1. Jɛhova yere mɛm loo pya ye zooro kɔ ba a doo wa?

WERELOO a naa wee nyaa kuī loo Jɛhova kaāna. (Hos 6:⁠6) A yerenage mɛm loo pya ye zooro kɔ ba a doo wo. Tɛ̄maloo nɛɛ mɔmanudɛɛ̄ Maika, Bari yere i mɛm loo kɔ i wereloo ‘wereloo a naa wee nyaa.’ (Maika 6:⁠8) Kerewo, lɛɛ i gae edap doo wo, i ɛrɛ edasī suā nu wereloo a naa wee nyaa kura.

2. Ena wereloo a naa wee nyaa a?

² Ena wereloo a naa wee nyaa a? Ue a kɔ “wereloo a naa wee nyaa” sira yira 230 sɔ̄ bu New World Translation of the Holy Scriptures. Ena lo ama kura ani? Nu a kura na kɔ, nɛɛ a ɛrɛ wereloo a naa wee nyaa kumaloo ziī nɛɛ, wee kiisī lo ewereloo lo nɛɛ sa ye daba bialoo. Jɛhova na gbɛnɛ nɛɛ a tɔgɛ wereloo a naa wee nyaa a. Bu ekobee ue ama i gaa le kɔnia kɛ̄ Jɛhova tɔgɛ wereloo a naa wee nyaa kumaloo miɔŋɔ nɛɛ doo. Bu elua ekobee ue li, i nɔ kɛ̄ ili pya zooro Bari dap nɔ Jɛhova tɛ̄maloo etɔgɛ wereloo a naa wee nyaa kumaloo enia ii doo.

3. Jɛhova bee siā ye loo nɛ Mozis doodoo wa?

³ Nwīgbagbara sɔ̄ aā sɔ̄ pya Izrɛl bee aa Ijipt, Jɛhova bee siā ye loo nɛ Mozis tɛ̄maloo ekɔ ye bee le pya ye elap dogo ye nɛ. A bee kɔ: “Jɛhova, Jɛhova, Bari lo toesaɛ̄ le ewonu, lo a naa wee nwaaba ɛrɛ saŋ, sa mma bu wereloo a naa wee nyaa le kaāna yira, lo a sere wereloo a naa wee nyaa nɛ booboo sɔ̄ baɛ boo le lop tup, nɛɛ a aaloo pɔrɔ dogo le tɛɛ̄ ekwɔ le doo gbee.” (A’aa 34:​6, 7) Tɛ̄maloo pya ue a yere mɛm loo nɛɛ akiiloo pya ye elap ama, Jɛhova  bee kɔ nɛ Mozis ziī nu alu keebee akiiloo ye wereloo a naa wee nyaa. Ena alu lo nu ani?

4-5. (a) Bu mɛ sīdee na Jɛhova kɔ nu akiiloo aba ɛɛ a? (b) Pya amunu ebip na i kɔ ue nyɔɔ a?

⁴ Naale aba bee Jɛhova kɔ a ɛrɛe wereloo a naa wee nyaa mɛ a “mma bu wereloo a naa wee nyaa.” Ue ama lunage esikɛ̄ kɔ dɔɔ̄na ini’ī sɔ̄ bu Baibol. (Buā 14:18; Neh 9:17; Yɔɔ 86:15; 103:8; Joel 2:13; Jona 4:⁠2) Bu ziī ziī dɔ ama, alu ekɔ ue ama kumaloo aba Jɛhova e a naale lɔgɔ miɔŋɔ nɛɛ. Ekɔ a naa lu keebee kɔ Jɛhova kɔ ue siībadɛɛ̄ ye elap dogo lo a le wereloo a naa wee nyaa ni? Lɔgɔ baɛ baɛ beenyiɛ naale loo kɔ wereloo a naa wee nyaa kuī ye loo. * Nu anua Mɛnɛ Devid bee kɔ: “O wereloo a naa wee nyaa, aa Jɛhova, e’ina bunyɔɔ . . . O wereloo a naa wee nyaa si du doodoo wa, aa Bari! Pya miɔŋɔ nɛɛ teera yii kɛɛ̄ ekoo o baɛ laba.” (Yɔɔ 36:​5, 7) I tɔgɛge kaāna nia loo wereloo a naa wee nyaa Bari ɛrɛ dookɛ̄ Devid bee doo ni?

⁵ Lo edābeeloo nu wereloo a naa wee nyaa kura leere, dooraa i naa kɔ ue nyɔɔ baɛ ebip ama: Ba mɛɛ na Jɛhova wee tɔgɛ wereloo a naa wee nyaa kumaloo a? E bu mɛ sīdee na i dap ɛrɛ biī aāloo wereloo a naa wee nyaa Jɛhova ɛrɛ a?

6. Ba mɛɛ na Jɛhova wee tɔgɛ wereloo a naa wee nyaa kumaloo a?

⁶ Ba mɛɛ na Jɛhova wee tɔgɛ wereloo a naa wee nyaa kumaloo ani? Baibol kɔ i dap wereloo gbɛnɛ-edo nu, doodoo ‘foh nu,’ “miī-vine le nɔɔ̄,” “zuurabahtɔ̄,” ‘buābee,’ “suānu” le pya dɔɔ̄na nu. (2 Edoo 26:10; Kam 12:1; 21:17; 29:⁠3) Kerewo, naa wee lu etɔgɛ wereloo a naa wee nyaa kumaloo nu a naale nɛɛ. Mɛ Jɛhova naa aadee tɔgɛ wereloo a naa wee nyaa kumaloo ɛrɛgeba nɛɛ. A tɔgɛ kumaloo pya a ɛrɛ keebee gbanialoo ye kumaloo. Ilii Bari tɔɔ̄ nɛ pya ye gbo. A ɛrɛ le ekɛɛrɛ wa kumaloo, sa ekiisī lo ewere wa loo.

7. Bu mɛ sīdee na Jɛhova tɔgɛ wereloo kumaloo dɛ̄dɛɛ̄ nɛɛ a?

⁷ Jɛhova tɔgɛ wereloo kumaloo dɛ̄dɛɛ̄ miɔŋɔ nɛɛ. Jizɔs bee kɔ nɛ ziī gbara a kura Nikodimɔs kɔ: “Bari bee wereloo nyɔuwe [pya nɛɛ] doo wo, kɔ a bee su aba ye Nwiī-nɛɛdam a bee ɛrɛ nɛ, lokwa ɛrɛgeba nɛɛ a ye yira nɛ naale epe mɛ a e’ɛrɛ dum a naa tah.” ​—⁠Jɔn 3:​1, 16; Mat 5:​44, 45.

8-9. (a) Ena anua Jɛhova tɔgɛ wereloo a naa wee nyaa kumaloo pya ye zooro a? (b) Ena i kɔnia a?

 ⁸ Dookɛ̄ a bee lu ekɔ tua sɔ̄ doo, Jɛhova tɔgɛ ye wereloo a naa wee nyaa kumaloo aba pya a ye ɛrɛ le gbanialoo kumaloo, lo a le pya ye zooro. I muɛ lo ama aāloo nu Mɛnɛ Devid le nɛɛ mɔmanudɛɛ̄ Daniɛl bee kɔ. Bu edoba, Devid kɔ: “Doo kɔ o wereloo a naa wee nyaa a le nɛ pya a a suāloo dɛ̄dɛɛ̄ sɔ̄.” “Wereloo a naa wee nyaa lo Jɛhova le aā deedee mmɛ deedee loo pya a ye ɛrɛ bɔɔ loo.” E Daniɛl bee kɔ: “Aa Nɛɛ-a-i-ɛrɛ, lo gbɛnɛ Bari alu bɔɔ, [lo a tɔgɛ] wereloo a naa wee nyaa loo pya a ye wereloo sa sere dɛ̄dɛɛ̄ ye lok.” (Yɔɔ 36:10; 103:17; Dan 9:⁠4) Dookɛ̄ pya ue a bee lu esu edɔɔ̄ Bari ɛma ama tɔgɛ doo, Jɛhova tɔgɛ wereloo a naa wee nyaa kumaloo pya ye zooro nyɔɔbee ba suā ye loo, ye ɛrɛ bɔɔ loo, ye wereloo, sa sere pya ye lok. Jɛhova tɔgɛ ye wereloo a naa wee nyaa loo aba pya ye nɛɛ, lo a le pya a ye taāŋabah bu kaka sīdee.

⁹ Lɛɛ i gae bɔātɛ̄ etaāŋabah Jɛhova, alɛ ebee i tɔgɛ wereloo kumaloo dookɛ̄ a tɔgɛnage kumaloo dɛ̄dɛɛ̄ nɛɛ doo. (Yɔɔ 104:14) Kerewo, doodoo pya a gaa ye taāŋabah, i ɛrɛnage biī aāloo ye wereloo a naa wee nyaa. Bu kaka, Jɛhova agɛrɛ nyiɛ pya ye zooro kɔ: “Mdaa wereloo a naa wee nyaa naale kii a aaloo.” (Ais 54:10) Bu kaka, dookɛ̄ a bee siraloo Devid doo, ‘Jɛhova e’aara pya a ye tɔɔ̄ nɛ bu keebee sīdee.’ (Yɔɔ 4:⁠3) I doo dogo doodoo wa kiiloo kɛ̄ Jɛhova i kuūdɛɛ̄loo bu keebee sīdee doo ni? Nɛɛ uɛ le-yɔɔ bee kɔ: “Ɛrɛgeba nɛɛ a suā nu, doolo a kɛɛrɛbu pya lo nu ama; doolo pya nɛɛ kɛɛrɛ ekɛɛrɛ akiiloo dɛ̄dɛɛ̄ wereloo a naa wee nyaa lo Jɛhova.” (Yɔɔ 107:43) Zuurabahtɔ̄ a lee ama aabah Jɛhova. Nyɔɔwo, doraa i kɔnia taa sīdee pya zooro Jɛhova ɛrɛ biī aāloo ye wereloo a naa wee nyaa.

10. Susuā kɔ wereloo a naa wee nyaa lo Bari ɛrɛ tɔɔ̄ ina deedee yerebah i nɛ doodoo wa? (Le-yɔɔ 31:⁠7)

¹⁰Wereloo a naa wee nyaa lo Bari ɛrɛ tɔɔ̄ ina deedee. Lu ekɔ wereloo a naa wee nyaa Bari ɛrɛ tɔɔ̄ ina deedee 26 sɔ̄ bu  kpa Le-yɔɔ 136 ekobee. Ye tua barakpaɛ̄ buū kɔ: “Dooraa yaa Jɛhova nyɔnɛbee a lee, nyɔnɛbee ye wereloo a naa wee nyaa tɔɔ̄ ina deedee.” (Yɔɔ 136:⁠1) Ue a kɔ: “Nyɔnɛbee ye wereloo a naa wee nyaa tɔɔ̄ ina deedee” siragi gbɛnɛ-edo sɔ̄ aā ye 2 mmɛ ye 26 barakpaɛ̄. E sɔ̄ i buū pya dɔ a le bu yɔɔ ama, alu i nyɛŋia loo sɔ̄ i muɛ kɛ̄ Jɛhova kiisī lo etɔgɛ ye wereloo a naa wee nyaa bu gbɛnɛ-edo sīdee doo. Pya ue alu ekɔ tɛɛ̄nyɔɔ a kɔ, “nyɔnɛbee ye wereloo a naa wee nyaa tɔɔ̄ ina deedee,” doo kɔ i suā leere kɔ wereloo Bari ɛrɛ loo pya ye nɛɛ naa wee nyaa. Naa ɛp kɛ̄ alu nu egbɔ̄nyiɛ lo esuā kɔ Jɛhova naa wee aadee lɛɛbaloo pya ye zooro doo a! Taāwo, a su ye loo gbaloo pya a ye taāŋabah sa wa tɔɔ̄ bialoo, eetɔɔ̄ na sɔ̄ ba le bu etɛɛrɛloo. Kɛ̄ a i dɔbiī nɛ doo: Susuā kɔ Jɛhova tɔɔ̄ i bialoo ɛɛrɛ i bu sa i nɛ mɛm alu ebɛɛ̄ lokwa i dap tama pya i taāŋa sa kiisī lo etaāŋa ye bah.​—⁠Buū Le-yɔɔ 31:⁠7.

11. Dookɛ̄ Le-yɔɔ 86:5 kɔ doo, ena a zū Jɛhova kɔ a aaloo pɔrɔ a?

¹¹Wereloo a naa wee nyaa lo Bari ɛrɛ zū ye kɔ a aaloo pɔrɔ. Sɔ̄ Jɛhova muɛ kɔ ziī nɛɛ a bee si pɔrɔ ekiiya sa lɛɛbaloo ye pɔrɔ dogo, wereloo a naa wee nyaa zū ye kɔ a aaloo nɛ lo nɛɛ. Nɛɛ uɛ le-yɔɔ Devid bee kɔ kumaloo Jɛhova kɔ: “A naa doo i nɛ doodoo kɛ̄ dɛ̄dɛɛ i pɔrɔ le doo, ale obara i nɛ doodoo kɛ̄ i gbee lok le doo.” (Yɔɔ 103:​8-11) Aāloo nu a bee siraloo Devid, a bee muɛ kɛ̄ a wee ziloo nɛɛ doo sɔ̄ ye ekɛɛrɛ beenyiɛ ye bege ue. A bee muɛnage kɔ Jɛhova kpɛ̄naloo e “aaloo pɔrɔ.” Ena a zū Jɛhova kɔ a aaloo pɔrɔ a? Ye ture le bu kpa Le-yɔɔ 86:⁠5. (Buū) Bu kaka, dookɛ̄ Devid bee kɔ bu kara doo, Jɛhova aaloo pɔrɔ nɛ pya a ye bara nyɔnɛbee a mma bu wereloo a naa wee nyaa.

12-13. Ena edap i yerebah nɛ lo a le i ɛrɛ ekiɛ̄nu yemakɛ̄ nyɔɔ pɔrɔ nu i bee doo sɔ̄ akii adumɛ a?

¹² Lo i si pɔrɔ, a bɔloo kɔ i ɛrɛ ekiɛ̄nu loo nu i bee doo. A dap doo kɔ i kiiya sa doo dogo lo ekwabaloo i ekwɔ. Kerewo, siga pya zooro Bari ɛrɛ ekiɛ̄nu yeekɛ̄, nyɔɔbee pɔrɔ nu ba bee doo sɔ̄ akii adumɛ. Nyiɛ wa bege wa ue mmɛ kɛ̄ ba kɛɛrɛ kɔ lɔgɔ nu enua Jɛhova aaloo wa nɛ naale, kaɛlɛɛ kɛ̄ ba kiiya doo. Lo a le kɛ̄ nu a tɔɔ̄loo doolo, nɔnɔ nu akiiloo kɛ̄ Bari  kpɛ̄naloo etɔgɛ wereloo a naa wee nyaa kumaloo pya ye zooro doo eyerebah a nɛ.

¹³Kɛ̄ a i dɔbiī nɛ doo: Kere ii mmana, i dap su ɛɛbu siātam nɛ Jɛhova aābu logaloga beenyiɛ. Nu a doo kɔ lo ama a waɛ na bee “miī Jizɔs ye Nwiī-nɛɛdam log i ɔŋana lɛɛ bu dɛ̄dɛɛ̄ pɔrɔ.” (1 Jɔn 1:⁠7) Lo loo a ɔ nyɔɔbee pio ekwɔ o bee tɛɛ̄, nyɛŋiabu kɔ Jɛhova le ekpɛ̄naloo e’aaloo a nɛ lo a le o ekiiya lo. Yere nukuādɛɛ̄ loo kɛ̄ Devid bee tɔgɛ gbaaloo a le yɛɛ wereloo a naa wee nyaa le aaloo pɔrɔ doo. A bee ɛm kɔ: “Dookɛ̄ bunyɔɔ kii nyɔɔ eenyɔɔ kɛnɛkɛ̄ doo, aba sī dee ama na ye wereloo a naa wee nyaa kuīnage nɛ pya a ye ɛrɛ bɔɔ loo doo a; dookɛ̄ kɛ̄ enaani wee sira aa binia loo kɛ̄ enaani wee dɛp kii doo, kɛ̄ a bee su dɛ̄dɛɛ̄ i doo gbee i lɛɛ loo doolo.” (Yɔɔ 103:​11, 12) Bu kaka, Jɛhova kpɛ̄naloo “elɛɛbaloo . . . nɛ emanyɔɔ.”​—⁠Ais 55:⁠7.

14. Mɛ sīdee na Devid baatɛ̄ kɛ̄ wereloo a naa wee nyaa Jɛhova ɛrɛ i kpega doo a?

¹⁴Wereloo a naa wee nyaa lo Bari ɛrɛ wee nɛ kpega bu edɔɔ̄. Bu kara Devid bee yere nɛ Jɛhova, a bee kɔ: “Olo na mdaa kɛ̄ gɔā, olo esere mɛ lɛɛ loo etɛɛrɛloo; olo esua wiikpā zuzuura mɛ tɛ̄ma ɛŋɛnɛ. . . . Wereloo a naa wee nyaa tɛɛ̄ ɛŋɛnɛ nɛɛ a ture nyiɛ loo Jɛhova.” (Yɔɔ 32:​7, 10) Dookɛ̄ ekpadaɛ̄ a wee tɛɛ̄ ɛŋɛnɛ buɛ̄ a dee kere wee kpega pya a le bu doo, kɛ̄ wereloo a naa wee nyaa Jɛhova ɛrɛ i tɛɛ̄nage ɛŋɛnɛ doolo, e a kpega i lɛɛ loo pya nu a dap gbee gbanialoo i ye ɛrɛ loo. Gbaāloo wo, wereloo a naa wee nyaa Jɛhova ɛrɛ zū ye kɔ a zuura i ye wamaloo.​—⁠Jer 31:⁠3.

15. Bu mɛ sīdee na wereloo a naa wee nyaa Jɛhova ɛrɛ le doodoo i kɛ̄ teera yii a?

¹⁵ Devid bee su dɔɔ̄na ue a tɔɔ̄dɔ nu kɔā kɛ̄ Bari kpega pya ye nɛɛ doo. A bee ɛm kɔ: “Bari na mdaa e’aga kɛ̄ teera yii, loo Bari a mɛ tɔgɛ wereloo a naa wee nyaa.” Devid bee kɔnage kumaloo Jɛhova kɔ: “Mdaa gbɛnɛ dɛm, le na kɛ̄ teera yii, na e’aga be le nɛɛ a mɛ zuura lɛɛ, na kpega le nɛɛ m teera yii loo.” (Yɔɔ 59:17; 144:⁠2) Ena anua Devid bee su wereloo a naa wee nyaa Jɛhova ɛrɛ dooreloo kɛ̄ teera yii le e’aga kɛ̄ ani? Kaɛlɛɛ kɛ̄ i tɔɔ̄, Jɛhova enɛ i kpega alu ebɛɛ̄ lokwa i dap baɛloo gbanialoo i ye ɛrɛ kumaloo, kuma sɔ̄ i luge pya ye zooro a. Ue agɛrɛ nyiɛ ama lenage bu kpa Le-yɔɔ 91. Nɛɛ a bee ɛm yɔɔ ama bee kɔ: “[M] gaa le kɔ nɛ Jɛhova: ‘Mdaa kɛ̄ teera yii le na e’aga kɛ̄.’”(Yɔɔ 91:​1-3, 9, 14) Mozis bee sunage pya ue a le doo wo kɔānage ue akiiloo kɛ̄ teera yii. (Yɔɔ 90:⁠1) Gbaāloo wo, nwīgbagbara sɔ̄ lɛɛ Mozis gae u, a bee kɔnage dɔɔ̄na ue egbɔ̄nyiɛ. A bee ɛm kɔ: “Bari a tɔɔ̄ ina deedee na o kɛ̄ etɔɔ̄ a, e kɛɛ̄ a na baɛ ekpo bah a naa wee tah le a.” (Deut 33:27) Ena etaā ue a kɔ “e kɛɛ̄ a na baɛ ekpo bah a naa wee tah le a” i tɔgɛ akiiloo Jɛhova a?

16. Bu baɛ amunu sīdee na alu enɛ i leelee a? (Le-yɔɔ 136:⁠23)

¹⁶ Sɔ̄ Jɛhova lu i kɛ̄ teera yii, i le bu kpega. Kerewo, a ɛrɛ pio dee loo i wee ɔ sa i gbī kɛ̄ edoodoo bebe loo lo e’ɔaloo. Ena Jɛhova edoo i nɛ bu pya sɔ̄ a le doo wo a? (Buū Le-yɔɔ 136:23.) A gaa le su ye bah i bɛɛ̄ŋɛ loo, i kɛɛrɛloo dana lɛɛ kɛ̄, sa i yerebah nɛ kɔ i sikɛ̄ ɛrɛ i loo. (Yɔɔ 28:9; 94:18) Kɛ̄ a i dɔbiī nɛ doo: Susuā kɔ Jɛhova kpɛ̄naloo eyere i kpotɛ̄ yerebah i nɛ kɔ i nyɛŋiabu kɔ a nɛ i leelee bu baɛ sīdee. Tuatua, i ɛrɛ e’aga kɛ̄ teera yii kaɛlɛɛ ɛrɛgeba kɛ̄ i le. Eree baɛ, i wereloo Tɛ a le li bunyɔɔ kuū i dɛɛ̄ loo kaāna.

17. Ena wereloo a naa wee nyaa Bari ɛrɛ doo kɔ i suā a? (Le-yɔɔ 33:​18-22)

¹⁷ Dookɛ̄ i enɔā doo, ɛrɛgeba sɔ̄ i gaa kpesī taāŋa, i dap suā leere kɔ Jɛhova eyerebah i nɛ lo ebia bu bɔ ture nyiɛ loo. (2 Kɔr 4:​7-9) Nɛɛ mɔmanudɛɛ̄ Jeremaia bee ɛm kɔ: “Wereloo Jɛhova lo a naa wee nyaa naa ɔp lɔgɔ sɔ̄, dɛ̄dɛɛ̄ ye toesaɛ̄ naa ɛrɛ kuma.” (Yɔɔ-To 3:22) I dap para esuā leere kɔ Jɛhova ekiisī lo etɔgɛ wereloo a naa wee nyaa i kumaloo nyɔnɛbee nɛɛ ɛm Le-yɔɔ bee i nɛ agɛrɛ nyiɛ kɔ: “Dɛɛ̄ Jɛhova le nyɔɔ pya a ye ɛrɛ bɔɔ loo, nyɔɔ pya a ɛmadɛɛ̄ ye wereloo a naa wee nyaa.”​—⁠Buū Le-yɔɔ 33:​18-22.

18-19. (a) Ena ii gbī kɔ a ibere i a? (b) Ena i nɔ bu ekobee a nyɔɔnɛ a?

¹⁸ Ena ii gbī kɔ a ibere i a? Lɛɛ i gae bɔātɛ̄ etaāŋabah Jɛhova, Bari bee i wereloo dookɛ̄ a werenage loo dɛ̄dɛɛ̄ nɛɛ doo. Mɛ nyaawo, i gaa ɛrɛ biī aāloo ye wereloo a naa wee nyaa doodoo pya a gaa ye taāŋabah. Lo wereloo ama zū Jɛhova kɔ a su ye baɛ bah i bɛɛ̄ŋɛ loo lo ekpega i. A gaa lee kiisī lo esu i yaaloo sa a gaa lee doo pya yii a bee yira i kumaloo. A gbī kɔ i lu pya ye gbo mmɛ deedee! (Yɔɔ 46:​1, 2, 7) Nyɔɔwo, kaɛlɛɛ ɛrɛgeba taāŋa i gaa kpesī, Jɛhova enɛ i mɛm lokwa i dap tɔɔ̄ agara.

¹⁹ I emɔna kɛ̄ Jɛhova tɔgɛ wereloo a naa wee nyaa loo pya ye zooro doo. Nyɔɔwo a gbī kɔ i tɔgɛ wereloo a naa wee nyaa loo ɛnia ii. I tɔgɛ doodoo wa ni? Ekobee ue a nyɔɔnɛ ekɔ ue nyɔɔ ue a kuī ama.