48 EKOBEE UE ENƆ
“Ɛp Taɛ Deesī”
“Doolo baɛ dɛɛ̄ a ɛp taɛ mmsī, e doolo nu o ɛp a tɔɔ̄ leere mmsī.”—KAM 4:25.
YƆƆ 77 Ɛɛdee Bu Nyɔuwe A Yii Zii
DASĪ TƐƐ̄NYƆƆ *
1-2. Mɛ sīdee na i nyɔɔnɛ zuurabahtɔ̄ a le bu kpa Kam 4:25 a? Naa nɛ edoba.
NAA kɛɛrɛbu pya edoba ama. Ziī wuga nɛɛwa e’ana alu Nɛɛ Kraist kɛɛrɛbu loo pya le nu a bee ye siraloo sɔ̄ akii adumɛ. Kere a ɛrɛ nu finiabah anyaawo, a kiisī lo edoo dɛ̄dɛɛ̄ nu a dap doo bu esiatam Jɛhova. (1 Kɔr 15:58) A bialoo wee kɛɛrɛbu sɔ̄ alɛ le pya nɛɛ a wereloo egbaa le bu aā nyɔuwe elua eyira yii loo. Dɔɔ̄na wuga nɛɛwa nyɛŋia bu kɔ ziī wuga a le bu bɔŋanaloo bee ye biirebu, mɛ a bee biaɛfii lo elɛɛbaloo ye nɛ. (Kɔl 3:13) Ziī wuga nɛɛdam bee suā kɔ a bee tɛɛ̄e ekwɔ sɔ̄ akii adumɛ, kerewo a bee biaɛfii lo edoo dɛ̄dɛɛ̄ nu a dap lo ebia bu bɔloo ture nyiɛ loo anyaawo.—Yɔɔ 51:10.
2 Bu amunu sīdee na taa pya Nɛɛ Kraist ama bee ziī ani? Dɛ̄dɛɛ̄ aba bee nyɛŋiabu nu a bee wa siraloo sɔ̄ akii adumɛ, mɛ ba naa bee bialoo kɛɛrɛbu. Taāwo, ba “ɛp taɛ mmsī.”—Buū Kam 4:25.
3. E na anua alu ebɛɛ̄ kɔ i “ɛp taɛ mmsī” a?
3 E na anua alu ebɛɛ̄ lo e’ɛp “taɛ mmsī” a? Dookɛ̄ nɛɛ a bialoo ɛp dumɛ naa wee dap kiisī doo, kɛ̄ ii le edapnage kiisī bu i esiatam nɛ Jɛhova lo i bialoo kɛɛrɛbu pya nu i bee tɛɛ̄ bu sɔ̄ akii adumɛ doo lo.—Luk 9:62.
4. E na i gaa le nɔ bu ekobee ue ama a?
4 Bu ekobee ue ama, i gaa le kɔ ue nyɔɔ taa nu bɔɔ a le bu bie ekɛɛrɛ nyɔɔ nu a bee i siraloo sɔ̄ akii adumɛ. * Pya lo nu na: (1) kɛɛrɛbu nu etɛ̄na, (2) ɛrɛ biirabu, le (3) sɔ̄ nyiɛ i i bege ue yeekɛ̄. Bu ziī ziī kɛ̄tɔɔ̄ ama, i muɛ̄ kɛ̄ pya daakuu Baibol i dap yerebah nɛ kɔ i “ibere nu a le gɔdumɛ,” sa sere dɛɛ̄ nyɔɔ pya “nu a . . . le mmsī” doo.—Fil 3:13.
ZAƐ̄ A LE BU BIALOO KƐƐRƐ KƆ SƆ̄ AKII ADUMƐ A BEE LEE
E na edap i kpaɛ̄ lɛɛloo e’ɛp deesī li a? (Ɛp 5, 9, 13 barakpaɛ̄) *
5. Amunu zaɛ̄ na kpa Eklisiastis 7:10 i zuurabahtɔ̄ kiiloo a?
5 Buū Eklisiastis 7:10. Yere nukuādɛɛ̄ loo kɔ dɔ kpa kaɛ ama naa kɔ a bee piya lo ebip kɔ: “E na anua kɔ tua dee a lee a?” Nyɛŋiabu loo lele nu lu dɔɔ̄nu a aabah Jɛhova. Taāwo, lo dɔ kɔ: “O a kɔ, ‘E na anua kɔ tua dee a lee ee pya lo gbo dee ama a?’ ” Nyɔɔwo, a bɔloo kɔ i nwaɛ̄dɛɛ̄ lokwa ii su i dum sɔ̄ akii adumɛ dooreloo nyaawo sa kɛɛrɛ kɔ nu bee piya anyaawo ereloo. Dɔɔ̄na tatap Baibol baatɛ̄ dɔ ama kɔ: “O aa bip kɔ, ‛Aa, e na anua nu bee lee kaāna sɔ̄ akii adumɛ a?’ Naa lee ebip dua ebip ama.”
Sɔ̄ pya Izrɛl e’aara Ijipt, amunu ekwɔ na ba bee tɛɛ̄ a? (Buū 6 barakpaɛ̄)
6. E na anua alu nu suānu naale loo lo ekɛɛrɛ kɔ dum bee lee sɔ̄ akii adumɛ a? Naa nɛ edoba.
6 E na anua alu nu suānu naale loo lo ekɛɛrɛ kɔ i dum bee lee sɔ̄ akii adumɛ a? Bialoo kɛɛrɛ kɔ sɔ̄ akii adumɛ bee lee dap doo kɔ i wee kɛɛrɛbu aba le nu a bee sira sɔ̄ akii adumɛ. A dap nage doo kɔ i aa kɛɛrɛbu pya e’aga kɛ̄tɔɔ̄ i bee kpesī sɔ̄ akii adumɛ a. Bu edoba, naa kɛɛrɛbu loo pya Izrɛl a dee kere. Sɔ̄ ba e’aara Ijipt, ba bee nwaabah ibere kɛ̄ dum bee wa agaloo doo sɔ̄ ba bee le lo kɛ̄. Ba bee sere ekɛɛrɛ nyɔɔ pya nuede ba gaa bee de. Ba bee kɔ: “I kɛɛrɛbu bari i bee ba yɔrɔ li Ijipt, le dɛ̄dɛɛ̄ cucumber, le melon, le leek, le onion, le garlic!” (Buā 11:5) Mɛ ekɔ ba bee de pya nu ama bu “yɔrɔ” ni? Eeye. Pya Izrɛl bee kpɛ kaāna gbɛnɛ nu; bee lu ebii wa nɛ kɛ̄ nua zooro li Ijipt. (A’aa 1:13, 14; 3:6-9) Kerewo, sɔ̄ a esaa ba bee ibere dɛ̄dɛɛ̄ lo tɔga sa gbī kɔ ba ebee le e dookɛ̄ ba bee le doo sɔ̄ akii adumɛ. Ba bee sere ekɛɛrɛ nyɔɔ “gbo nama dee a” taā ba sere ekɛɛrɛ nyɔɔ pya lele nu Jɛhova edora wa nɛ. Bu Jɛhova naa bee ɛɛ loo wa elap dogo ama.—Buā 11:10.
7. E na a bee yerebah nɛ ziī wuga nɛɛwa kɔ a ɔbɛ ekɛɛrɛ kɔ nu bee lee sɔ̄ akii adumɛ a?
7 Bu mɛ sīdee na i dap ɔbɛ ekɛɛrɛ kɔ nu bee lee sɔ̄ akii adumɛ a? Naa ɛp edoba ziī wuga nɛɛwa a bee bɔātɛ̄ esitam bie Bɛtɛl li Brooklyn bu zua 1945. Sɔ̄ pio zua etɛ̄na, a bee iya ziī wuga nɛɛdam a gaa sinage tam Bɛtɛl, e baɛ aba bee gbaa si tam bu gbɛnɛ-edo zua. Kerewo, bu zua 1970, loo ye dam bee dumɛ. A kɔ sɔ̄ ye dam bee suā kɔ esaa e’u, a bee ye zuurabahtɔ̄ lokwa a dap tama lulu wa ua dam. A bee ye kɔ nɛ kɔ: “I iya dam le wa bee lee. Pio iya dam le wa naa wee le bu ɛɛbu doo wo.” Mɛ a bee ye kɔnage nɛ kɔ: “Oo le e’ibere pya lele nu i wee gbaa doo, mɛ o aa bialoo wee kɛɛrɛ pya nu ama. Sɔ̄ sɔ̄ gaa kiisī, oo le e’ɛrɛna ekiɛ̄nu. Loo a aa ɔ sa o bialoo wee ɛrɛ saŋ. Ɛrɛ ɛɛbu kɔ i ebee su pya sɔ̄ ama siātam nɛ Jɛhova. Kɛɛrɛbu nu lu dɔɔ̄nu a aabah Jɛhova.” Oo yiga kɔ lo ama lu le zuurabahtɔ̄ ni?
8. Bu mɛ sīdee na i wuga nɛɛwa bee ɛrɛ biī aāloo kɔ a naa bee bialoo kɛɛrɛ kɔ nu bee lee sɔ̄ akii adumɛ a?
8 I wuga nɛɛwa ama bee su zuurabahtɔ̄ ye dam. A bee si tam nɛ Jɛhova bu yira agɛrɛ mmɛ sɔ̄ a u sɔ̄ a elua 92 zua. Pio zua lɛɛ a gae u, a bee kɔ: “Kɛkɛɛrɛbu loo 63 zua m esua siātam nɛ Jɛhova, m dap kɔ m e’ɛrɛ kaāna ɛɛbu le iinaloo bu na dum.” E na anua a? A bee baatɛ̄ kɔ: “Nu a doo kɔ dum a kpeloo kaāna na pya i wuga nɛɛdam le nɛɛwa ba le tɛɛ̄ ɛŋɛnɛ nyɔuwe le i bɛābu lo enyɔɔnɛ pya i wuga bu yira tɔɔ̄ bu paradais a kɛnɛkɛ̄, gbaa taāŋabah i Gbɛnɛ Nɛɛ Dɛmnu, Jɛhova alu aba kaka Bari mmɛ deedee.” * Le edoba akiiloo nɛɛ a bee sere ekɛɛrɛ nyɔɔ yii Bari sɛh!
ZAƐ̄ A LE BU ƐRƐ BIIRABU
9. Dookɛ̄ alu ekɔ doo bu kpa Levitikɔs 19:18, mɛ sɔ̄ na a wee i agabah e’aaloo nɛ nɛɛ a i tɛɛ̄ ekwɔ loo ani?
9 Buū Levitikɔs 19:18. Gbɛnɛkpo sɔ̄ a wee i agaloo e aaloo nɛ pya i wuga bu bɔŋanaloo, i gbo a i tɔɔ̄ waɛloo, ale pya i butɔ sɔ̄ ba i tɛɛ̄ ekwɔ loo. Bu edoba, ziī wuga nɛɛwa a le bu bɔŋanaloo bee dɛrɛ ue dɔɔ̄na wuga nɛɛwa kɔ a yib e ye kpugi. Sɔ̄ esaa, lo wuga nɛɛwa a bee ye dɛrɛ ue a bee bara aaloo, mɛ lo nɛɛ a bee lu edɛrɛ ue a naa yiga sa a bee kiisī lo ekɛɛrɛbu nu a bee sira. E wee a tɔɔ̄ge loo doo wo ni? Kere dua nu ama sii a siraloo, gbɛnɛ-edo ii e’ɛrɛ biirabu sa kɛɛrɛ kɔ ii le dabe aaloo nɛ nɛɛ a bee i tɛɛ̄ ekwɔ loo.
10. E na edap i yerebah nɛ sɔ̄ ba i biirebu ani?
10 E na a i dap yerebah nɛ sɔ̄ ba i biirebu ani? Alu ebɛɛ̄ kɔ i nyɛŋiabu kɔ Jɛhova muɛ̄ dɛ̄dɛɛ̄ nu. A suā dɛ̄dɛɛ̄ nu i gaa tɛɛ̄ bu, gbaāloo ɛrɛgeba pɔrɔ biaɛ lo i gaa tɛɛ̄bah. (Hib 4:13) A kiɛ̄ ye sɔ̄ i gaa tɔga. (Ais 63:9) Sa eyira yii kɔ elɛɛe ɛrɛgeba pah pɔrɔ biaɛ ebee i ɛrɛ nyɔɔ.—Mum 21:3, 4.
11. I ɛrɛ biī doodoo wa lo i aaloo nɛ pya a i tɛɛ̄ ekwɔ loo?
11 E a bɔloo kɔ i nyɛŋiabu kɔ i ɛrɛ biī lo i aaloo nɛ pya a i tɛɛ̄ ekwɔ loo. Taɛ nu wuga nɛɛwa a bee lu edɛrɛ ue bee doo lo. Sɔ̄ sɔ̄ gaa kiisī, a bee aaloo nɛ wuga nɛɛwa a bee ye dɛrɛ ue a sa naa sina saŋ. A bee yere nukuādɛɛ̄ loo kɔ lo i aaloo nɛ pya dɔɔ̄na Jɛhova e aa nage loo i nɛ. (Mat 6:14) A bee suā nu lo wuga nɛɛwa edora ye loo, mɛ a bee biaɛfii lo e aaloo ye nɛ. Nyɔɔwo, bu ye bee ɛɛ kaāna e a bee kiisī lo esitam nɛ Jɛhova.
ZAƐ̄ A LE BU SƆ̄ NYIƐ I I BEGE UE YEEKƐ̄
12. E na 1 Jɔn 3:19, 20 kɔ a?
12 Buū 1 Jɔn 3:19, 20. Nyiɛ i wee i bege ue pio sɔ̄. Bu edoba, nyiɛ pio nɛɛ wee wa begee ue nyɔɔ nu ba bee doo lɛɛ ba gae nɔ kaka ue. E nyiɛ pya dɔɔ̄na bege wa ue nyɔɔ ekwɔ ba bee tɛɛ̄ sɔ̄ ba eliamaā sah. E taɛ kɛ̄ a wee le doo lo. (Rom 3:23) Bu kaka, i gbī edoo nu a lee. Mɛ “i tɛɛ̄ ekwɔ bu booboo nu.” (Jem 3:2; Rom 7:21-23) Kere a naa nia i sɔ̄ nyiɛ i i bege ue, a dap i dɔbiī nɛ. E na anua a? Nyɔɔbee sɔ̄ nyiɛ i i bege ue i dap nyaana i sīdee tɔɔ̄dum sa biaɛfii kɔ ii le etɛɛ̄nae ekwɔ i bee tɛɛ̄ a.—Hib 12:12, 13.
13. E na anua i nwaɛ̄dɛɛ̄ sɔ̄ nyiɛ i i bege ue yeekɛ̄ a?
13 Bu dɔɔ̄na sīdee, beenyiɛ i dap i bege ue yeekɛ̄, lo a le kɔ, nyiɛ i ekiisī lo ebege i ue kere i ekiiya sa Jɛhova etɔgɛ i kɔ e’aarae loo i nɛ. Dua bege ue ama dap i yere muū loo. (Yɔɔ 31:10; 38:3, 4) Bu mɛ sīdee? Naa ɛp edoba ziī wuga nɛɛwa lo beenyiɛ bee kiisī lo ebege ye ue nyɔɔ pɔrɔ a bee si sɔ̄ akii adumɛ. A bee kɔ: “M bee kɛɛrɛ kɔ mm le edapnae si tam nɛ Jɛhova nyɔnɛbee sɔ̄ etɛ̄na mɛ loo.” Nu dap tɔɔ̄loo gbɛnɛ-edo ii dookɛ̄ a bee tɔɔ̄loo wuga nɛɛwa ama doo. A bɔloo kɔ i nwaɛdɛɛ̄ kiiloo sɔ̄ nyiɛ i bege ue yeekɛ̄. Kɛ̄adoo, naa kɛɛrɛ kɛ̄ e’ɛɛrɛbu Setan doo lo i lɛɛbaloo etaāŋabah Jɛhova kere alɛ sii i lɛɛbaloo a!—Dooreloo 2 Pya Kɔrint 2:5-7, 11.
14. I doodoo wa suā kɔ Jɛhova sii i lɛɛbaloo ni?
14 Kerewo, i dap kɛɛrɛ kɔ, ‘M tɛɛ̄ doodoo wa suā kɔ Jɛhova sii mɛ lɛɛbaloo ni?’ Bu ziī sīdee, lo i bip dua ebip ama, i suā ye ture. Bu gbɛnɛ-edo zua akii adumɛ, Tɔ Baɛloo bee kɔ: “Naa [daba] i dap muɛ̄ kɔ i kiisī lo etɛɛ̄ ekwɔ sa doo pya nu a naa lee lo i wee doo sɔ̄ akii adumɛ. . . . O aa pee o bɛābu. O aa kɛɛrɛ kɔ o esie pɔrɔ a naale edapna lu e’aaloo a nɛ. E taɛ kɛ̄ Setan egbī kɔ o kɛɛrɛ doo lo. Nyɔɔbee o ɛrɛ ekiɛ̄nu le biirabu, a tɔgɛ kɔ o sii pe. Loo a aa ɔ lo ekumalookɛ̄ sa yere kara nɛ Bari, kɔ a yerebah a nɛ lo e’ɛrɛ le ekɛɛrɛ. Kɔ ue ye nɛ dookɛ̄ nwiī wee kɔ ue nɛ ye tɛ doo sɔ̄ a le bu taāŋa, kaɛlɛɛ buā sɔ̄ o ye su kɔā ue nɛ nyɔɔ aba ziī nu, e Jɛhova eyerebah a nɛ nyɔɔbee ye wereloo a naa wee nyaa.” *
15-16. A tɔɔ̄ loo pio nɛɛ doodoo wa sɔ̄ ba suā kɔ Jɛhova sii wa lɛɛbaloo ni?
15 Gbɛnɛ-edo pya nɛɛ Jɛhova ɛrɛ egbɔ̄nyiɛ sɔ̄ ba suā kɔ a sii wa lɛɛbaloo. Bu edoba, bu pio zua akii adumɛ, nu ziī wuga nɛɛdam bee buū aābu ekobee ue a kɔ “The Bible Changes Lives” bee ye tɔaloo kaāna. Bu lo ekobee ue, ziī wuga nɛɛwa bee kɔ a aga ye bah eyiga kɔ Jɛhova esikɛ̄ ye wereloo nyɔɔ ekwɔ a bee tɛɛ̄ sɔ̄ akii adumɛ. A bee kiisī lo ekɛɛrɛ doo wo bu gbɛnɛ-edo zua sɔ̄ eliamaā sah. Kerewo, sɔ̄ a bee ɛrɛ ekɛɛrɛ nyɔɔ waara zɔɔ a’agara, a bɔātɛ̄ e’ɛp nu bu sīdee alu kee. *
16 Bu mɛ sīdee na nu a bee tɛɛ̄ bu ama bee yerebah nɛ lo wuga nɛɛdam ani? Lo wuga nɛɛdam bee ɛm kɔ: “Sɔ̄ m bee lege zege, a bee mɛ agaloo e’ɔbɛ ɛp foto a tɔgɛ ekotɛ̄ nɛɛ. Kunɛ dee ama, m bee obia nage ɛp. M bee gbī yerebah aābah pya kanɛɛ bu bɔŋanaloo, sa m ebea eebah na taāŋa anyaawo. Pya kanɛɛ doo kɔ m suā kɔ Bari were mɛ loo sa mɛ toesaɛ̄. Kerewo, pio sɔ̄ a tɔɔ̄ mɛ loo bee kɔ mm le e dɛɛ̄ lɔgɔ nu, sa bee kɔ Jɛhova naale e aana loo mɛ nɛ. Bubuū nu akiiloo lo [wuga nɛɛwa] bee mɛ yerebah nɛ. Nyaawo m suā kɔ lo m kɛɛrɛ kɔ Bari naale edap mɛ aaloo nɛ, a kura kɔ waara zɔɔ ye Nwiīnɛɛdam naa dap uu na pɔrɔ. M bee fii lo ekobee ue lɛɛbu lo kpa, e m wee buū sa ɛrɛ ekɛɛrɛ nyɔɔ ɛrɛgeba sɔ̄ m kɛɛrɛ kɔ mm le e dɛɛ̄ lɔgɔ nu.”
17. Mɛ sīdee na nɛɛ lɛɛratam Pɔɔl naa bee dɔ bu zaɛ̄ bege ue aba ɛɛ yeekɛ̄ a?
17 Pya nu a bee sira a bee lo ama doo kɔ i nyɛŋiabu loo nɛɛ lɛɛratam Pɔɔl. A bee si gbɛnɛ-edo pɔrɔ lɛɛ a gae bee lu nɛɛ a nyɔɔnɛ dumɛ Jizɔs. Pɔɔl bee nyɛŋiabu loo pya nu ebee doo, mɛ a naa bee bialoo kɛɛrɛbu loo. (1 Tim 1:12-15) A bee ɛp waara zɔɔ a’agara nua dɔɔ̄nu alu enɛ ye. (Gal 2:20) Nyɔɔwo, Pɔɔl naa bee bege ue aba ɛɛ yeekɛ̄, taāwo, a bee kiisī loo edoo dɛ̄dɛɛ̄ nu a dap doo bu esiatam Jɛhova.
BIE EKƐƐRƐ NYƆƆ DEESĪ!
Doraa i biaɛfii lo esere dɛɛ̄ deesī (Ɛp 18-19 barakpaɛ̄) *
18. E na i enɔā bu ekobee ue ama a?
18 Pya e na i enɔā aāloo ɛp pya nu zaɛ̄ alu ekɔ bu ekobee ue ama a? (1) Nyɛŋiabu nu lu dɔɔ̄nu a aabah Jɛhova; mɛ kaɛlɛɛ kɛ̄ i dum bee lee doo sɔ̄ akii adumɛ, i dum bu aā nyɔuwe elee eera. (2) Pya dɔɔ̄na dap doo nu a i ziloo, mɛ lo i aaloo wa nɛ, i dap kiisī lo esitam nɛ Jɛhova. (3) Lo i beenyiɛ bege i ue yeekɛ̄ edoo kɔ i aa su ɛɛbu siātam nɛ Jɛhova. Nyɔɔwo, i ɛrɛ eyiga kɔ Jɛhova e’aaraloo i nɛ dookɛ̄ Pɔɔl bee doo.
19. I tɛɛ̄ doodoo wa suā kɔ bu aā nyɔuwe ii le e’ɛrɛ ekiɛ̄nu loo pya nu akii adumɛ ni?
19 I ɛmadɛɛ̄ lo etɔɔ̄dum ina deedee. E bu aā nyɔuwe Bari, ii le e’ɛrɛ ekiɛ̄nu loo nu a bee sira sɔ̄ akii adumɛ. Kiiloo lo sɔ̄, Baibol kɔ: “Dɛ̄dɛɛ̄ tuatua nu naale lu enyɛŋiabu.” (Ais 65:17) Naa kɛɛrɛ: Pio ii e’ana bia bu esiatam Jɛhova, mɛ bu aā nyɔuwe i obia lu zege. (Job 33:25) Nyɔɔwo, doraa ii le ebialoo kɛɛrɛbu nu etɛ̄na. Taāwo, i bie ekɛɛrɛ nyɔɔ aā nyɔuwe sa doo dɛ̄dɛɛ̄ nu i dap lo eyii bu!
YƆƆ 142 Aabaloo I Bɛābu Agɛrɛ
^ bar. 5 A bɔloo enyɛŋiabu nu a bee i sira loo sɔ̄ akii adumɛ. Mɛ lo i bialoo kɛɛrɛbu nu a bee sira sɔ̄ akii adumɛ, i dap ɔbɛ edoo pya nu i wee doo bu esiatam Jɛhova, ale ibere nu esira li deesī. Ekobee ue ama kɔ ue nyɔɔ taa nu a dap doo kɔ i bialoo kɛɛrɛbu nu a bee i siraloo sɔ̄ akii adumɛ. I gaa le kɛɛrɛbu pya daakuu Baibol le edoba bu ilii dee ama lo edap i yerebah nɛ kɔ i aa dɔ bu pya lo zaɛ̄.
^ bar. 4 UE ALU EKƆ BAATƐ̄: Bu ekobee ue ama, “kɛɛrɛbu nu a bee sira” na sɔ̄ i bialoo kɛɛrɛbu nu a bee i siraloo sɔ̄ akii adumɛ, lo a le kɔ nu akiiloo dɛ̄dɛɛ̄ sɔ̄, ale kɛɛrɛ kɔ i dum bee lee lo sɔ̄.
^ bar. 8 Buū Watchtower, July 1, 2004, pp. 23-29.
^ bar. 14 Buū Watchtower, February 15, 1954, p. 123.
^ bar. 15 Buū Watchtower, August 1, 2011, pp. 20-21.
^ bar. 59 UE A BAATƐ̄ FOTO: Bialoo wee bura nu etɛ̄na, ɛrɛ biirabu, le sɔ̄ nyiɛ i i bege ue yeekɛ̄ le doodoo dumɛ toh lo i gaa toora a i zui kɔ i aa dap kiā nyɔɔ dee dum.
^ bar. 66 UE A BAATƐ̄ FOTO: Lo i lɛɛbaloo dɛ̄dɛɛ̄ dumɛ toh ama, i ɛrɛ i loo sa ɛrɛ ɛɛbu, sa sikɛ̄ ɛrɛ mɛm. E i dap bie ekɛɛrɛ nyɔɔ nu a le deesī.
