɛ. Jɛhova bee suā kɔ Devid weree ye loo kaāna sa gbī edoo nu a lee. Ekɔ bu a naa ɛɛ kɔ i Bari ɛp le a i le bu ni?—1 Mɛnɛ 9:4; 1 Edoo 29:10, 17.

14. Ena eyerebah nɛ Pya Nɛɛ Kraist kɔ ba a ɔbɛ ebiaɛ pya dɔɔ̄na a?

¹⁴ Lo a le Jɛhova naa ɛmadɛɛ̄ kɔ i ɛrɛ edasī mmana, ili ii lee ɛmanage dɛɛ̄ kɔ pya dɔɔ̄na a dasī mmana, mɛ i ɛp le a wa le bu. A wee lu nu a waɛ lo emuɛ ekwɔ pya dɔɔ̄na sa wa gbɛ. Kerewo, nɛɛ a agaloo bu edɔɔ̄ wee nyɔɔnɛ pya dɔɔ̄na tɔniā bu efɛɛloo kereadoo a muɛ wa ekwɔ. Diamond a sii lu ekwaloo nua lo elu esu daānu naa wee kpedɛɛ̄, mɛ nɛɛ suānu suā kɔ alu nu a si gbɛnɛ du sa ekpedɛɛ̄ sɔ̄ elua ekwaloo sah. Doodoo Jɛhova le Jizɔs, alu ebɛɛ̄ kɔ i ɛp emanyɔɔ kɛ̄ mɛā  nɛɛ le doo, sa ɛp pya lele elap dogo a wa le bu.

15. Bu mɛ sīdee na kɛkɛɛrɛ nu akiiloo kɛ̄tɔɔ̄ pya dɔɔ̄na edap i yerebah nɛ kɔ i aa wa biaɛ a?

¹⁵ Gbaāloo ɛ’ɛp lele elap dogo a le bu pya dɔɔ̄na, dɔɔ̄na ena edap i yerebah nɛ kɔ i aa wa biaɛ a? Piiga lo ekɛɛrɛ nu akiiloo wa kɛ̄tɔɔ̄. Naa ɛp edoba ama. Ziī dee bie bu tɔkaɛ, Jizɔs bee muɛ ziī wa ye dam e’ua alu kporo, a tɛrɛ baɛ nwīgbagbara kpugi bu kɛ̄ kpooge kpugi. A naa bee bip kɔ: “Ena anua a naa bee tɛrɛ eewo a?” Taā a ɛp sa bie ekɛɛrɛ nyɔɔ buā kpugi lo wa bee tɛrɛ, Jizɔs bee kɛɛrɛ nu akiiloo ye kɛ̄tɔɔ̄ le nu a ye zū kɔ a tɛrɛ lo kpugi sa a bee ye kaɛgɛ kɔ a doo kuma kɛ̄ a dap doo.—Luk 21:1-4.

16. Ena o dap nɔ aāloo nu a bee siraloo Veronica a?

¹⁶ Nu a bee siraloo ziī wuga nɛɛwa a kura Veronica dap i yerebah nɛ kɔ i dābeeloo biī a le bu kɛkɛɛrɛ nu akiiloo kɛ̄tɔɔ̄ pya dɔɔ̄na. Bu bɔŋanaloo Veronica bee le, ɛrɛ ziī wuga nɛɛwa a bee le lo bɔŋanaloo lo aba ɛɛ aa bee kuūdɛɛ̄loo ye nwiīnɛɛdam. Veronica bee kɔ: “A bee mɛ tɔɔ̄loo kɔ ba naa gaa si enɔānu le uwe zue ue eree sɔ̄ loo. Wo bee doo kɔ m ɛp wa bu pɔrɔ sīdee. Mɛ m bee nyɔɔnɛ lo wa si uwe zue ue ziī dee. A bee kɔ pya taāŋa a gaa tɛɛ̄bu mɛ nɛ nyɔɔ ye nwiīnɛɛdam a ɛrɛ dumɛ bu ekobee. Aa bee piiga kuma kɛ̄ a dap doo lo ekuūdɛɛ̄loo wa ebɛɛ̄ bu namloo  le bu edɔɔ̄. Pio sɔ̄ a wee si enɔānu bu dɔɔ̄na bɔŋanaloo nyɔɔbee dumɛloo ye nwiīnɛɛdam ama.” Bu kpɛdumɛ Veronica bee kɔ: “Mm bee suā kɔ kɛ̄ dum gaa ye agaloo doolo. Nyaawo, m sikɛ̄ wereloo sa tɔgɛ enwadɛɛ̄ loo wuga nɛɛwa ama kaāna nyɔɔ kɛ̄ a gaa piiga lo etaāŋabah Jɛhova doo.”

17. Ena kpa Jemes 2:8 i kɔ nɛ kɔ i doo a, e bu mɛ sīdee na i dap doo wo a?

¹⁷ Ena i doo lo a le i suā kɔ i ebiaɛra ziī i wuga bu yira ani? I ɛrɛ enyɛŋiabu kɔ alu ebɛɛ̄ kɔ i wereloo pya i wuga. (Buū Jemes 2:⁠8.) I yerenage kara bara Jɛhova kɔ a yerebah i nɛ lo e’ɔbɛ ebiaɛ pya dɔɔ̄na. I dap doo nu a gbaaloo i kara tɛ̄maloo eyiiloo nɛɛ i ebee biaɛ bu pɔrɔ sīdee a. Lo ama dap doo kɔ i suā ye loo leere. I dap kɔ a nyɔɔnɛ i si uwe zue ue ale nyɔɔnɛ i gbaa denu. Lo i piiga lo esuāloo i wuga leere, i gaa nɔ edoba Jɛhova le Jizɔs tɛ̄maloo e’ɛp le a ye le bu. Dodoo wo etɔgɛ kɔ i gaa gbaɛ̄tɔ̄loo lok a aabah i le nɛɛ tɔɔ̄loo naana pee a kɔ i ɔbɛ ebiaɛ.

18. Bu mɛ sīdee na i tɔgɛ kɔ i gaa gbaɛ̄tɔ̄loo muɛ̄ le nɛɛ tɔɔ̄loo naana pee a?

¹⁸ Dookɛ̄ kasī naana pee wee gbaɛ̄tɔ̄loo muɛ̄ nɛɛ a wee wa tɔ̄loo doo, kɛ̄ pya a nyɔɔnɛ dumɛ Jizɔs ye gbaɛ̄nage tɔ̄loo muɛ̄ doolo. Lo i piiga lo e’ɔbɛ e’ɛrɛ gbɛnɛ ekɛɛrɛ akiiloo pya i ebɛɛ̄ bu namloo sa ɔbɛnage ebiaɛ pya dɔɔ̄na, Jɛhova le Jizɔs enɛ i leelee. Kere i nuūna “nwī eku naana pee” ale “dɔɔ̄na gbo naana pee,” dooraa i kiisī lo egbaɛ̄tɔ̄loo muɛ̄ le nɛɛ tɔɔ̄loo naana pee. (Luk 12:32; Jɔn 10:​11, 14, 16) Bu lo ekobee ue i nɔ li, i gaa le kɔ nu akiiloo baɛ nu Jizɔs bee kɔ nɛ pya a wee ye nyɔɔnɛ dumɛ kɔ ba a doo.