1-2. (a) Ena a bee lu ekɔ nɛ taa pya a wee nyɔɔnɛ dumɛ Jizɔs kɔ ba a doo a, e ba bee doo dogo doodoo wa? (b) Ena i nɔ bu ekobee ue ama a?

 SƆ̄ ELUA edoo doonu tɛɛ̄yee bu zua 32 C.E. sah, nɛɛ lɛɛratam Pita, Jems, le Jɔn bee muɛ ziī mɔmanudɛɛ̄. Bie nyɔɔ ziī egu, naadaba bie nyɔɔ Egu Hermon, Jizɔs bee wa kiiya bia kɛ̄sī. “Ye sī bee mɔ doodoo enaani, e ye bɛloo bee ɛɛ doodoo ɛɛdee.” (Mat 17:​1-4) Sɔ̄ lo mɔmanudɛɛ̄ esaa etah, pya nɛɛ lɛɛratam ama bee dā sɔ̄ Bari kɔ: “Alɛ ama na mdaa wereloo Nwiīnɛɛdam a, bu mɛ ɛɛ ye loo, gbānaa ye tɔ̄.” (Mat 17:⁠5) Taa nɛɛ lɛɛratam ama bee tɔgɛ kɔ ba gbaɛ̄e tɔ̄loo Jizɔs tɛ̄maloo nu ba doo. I gbī enɔ wa edoba.

² Bu ekobee ue i aa a, i bee nɔ kɔ gbaɛ̄tɔ̄loo muɛ̄ Jizɔs kura kɔ i ɔbɛ edoo pio nu. Bu ekobee ue ama, i kɔ ue nyɔɔ baɛ nu Jizɔs bee kɔ i doo.

3. Dookɛ̄ kpa Matiu 7:​13, 14 kɔ doo, ena a bɔloo kɔ i doo a?

³ Buū Matiu 7:​13, 14. Yere nukuādɛɛ̄ loo kɔ Jizɔs bee kue bee baɛ ka dee a ture nɛɛ mmɛ baɛ keekee kɛ̄, lo a le dee a “bɛɛasī” le “biibii sī” dee. Lɔgɔ dɔɔ̄na dee naale na, mɛ aba baɛ lo ama. I ɛrɛ esagɛ lo dee i tɛɛ̄nyɔɔ. Lo ama lu biaɛfii a kuī eera nyɔnɛbee aba ziī ka dee na eture nɛɛ mmɛ loo dum a naatah a.

4. O baatɛ̄ dee a “bɛɛasī” doodoo wa?

 ⁴ Alu ebɛɛ̄ kɔ i suā kee a le yɛɛ baɛ dee ama. Gbɛnɛ-edo nɛɛ le nyɔɔ dee a “bɛɛasī” a, nyɔnɛbee a waɛ etɛɛ̄nyɔɔ. Lu ekiɛ̄nu kɔ pio nɛɛ sagɛ lo enyɔɔnɛ gbɛnɛ-edo nɛɛ tɛɛ̄nyɔɔ lo dee. A ibere wa kɔ nɛɛ a gaa baɛbee lo dee na Setan lo a le Pɔrɔ-edɔɔ̄, e lo dee ture nɛɛ mmɛ loo luh.​—⁠1 Kɔr 6:​9, 10; 1 Jɔn 5:⁠19.

5. Amunu epiaga na pio nɛɛ edora lokwa ba dap suāloo dee alu “biibii sī” sa bɔātɛ̄ etɛɛ̄nyɔɔ a?

⁵ Dee a “bɛɛasī” lu kee loo lo alu “biibii sī” a, e Jizɔs bee kɔ nwīepoo loo nɛɛ na etɛɛ̄nyɔɔ a. Ena anua a? Bu kaka, bu lo barakpaɛ̄ a nyɔɔnɛ, Jizɔs bee zuurabahtɔ̄ pya a wee ye nyɔɔnɛ dumɛ kiiloo pya zue ue esah. (Mat 7:15) Pio nɛɛ kɔ a ɛrɛ gbɛnɛ-edo yigabari a le, e gbɛnɛ-edo aba kɔ ba gaa tɔgɛe kaka ue. Elua edag gbɛnɛ-edo nɛɛ sa wa zimɛ dɛɛ̄ mmɛ lo kɛ̄ loo wa e’ɔa sa ba naa dapna gbī dee a ture nɛɛ mmɛ loo dum. Kerewo, a dap lu egbī lo dee muɛ. Jizɔs bee kɔ: “Lo a le bui tɔɔ̄ bu na ue, bui lu kaāna pya a wee mɛ nyɔɔnɛ dumɛ, e bui suāloo kaka ue, e kaka ue edoo kɔ bui aa bu zooro.” (Jɔn 8:​31, 32) Lee kɔ oo bee nyɔɔnɛ gbɛnɛ eku nɛɛ; mɛ o bee gbī kaka ue. O bee bɔātɛ̄ ebiibahkɛ̄ nɔ Muɛ̄ Ue Bari lo esuā nu a i gbī aābah, sa o gbaɛ̄tɔ̄loo pya tɔgɛnu Jizɔs. Pya dɔɔ̄na nu o bee nɔnage na kɔ, Jɛhova ɛmadɛɛ̄ kɔ i kiī tɔgɛnu pya ekwɔ sīdee yigabari sa ɔbɛ esere pya dee seseea a ɛrɛ nu edoo kiiloo taāŋabah yɔ. O nɔnage kɔ doo nu Jɛhova i gbī aābah le kpooraloo aaloo pya doonu a naa nia ye dap lu nu finiabah pio sɔ̄. (Mat 10:​34-36) Pio sɔ̄ a naa bee a waɛbah edoo pya nyaa ama. Kerewo, o bee kiisī nyɔnɛbee o wereloo o Tɛ a le li bunyɔɔ le kɔ o gbī edoo kɔ bu ye a ɛɛ. Naa ɛp kɛ̄ bu ye a ɛɛ loo doo a!​—⁠Kam 27:⁠11.

6. Dookɛ̄ Le-yɔɔ 119:​9, 10, 45, le 133 kɔ doo, ena eyerebah i nɛ kɔ i tɔɔ̄ bia nyɔɔ biibii sī dee a?

⁶ Aba sɔ̄ i bɔātɛ̄ etɛɛ̄nyɔɔ lo dee alu biibii sī a, ena eyerebah i nɛ kɔ i tɔɔ̄ bia nyɔɔ a? Naa ɛp ziī edoba ama. Kpe alu eka baɛ naɛsī loo te-maā wee doo kɔ nɛɛ a gaa ɔp fah aa dɔ maā. Lo kpe alu eka baɛ naɛsī loo lo te-maā a, wee kpega pya a gaa ɔp fah sa doo kɔ fah aa dɔ maā. Lɔgɔ nɛɛ naale ekɔ a bee piya sɔ̄ lo kpe le lo kɛ̄ lo ekpega wa! Pya daakuu Jɛhova a le bu Baibol le doodoo lo kpe alu eka baɛ naɛsī loo lo te-maā a. Pya ye daakuu ama kpega i sɔ̄ i le nyɔɔ lo biibii sī dee.​—⁠Buū Le-yɔɔ 119:​9, 10, 45, 133.

7. Pya zege e’ɛp dee alu biibii sī doodoo wa?

⁷ Pya zege, ekɔ a ɛrɛ pio sɔ̄ bui wee kɛɛrɛ kɔ pya daakuu Jɛhova lu lo a i bɔp ni? Taɛ nu Setan gbī kɔ o kɛɛrɛ lo. A gbī kɔ o sere ekɛɛrɛ nyɔɔ nu pya a le nyɔɔ dee a bɛɛasī aa doo, le kɛ̄ a bee kɔ ba gaa ɛrɛ ekpeloo doo. A dap su nu pya o gbo aa doo bie tɔkpa ale nu o muɛ nyɔɔ intanɛt daā kɔ o kɛɛrɛ kɔ a ɛrɛ nu o gaa peere. Setan gbī kɔ o kɛɛrɛ kɔ pya daakuu Jɛhova gaa a kpeg lɛɛ loo pya ekpeloo o bee ɛrɛ bu dum. * Mɛ  nyɛŋiabu kɔ: Setan naa gbī kɔ pya aa tɛɛ̄nyɔɔ alɛɛ dee a suā nu a wa le sī le kɛ̄ wa kiā e’mmɛ wa. Kerewo, Jɛhova edora kɔ pya a tɔɔ̄ bia nyɔɔ dee dum a suā nu a wa le mmsī, lo a le dum a naatah.​—⁠Yɔɔ 37:29; Ais 35:​5, 6; 65:​21-23.

8. Ena pya zege dap nɔ aāloo edoba Olaf a?

⁸ Kɛɛrɛ nu o dap nɔ aāloo nu a bee siraloo zege wuga nɛɛdam a kura Olaf. * Pya le ɛɛ le aba class bee ye zū kɔ a yii bu dogo kunagā. Sɔ̄ a bee baatɛ̄ kɔ Pya Ekeebee Jɛhova wee tɔɔ̄dum dɛɛa nyɔɔ kɛ̄ daakuu Baibol akii nyɔɔ le doo, pio pya miɔŋɔ nɛɛwa a bee le ye class bee gbī ezū ye kɔ a mae wa loo. Mɛ Olaf bee yira agara nɛ doo nu a lee. Mɛ a naa bee le aba doā-ɛp a bee kpesī lo. Olaf kɔ: “Pya na nɛɛ tɔgɛnu bee piiga lo ezū mɛ kɔ m si gbɛnɛ tɔkpa lokwa m dap lu nɛɛ pya nɛɛ enɛ enwadɛɛ̄. Ba bee mɛ kɔ nɛ kɔ lo mm doo wo, mm le ekiisī leere bu dum.” Ena a bee yerebah  nɛ Olaf kɔ a kiī ezū ama a? A bee kɔ: “M bee yii gbo pya a le bu na bɔŋanaloo. Ba bee le doodoo pya na butɔ. M bee bɔānagetɛ̄ ebiibahkɛ̄ nɔ Baibol eekɛ̄ m wee doo. Kɛ̄ m agɛrɛbah nɔnu doo, kɛ̄ m agɛrɛnage bah suā kɔ m emɔnae kaka ue doolo. E nu a sira aabu na bee, m bee biaɛfii lo etaāŋabah Jɛhova.”

9. Ena alu egbī aābah pya nɛɛ a gbī etɔɔ̄ nyɔɔ dee alu biibii sī a?

⁹ Setan egbī edoo nu edoo kɔ o aa nyɔɔ dee a ture nɛɛ mmɛ loo dum. A gbī kɔ o nyɔɔnɛ gbɛnɛ-edo nɛɛ a le nyɔɔ bɛɛasī dee “lo a ture nɛɛ mmɛ loo pepe.” (Mat 7:13) Kerewo, i gaa le bia nyɔɔ dee alu biibii sī lo a le i kiisī lo egbaɛ̄tɔ̄ Jizɔs le lo e’ɛp lo dee nua nu kpega. Nyaawo, i naa ɛp dɔɔ̄na nu Jizɔs bee kɔ i doo.

10. Dookɛ̄ a le bu kpa Matiu 5:​23, 24 doo, ena Jizɔs bee kɔ i doo a?

¹⁰ Buū Matiu 5:​23, 24. Jizɔs bee baatɛ̄ ziī siranu a wee kuī loo pya Juu a gaa bee ye gbaɛ̄tɔ̄loo. Naa kɛɛrɛ kɔ ziī nɛɛ a le bu tɔkaɛ ekpɛ̄naloo esu nam esu wɔma zɔɔ nɛ nɛɛ ewɔp. E taɛ lo sɔ̄, lo nɛɛ nyɛŋiabu kɔ ye wuga ɛrɛ ziī nu ye pima, e aaloo lo nam a gaa bee gbī esu wɔma zɔɔ a bie lo kɛ̄ sa “kii.” Ena anua a? Ena a dap kuī ee waara zɔɔ nɛ Jɛhova a? Jizɔs bee kɔ kpaāna kɔ: “Dasī doo kɔ o wuga yɔrɔ bui le bu efɛɛloo.”

11. Naa baatɛ̄ epiaga a bee su bah Jekɔb lo edap nyɔɔnɛ Isɔ sere efɛɛloo.

¹¹ I dap nɔ gbɛnɛ-edo nu akiiloo sere efɛɛloo tɛ̄maloo enɔ nu akiiloo Jekɔb a bee lu tɛ-beegā. Sɔ̄ nu alu 20 zua etɛ̄na aā sɔ̄ Jekɔb bee aa ye buɛ̄, Bari bee ye nɛ lok tɛ̄maloo ziī ɛnjɛl kɔ a obia kii ye buɛ̄. (Jɛn 31:​11, 13, 38) Mɛ a ɛrɛ taāŋa a bee le. Ye gbɛnɛ wuga nɛɛdam a kura Isɔ aa bee gbī efɛ ye. (Jɛn 27:41) Jekɔb bee “ɛrɛ gbɛnɛ bɔɔ e beenyiɛ ye bee ye nɛ” taāŋa kɔ ye wuga dap lege aa ye ɛrɛ saŋ pima. (Jɛn 32:⁠7) Ena Jekɔb bee doo lo enyɔɔnɛ ye wuga sere efɛɛloo a? Tuatua, a bee biibahkɛ̄ yere kara nɛ Jɛhova nyɔɔ ue ama. Lɛɛ, a dɔɔ̄ nu ma Isɔ. (Jɛn 32:​9-15) Bu kpɛdumɛ, sɔ̄ baɛ wuga a naa gaa bee kɔna ue nɛ ziī ama mɔna sī le sī, Jekɔb bee tɔgɛ enwadɛɛ̄ loo Isɔ. A bee uubeekɛ̄ nɛ Isɔ, naale aba ziī sɔ̄, ale baɛ sɔ̄, mɛ ɛrɛba sɔ̄! Bu kumalookɛ̄ le enwadɛɛ̄, Jekɔb bee nyɔɔnɛ ye wuga sere efɛɛloo.​—⁠Jɛn 33:​3, 4.

12. Ena i dap nɔ aāloo edoba Jekɔb a?

¹² I nɔ nu aāloo kɛ̄ Jekɔb bee kpɛ̄naloo lo ezɔ̄ŋia ye wuga Isɔ sa ye nyɔɔnɛ kɔnia ue doo. Jekɔb bee kumalookɛ̄ sa bara yerebah aābah Jɛhova. Lɛɛ a doo nu a bee yere kara kumaloo a, tɛ̄maloo e’obia nyɔɔnɛ ye wuga sere efɛɛloo dookɛ̄ a bɔloo doo. Sɔ̄ baɛ wuga ama bee mɔna, Jekɔb naa bee nyɔɔnɛ ye wuga Isɔ amkɛ̄ nyɔɔ nɛɛ a bee doo nu a lee ale nɛɛ a bee doo nu a bee piya. Nu Jekɔb bee seeasī na lo enyɔɔnɛ ye wuga sere efɛɛloo. I nɔ edoba Jekɔb doodoo wa?

13-14. Lo i biirebu ziī i wuga bu yira, ena i doo a?

¹³ Ili i lu pya a gaa kiā nyɔɔ dee a ture nɛɛ mmɛ loo dum gbī enyɔɔnɛ pya i  wuga tɔɔ̄ bu efɛɛloo. (Rom 12:18) I doo dogo doodoo wa sɔ̄ i suā kɔ i ebiirebu ziī i wuga bu yira ni? Doodoo Jekɔb, i biibahkɛ̄ yere kara nɛ Jɛhova. I dap ye bara kɔ a nɛ leelee i epiaga lokwa i dap sikɛ̄ nyɔɔnɛ i wuga le bu efɛɛloo.

¹⁴ I sunage sɔ̄ ɛma aba ii. I dap bip aba ii kɔ: ‘M kpɛ̄nage loo eyiga kɔ m tɛɛ̄e ekwɔ, kumalookɛ̄ bara kɔ alu e’aaloo mɛ nɛ sa sere efɛɛloo ni? Etɔɔ̄loo Jɛhova le Jizɔs doodoo wa lo m dasī nyɔɔnɛ na wuga nɛɛdam ale nɛɛwa sere efɛɛloo ni?’ Ture pya ebip ama ezū i kɔ i gbaɛ̄tɔ̄ Jizɔs sa kumalookɛ̄ siloo i wuga bu yira lokwa i ye dap nyɔɔnɛ sere efɛɛloo. Bu lo sīdee, i dap nɔ edoba Jekɔb.

15. Bu mɛ sīdee na susu zuurabahtɔ̄ a le bu Pya Ɛfɛsɔs 4:​2, 3 edap i yerebah nɛ kɔ i nyɔɔnɛ i wuga sere efɛɛloo a?

¹⁵ Naa kɛɛrɛ nu ebee sira lo Jekɔb bee eeloo nɛ nyɔɔ sɔ̄ a bee zɔ̄ŋia ye wuga. Nu ebee sira ebee lu kaāna kee. Sɔ̄ i siloo i wuga wee kwa taāŋa a i le yɛɛ, i ɛrɛ edoo wo bu kumalookɛ̄. (Buū Pya Ɛfɛsɔs 4:​2, 3.) Kam 18:19 kɔ: “Wuga alu eyerebah nɛ le doodoo gbɛnɛ buɛ̄ a aga, mɛ kana le doodoo dɛ̄dɛɛ̄ nu dumɛ bū lo e’aga tɔ nyɔɔ.” Bara alu edoo bu kumalookɛ̄ dap doo kɔ i yii bu lo “e’aga tɔ nyɔɔ.”

16. Ena i kɛɛrɛbu loo a, e ena anua a?

¹⁶ Alunage ebɛɛ̄ kɔ i kɛɛrɛ nu i kɔ nɛ i wuga le kɛ̄ i kɔ doo. Sɔ̄ i ekpɛ̄naloo, i siloo nɛɛ i bee biirebu a sa suā kɔ nu i gbī edoo na dodoo kɔ bu ye aa biira na. Tua sɔ̄, a dap kɔ pya nu a i dap biirebu. A dap waɛ esi saŋ ale kɔ ue leere aba ii, mɛ ekɔ dodoo wo edooge kɔ efɛɛloo a le ni? Eeye doo pippip. Nyɛŋiabu kɔ nyɔɔnɛ o wuga sere efɛɛloo kuī ee gbī esuā nɛɛ a bee doo nu a lee ale nɛɛ a bee doo nu a bee piya.​—⁠1 Kɔr 6:⁠7.

17. Ena o dap nɔ aāloo edoba Gilbert a?

¹⁷ Ziī wuga nɛɛdam a kura Gilbert bee piiga lo elu nɛɛ a sere efɛɛloo. A bee kɔ: “Ziī nɛɛ a nuūna na butɔ le mm bee ɛrɛ gbɛnɛ taāŋa. Bu nu a eeloo baɛ zua, m bee piiga lo ekɔ ue bu efɛɛloo lokwa i dap sikɛ̄ yiiloo ziī.” Dɔɔ̄na ena Gilbert bee doo a? “Lɛɛ m gae nyɔɔnɛ na wuga ama kɔnia ue, m wee yere kara  sa m kwa na beenyiɛ leere lokwa mm si saŋ lo a kɔ ziī ue a naa bɔloo mɛ nɛ. A bee lu ebɛɛ̄ kɔ m kpɛ̄naloo e’aaloo ye nɛ. Mm bee doodoo bee mda na m dooe nu a lee a, e m bee dābeeloo kɔ nu a bɔloo kɔ m doo na lo esere efɛɛloo.” Ena a bee sira aabu a? Gilbert kɔ: “Nii’ee, m ɛrɛ efɛɛloo beenyiɛ nyɔɔ le gbanialoo m nyɔɔnɛ pya na butɔ ɛnia.”

18-19. Lo i ebiirebu ziī nɛɛ, ena i biaɛfii lo edoo a, e ena anua a?

¹⁸ Ena o biaɛfii lo edoo lo o muɛ kɔ o ebiirebu ziī o wuga bu yira a? Nyɔɔnɛ zuurabahtɔ̄ Jizɔs akiiloo sere efɛɛloo. Kɔ ue nɛ Jɛhova akiiloo lo kɛ̄tɔɔ̄, sa dɛrɛ nyiɛ nyɔɔ kɔ ye kaɛ edɔɔ̄ eyerebah a nɛ kɔ o lu nɛɛ a sere efɛɛloo. Lo o doo wo, o le bu ɛɛbu, e o tɔgɛ kɔ o gaa gbaɛ̄etɔ̄ Jizɔs.​—⁠Mat 5:⁠9.

¹⁹ Bu i ɛɛ kɔ Jɛhova nɛ i zuurabahtɔ̄ tɛ̄maloo Jizɔs Kraist alu “ekobee bɔŋanaloo.” (Ɛfɛs 5:23) Doodoo nɛɛ lɛɛratam Pita, Jems, le Jɔn, dooraa i biaɛfii lo e “gbaɛ̄tɔ̄” Jizɔs. (Mat 17:⁠5) I enɔā kɛ̄ i dap doo lo ama doo tɛ̄maloo enyɔɔnɛ pya i wuga bu yira lo i ebiirebu sere efɛɛloo. Dodoo wo le tɔɔ̄ bia nyɔɔ biibii sī dee a ture nɛɛ mmɛ loo dum edoo kɔ i ɛrɛ gbɛnɛ-edo leelee anyaawo le biakɛ̄ ɛɛbu li deesī.