A bee lu ekpɔā pio aba bie kɛ̄ a wee lu e’ɛp pya nɛɛwa kɔ ba naale dɛɛ̄ lɔgɔ nu. Bu edoba, Hans, alu nɛɛ kuūdɛɛ̄loo sɛkiut li Bolivia kɔ: “Bee lu ekpɔā pio pya nɛɛdam bie kɛ̄ a wee lu e’ɛp nɛɛwa kumakɛ̄, lo a doo kɔ ba a kɛɛrɛ kɔ nɛɛdam lee ee nɛɛwa.” Ziī nɛɛ kanɛɛ a kura Shengxian, alu Taiwan kɔ: “Kɛ̄ m wee tɔɔ̄, gbɛnɛ-edo pya nɛɛdam naa wee gbī kɔ pya nɛɛwa a yere egā bu wa ue. Lo ziī nɛɛdam kɔ nu alu ekɛɛrɛ ziī nɛɛwa, pya ye gbo wee ye ɛp kumakɛ̄.” Pya dɔɔ̄na nɛɛdam tɔgɛ kɛ̄ ba naa ɛp nɛɛwa yeredɛɛ̄ nu doo bu pya dɔɔ̄na sīdee a naa waɛ esuā. Bu edoba, ba dap kɔ nu mɔm lo egbɛɛrɛ egā loo pya nɛɛwa.

Alu nu ɛɛbu kɔ lɔgɔ nɛɛ a naa dap nyaana baloo kɛ̄ a bee lu ekpɔā ye doo naale. A dap ɔbɛ ekɛɛrɛ kɔ nɛɛdam lee ee nɛɛwa. (Ɛfɛs 4:​22-24) Dap lu edoo lo ama tɛ̄maloo enɔ edoba Jɛhova. Bu ekobee ue ama, i nɔ kɛ̄ Jɛhova aara pya nɛɛwa doo, kɛ̄ pya wuga nɛɛdam dap nɔ kɛ̄ Jɛhova aara pya nɛɛwa doo, le kɛ̄ pya kanɛɛ dap zaāsī lo etɔgɛ enwadɛɛ̄ kumaloo pya wuga nɛɛwa doo.

BU MƐ SĪDEE NA JƐHOVA AARA PYA NƐƐWA A?

Jɛhova sere kaāna le edoba nyɔɔ kɛ̄ e’aara pya nɛɛwa doo. Doodoo Tɛ a ɛrɛ toesaɛ̄, a wereloo dɛ̄dɛɛ̄ nɛɛ. (Jɔn 3:16) E pya wuga nɛɛwa a tɔɔ̄ agara le doodoo pya ye miɔŋɔ nɛɛwa. Naa ɛp pio sīdee Jɛhova tɔgɛ kɔ a yeree ka loo pya nɛɛwa ama.

A aara wa bu sīdee baɛsī naale loo. Jɛhova bee dɛm nɛɛdam le nɛɛwa bu ye bera.  (Jɛn 1:27) A naa bee dɛm pya nɛɛdam kɔ ba a suānu, ale para doo nu ee pya nɛɛwa, e a naa ɛp kɔ nɛɛdam lee ee nɛɛwa. (2 Edoo 19:7) A bee dɛm pya nɛɛdam le nɛɛwa kɔ ba a dābeeloo Baibol bu aba sīdee sa ɛrɛ pya Ye lele elap dogo. Jɛhova ɛp yira pya nɛɛdam le nɛɛwa bu aba sīdee, kere ba ɛrɛ bɛābu lo etɔɔ̄ a nyɔɔ kɛnɛkɛ̄ bu Paradais ale lo ekii bunyɔɔ sa bɛɛ doodoo pya mɛnɛ le pya ewɔp. (2 Pit 1:1) Bu kaka, Jɛhova naa ɛp pya nɛɛwa kumakɛ̄.

A gbaɛ̄ wa tɔ̄ loo. Jɛhova kɛɛrɛ kɛ̄ nu tɔɔ̄loo pya nɛɛwa doo le taāŋa ba gaa tɛɛ̄ bu. Bu edoba, a bee gbaɛ̄tɔ̄ sa agara kara Rachel le Hana. (Jɛn 30:22; 1 Sam 1:​10, 11, 19, 20) Jɛhova doonage kɔ pya a bee ɛm Baibol a ɛm nu akiiloo pya nɛɛdam a bee gbaɛ̄tɔ̄loo pya nɛɛwa. Bu edoba, Abreham bee su zuurabahtɔ̄ Jɛhova bee ye nɛ kɔ a gbaɛ̄tɔ̄loo ye wa a kura Sera. (Jɛn 21:​12-14) Mɛnɛ Devid bee gbaɛ̄tɔ̄loo Abigail. A bee ɛp kɔ Jɛhova na a ye lɛɛra kɔ a kɔe ue ye nɛ a. (1 Sam 25:​32-35) Jizɔs alu nɛɛ a bee tɔgɛ elap dogo ye Tɛ bu sīdee a mmana bee gbaɛ̄tɔ̄loo ye ka Meri. (Jɔn 2:​3-10) Pya edoba ama tɔgɛ kɔ ziī sīdee Jɛhova yere ka loo pya nɛɛwa na gbaɛ̄ wa tɔ̄ loo.

A dɛrɛ wa nyiɛ nyɔɔ. Bu edoba, Jɛhova bee dɛrɛ nyiɛ nyɔɔ Iv sa ye su nua nɛɛ eyerebah lo ekuūdɛɛ̄loo kɛnɛkɛ̄. (Jɛn 1:28) Tɛ̄maloo edoo wo, a tɔgɛ kɔ a naa ɛp kɔ Adam lee ye ee, mɛ alu nɛɛ yerebah a bɔloo ye nɛ. Jɛhova bee dɛrɛnage nyiɛ nyɔɔ Dɛbora le Hulda lo ba bee lu pya mɔmanudɛɛ̄ sa kɔ ba a nɛ zuurabahtɔ̄ pya Ye nɛɛ, gbaāloo ziī nɛɛ-biaɛ̄ le mɛnɛ-buɛ. (Biaɛ 4:​4-9; 2 Mɛnɛ 22:​14-20) Nii’ee, Jɛhova nɛ tam pya nɛɛwa ba lu Nɛɛ Kraist kɔ ba a si. Pya nɛɛwa ba bɔ ture nyiɛ loo ama gaa si tam doodoo pya zue ue bu bɔŋanaloo, pya sɛmdee, le pya zue ue dɔɔ̄na edo. Ba yerebah lo ewu, sa si tam loo i Tɔ Nɔnu Buɛ̄-mɛnɛ le tɔ-naatam doo kɔ a bia le. Pio aba gaa si tam bie Bɛtɛl, e pya lo dɔɔ̄na gaa si tam bie pya kɛ̄ a gaa lu etɔɔ̄ tap ue. Pya wuga nɛɛwa ama le doodoo gbɛnɛ gbo nɔ̄ lo Jɛhova gaa su daā nu alu Ye ekɛɛrɛ gbɔ̄mɛɛ. (Yɔɔ 68:11) Bu kaka, Jɛhova naa ɛp pya nɛɛwa nua pya a ɔloo ale pya a naa bɔloo.

BU MƐ SĪDEE NA PYA WUGA NƐƐDAM DAP NƆ LO E’AARA PYA NƐƐWA DOOKƐ̄ JƐHOVA DOO A?

Pya wuga nɛɛdam, lokwa bui dap suā lo a le bui gaa aarage pya i wuga nɛɛwa dookɛ̄ Jɛhova doo, alu ebɛɛ̄ kɔ bui ɛma-ɛp bui ekɛɛrɛ le dogo leere. I gbī yerebah lokwa i dap doo wo. Dookɛ̄ X-ray wee tɔgɛ dumɛloo a le bu nyiɛ nɛɛ doo, kɛ̄ le gbo le Muɛ̄ Ue Bari dapnage i yerebah nɛ kɔ i muɛ ɛrɛgeba pɔrɔ ekɛɛrɛ i ɛrɛ kumaloo pya nɛɛwa doo lo. Ena i doo lokwa i ɛrɛ lo yerebah a?

Bip o kaāna gbo. (Kam 18:17) A lee kɔ i bip i gbo i dɛrɛ nyiɛ nyɔɔ lo a dābeeloo nu sa lu fɛgɛ pio ebip kɔ: “M aara pya wuga nɛɛwa doodoo wa? Ba dapge kɔ m nwa wa dɛɛ̄ ni? A ɛrɛ ziī nu a bɔloo kɔ m kwabaloo bu kɛ̄ m wa nyɔɔnɛ dania nu doo ni?” Lo o gbo kɔ pio nu alu ebɛɛ̄ kɔ o kwabaloo, o aa amkɛ̄ sa kɔ ue leere aba ɔɔ. Taāwo, piiga lo ekwabaloo kɛ̄ alu ebɛɛ̄ kɔ o doo wo.

Nɔ Muɛ̄ Ue Bari. Sīdee a lee eera i dap suā lo a le i gaa aarage pya wuga nɛɛwa leere na tɛ̄maloo su Muɛ̄ Ue Bari ɛma nu i wa kɛɛrɛ kumaloo le i dogo. (Hib 4:12) Sɔ̄ i nɔ Baibol, i nɔ nu akiiloo pya nɛɛdam a bee aara pya nɛɛwa bu le sīdee le pya ba naa bee doo wo. I dap su pya edoba ama ɛma kɛ̄ i aara pya nɛɛwa doo. Gbaāloo wo, susu pya dɔɔ̄na dɔ Kpa Kaɛ dooreloo ziī edoo kɔ i aa su pio dɔ Baibol yeākpotɛ̄ ekwɔ ekɛɛrɛ i ɛrɛ kumaloo pya nɛɛwa. Bu edoba, dookɛ̄ 1 Pita 3:7 kɔ doo, alu ekɔ alu e “su enwadɛɛ̄ sere nyɔɔ nɛɛwa doodoo pya a ɛrɛ e’ɔaloo eenyɔɔ.” b Ekɔ lo ama kura kɔ ba naale dɛɛ̄ lɔgɔ nu, sa naa suānu ale para nu tɔɔ̄ pya nɛɛdam ni? Naale doo wo doo pippip! Susu pya ue Pita kɔ dooreloo nu a le bu Pya Galetia 3:​26-29 tɔgɛ kɔ Jɛhova esagɛ  pya nɛɛwa le pya nɛɛdam kɔ ba a nyɔɔnɛ Jizɔs bɛɛ li bunyɔɔ. Sɔ̄ i nɔ Muɛ̄ Ue Bari sa bip i kaāna gbo alu nɛɛdam ale nɛɛwa kɛ̄ i aara pya nɛɛwa doo, i dap nɔ lo etɔgɛ enwadɛɛ̄ kumaloo pya i wuga nɛɛwa bu sīdee a bɔloo.

BU MƐ SĪDEE NA PYA KANƐƐ TƆGƐ ENWADƐƐ̄ KUMALOO PYA WUGA NƐƐWA A?

Aāloo edoba pya kanɛɛ a ɛrɛ wereloo, pya wuga nɛɛdam bu bɔŋanaloo dap nɔ lo e’aara pya wuga nɛɛwa bu enwadɛɛ̄. Bu mɛ sīdee na pya kanɛɛ gaa zaāsī lo etɔgɛ enwadɛɛ̄ kumaloo pya wuga nɛɛwa a? Naa ɛp pio sīdee ama.

Ba kaɛgɛ pya wuga nɛɛwa. Nɛɛ lɛɛratam Pɔɔl bee sere le edoba kɛ̄ nɛ pya kanɛɛ. A bee kaɛgɛ gbɛnɛ-edo pya wuga nɛɛwa bu kpa a bee ɛm ma bɔŋanaloo a bee le Rom. (Rom 16:12) O dapge kɛɛrɛbu kɛ̄ bu pya lo wuga nɛɛwa bee ɛɛ doo sɔ̄ a bee lu ebuū lo kpa bie bu bɔŋanaloo ni? Bu aba lo sīdee, pya kanɛɛ kaɛgɛnage pya wuga nɛɛwa loo wa le elap dogo le tam ba si nɛ Jɛhova anii’ee. Lo ama doo kɔ pya wuga nɛɛwa a suā kɛ̄ ba wa nɛ enwadɛɛ̄ sa wa tɔgɛ nialoo doo. Pya ue yere mɛm loo a aabah nɛɛ kanɛɛ dap lu taɛ nu pya i wuga nɛɛwa gbī lokwa ba kiisī lo etaāŋabah Jɛhova bu bɔ ture nyiɛ loo.—Kam 15:23.

Sɔ̄ pya kanɛɛ kaɛgɛ pya i wuga nɛɛwa, ba doo kɔ ba a suā taɛ nu a gaa lu ekaɛgɛ wa loo. Ena anua a? Ziī wuga nɛɛwa a kura Jessica kɔ: “A wee lee sɔ̄ pya wuga nɛɛdam kɔ nɛ wuga nɛɛwa kɔ ‘o gaa piiga.’ Kerewo, a wee i nia kaāna sɔ̄ pya wuga nɛɛdam kɔ taɛ nu ba gaa i doo yaa loo, doodoo sɔ̄ i tɔgɛ pya i miɔŋɔ kɔ ba a ɛŋɛtɛ̄kɛ̄ sa ba aa yere kɔma sɔ̄ enɔānu gaa kiisī, le sɔ̄ i aara nɛɛ i wee nɔɛ̄ Baibol nua enɔānu.” Sɔ̄ pya kanɛɛ kɔ taɛ nu ba kaɛgɛ pya wuga nɛɛwa loo, a doo kɔ pya wuga nɛɛwa a muɛ kɔ ba lu ebɛɛ̄ bu bɔŋanaloo sa aa lu etɔgɛ wa nialoo.

 Ba gbaɛ̄tɔ̄loo pya wuga nɛɛwa. Pya kanɛɛ a kumalookɛ̄ suā kɔ naale aba alaba na ba suā dɛ̄dɛɛ̄ nu a. Pio pya kanɛɛ a suā doo wo wee gbī lɛra ekɛɛrɛ a aabah pya wuga nɛɛwa, e ba wee gbaɛ̄tɔ̄ leere sɔ̄ ba gaa wa kɔ ue nɛ. Sɔ̄ pya kanɛɛ doo wo, ba yere mɛm loo pya wuga nɛɛwa sa alaba ɛrɛnage biī aāloo. Bu mɛ sīdee? Ziī nɛɛ kanɛɛ a kura Gerardo lo a gaa si tam Bɛtɛl kɔ: “M emɔna kɔ sɔ̄ m gbī tura ekɛɛrɛ aābah pya wuga nɛɛwa a yerebah mɛ nɛ kɔ m dap si na tam leere. Gbɛnɛkpo aba esiatam ama bu nyɔɔnyɔɔ sɔ̄ ee gbɛnɛ-edo pya wuga nɛɛdam.” Gbɛnɛ-edo pya wuga nɛɛwa aa si tam sɛmdee bu bɔŋanaloo, nyɔɔwo ba suā gbɛnɛkpo nu akiiloo pya a tɔɔ̄ kɛ̄ i gaa zue ue. Ziī nɛɛ kanɛɛ a kura Bryan kɔ: “Pya wuga nɛɛwa ɛrɛ gbɛnɛ-edo nu ba dap doo bu bɔŋanaloo. Nyɔɔwo, ɛrɛ biī aāloo nu ba suā!”

Pya kanɛɛ a suānu naa wee ɛp nu alu ekɛɛrɛ pya wuga nɛɛwa tɛrɛ. Ena anua a? Ziī nɛɛ kanɛɛ a kura Edward kɔ: “Nu alu ekɛɛrɛ wuga nɛɛwa dap yerebah nɛ wuga nɛɛdam kɔ a dābeeloo nu leere sa ye yerebah nɛ kɔ a ɛrɛ toesaɛ̄. (Kam 1:5) Kere nɛɛ kanɛɛ naale edoo nu lo wuga nɛɛwa kɔ, a dap ye doo yaa loo pya nu a yere nukuādɛɛ̄ loo le ye lɛra ekɛɛrɛ.

Ba kpɔā pya wuga nɛɛwa. Pya kanɛɛ edaābeeloo nu wee gbī sīdee ekpɔā pya wuga nɛɛwa. Bu edoba, ba dap tɔgɛ pya wuga nɛɛwa kɛ̄ ba esere zɔ̄zɔ̄ŋia a wee lu e’ɛrɛ lɛɛ a gae elu ekii uwe zue ue doo, sɔ̄ wuga nɛɛdam eliamaā naale kɛ̄. Ba dap kpɔā pya wuga nɛɛwa lokwa ba dap su pya nu siātam ale machine siātam leere, le lokwa ba dap yerebah loo wuwu sa kwaloo pya i kɛ̄ etɔɔ̄ taāŋabah. Pya a gaa kuūdɛɛ̄loo tam bie Bɛtɛl, ekpɔā pya wuga nɛɛwa lokwa ba dap si keekee tam. Pio lo tam na kwakwaloo nu, yaɛ nu, kuūdɛɛ̄loo kɛ̄ alu esu kpugi daānu doo, su kɔmputa siātam, le pya dɔɔ̄na nu. Sɔ̄ pya kanɛɛ kpɔā pya wuga nɛɛwa, a tɔgɛ kɔ ba dɛrɛ wa nyiɛ nyɔɔ sa naa ɛp wa tɛrɛ.

Gbɛnɛ-edo pya wuga nɛɛwa wee su kpɔā ba ɛrɛ aābah pya kanɛɛ ama yeābah nɛ pya dɔɔ̄na. Bu edoba, pio pya wuga nɛɛwa su kari ba ɛrɛ akiiloo tam wube yeābah nɛ pya dɔɔ̄na tɛ̄maloo ewu tɔ wa nɛ sɔ̄ bɔgia siranu sira. E pya dɔɔ̄na wuga nɛɛwa su pya kari ba bee nɔ bu tam zue ue yeābah nɛ pya dɔɔ̄na wuga nɛɛwa lokwa ba dapnage para zue ue. Pya wuga nɛɛwa ama ɛp pya kanɛɛ a bee wa kpɔā doodoo wa? Ziī wuga nɛɛwa a kura Jennifer kɔ: “Sɔ̄ m bee le gaa si tam loo ziī Tɔ Nɔnu Buɛ̄-mɛnɛ, nɛɛ a bee kuūdɛɛ̄loo lo tam bee mɛ kpɔā leere. A bee yere nukuādɛɛ̄ loo tam m bee si, sa a bee mɛ kaɛgɛ. A nia mɛ lo enyɔɔnɛ ye siniatam nyɔnɛbee m muɛ kɔ a yere mɛ ka loo sa mɛ dɛrɛ nyiɛ nyɔɔ.”

BIĪ A LE BU AARA PYA WUGA NƐƐWA DOODOO PYA A NUŪNA I BUTƆ

I wereloo pya i wuga nɛɛwa ba bɔ ture nyiɛ loo dookɛ̄ Jɛhova doo! Nyɔɔwo i aara wa doodoo pya a nuūna i butɔ. (1 Tim 5:​1, 2) Bu i ɛɛ lo enyɔɔnɛ wa siniatam. E bu i ɛɛ kaāna sɔ̄ i suā kɔ ba muɛ kɔ i were wa loo sa wa yerekpotɛ̄. Ziī wuga nɛɛwa a kura Vanessa kɔ: “Bu mɛ ɛɛ lo ele bu bɔŋanaloo Jɛhova, lo pya nɛɛdam ba doo kɔ loo mɛ a sukɛ̄ le emma bu.” Ziī wuga nɛɛwa a le Taiwan kɔ: “Bu mɛ ɛɛ kaāna kɔ Jɛhova le ye bɔŋanaloo yere dua ka ama loo pya nɛɛwa sa kɛɛrɛbu loo kɛ̄ nu i tɔɔ̄loo doo. Lo ama agɛrɛtɛ̄ na yira sa doo kɔ m agɛrɛbah tɔgɛ nia loo dee a mɛ kpaānɛ lo ele bu bɔŋanaloo Jɛhova.”

Naa ɛp kɛ̄ bu Jɛhova e’ɛɛ doo sɔ̄ a muɛ pya wuga nɛɛdam ba bɔloo eture nyiɛ loo ba gaa piiga lo e’aara pya nɛɛwa dookɛ̄ alɛ doo a! (Kam 27:11) Ziī nɛɛ kanɛɛ a kura Benjamin a tɔɔ̄ Scotland kɔ: “Gbɛnɛ-edo pya nɛɛdam a le bu nyɔuwe anii’ee naa nɛ enwadɛɛ̄ pya nɛɛwa doo pippip. Nyɔɔwo, ɛrɛgeba sɔ̄ pya nɛɛwa lu Tɔ Nɔnu Buɛ̄-mɛnɛ, i gbī edoo kɔ ba a muɛ kɔ i were wa loo sa wa nwadɛɛ̄.” Dooraa i piiga lo enɔ Jɛhova tɛ̄maloo e’aara pya i wuga nɛɛwa bu sīdee wereloo le loo sa wa nɛ enwadɛɛ̄.—Rom 12:10.