BU SƆ̄ a bee lu e’ɛm Baibol, zooro wee kuūdɛɛ̄loo butɔ ale nu dɔɔ̄na nɛɛ ɛrɛ. Siga sɔ̄, muɛ̄ ue Hibru ale Grik wee tap “zooro” nua nɛɛbee ale nɛɛ kuūdɛɛ̄loo tɔ.

Sɔ̄ Josɛf lo alu nwiī tɛ-bee-gā a kura Jakob bee le zooro bie Ijipt, Josɛf bee lu nɛɛtam bu dɛ̄dɛɛ̄ tɔ ye tɛ-ɛrɛ. Sira kɔ ye tɛ-ɛrɛ alu nɛɛ Ijipt a, bee “lɛɛbaloo dɛ̄dɛɛ̄ nu a bee ɛrɛ bie bah Josɛf.” (Jɛn 39:2-6) Sɔ̄ a esaa, sɔ̄ Josɛf e ɛrɛ gbɛnɛ ekpo bu Ijipt, a bee sikɛ̄ tubobaloo nɛɛ elu nɛɛbee loo alɛɛ tɔ.​—Jɛn 44:4.

Bu dee Jizɔs, pya a ɛrɛ kɛnɛkɛ̄ wee tɔɔ̄ bu gbɛnɛ buɛ̄ aāloo kɛ̄ kere uwe alu efoh nu bu le. Pya tɛ-ɛrɛ kɛnɛkɛ̄ ama wee tubobaloo pya nɛɛtam kɔ ba a baɛbee tam pya si tam kpugi si bu ziī ziī biradee lo ekuūdɛɛ̄loo ye kere uwe.

Mɛɛ̄ na a bee nyim tura lo esitam baɛbee a? Nɛɛ ɛm kpa a bee tɔɔ̄ Rom bu tua sɔ̄ o’oo tup zua a, a kura Columella, bee kɔ zooro a wee lu etubobaloo nua nɛɛtam ale nɛɛ kuūdɛɛ̄loo tɔ ɛrɛ elu “nɛɛ alu emuɛ̄ kɔ a para gbɛnɛ-edo tam.” Elu nɛɛ a naa ɛrɛ bɔɔ lo esu ye ekpo daā nu, e a naale esu nage daā nu bu bag.” A bee si nage kɛ̄ kɔ: “Eenyɔɔ dɛ̄dɛɛ̄ nu, nu elu e’ɛmadɛɛ̄ ye aabah na ama​—a naa le ekɛɛrɛ kɔ a suā e nu a naa suā, le kɔ e wee kpɛ̄naloo enɔ nu.”

Muɛ̄ Ue Bari su pio tam nɛɛ kuūdɛɛ̄loo tɔ wee si baātɛ̄ siga tam a wee lu esi bie bu bɔŋanaloo pya Nɛɛ Kraist. Bu edoba, Nɛɛ lɛɛratam Pita bee yere mɛm loo pya Nɛɛ Kraist kɔ ba a su pya kari Bari wa nɛ “siā tam nɛ ɛnia [aba,] doodoo kaāna pya tɔɔ̄loo nu ewonu Bari lo a le booboo sīdee.”​—1 Pit 4:10.

Jizɔs bee su nage edoba akiiloo nɛɛ kuūdɛɛ̄loo tɔ kɔā ue, dookɛ̄ a lu e’ɛm bu kpa Luk 16:​1-8 doo. Gbaāloo wo, a bee kɔ bu mɔmanudɛɛ̄ akiiloo ye lele kɛ̄ doodoo mɛnɛ, Jizɔs nɛ agɛrɛ nyiɛ pya ye zooro kɔ a gaa le tuboe baloo pya “zooro a bɔloo eture nyiɛ loo sa suā nu,” ale pya “nɛɛtɔɔ̄loo nu a bɔloo eture nyiɛ loo.” Taɛ tam lo zooro na nɛ nuede bu edɔɔ̄ pya Nɛɛ Kraist dɛ̄dɛɛ̄ sɔ̄ bu sɔ̄ kpɛdumɛ. (Mat 24:45-47; Luk 12:42) Bu i ɛɛ kaāna kɔ i le yɛɛ pya a gaa ɛrɛ biī aāloo pya kpa a i yere mɛm loo, lo zooro a bɔloo ture nyiɛ loo gaa nɛ sa doo kɔ a gbɔɛ̄ kɛ̄ bu yube nyɔuwe.