GBƐNƐ-EDO pya wuga nɛɛdam le nɛɛwa ba bee aa wa edo kii Beke lokwa ba dap ɛrɛ kpugi ekuādɛɛ̄loo pya wa butɔ e’obia kii edo ba aa. Tɛ̄maloo wereloo ba ɛrɛ loo Jɛhova le pya le aba le, ba ekira kɛ̄ ebɛɛ̄ pya zue ue Buɛ̄-mɛnɛ le. (Mat 22:37-39) Pya e na ba lɛɛbaloo a, e Jɛhova bee wa nɛ ekpɛanu doodoo wa? Lo esuā lo ama, i naa kɔ nu akiiloo edo Cameroon li barasī Africa kɛ̄ enaani wee dɛp kii.

Bu zua 1998 ziī wuga nɛɛdam a kura Onésime bee aa Cameroon kɛ̄ a bee mɛā bia. A bee tɔɔ̄ dɔɔ̄na edo loo 14 zua. Ziī dee bie enɔānu pya Nɛɛ Kraist, a bee dā ziī edoba akiiloo tam zue ue. Nɛɛ a gaa nɛ ekɔaue bee kɔ, “Lo a le baɛ gbo gaa fɛ bari bie baɛ keekee kɛ̄, e ziī aba gaa fɛ gbɛnɛkpo bari ee elua a, ekɔ lo nɛɛ a naa gaa fɛ gbɛnɛkpo bari a naale ekii kɛ̄ a gaa lu efɛ gbɛnɛkpo bari ani?”

Lo edoba bee doo kɔ Onésime a kɛɛrɛ nu akiiloo obia kii kɛ̄ fɛ bari bu edɔɔ̄ gaa bee kiisī leere bie Cameroon lokwa a dap yerebah nɛ pya zue ue a le lo kɛ̄. Mɛ a ɛrɛ pya nu a bee ye nɛ taāŋa. Edapge sikɛ̄ tɔɔ̄ ye buɛ̄ ama nyɔɔbee etɔ̄na dɔɔ̄na edo bu gbɛnɛ-edo zua ni? Lo esuā sɛh edapge tɔɔ̄, Onésime bee si Cameroon sa tɔɔ̄ ini’ī enɔɔ̄. Lɛɛ bu zua 2012, a obia kii wee tɔɔ̄ sa bia.

Onésime bee kɔ: “M bee ɛrɛ ekwabaloo pio nu lokwa m dap tɔɔ̄ kɛ̄ a aramiā ama. Bie Tɔ Nɔnu Buɛ̄-mɛnɛ, naa bee mɛ aadee su loo lo esikɛ̄ ɛŋɛtɛ̄ nyɔɔ gbɔrɔɔ-te fom naa le nyɔɔ.” A bee kɛgɛ sa kɔ, “kɛ̄ m gbaɛ̄tɔ̄loo nu a gaa lu etɔgɛ doo, kɛ̄ m lɛɛnage nyiɛ nyɔɔ pya lele kasi m wee ɛŋɛtɛ̄ nyɔɔ bie enɔānu doo lo.”

Bu zua 2013, Onésime bee ii Géraldine, lo a bee obia lu Cameroon sɔ̄ a etɔ̄na France loo ɛrɛnia zua. Amunu leelee na dam le wa ama bee ɛrɛ nyɔɔbee ba bee sere ekɛɛrɛ nyɔɔ nu a kuī eera bu dum a? Onésime bee kɔ: “Doodoo dam le wa, i bee gbaa si Tɔkpa Pya Zue Ue Buɛ̄-mɛnɛ sa si tam Bɛtɛl. Bu zua i aa a, 20 pya a gaa nɔ Baibol ba le i bɔŋanaloo bee liamaā. Nyaawo, m kɛɛrɛ kɔ taɛ kɛ̄ a bɔloo kɔ m tɔɔ̄ ‘fɛ bari’ na m le a.” (Maak 1:17, 18) Géraldine bee kɔ yereloo kɔ: “M e’ɛrɛ gbɛnɛ-edo leelee ee kɛ̄ m bee ɛmadɛɛ̄ doo.”

Judith ebee kii United States mɛ a gbī enyimɛ ye esiatam zue ue. A bee kɔ, “Ɛrɛgeba sɔ̄ m aa kpaɛ̄ pya na butɔ bie Cameroon, m wee to nyɔnɛbee a kura kɔ m  lɛɛbaloo dɛ̄dɛɛ̄ pya m ebee ina gaa nyɔɔnɛ nɔ Baibol.” Kerewo, Judith naa bee gbī e’obia kii Cameroon. A gaa bee si tam ba gaa bee ye kpɛ gbɛnɛ kpugi lo a wee doo kɔ a dap kuūdɛɛ̄loo kɛ̄tɔɔ̄ nwanaloo ye tɛ a le Cameroon. Mɛ Judith bee dɛrɛ nyiɛ nyɔɔ Jɛhova sa obia kii Cameroon. A kɔ a bee peeree pio nu a wee ye niae kaāna sɔ̄ a bee le United States. A bee yere kara kɔ Jɛhova a yereebah ye nɛ kɔ a dap kwabaloo pio nu, e a bee ɛrɛnage yerebah aābah nɛɛ kuūdɛɛ̄loo sɛkiut le ye wa.

Sɔ̄ Judith nyɛŋiabu kɛ̄ nu mɛā doo sɔ̄ a obia kii Cameroon, a bee kɔ, “Bu taa zua m bee yerebah nɛ nia nɛɛ kɔ ba a liamaā.” Judith bee bɔātɛ̄ esitam sɛmdee bu keebee sīdee. Nii’ee, a gaa nyɔɔnɛ ye dam Sam-Castel, bu esiatam kuūdɛɛ̄loo sɛkiut. Mɛ e na a bee sira loo tɛ Judith a? Judith le pya ye butɔ bee muɛ̄ ziī tɔpie a le buɛ̄ beke lo ba bee kuūdɛɛ̄loo ye tɛ mmɛ sɔ̄ ba ye baaloo. A lu nu ɛɛbu kɔ a bee lu ebaa ye loo sa loo ye nwaɛ̄.

Ziī wuga nɛɛdam a kura Victor bee aa kɛ̄ a gaa bee tɔɔ̄ sa kii Canada. Sɔ̄ ebuna ziī ekobee ue a le bu Tɔ Baɛloo a kɔ nu akiiloo gbɛnɛ tɔkpa, a bee sikɛ̄ ɛrɛ ekɛɛrɛ nyɔɔ si tɔkpa. A bee ɔbɛ si gbɛnɛ tɔkpa sa nɔ bahtam. A bee kɔ “bahtam ama bee doo kɔ m nwaabah ɛrɛ tam esi, le lo edoo nu m gaa bee gbī edoo aa dee, lo a le sɛmdee.” Sɔ̄ a esaa, Victor bee ii Caroline, e dam le wa ama bee si Cameroon. Sɔ̄ ba si Bɛtɛl a le lo naɛsī, bee lu eyere wa mɛm loo kɔ ba a kɛɛrɛbu si tam bie Cameroon. Victor bee kɔ, “Ii bee ɛrɛ lɔgɔ nu edoo kɔ i aa si, e kuma sɔ̄ i ebee doo kɔ i dum a waɛbah a, i bee yiga lo esi.” Kere loo Caroline naa bee aadee nwaɛ̄, ba bee biaɛfii lo ekii li.

Victor le Caroline bee bɔātɛ̄ esitam doodoo pya sɛmdee lokwa ba dap yerebah nɛ pya nɛɛ a ɛrɛ taɛ lo enɔ Baibol. Ba bee kpooge kpugi lokwa ba naa bɔātɛ̄ si tam aba sɔ̄ ba ina lo kɛ̄. Sɔ̄ a esaa, ba bee sitam bu pio enɔɔ̄ bie Canada lo a bee wa yerebah nɛ kɔ ba a obia kii Cameroon le kɔ ba a kiisī lo esitam sɛmdee. Amunu leelee na ba bee ɛrɛ a? Ba bee si Tɔkpa Pya Zue Ue Buɛ̄-mɛnɛ, si tam sɛmdee bu keebee sīdee, sa gaa si tam wu Tɔ Nɔnu Buɛ̄-mɛnɛ anyaawo. Victor kɔ, “Lɛlɛɛbaloo pya nu a wee i nia doo kɔ i muɛ̄ yerebah a aabah Jɛhova.”

Bu zua 2002, Alain nɛɛ a bee le gbɛnɛ tɔkpa li Germany bee buū nwīepɛɛ kpa a kɔ Pya Zege—Ena Bui Su Bui Dum Daā A? Pya ue a le bu bee ye yerebah nɛ kɔ a ɛrɛ aā nu seea sī. Bu zua 2006, a bee si Ministerial Training School sa a bee lu eyere ye ture Cameroon, taɛ barasī kɛ̄ a bee lu emaɛ̄ ye bie.

Bie Cameroon, Alain bee muɛ̄ tam esi bu nwī kere sɔ̄. Sɔ̄ a esaa, a bee sikɛ̄ muɛ̄ tam ba ekpɛ ye gbɛnɛkpo kpugi loo, mɛ a bee kɛɛrɛ kɔ lo tam edoo kɔ aa ɛrɛ sɔ̄ esiā uwe zue ue. Nyɔɔwo, sɔ̄ a bee lu ekue ye kɔ a si tam sɛmdee bu keebee sīdee, a bee yiga sa a bee si. Nɛɛ a bee ye kue loo tam a bee gbī eyere ye kpugi loo, mɛ Alain naa bee yiga esi. Sɔ̄ a esaa, Alain bee ii Stéphanie, lo a ebee tɔɔ̄ France bu gbɛnɛ-edo zua. Amunu e’aga kɛ̄tɔɔ̄ na a bee kpesi sɔ̄ a kii Cameroon a?

 Stéphanie bee kɔ: “Nu gaa bee mɛ dumɛ, mɛ m bee piiga lo e’ɛrɛ boa mmɛ sɔ̄ loo mɛ nwaɛ̄.” Bee lu enɛ ekpɛanu dam le wa ama nyɔɔ wa egerebu. Alain bee kɔ: “Sɔ̄ i kii wee zue ue kɛ̄ a binia doodoo buɛ̄ alu ekue Katé, i muɛ̄ gbɛnɛ-edo pya ba gbī enɔ Baibol. Sɔ̄ a esaa, i bee wa dap nyɔɔnɛ nɔ Baibol tɛ̄ma bu fon. Baɛ pya i wee nyɔɔnɛ nɔnu ama bee liamaā, e a bee lu e’ɛrɛ eku pya zue ue bie lo kɛ̄.” Stéphanie bee kɔ yereloo kɔ: “Lɔgɔ nu a i ɛɛrɛbu ee bee i yerebah nɛ pya nɛɛ kɔ ba a kiīloo nɛ Jɛhova naale. Tɛ̄maloo esitam akɛāma, i e’ɛrɛ kaāna ɛɛbu.” Nii’ee, Alain le Stéphanie gaa si tam kuūdɛɛ̄loo sɛkiut.

Gisèle bee liamaā sɔ̄ a gaa bee si tɔkpa ba wee nɔnu akiiloo pie li Italy. Kɛ̄ ziī dam le wa a bee lu pya sɛmdee bee tɔɔ̄dum a waɛbah doo bee ye tɔaloo, sa a gbī enyimɛ ye esiatam zue ue. Nyɔɔwo, Gisèle bee bɔātɛ̄ esɛmdee sɔ̄ esaa ye tɔkpa.

Gisèle bee ɛrɛ taɛ lo e’obia kii Cameroon sa nyimɛ ye esiatam nɛ Jɛhova, mɛ a bee ɛrɛ pio taāŋa. A bee kɔ, “M lɛɛbaloo etɔɔ̄ Italy, sa aa kpaɛ̄ pya na gbo le pya na butɔ ba bee le Italy.” Kerewo, bu O’oo Enɔɔ̄ bu zua 2016, Gisèle bee obia kii Cameroon. Sɔ̄ pio sɔ̄ etɛ̄na, a bee iya Léonce, e tɔ naa tam a le Cameroon bee kɔ ba a kii Ayos, buɛ̄ ebɛɛ̄ pya zue ue le.

Dum bee mɛā doodoo wa li Ayos? Gisèle bee kɔ: “Gbɛnɛkpo sɔ̄ miā naa bee le bu pio kaɛ, e ii bee dap yere miā bu i fon. Ii wee dap su i fon daānu gbɛnɛkpo sɔ̄. M bee nɔ kɛ̄ ebuinu dɛɛ̄ kaāni doo, e i wee aara wheelbarrow sa aara miā wee ibi maā sɔ̄ pya nɛɛ naa aadee mma nu maā.” E na a bee yerebah nɛ Gisèle le ye dam kɔ ba a egerebu a? Gisèle bee kɔ: “Edɔɔ̄ Jɛhova, dam a a yerebah nɛ, yere mɛm loo le yerekpotɛ̄ le dɔɔ̄nu a aabah pya butɔ le pya i gbo bee i yerebah nɛ.”

Bu Gisèle ɛɛge kɔ a obia kii ye barasī ni? A kɔ: “Aiī! Bu kaka, bu mɛ ɛɛ kaāna. I bee ɛrɛ pio taāŋa sa loo i bee ɔnage, mɛ aba sɔ̄ i be eeba lo ama, na dam le mm bee suā kɔ i edora taɛ nu a bɔloo kɔ i doo. I bee dɛrɛ nyiɛ nyɔɔ Jɛhova sa ye tɔɔ̄ waɛloo.” Léonce le Gisèle bee si Tɔkpa Pya Zue Ue Buɛ̄-mɛnɛ, e nyaawo, ba gaa si tam doodoo pya keebee sɛmdee bu kere sɔ̄.

Dookɛ̄ pya fɛ bari wee egerebu e’aga kɛ̄tɔɔ̄ lokwa ba dap fɛ gbɛnɛkpo bari doo, pya a obia kii wa barasī lɛɛbaloo pio nu lokwa ba dap yerebah nɛ pya a gbī edā yereue Buɛ̄-mɛnɛ. Bu kaka, Jɛhova gaa le nyɛŋiabu e’aga tam pya wuga ama si le wereloo ba tɔgɛ loo ye bee. (Neh 5:19; Hib 6:10) Lo o le buɛ̄ beke sa ebɛɛ̄ pya zue ue le bui barasī, o dapge obia kii ni? Lo o doo wo, Jɛhova enɛ a ekpɛanu.—Kam 10:22.