1-2. Dookɛ̄ 1 Pita 4:7, 8 kɔ doo, e na eyerebah i nɛ lo etama e’aga sɔ̄ a?

SƆ̄ I etɔ̄na waɛloo “kpɛdumɛ dee” kaāna a, i dap kpesī e’agaba taāŋa. (2 Tim 3:1) Bu edoba, sɔ̄ a bee lu edoo doonu tɛrɛ kpa sah bu ziī buɛ̄ a le barasī Africa kɛ̄ enaani wee dɛp kii ba bee bebe sa fɛga nɛɛ. Nu bee agaloo pya i wuga bie lo barasī loo ini’ī enɔɔ̄ nyɔɔbee ba bee le gaa bebe dɛ̄dɛɛ̄ kɛ̄ a wa tɛɛ̄ ɛŋɛnɛ. E na a bee wa yerebah nɛ kɔ ba a dap tama e’aga kɛ̄tɔɔ̄ ama ani? Pio aba bee tɔɔ̄ tɔ pya wuga taāŋa naa bee ina wa barasī. Ziī wuga nɛɛdam bee kɔ: “Bu kɛ̄tɔɔ̄ ama, mm bee ɛrɛ ekiɛ̄nu nyɔɔbee m bee le yɛɛ pya wuga. I bee dap yere mɛm loo ɛnia ii.”

² Sɔ̄ “gbɛnɛ etɛɛrɛloo” ebɔātɛ̄, i ɛrɛ ɛɛbu lo pya i gbo a i wereloo le i kpaɛ̄. (Mum 7:14) Nyɔɔwo, a lu gbaragbara kɔ i agɛrɛtɛ̄ gbanialoo i ɛrɛ loo pya wuga anyaawo. (Buū 1 Pita 4:7, 8.) I dap nɔ gbɛnɛ-edo nu aāloo Jeremaia, lo pya ye gbo bee yerebah doo kɔ a tɔɔ̄dum lɛɛ aa lu sɔ̄ a bee lu egbeesī Jerusalɛm. * Bu mɛ sīdee na i dap nɔ edoba Jeremaia ani?

3. (a) E na ebee dap doo kɔ Jeremaia a kpooraloo sa tɔɔ̄ aba ɛɛ a? (b) E na Jeremaia bee kɔ nɛ Baruk a, e e na a bee sira aabu a?

³ Bu nu alu 40 zua, Jeremaia bee tɔɔ̄ yɛɛ pya nɛɛ a naa tɔɔ̄ agara nɛ Jɛhova, naa daba a bee tɔɔ̄ nage yɛɛ  pio pya ye manamana a le ye buɛ̄ Anatot. (Jer 11:21; 12:6) Kerewo, a naa bee kpooraloo sa tɔɔ̄ aba ɛɛ. A bee kɔ kɛ̄ nu ye tɔɔ̄loo doo nɛ nɛɛ ɛm kpa a kura Baruk a bee tɔɔ̄ agara nɛ Jɛhova, e i suā kɛ̄ nu bee tɔɔ̄loo Jeremaia doo nyɔɔbee alu e’ɛm sere kɛ̄. (Jer 8:21; 9:1; 20:14-18; 45:1) I dap kɛɛrɛ dua wereloo le enwadɛɛ̄ a bee le yɛɛ Jeremaia le Baruk sɔ̄ a gaa bee ɛm nu a bee sira bu dum Jeremaia.​—Jer 20:1, 2; 26:7-11.

4. E na Jɛhova bee kɔ Jeremaia a doo a, e bu mɛ sīdee na tam ama bee agɛrɛtɛ̄ gbanialoo a bee le yɛɛ Jeremaia le Baruk a?

⁴ Jeremaia bee zuurabahtɔ̄ pya Izrɛl loo nu a gaa le sira loo buɛ̄ Jerusalɛm. (Jer 25:3) Lokwa pya nɛɛ kiiya, Jɛhova bee kɔ nɛ Jeremaia kɔ a ɛm ye ue zuurabahtɔ̄ sere bu ui kpa. (Jer 36:1-4) Baɛbaɛ beenyiɛ naale loo kɔ, sɔ̄ Jeremaia le Baruk gaa bee si tam Jɛhova bee wa lɛɛra lo a bee wa su pio enɔɔ̄ bah a, ba bee ɛrɛ kaāna kɔnia sɔh lo a doo kɔ wa yira a agatɛ̄.

5. I doodoo wa suā kɔ Baruk bee lu le gbo Jeremaia?

⁵ Sɔ̄ ba e’ɛma lo ue zuurabahtɔ̄ sah, Jeremaia bee dɛɛa nyɔɔ ye gbo Baruk kɔ a kɔ lo yereue nɛ pya a bee tɔɔ̄ Jerusalɛm. (Jer 36:5, 6) Baruk bee ɛrɛ e’agaloo sa si tam a aga ama. O dapge kɛɛrɛ kɛ̄ bu Jeremaia bee ɛɛ doo sɔ̄ Baruk bee yii bu tɔkaɛ sa buū lo ui kpa dookɛ̄ a bee lu elɛɛra ye doo ni? (Jer 36:8-10) Sɔ̄ pya nɛɛbee Juda dā nu Baruk edoora, ba bee kɔ a buū lo ui kpa siā nyɔɔ wa nɛ! (Jer 36:14, 15) Pya lo nɛɛbee bee biaɛfii lo ekɔ yereue Jeremaia nɛ Mɛnɛ Jehoiakim. Ba bee lu  fɛgɛ loo Baruk sa ba kɔ ye nɛ kɔ: “Kii wee gɔā, olo le Jeremaia, e bui aa doo kɔ lɔgɔ nɛɛ a suā kɛ̄ bui le.” (Jer 36:16-19) Zuurabahtɔ̄ ama bee lee!

6. E na Jeremaia le Baruk bee doo sɔ̄ alu egbāna wa sī a?

⁶ Mɛnɛ Jehoiakim bee ɛrɛ saŋ sɔ̄ a bee dā pya ue Jeremaia bee ɛm mmɛ kɛ̄ a ɔp lo ui kpa sa nɛ muɛ̄ kɔ alu e’aa Jeremaia le Baruk. Kerewo, bɔɔ naa bee aa Jeremaia. A bee su dɔɔ̄na ui kpa nɛ Baruk, sa su egā kɔā yereue Jɛhova, e Baruk ɛm “dɛ̄dɛɛ̄ ue lo a bee lu e’ɛm nyɔɔ ui-kpa lo Jehoiakim mɛnɛ-buɛ̄ Juda ebee ɔp bu miā.”​—Jer 36:26-28, 32.

7. E na a bee sira sɔ̄ Jeremaia le Baruk gbaa si tam a?

⁷ Sɔ̄ pya nɛɛ gbaa le bu doā-ɛp wee agɛrɛtɛ̄ wa yii gbo. Nyɔɔwo, dap sira kɔ sɔ̄ Jeremaia le Baruk gbaa si tam lo esikɛ̄ ɛm ui kpa Mɛnɛ Jehoiakim bee ɔp a, baɛ aba bee muɛ̄ le le elap a le bu ziī sa wa yii gbo sikɛ̄ agatɛ̄. Bu mɛ sīdee na i dap ɛrɛ biī aāloo edoba baɛ nɛɛ a bɔloo ture nyiɛ loo ama a?

8. E na a i dap kpaɛ̄ lɛɛloo etɔɔ̄ waɛloo pya dɔɔ̄na a, e e na anua i piiga lo etɔɔ̄ wa waɛloo a?

⁸ Dap i agaba ekɔ ue aā nyiɛ i nɛ pya dɔɔ̄na lo a ɛrɛ nɛɛ a e bee i doo piya nu loo sɔ̄ akii adumɛ. (Kam 18:19, 24) Ale a dap i tɔɔ̄loo kɔ ii ɛrɛ sɔ̄ le mɛm esu nyima loo pya dɔɔ̄na. Kerewo, ii le e’ɔɛ loo i. Lo i gbī kɔ pya i wuga a le i kpaɛ̄ sɔ̄ i le bu doā-ɛp, i ɛrɛ enɔ lo edɛrɛ wa nyiɛ nyɔɔ tɛ̄maloo ekɔ nu i kɛɛrɛ le kɛ̄ nu i tɔɔ̄loo doo wa nɛ. Lo ama lu nu a kuī i dasī doo lo i gbī elu le gbo.​—1 Pit 1:22.

9. (a) Bu mɛ sīdee na Jizɔs bee tɔgɛ kɔ a dɛrɛe nyiɛ nyɔɔ pya ye gbo a? (b) Kɔ o ekɛɛrɛ le kɛ̄ nu a tɔɔ̄loo doo dap agɛrɛtɛ̄ o nyinia gbo kumaloo pya dɔɔ̄na doodoo wa? Nɛ edoba.

⁹ Jizɔs bee tɔgɛ kɔ a dɛrɛe nyiɛ nyɔɔ pya ye gbo tɛ̄maloo ekɔ ue aā nyiɛ wa nɛ. (Jɔn 15:15) I dap nɔ Jizɔs tɛ̄maloo ekɔ nu a i ɛɛrɛbu, nu a i yere saŋ bu le i ekɛɛrɛ nɛ pya dɔɔ̄na. Gbaɛ̄tɔ̄ kaāna sɔ̄ nɛɛ gaa a kɔ ue nɛ, mɛ o muɛ̄ kɔ kɛ̄ bui kɛɛrɛ nu doo, kɛ̄ nu i tɔɔ̄loo doo, le nu bui seeasī bee ziī. Naa kɛɛrɛbu edoba Cindy, ziī wuga nɛɛwa a bee le bu ye 20 zua. A bee yii gbo Marie-Louise alu nɛɛ sɛmdee elua 60 zua. Cindy le Marie-Louise wee gbaa si uwe  zue ue dɛ̄dɛɛ̄ lɔɔrɛ Nia Dee Loo Kaɛ, sa wee kɔnia sɔh nyɔɔ keekee ekobee ue. Cindy kɔ, “kpe mɛ loo enyɔɔnɛ pya na gbo kɔnia sɔh nyɔɔbee a doo kɔ m dā wa.” Gbo wee agabu sɔ̄ bui gbaa kɔnia ue sa gbaɛ̄tɔ̄loo ziī kaāna. Doodoo Cindy, lo o su zaāsī bu enyɔɔnɛ pya dɔɔ̄na kɔnia ue, edoo kɔ bui yinia gbo a nyim.​—Kam 27:9.

10. Dookɛ̄ Kam 27:17 kɔ doo, e na a dap sira aabu sɔ̄ i nyɔɔnɛ pya i wuga bu yira si tam a?

¹⁰ Dookɛ̄ a bee sira loo Jeremaia le Baruk doo, sɔ̄ i nyɔɔnɛ pya i wuga bu yira si tam sa muɛ̄ pya le elap a wa le bu, i nɔ nu wa aāloo sa wa tɔɔ̄ waɛloo kaāna. (Buū Kam 27:17.) Bu edoba, wee a tɔɔ̄loo doodoo wa sɔ̄ o muɛ̄ o gbo a gaa su e’agaloo kɔā nu a yira ale a kɔ ue akiiloo Jɛhova le ye ekɛɛrɛ aābu nyiɛ ye nɛ pya dɔɔ̄na? Naa daba, o sikɛ̄ ye wereloo kaāna.

11-12. Nɛ edoba akiiloo kɛ̄ tam zue ue dap yere mɛm loo gbanialoo o ɛrɛ loo o gbo doo.

¹¹ Naa ɛp baɛ edoba a tɔgɛ kɛ̄ tam zue ue su pya nɛɛ gbaloo ziī doo. Wuga nɛɛwa a kura Adeline a le 23 zua, bee kɔ nɛ ye gbo a kura Candice, kɔ a nyɔɔnɛe ye kii kɛ̄ a naa wee aadee lu ezue ue. A bee kɔ: “I bee su mɛm zuema ue sa tam zue ue bee i kpeloo gbɛnɛ. I bee ɛrɛ ebɛɛ̄ lo eyere mɛm loo ziī lokwa i dap kiisī leere bu edɔɔ̄.” Gbaa si tam bee wa dɔbiī nɛ doodoo wa? Adeline kɔ: “Sɔ̄ i e aara uwe zue ue ziī ziī biradee, i wee kɔnia kɛ̄ nu i tɔɔ̄loo doo, nu a i yere mɛm loo kaāna bu i kɔnia ue, le kɛ̄ i bee muɛ̄ kɛ̄ Jɛhova i lere dee bah bu lo esiatam doo. Baɛ ii bee ɛrɛ ekpeloo yɛɛ i sɔ̄ i bee kɔnia sɔh sa sikɛ̄ suāloo ziī kaāna.”

¹² Laïla le Marianne, baɛ wuga nɛɛwa ba lege aba aba ba lu France, bee su o’oo kaɛ zuema ue bie Bangui, kɛ̄ alu bee kɛ̄ loo Central African Republic  nɛɛ wee mma kaāna. Laïla bee kɔ: “Marianne le mm bee kpesī e’aga kɛ̄tɔɔ̄, mɛ nyɔɔ kɔ i wee kɔnia i taāŋa sa ɛrɛ wereloo yɛɛ i a, i gbanialoo bee agatɛ̄. Sɔ̄ m muɛ̄ kɛ̄ Marianne sueloo kɛ̄ bu lo kɛ̄tɔɔ̄ doo, wereloo a ɛrɛ loo pya a le lo barasī, le mɛm a ɛrɛ bu tam zue ue doo kɔ m sikɛ̄ ye ɛrɛ taɛ bu emanyɔɔ.” Naa lu ebɛɛ̄ kɔ o dasī kii dɔɔ̄na barasī lɛɛ o gaa ɛrɛ dua ekpeloo ama. Ziī ziī sɔ̄ o nyɔɔnɛ wuga nɛɛdam ale wuga nɛɛwa zue ue bu bui kɛ̄ zue ue, dee kpaā a nɛ lo esuāloo nɛɛ o gaa nyɔɔnɛ sitam leere, sa yere mɛm loo gbanialoo a i le yɛɛ.

13. E na a dap sira sɔ̄ i tɔɔ̄ waɛloo pya i gbo sa wa nyɔɔnɛ siniatam a?

¹³ Pio sɔ̄, sɔ̄ i tɔɔ̄ waɛloo i gbo kaāna sa wa nyɔɔnɛ siniatam i muɛ̄ pya wa le elap le pya kɛ̄ ba ɔloo. E na edap i yerebah nɛ kɔ i dap wa tama kere sɔ̄ ba tɛɛ̄ ekwɔ a? Naa sikɛ̄ kɛɛrɛbu edoba Jeremaia. E na a bee ye yerebah nɛ kɔ a muɛ̄ le a le bu pya dɔɔ̄na sa ɛp wa tɛɛ̄ ekwɔ tɛrɛ a?

14. E na Jeremaia bee nɔ aābah Jɛhova a, e lo ama bee ye yerebah nɛ doodoo wa?

¹⁴ Naa daba, Jeremaia na a bee ɛm 1 le 2 Pya Mɛnɛ-Buɛ̄ a, gbaā nage loo lo kpa ye bee kuea loo a. Tam a bee lu enɛ ye ama doo kɔ a suā kɛ̄ Jɛhova ɛrɛ toesaɛ̄ loo miɔŋɔ nɛɛ a naa mmana doo. Bu edoba, a bee muɛ̄ kɔ sɔ̄ Mɛnɛ Ahab bee kiiya aaloo ye pɔrɔ dogo, Jɛhova bee kpɔā ye dum. (1 Mɛnɛ 21:27-29) Bu aba lo sīdee, Jeremaia bee suā nage kɔ Manase bee doo nu a beā Jɛhova ee kɛ̄ Ahab bee doo. Kerewo, Jɛhova bee aaloo nɛ Manase sɔ̄ a kiiya. (2 Mɛnɛ 21:16, 17; 2 Edoo 33:10-13) Pya e’ɛma ama bee yerebah nɛ Jeremaia kɔ a nɔ kɛ̄ Bari ɛrɛ toesaɛ̄ le egerebu doo sɔ̄ a gaa nyɔɔnɛ pya ye gbo dānia nu.​—Yɔɔ 103:8, 9.

15. Jeremaia bee nɔ egerebu Jɛhova doodoo wa sɔ̄ ekɛɛrɛ Baruk bee dabia ni?

¹⁵ Naa kɛɛrɛ kɛ̄ Jeremaia bee yerebah nɛ Baruk doo sɔ̄ alu edabara ye ekɛɛrɛ lɛɛloo tam a bee lu enɛ ye. Taā a nwaabah biaɛfii kɔ ye gbo Baruk naale enyaa, Jeremaia bee ye yerebah nɛ tɛ̄maloo ekɔ pya yereue Bari bee kɔ a kɔ ye nɛ. (Jer 45:1-5) E na e’ɛma ama i tɔgɛ a?

16. Aāloo ue a le bu Kam 17:9, e na alu ebɛɛ̄ kɔ i doo lokwa ii peere pya i gbo a?

¹⁶ Bu kaka, ii dap ɛmadɛɛ̄ kɔ pya i wuga nɛɛdam le nɛɛwa a mmana. Nyɔɔwo, sɔ̄ i eyira gbo ziī nɛɛ, i piiga lo edoo kɔ lo yii gbo aa laba. Lo pya i gbo tɛɛ̄ ekwɔ, dap lu ebɛɛ̄ kɔ i su Muɛ̄ Ue Bari wa zuuna bahtɔ̄ bu fɛgɛ kerewo, i kɔ taɛ nu ba doo a bee piya wa nɛ. (Yɔɔ 141:5) E lo ba yere i saŋ bu, i aaloo wa nɛ. Sɔ̄ i e aaraloo wa nɛ, i ɔbɛ ekɔ nu akiiloo nu ba bee doo a wa nɛ ale kɔ nɛ pya dɔɔ̄na. (Buū Kam 17:9.) Naa ɛp kɛ̄ alu ebɛɛ̄ doo lo esere ekɛɛrɛ nyɔɔ le elap a le bu pya i wuga nɛɛdam le nɛɛwa bu sɔ̄ kpɛdumɛ ama taā i ɛp wa tɛɛ̄ ekwɔ! Lo i doo wo, edoo kɔ i yinia gbo a agatɛ̄, sa dua gbo ama ebɛɛ̄ nage i bu gbɛnɛ etɛɛrɛloo.

17. Bu mɛ sīdee na Jeremaia bee tɔgɛ kɔ a lue kaāna gbo bu sɔ̄ etɛɛrɛloo a?

¹⁷ Jeremaia nɛɛ kɔ ekɛɛrɛ Bari bee tɔgɛ kɔ a lue kaāna gbo bu sɔ̄ etɛɛrɛloo.  Bu edoba, sɔ̄ Ebed-melek a wee si tam tɔ mɛnɛ-buɛ̄ bee agara Jeremaia lɛɛbah luh sɔ̄ a bee lu etɛrɛ ye bu bana gba, bɔɔ bee aa Ebed-melek kɔ pya nɛɛbee gaa le fɛe ye. Sɔ̄ Jeremaia dā nu akiiloo, a naa bee ubepiī sa kɛɛrɛ kɔ ye gbo Ebed-melek etama lo kɛ̄tɔɔ̄ nyɔɔ ye loo. Kere adoo Jeremaia bee le kpɔgɔrɔ, a bee piiga kuma kɛ̄ a dap doo lo eyere mɛm loo ye gbo Ebed-melek tɛ̄maloo ekɔ yii Jɛhova eyira a nɛ egbɔ̄nyiɛ ye nɛ.​—Jer 38:7-13; 39:15-18.

18. Dookɛ̄ Kam 17:17 kɔ doo, E na i doo sɔ̄ i gbo le bu e’aga kɛ̄tɔɔ̄ a?

¹⁸ Bu ilii dee ama, pya i wuga nɛɛdam le nɛɛwa gaa tɛɛ̄ bu keekee kɛ̄tɔɔ̄. Bu edoba, gbɛnɛ-edo aba tɔga aaloo bugia siranu ale nɔ̄ a dɔ wa barasī. Sɔ̄ nu a doo wo sira, pio ii dap wa nɛ kɛ̄ etɔɔ̄. Pya dɔɔ̄na dap wa dɔɔ̄ kpugi nɛ. Mɛ dɛ̄dɛɛ̄ ii dap bara Jɛhova kɔ a yerebah nɛ pya i wuga nɛɛdam le nɛɛwa. Lo i dā kɔ ziī wuga nɛɛdam ale wuga nɛɛwa ɛrɛ e’ɔaloo, naa daba ii le esuā kɛ̄ ekɔ ue ye nɛ doo ale kɛ̄ edoo dogo ye kumaloo doo. Mɛ dɛ̄dɛɛ̄ ii dap yerebah. Bu edoba, i dap nɔɔ̄ sɔ̄ lo e’ina ye loo. I dap gbaɛ̄tɔ̄ kaāna bu fɛgɛ sɔ̄ a gaa kɔ ue. E i dap kɔ dɔ kpa kaɛ a wee i gbɔ̄nyiɛ sɔ̄ i le bu dua lo kɛ̄tɔɔ̄ ye nɛ. (Ais 50:4) Nu alu ebɛɛ̄ na kɔ o le kpaɛ̄ pya o gbo sɔ̄ ba a gbī.​—Buū Kam 17:17.

19. Bu mɛ sīdee na agɛrɛtɛ̄ gbanialoo a i le yɛɛ anyaawo eyerebah i nɛ li deesī a?

¹⁹ I ɛrɛ ebiaɛfii anyaawo lo e’agɛrɛtɛ̄ gbanialoo i ɛrɛ loo pya i wuga nɛɛdam le nɛɛwa. E na anua a? Nyɔnɛbee pya i nɛɛ baa gaa le gbī epoo i tɛ̄maloo ekɔ i esah loo. Ba egbī kɔ i be ziī. Mɛ wa epiaga elu yɔrɔ. Ba naale edap gbee wereloo a i le yɛɛ. Lɔgɔ nu ba doo naale egbee gbaaloo a i le yɛɛ. Bu kaka, i gbo naale etɔɔ̄ aba bu lo sɔ̄ eku ama, mɛ etɔɔ̄ ina dee a naa tah!