1. Amunu ebip na i dap bip aba ii a?

EKƆ bu a wee dɔ sɔ̄ o kɛɛrɛ pya siranu a le deesī doodoo gbeerasī ekwɔ sīdee taāŋabah, be a aabah Gɔg lo Magɔg le nɔ̄ Armagidɔn ni? O wee bipge aba ɔɔ kɔ: “M dapge bia bu tɔɔ̄ agara sɔ̄ pya siranu a yere bɔɔ ama esira ni? Lo o ebee kɛɛrɛbu pya nu ama, pya ue Jizɔs a le bu dɔ Kpa Kaɛ a bɛɛ ekobee ue ama eyerebah a nɛ kaāna. Jizɔs bee kɔ nɛ pya a wee ye nyɔɔnɛ dumɛ kɔ: “Bui aa doo kɔ beenyiɛ i a nyɔŋa; yira loo Bari.” (Jɔn 14:⁠1) E’agatɛ̄ yira eyerebah i nɛ kɔ i ɛrɛ mɛm lokwa i dap kpesī nu esira li deesī.

2. Bu mɛ sīdee na i dap doo kɔ i yira a agaloo a, e ena i kɔ ue nyɔɔ bu ekobee ue ama a?

² Susuā kɛ̄ e’aabaloo pya nu a doā-ɛp i yira doo anyaawo, edoo kɔ i dap egerebu sɔ̄ i kpesī nu edoā-ɛp i yira li deesī. Kɛkɛɛrɛ kɛ̄ i doo dogo doo sɔ̄ i kpesī doā-ɛp anyaawo eyerebah i nɛ kɔ i muɛ kɛ̄ alu ebɛɛ̄ kɔ i agɛrɛtɛ̄ i yira. Kɛ̄ i be eebah ziī ziī doā-ɛp i kpesī doo, kɛ̄ i yira e’aganage loo doolo. E lo ama eyerebah i nɛ kɔ i egerebu bu pya doā-ɛp i kpesī li deesī. Bu ekobee ue ama, i kɔ ue nyɔɔ nia kɛ̄tɔɔ̄ pya a wee nyɔɔnɛ dumɛ Jizɔs bee kpesī lo a bee tɔgɛ kɔ alu ebɛɛ̄ kɔ ba a ɛrɛ yira yereloo. Lɛɛ i kɔnia kɛ̄ i dap kpesī lo dua finiabah doo anii’ee, le kɛ̄ edap doo kɔ i kpɛ̄naloo baɛ pya nu elu li deesī doo.

3. Ena ue Jizɔs a le bu kpa Matiu 6:​30, 33 doo kɔ i suā akiiloo yira a?

³ Alu nu a wee le kɔ tɛ bee tɔ wee gbī enɛ nuede, nu eyaa le tɔ etɔɔ̄ bu ye wa le pya ye miɔŋɔ. Lo ama naa aadee waɛ edoo bu e’aga sɔ̄ ama. Pio pya i wuga bu yira epeere wa tam esi, e kaɛlɛɛ kɛ̄ ba piiga doo ba naa dapna ɛrɛ lo dɔɔ̄na. E pya dɔɔ̄na elɛrabaloo tam ba ebee si nyɔɔbee a  naa bɔloo Pya Nɛɛ Kraist. Sɔ̄ nu a le doo wo sira, alu ebɛɛ̄ kɔ i ɛrɛ e’agatɛ̄ yira kɔ Jɛhova enɛ i nu a i bɛɛ̄ le pya i butɔ. Jizɔs bee kɔ baatɛ̄ lo ama nɛ pya a wee ye nyɔɔnɛ dumɛ bu ye Ekɔaue Nyɔɔ Egu. (Buū Matiu 6:​30, 33.) Susuā leere kɔ Jɛhova naale elɛɛ i baloo edoo kɔ i bɔɔgɛ i ekɛɛrɛ bie nyɔɔ susu tam Buɛ̄-mɛnɛ nua tuatua bu i dum. E sɔ̄ i muɛ kɛ̄ Jɛhova aa i yerebah nɛ lo ekuūdɛɛ̄loo pya i ebɛɛ̄ bu namloo doo, i agɛrɛbah ye tɔɔ̄ waɛloo sa lo ama edoo kɔ i yira a agaloo.

4-5. Ena a bee yerebah nɛ ziī butɔ sɔ̄ kɛ̄ ba etɛɛ̄ doo ɛrɛ pya nu a wa bɛɛ̄ bu namloo naa bee waɛ a?

⁴ Naa kɛɛrɛ kɛ̄ ziī butɔ a le Venezuela bee muɛ yerebah Jɛhova doo sɔ̄ kɛ̄ ba etɛɛ̄ doo ɛrɛ pya nu a wa bɛɛ̄ bu namloo naa bee waɛ. Tua sɔ̄, pya butɔ Castro bee ɛrɛ kpugi a wa gbɔɛ̄loo aāloo pya nu ba wee foh bu wa uwe. Sɔ̄ esaa, ziī eku pya nɛɛ a aara naā bee wa kpo lɛɛloo wa uwe sa wa su lɛɛbah. Wa tɛ a kura Miguel kɔ: “Nyaawo aba nu i dɛɛa nyɔɔ na nwīgbagbara uwe i bee bara sa foh nu nyɔɔ. Ziī ziī lɔɔrɛ, m wee yere kara bara Jɛhova kɔ a nɛ i pya nu a i bɛɛ̄ lo biradee.” Dum agaloo pya butɔ ama kaāna, mɛ tɛ̄maloo e’agatɛ̄ yira ba ɛrɛ kɔ i wereloo Tɛ enɛ wa nu a wa bɛɛ̄ ziī ziī biradee, pya butɔ Castro naa wee lɔɛ enɔānu, e ba wee sinage uwe zue ue aā ziī sɔ̄ yii ziī. Ba su nu akiiloo Buɛ̄-mɛnɛ Bari nua tuatua bu wa dum, e Jɛhova aa wa nɛ nu a wa bɛɛ̄.

⁵ Bu pya e’aga sɔ̄ ama, Miguel le ye wa Yurai kiisī lo ekɛɛrɛbu kɛ̄ Jɛhova bee wa kuūdɛɛ̄loo doo. Siga sɔ̄, Jɛhova wee su pya i wuga bu yira wa yeābah nɛ tɛ̄maloo enɛ wa pio nu alu wa ebɛɛ̄ ale lo egbī tam esi nɛ Miguel. Pya dɔɔ̄na sɔ̄, Jɛhova doo kɔ ba a ɛrɛ pya nu a wa bɛɛ̄ tɛ̄maloo pya nu alu e dɔɔ̄ tɛ̄mabah Tɔ-naatam. Jɛhova sii wa lɛɛbaloo lɔgɔ sɔ̄. E nu a sira aabu na bee, ba muɛ kɔ yira pya wa butɔ agaloo. Sɔ̄ ekɔa ziī kɛ̄ Jɛhova bee wa yerebah nɛ doo sah, wa sira a kura Yoselin bee kɔ: “A yere i mɛm loo sɔ̄ i muɛ kɛ̄ Jɛhova i yerebah nɛ doo. Ɛɛ mdaa gbo lo m dap dɛɛa nyɔɔ bu na dum.” A sikɛ̄ kɔ yereloo kɔ: “Pya doā-ɛp i butɔ ekpeasī eyerebah i nɛ kɔ i dap kpɛ̄naloo baɛ pya e’agabah doā-ɛp a gaa lu li deesī.”

6. Bu mɛ sīdee na o dap yere mɛm loo o yira kere o le bu naɛbah a?

⁶ Ekɔ o le bu naɛbah ni? Lo a le wo, o waa tɛɛ̄bu kaāna e’aga kɛ̄tɔɔ̄. Kerewo, kaɛlɛɛ kɛ̄ kɛ̄tɔɔ̄ a agaloo doo, o dap su pya sɔ̄ ama yeā mɛm loo o yira. Yere kara sa buū pya ue Jizɔs a le bu kpa Matiu 6:​25-34 sa o bura bura nyɔɔ. Naa kɛɛrɛ nu akiiloo pya nɛɛ a le bu ilii dee ama lo a tɔgɛ kɔ Jɛhova wee doo nu alu ebɛɛ̄ pya nɛɛ a ɛrɛ gbɛnɛ-edo nu edoo bu ye esiatam. (1 Kɔr 15:58) Dodoo wo edoo kɔ o agɛrɛbah dɛrɛ nyiɛ nyɔɔ o Tɛ a le li bunyɔɔ kɔ dookɛ̄ a bee yerebah nɛ pya dɔɔ̄na a le bu dua kɛ̄tɔɔ̄ ama doo, kɛ̄ eyerenage bah a nɛ doolo.  A suā pya nu a gaa a bɛɛ̄, e a suā kɛ̄ enɛ a pya lo nu doo. Kuma kɛ̄ o muɛ yerebah Jɛhova bu o dum doo, kɛ̄ o yira e’aganage loo doolo lokwa o dap kpesī pya doā-ɛp a aga eewo a gaa lu li deesī.​—⁠Hab 3:​17, 18.

7. Dookɛ̄ kpa Matiu 8:​23-26 kɔ doo, bu mɛ sīdee na “gbɛnɛ fii efɔp” bee doā-ɛp yira pya a wee nyɔɔnɛ dumɛ Jizɔs a?

⁷ Sɔ̄ Jizɔs le pya a wee ye nyɔɔnɛ dumɛ bee le bu fah nyɔɔ maā, gbɛnɛ fii efɔp bee bugia dɔ. Jizɔs bee su nu a bee sira ama wa yeābah nɛ kɔ ba a muɛ kɛ̄ alu ebɛɛ̄ kɔ ba a yere wa yira loo doo. (Buū Matiu 8:​23-26.) Bu sɔ̄ lo gbɛnɛ fii efɔp aa bee dɔ sa doo kɔ maā a yii bu lo fah a, Jizɔs aa bee fɛɛrɛloo daa ye daa. Sɔ̄ bɔɔ e’aara pya a wee ye nyɔɔnɛ dumɛ, ba bee ye kue lɛɛ daa sa ye kɔ nɛ kɔ a kpɔāe wa, Nɛɛ-a-i-ɛrɛ bee wa kɛɛrɛloo bip kɔ: “Ena a i aarɛ bɔɔ a, bui pya nwī-gbagbara yira?” Pya a wee ye nyɔɔnɛ dumɛ lo bɔɔ bee aa ama ebee suā kɔ Jɛhova ɛrɛ ekpo lo ekpega Jizɔs le pya a ye le loo lɛɛloo ɛrɛgeba nu e’ɛrɛ pɔrɔ pah nyɔɔ wa dum. Ena i nɔ aāloo a? Ɛɛ na kɔ, yira a agaloo dap i yerebah nɛ lo e’egerebu kɛ̄bah ɛrɛgeba “gbɛnɛ fii efɔp,” kere alu kasī fii efɔp ale ɛrɛgeba taāŋa a bee gbɛnɛ fii efɔp.

8-9. Yira Anel bee lu edoā-ɛp doodoo wa, e ena a bee ye yerebah nɛ a?

⁸ Naa ɛp nu akiiloo Anel alu ziī wuga nɛɛwa a sii bee iya dam a aa Puerto Rico, lo a bee dap be eebah ziī gbɛnɛ doā-ɛp tɛ̄maloo ye e’agatɛ̄ yira. Alɛɛ “gbɛnɛ fii efɔp” bee lu kasī fii efɔp. A bee bɔātɛ̄ bu zua 2017 sɔ̄ Hurricane Maria bee gbeesī tɔ Anel. Lo gbɛnɛ fii efɔp bee doo kɔ a peere ye tam. Anel kɔ: “Bu pya e’aga sɔ̄ ama, m bee le bu gbɛnɛ ekɛɛrɛ, kerewo, m bee dɛɛa nyɔɔ Jɛhova tɛ̄maloo yere kara sa mm bee iye kɔ lo gbɛnɛ ekɛɛrɛ a ɔbɛ mɛ lɛɛ loo edoo nu alu ebɛɛ̄ kɔ m doo.”

⁹ Anel bee kɔ gbaɛ̄tɔ̄loo bee le dɔɔ̄na nu a bee ye yereebah nɛ kɔ a dabe tama ye taāŋa. A kɔ: “Nyɔnyɔɔnɛ leredeebah a aabah bɔŋanaloo Jɛhova bee yerebah doo kɔ nyiɛ mɛ a ziīna. M bee muɛ kɛ̄ Jɛhova bee mɛ yerebah nɛ doo tɛ̄maloo kɛ̄ pya wuga bee mɛ yere mɛm loo sa mɛ dɔɔ̄gi nu nɛ doo.” A bee kɔ yereloo kɔ: “Jɛhova bee mɛ nɛ nu a eenyɔɔ kunɛ nu m bee ye bara sa lo ama bee yere mɛm loo na yira kaāna.”

10. Ena o doo lo o kpesī “gbɛnɛ fii efɔp” a?

¹⁰ Ekɔ o waa kpesī “gbɛnɛ fii efɔp” bu o dum ni? A dap lu naɛbah a aaloo ziī bugia siranu a sira. Ale a dap lu fii efɔp a tɔɔ̄ dɔ nu, doodoo e’agabah eyɔloo lo a a ɔɛloo sa oo suāna nu edoo loo. A dap a taāŋɛ pio sɔ̄, mɛ o aa iye kɔ a doo kɔ o aa dɛrɛna nyiɛ nyɔɔ Jɛhova. Tɔɔ̄ ye waɛloo tɛ̄maloo e’agɛrɛbah yere kara. Yere mɛm loo o yira tɛ̄maloo e’ɛrɛ ekɛɛrɛ nyɔɔ pya sɔ̄ Jɛhova bee a yerebah nɛ sɔ̄  akii adumɛ. (Yɔɔ 77:​11, 12) O dap suā leere kɔ a naale elɛɛ a baloo​—⁠bu kaka, a naale elɛɛ a baloo doo pippip.

11. Ena anua i biaɛfii lo egbaɛ̄tɔ̄loo pya a gaa zaāsī a?

¹¹ Dɔɔ̄na ena edap a yerebah nɛ kɔ o egerebu kɛ̄bah doā-ɛp a? Dookɛ̄ Anel bee kɔ doo, ɛɛ na gbaɛ̄tɔ̄loo. Nɔ lo edɛrɛ nyiɛ nyɔɔ pya nɛɛ Jehova le Jizɔs dɛrɛ nyiɛ nyɔɔ. Pio sɔ̄, pya alu etubobaloo kɔ ba a zaāsī dap i nɛ leredeebah a i tɔɔ̄loo kɔ suānu naale loo. Kerewo, Jɛhova wee nɛ leelee pya a gbaɛ̄tɔ̄loo. Nu i buū aābu ye Muɛ̄ Ue le nu esiraloo pya zooro Bari a bɔ ture nyiɛ loo, doo kɔ i suā kɔ gbaɛ̄tɔ̄loo wee kpɔā dum. (A’aa 14:​1-4; 2 Edoo 20:17) Bura bura nyɔɔ pya lo edoba. Dodoo wo e’agɛrɛtɛ̄ o biaɛfii lo egbabeebah nɔɔnɔɔnu bɔŋanaloo Jɛhova anyaawo le deesī li. (Hib 13:17) Lo ama edoo kɔ o aa ɛrɛ lɔgɔ bɔɔ akiiloo gbɛnɛ etɛɛrɛloo ewaraloo kɛ̄.​—⁠Kam 3:⁠25.

12. Ena kpa Luk 18:​1-8 kɔ akiiloo ɛrɛ yira le egerebu a?

¹² Jizɔs bee suā kɔ pɔrɔ biaɛ edap doā-ɛp yira pya a wee ye nyɔɔnɛ dumɛ. Lokwa ba dap egerebu, a bee kɔ ziī kam alu e’ɛm bu kpa Luk wa nɛ. Jizɔs bee kɔ kam akiiloo ziī wa ua dam a bee kiisī lo ebara ziī nɛɛ biaɛ a naa kaāna kɔ a biaɛ ye leere. A bee suā leere kɔ eyereebah ye nɛ lo a le a kiiesī lo ebara. Sɔ̄ sɔ̄ naa binia, lo nɛɛ biaɛ bee doo nu a bee ye bara. Ena alu nu i nɔ aāloo a? Jɛhova naale nɛɛ pɔrɔ dogo. Wo bee doo kɔ Jizɔs a kɔ: “E Bari naale ebiaɛge pya alɛ a bee sagɛ, pya ba ye to loo edɛɛ̄ le pie . . . ni?” (Buū Luk 18:​1-8.) Lɛɛ Jizɔs sikɛ̄ kɔ: “Sɔ̄ Nwī nɛɛ elu, a egbīge yira [a le doo wo ama] muɛ bu nyɔuwe?” Sɔ̄ i kpesī pɔrɔ biaɛ, alu ebɛɛ̄ kɔ i tɔgɛ e’agatɛ̄ yira a bee lo wa ua dam a, tɛ̄maloo ekiisī lo e’egerebu. Sɔ̄ i ɛrɛ dua yira a le doo wo, i dap dɛrɛ nyiɛ nyɔɔ Jɛhova kɔ eyerebah i nɛ. Alunage ebɛɛ̄ kɔ i yiga kɔ kara ɛrɛ gbɛnɛ ekpo. Pio sɔ̄, dap lu e’agara i kara bu pya sīdee ii bee ɛmadɛɛ̄.

13. Bu mɛ sīdee na kara bee yerebah nɛ ziī butɔ a bee lu eyere wa bɔɔ bu a?

¹³ Naa ɛp nu a bee siraloo ziī wuga nɛɛwa a kura Vero lo a tɔɔ̄ Democratic Republic of the Congo. Vero le ye dam a naale Nɛɛ Ekeebee gbaāloo wa nwiīnɛɛwa elua 15 zua bee teera aa wa buɛ̄ sɔ̄ ziī eku pya nɔ̄ bee yii wa buɛ̄. Bu sɔ̄ ba le nyɔɔ lo tee a, ba bee ina ziī kɛ̄ alu ebe nu nyɔɔ dee, e pya nɔ̄ bee wa aa nyiā sa wa yere bɔɔ bu kɔ ba efɛe wa. Sɔ̄ Vero bee bɔātɛ̄ eto, ye nwiīnɛɛwa bee piiga lo egbɔ̄ ye tɛ̄maloo eyere kara dana muɛ̄ nɛ nyɔɔ sa tɛɛ̄nyɔɔ bee Jɛhova bu ye kara gbɛnɛ-edo sɔ̄. Sɔ̄ eyere lo kara sah, nɛɛ bee pya lo nɔ̄ bee ye bip kɔ: “Nwiīgbobia, mɛɛ na a bee a tɔgɛ kɛ̄ eyere kara doo a?” A bee agara kɔ: “Ɛɛ na ka, a bee su edoba a le  bu kpa Matiu 6:​9-13 mɛ tɔŋɛ.” Lo nɛɛ bee pya nɔ̄ bee kɔ: “Nwiīgbobia, nyɔɔnɛ o tɛ le ka kii bu efɛɛloo, e doolo Jɛhova o Bari i kpega!”

14. Ena edap doā-ɛp i yira a, e ena eyerebah i nɛ kɔ i dap egerebu a?

¹⁴ Dua siranu ama tɔgɛ kɛ̄ yere kara lu nu a kuī doo. Mɛ ena o doo a, lo a le pya o kara naa lu enwaabah agara ale a naa lu e’agara bu sīdee a a nia a? Kiisī lo eyere kara doodoo wa ua dam a le bu kam Jizɔs, sa o dɛrɛ nyiɛ nyɔɔ Bari kɔ a naale elɛɛ a baloo le kɔ a naale epee sɔ̄ lo e’agara o kara bu ziī sīdee ale lo dɔɔ̄na. Kiisī lo ebara Jɛhova kɔ a nɛ a ye kaɛ edɔɔ̄. (Fil 4:13) Nyɛŋiabu kɔ nwīgbagbara sɔ̄ aā nyaawo, Jɛhova enɛ a leelee mmɛ kɛ̄ oo lee dapna nyɛŋiabu kɛ̄ o bee tɔga doo sɔ̄ akii adumɛ. Kuma sɔ̄ o bia bu bɔ ture nyiɛ loo sa gaa egerebu kɛ̄bah doā-ɛp tɛ̄maloo yerebah Jɛhova a, o sikɛ̄ agaloo sa dap kpesī pya doā-ɛp a gaa lu li deesī.​—⁠1 Pit 1:​6, 7.

15. Dookɛ̄ alu e’ɛm bu kpa Matiu 17:​19, 20 doo, amunu finiabah na pya a wee nyɔɔnɛ dumɛ Jizɔs bee kpesī a?

¹⁵ Jizɔs bee tɔgɛ pya a wee ye nyɔɔnɛ dumɛ kɔ yira eyerebah wa nɛ kɔ ba a dap be eebah e’aga kɛ̄tɔɔ̄. (Buū Matiu 17:​19, 20.) A ɛrɛ ziī sɔ̄ pya a wee ye nyɔɔnɛ dumɛ naa bee dap kpo pɔrɔ edɔɔ̄ lɛɛ bu nɛɛ, kereadoo ba ebee doo wo pya dɔɔ̄na sɔ̄. Ena anua ba naa bee dap a? Jizɔs baatɛ̄ kɔ alu ebɛɛ̄ kɔ ba a ɛrɛ yira yereloo. A bee wa kɔ nɛ kɔ lo ba ɛrɛ e’agatɛ̄ yira, ba edap be eebah e’aga kɛ̄tɔɔ̄ kereadoo lo e’aga kɛ̄tɔɔ̄ agabah sa bee gbɛnɛ egu! Nii’ee, ili dapnage kpesī finiabah a bee kɔ ii lee dap yeebah.

16. Bu mɛ sīdee na yira bee yerebah nɛ Geydi kɔ a dap egerebu sɔ̄ a bee lu efɛ ye dam a?

¹⁶ Naa kɛɛrɛ nu akiiloo ziī wuga nɛɛwa a kura Geydi alu Guatemala. A bee lu efɛ ye dam a kura Edi sɔ̄ ba bee le nyɔɔ dee aa aa enɔānu. Bu mɛ sīdee na yira Geydi eyerebah ye nɛ kɔ a dap tama gbɛnɛ ekiɛ̄nu ama a. A kɔ: “Yere kara yerebah mɛ nɛ kɔ m dap top na dɔnia toh tɛrɛ nyɔɔ Jɛhova, e lo ama bee doo kɔ m ɛrɛ efɛɛloo beenyiɛ. M bee muɛ yerebah a aabah Jɛhova tɛ̄maloo pya na butɔ le pya na gbo bu bɔŋanaloo. Lulu kirikiri bu esiatam Jɛhova bee dɔɔ̄ na biirabu lɛɛ loo sa mɛ yerebah nɛ kɔ m dap tama taāŋa ziī ziī biradee sa mm ɛrɛ gbɛnɛ ekɛɛrɛ akiiloo nyɔɔ’ee li. Aāloo nu a mɛ siraloo ama, m emɔna kɔ kaɛlɛɛ ɛrɛgeba doā-ɛp m kpesī li deesī, m dap egerebu sa tama lo doā-ɛp tɛ̄maloo yerebah Jɛhova, Jizɔs le bɔŋanaloo.”

17. Ena i dap doo sɔ̄ i kpesī gbɛnɛ taāŋa a bee egu a?

¹⁷ Ekɔ o le bu gbɛnɛ ekiɛ̄nu nyɔɔbee ziī nɛɛ o wereloo u ni? Yere mɛm loo o yira bu aakɛ̄ bu luh tɛ̄maloo ebuū pya ue a le bu Baibol akiiloo pya a bee lu elɛɛ kɛ̄  bu luh. Ekɔ o le bu gbɛnɛ ekiɛ̄nu nyɔɔbee alu ekpo ziī nɛɛ a nuūna o butɔ ni? Nɔ nu nyɔɔ oloo lokwa o dap suā leere kɔ Bari wee nɛ zuurabahtɔ̄ bu sīdee a lee eera. Kaɛlɛɛ ɛrɛgeba taāŋa o waa kpesī, su lo taāŋa nua dee a a kpaā nɛ lo ewu o yira. Kɔ taɛ kɛ̄ nu a tɔɔ̄loo doo nɛ Jɛhova. O aa kpoora oloo lɛɛ loo pya wuga nɛɛdam le nɛɛwa, taāwo tɔɔ̄ wa dabaloo. (Kam 18:⁠1) Doo pya nu edoo kɔ o dap egerebu, kere alu kɔ sɔ̄ o nyɛŋiabu nu a bee a siraloo, a doo kɔ o to. (Yɔɔ 126:​5, 6) Kiisī lo ebuū Baibol, si enɔānu le uwe zue ue. Sa o wee kɛɛrɛ nu akiiloo pya leelee lo Jɛhova eyira yii kɔ enɛe a li deesī. Kuma kɛ̄ o muɛ kɛ̄ Jɛhova aa a yerebah nɛ doo, kɛ̄ yira o ye ɛrɛ bu e’aganage loo doolo.

18. Lo o muɛ kɔ o yira naa aadee aganaloo, ena o dap doo a?

¹⁸ Lo ziī doā-ɛp o bee tɛɛ̄bu sɔ̄ akii adumɛ ale lo o waa tɛɛ̄bu anyaawo doo kɔ o muɛ kɔ o yira naa aadee aganaloo, o aa pee beenyiɛ a. Su ye nua dee a a kpaā nɛ lo e’agɛrɛtɛ̄ o yira. Bara nu pya nɛɛ lɛɛratam Jizɔs bee bara sɔ̄ ba bee kɔ: “Yere ilii yira loo.” (Luk 17:⁠5) Sa o ɛrɛ ekɛɛrɛ nyɔɔ pya edoba a bee lu ekɔ nu kumaloo bu ekobee ue ama. Nyɛŋiabu dɛ̄dɛɛ̄ sɔ̄ Jɛhova eyerebah a nɛ dookɛ̄ Miguel le Yurai bee doo. Agɛrɛbah yere kara nɛ Jɛhova dookɛ̄ sira Vero le Anel bee doo, eetɔɔ̄ na sɔ̄ o waa kpesī gbɛnɛ taāŋa. Sa o suā kɔ Jɛhova dap a yerebah nɛ tɛ̄maloo pya o butɔ ale pya o gbo dookɛ̄ Geydi bee doo. Lo o aaloo kɔ Jɛhova a yerebah a nɛ lo edap egerebu kɛ̄bah pya taāŋa o gaa tɛɛ̄bu anyaawo, o gaa le esuā leere kɔ eyerenage bah a nɛ kɔ o dap egerebu kɛ̄bah ɛrɛgeba doā-ɛp o kpesī li deesī.

19. Ena Jizɔs bee suā leere a, e ena ili suānage leere a?

¹⁹ Jizɔs bee yerebah nɛ pya a wee ye nyɔɔnɛ dumɛ kɔ ba a muɛ kɛ̄ alu ebɛɛ̄ kɔ ba a yere wa yira loo, kerewo, a naa bee ɛrɛ baɛ baɛ beenyiɛ kɔ tɛ̄maloo yerebah Jɛhova ba etɛɛ̄ yeebah pya doā-ɛp ba gaa le ekpesī li deesī sa bia bu bɔ ture nyiɛ loo. (Jɔn 14:1; 16:33) A bee suā leere kɔ gbɛnɛ eku pya nɛɛ etɛɛ̄ yeebah gbɛnɛ etɛɛrɛloo nyɔɔbee wa e’agatɛ̄ yira. (Mum 7:​9, 14) O lege wa yɛɛ ni? Tɛ̄maloo yerebah Jɛhova, o le wa yɛɛ lo a le o doo dɛ̄dɛɛ̄ nu o dap anyaawo lo e’agɛrɛtɛ̄ o yira!​—⁠Hib 10:⁠39.