Lɛɛ m gae kɔ nu a bee sikɛ̄ sira, m dasī kɔ kɛ̄ m bee bɔātɛ̄ esiatam mmɛɛ sɔ̄ doo.

M bee mɛa bu zua 1942 bie ekpedɛɛ̄ buɛ̄ pya Caribbean maā tɛɛ̄ ɛŋɛnɛ a kura Curaçao. Taɛ kɛ̄ na tɛ lu na Suriname, mɛ a bee kii lo buɛ̄ uwe tam. Pio zua lɛɛ m gae mɛa, na tɛ bee le yɛɛ tuatua pya nɛɛ a bee liamaā sa lu Pya Ekeebee Jɛhova li Curaçao. a A wee nyɔɔnɛ yube ii i lu pya ye miɔŋɔ nɔ Baibol dɛ̄dɛɛ̄ kaɛ, kere ii wee gbī enɔ nu. Sɔ̄ m elua 14 zua, na tɛ bee obara pya i butɔ kuma Suriname lokwa a dap kuūdɛɛ̄loo ye ka ebee ana.

Bie Suriname, m bee bɔātɛ̄ eyii gbo pya zege lo ba aa bee su mɛm siātam nɛ Jɛhova. Ba bee mɛ nama kina, sa aa si tam sɛmdee dɛ̄dɛɛ̄ sɔ̄. Sɔ̄ ba gaa kɔ pya nu a bee wa siraloo sɔ̄ ba bee zue ue, bu wa wee ɛɛ kaāna. Sɔ̄ i e’aara enɔānu, pya na gbo le mm wee kɔnia nu akiiloo Baibol, siga sɔ̄, sɔ̄ i le e’ɛŋɛtɛ̄kɛ̄ uunɛ sa aa ɛp zina bunyɔɔ. Pya na gbo ama bee mɛ yerebah nɛ kɔ m doo nu m gaa bee gbī edoo bu dum; lo a le, si tam nɛ Jɛhova. Nyɔɔwo, m bee liamaā sɔ̄ m elua 16 zua. Sɔ̄ m lu 18 zua, m bee bɔātɛ̄ esitam sɛmdee dɛ̄dɛɛ̄ sɔ̄.

M bee nɔ gbɛnɛ-edo nu sɔ̄ m gaa bee sɛmdee. E pya nu ama bee mɛ yerebah nɛ bu na esiatam mmɛɛ sɔ̄. Bu edoba, tua nu m bee nɔ na kɛ̄ kpɔā pya dɔɔ̄na lu ebɛɛ̄ doo. Sɔ̄ m bee bɔātɛ̄ sɛmdee, ziī nɛɛ a wee si tam aā ziī edo yii ziī a kura Willem van Seijl bee mɛ su yaa loo. b A bee mɛ tɔgɛ gbɛnɛ-edo kɛ̄ e’aa baloo tam bu bɔŋanaloo Bari doo. Taɛ lo sɔ̄ ama, m sii bee suā kɔ pya zuurabahtɔ̄ ama bɛɛ̄ mɛ kaāna. Lo zua a nyɔɔnɛ, bee lu etube mɛ baloo  nua nɛɛ sɛmdee bu keebee sīdee, e sɔ̄ esaa m bee bɔātɛ̄ eyerebah nɛ keekee eku pya wuga a bee tɔɔ̄ ebini kɛ̄ bu barasī kuɛ mma li Suriname. Bu mɛ bee ɛɛ kaāna kɛ̄ pya wuga bee mɛ kpɔā doo nyɔɔ sɔ̄! Aāge lo sɔ̄, m epiiga lo enyɔɔnɛ wa edoba tɛ̄maloo esu sɔ̄ kpɔā pya dɔɔ̄na.

Eree baɛ nu m bee nɔ na kɛ̄ etɔɔ̄dum a waɛbah sa lu nɛɛ a para nɔɔ nu doo. Bɔātɛ̄ ziī ziī enɔɔ̄, nɛɛ le mm wee gbaa si tam sɛmdee bu keebee sīdee wee nɔɔ pya nu a i bɛɛ̄ lo i yaɛ bu pya kaɛ a le sī. Lɛɛ ziī ii kiā nyɔɔnyɔɔ dɛɛ̄ kiā sa si buɛ̄ alu bee kɛ̄ bu lo barasī wee yaɛ pya nu a i bɛɛ̄. I wee nwaɛ̄dɛɛ̄ kaāna sa nɔɔ pya nu i yaɛ leere, le kɛ̄ i su daānu doo kinakina lokwa kpugi a wee lu edɔɔ̄ i nɛ ziī ziī enɔɔ̄ i dap toora. Lo alu kɔ nu tah i bah sɔ̄ i le barasīloo kuɛ mma ama, naa wee aadee waɛ kɔ i ɛrɛ nɛɛ eyerebah i nɛ. M muɛ kɔ nɔnɔ lo etɔɔ̄dum a waɛbah sa lu nɛɛ a para nɔɔ nu aā sɔ̄ m bee le zege na a mɛ yerebah nɛ kɔ m dap su ekɛɛrɛ bie nyɔɔ sisi tam nɛ Jɛhova bu dɛ̄dɛɛ̄ na dum a.

Lo eree taa nu m bee nɔ na biī a le bu tɔgɛnu pya nɛɛ bu alaba muɛ̄ ue. Sɔ̄ m aa bee aakɛ̄, m wee kɔ muɛ̄ ue Dutch, Beke, Papiamento, le Sranantongo (alunage ekure Sranan), lo alu muɛ̄ ue gbɛnɛ-edo nɛɛ wee kɔ bie Suriname. Mɛ bie barasī kuɛ mma ama, m bee muɛ̄ kɔ gbɛnɛ-edo nɛɛ gbaɛ̄ i tɔ̄ loo leere sɔ̄ i wa zue ue nɛ bu wa muɛ̄ ue. A bee mɛ agabah lo ekɔ pio lo muɛ̄ ue, doodoo Saramaccan nyɔɔ kɛ̄ ba sere muɛ̄ loo kɔ ue doo. Kerewo, na epiaga lo ekiisī lo enɔ naa bee lu yɔrɔ. Aā lo sɔ̄, m edaba tɔgɛ kaka ue gbɛnɛ-edo nɛɛ nyɔnɛbee m dap kɔ wa muɛ̄ ue.

A ɛrɛ pya nu a bee mɛ siraloo sɔ̄ m aa bee nɔge lo muɛ̄ ue, lo a bee doo kɔ kɛɛ a bɔp mɛ. Bu edoba, ɛrɛ ziī dee m bee gbī ebip ziī nwiīnɛɛwa a wee kɔ muɛ̄ ue Saramacca m wee nɔɛ̄ Baibol lo a le ye eyɔbu ekirage kɛ̄. Mɛ nu m bee ye bip na lo esua bu naa e! Nu m bee kɔ ama naa bee ye nia. Kere m bee tɛɛ̄ dua ekwɔ ama gbɛnɛkpo sɔ̄, m bee piiga lo ekɔ wa muɛ̄ ue bu na esiatam.

Bu zua 1970, bee lu etubo mɛ baloo nua nɛɛ kuūdɛɛ̄loo sɛkiut. Bu lo zua m bee su slide tɔŋɛ vidio a kura “Si Beekɛ̄ Pya Ekeebee Jɛhova Bu Yube Nyɔuwe” nɛ gbɛnɛ-edo eku pya wuga ba le keekee kɛ̄ bu barasī kuɛ mma ama. Lokwa i wa dap inaloo, mda le pio pya dɔɔ̄na wuga wee yii bu ziī nyɔɔnyɔɔ fah-maā alu gbɔrɔɔloo ba su epate kwaā sa tɛɛ̄ nyɔɔ maā a le bu lo kuɛ. Pya nu i bee yere bu lo fah na generator, nu yere fuel bu, bee miā, le slide esu tɔŋɛ lo vidio. Sɔ̄ i e’ina bee maā kɛ̄ i gaa bee kii, i wee toora pya nu i bee aara a kuma buɛ̄ i su slide tɔŋɛ lo vidio. Nu m wee bialoo nyɛŋiabu na kɛ̄ bu pya nɛɛ a le kɛ̄ a naa waɛ e’ina ama wee ɛɛ loo pya lo vidio doo. Bu mɛ bee ɛɛ kaāna lo eyerebah nɛ pya nɛɛ kɔ ba a nɔ nu akiiloo Jɛhova le ye  bɔŋanaloo a le a kɛnɛkɛ̄. Pya biī m bee ɛrɛ bee eenyɔɔ pya epiaga m bee doo lo esitam nɛ Jɛhova kaāna.

Kere m bee muɛ biī a le bu tɔɔ̄ aba mm bu tam zue ue, m bee muɛ kɔ alu ebɛɛ̄ kɔ m ii wa. Nyɔɔwo m bee yere kara bara Jɛhova kɔ a nɛ mɛ wa edap tāma pya finiabah a le bu esiatam mmɛɛ sɔ̄ bie pya buɛ̄ a le barasī kuɛ mma ama. Sɔ̄ nu alu ziī zua etɛ̄na, m bee bɔātɛ̄ nyɔɔnɛ Ethel alu nɛɛ sɛmdee bu keebee sīdee lo a ɛrɛ edɔɔ̄ su loo waāna zɔɔ biraloo kɔ i iya ziī. Edoba nɛɛ lɛɛratam Pɔɔl wee nia Ethel aā sɔ̄ a bee lege zege, e a bee gbī enɔ ye edoba sa su loo nɛ tam zue ue dookɛ̄ a bee doo. I bee iya ziī bu Ɛrɛnia Enɔɔ̄ bu zua 1971 sa bɔātɛ̄ tam kuūdɛɛ̄loo sɛkiut doodoo dam le wa.

Ethel bee aa butɔ ba naa bee ɛrɛ gbɛnɛkpo zɔ, nyɔɔwo a bee ye waɛloo esitam kuūdɛɛ̄loo sɛkiut bie lo kɛ̄. Bu edoba, sɔ̄ i aa kpɛ̄naloo lo esiloo ziī bɔŋanaloo a le kɛ̄ a binia a le barasī kuɛ mma ama, ii wee aara gbɛnɛ-edo nu. I wee log pya i bɛloo bu ɔɔ sa biranage maā ɔɔ. I wee de sa ba ɛrɛgebah nu pya wuga a le lo kɛ̄ i nɛ, doodoo kanu a kura iguana a bee gbere, bari a kura piranha ale ɛrɛgeba dɔɔ̄na nu ba aa aābu kuɛ le bu maā. Sɔ̄ lɔgɔ fɛrɛ ede nu bu naale, i wee de nu nyɔɔ epanya ebue. Sɔ̄ ibugu naa bee le i wee su bah deā nu. Ethel le mm emɔna kɔ su loo waāna zɔɔ lo esitam nɛ Jɛhova edoora kɔ i lu taa eziī alu epig loo ziī agɛrɛ. (Eklis 4:12) Ii le edap ibere le nu a bee i siraloo ama lɔgɔ sɔ̄ doo pip pip!

Bee le sɔ̄ i gaa bee aa ziī ebini buɛ̄ a le barasī kuɛ mma ama na nu m bee kɔ tua sɔ̄ a bee sira a. Sɔ̄ lo fah-maā ina kɛ̄ lo maā aa bee nwaabah tɛɛ̄, lo fah bee zii, mɛ a bee sikɛ̄ nwaabah yɛɛ. I doo Bari yaa kɔ i bee yaa life jacket sa ii bee dɔ aabu lo  fah-maā. Kerewo, maā bee mma bu i fah. I bee egara nuede a bee le bu i bā tɛrɛ maā sa su pya lo bā oma maā lɛɛ bu lo fah.

Nyɔɔbee i bee top i nuede bie a, i bee bɔātɛ̄ tɛrɛ toba sɔ̄ i le aa ɔp fah. Mɛ ii bee aa lɔgɔ nu. Nyɔɔwo i bee yere kara nɛ Jɛhova kɔ a nɛ i nu i de lo dee. Sɔ̄ i eyere kara sah, ziī wuga nɛɛdam bee tɛrɛ ye toba sa a aa ziī gbɛnɛka bari a gbɔ̄mɛloo o’oo ii lo uunɛ.

Sɔ̄ Ethel le Mm esiatam kuūdɛɛ̄loo sɛkiut bu o’oo zua i bee ɛrɛ ziī keebee leelee lo ii bee ɛmadɛɛ̄, lo a le kɔ i ebee sah e’ɛrɛ nwiī. Sɔ̄ m bee dā lo ue bu mɛ bee ɛɛ, kerewo mm bee suā nu esira aabu. Bee lege aa taɛ Ethel le mm kaāna lo ebia bu tam mmɛɛ sɔ̄ lo ewaɛge doo wo. I nwiīnɛɛdam Ethniël bee mɛā bu zua 1976. E sɔ̄ baɛ zua le siga etɛ̄na i eree baɛ nwiīnɛɛdam Giovanni bee mɛā.

Nyɔɔ ebɛɛ̄ a bee le Suriname lo sɔ̄, tɔ naatam bee nɔɔ̄ kɔ m dap le aa kpɔā pya na miɔŋɔ sa lenage aa si tam kuūdɛɛ̄loo sɛkiut. Sɔ̄ pya i nwiī bee lege etera, bee lu eyere mɛ ture sɛkiut ba naa ɛrɛ maɛ bɔŋanaloo. Lo ama bee mɛ yerebah nɛ kɔ m dap si tam kuūdɛɛ̄loo sɛkiut loo baɛ kaɛ bu ziī ziī enɔɔ̄ sa su elua baɛ kaɛ a siga a siātam sɛmdee bie bɔŋanaloo a bee lu eyere i ture. Ethel le pya i nwiīnɛɛdam wee mɛ nyɔɔnɛ sɔ̄ m si tam bu pya bɔŋanaloo a waɛloo kɛ̄ i tɔɔ̄. Kerewo, aba mm wee si pya bɔŋanaloo le asɛmbli a le kɛ̄ kuɛ mma a binia.

M wee nɔɔ nu leere lokwa m dap si dɛ̄dɛɛ̄ tam a mɛ le bah. M wee muɛ kɔ i ɛrɛ enɔānu butɔ dɛ̄dɛɛ̄ kaɛ. Ɛrɛgeba sɔ̄ m siloo pya bɔŋanaloo a le kɛ̄ a binia, Ethel na a wee nyɔɔnɛ pya i miɔŋɔ sere enɔānu butɔ a. Kerewo, i wee muɛ kɔ i gbaae doo nu doodoo ziī butɔ gbɛnɛkpo sɔ̄. Ethel le mm wee nyɔɔnɛ pya i miɔŋɔ nɛɛdam bira bii maɛ sɔ̄ ale aara wa siā pya kɛ̄ a kpedɛɛ̄ a le lo barasī. M wee kaɛ daa gbɛnɛ-edo sɔ̄, sa tɛɛ̄nyɔɔ pya nu edoo bu bɔŋanaloo. E Ethel doodoo le wa alu ekɔ ue kumaloo bu kpa Kam 31:15, wee aakɛ̄ bagara lɔɔrɛ doo nuede, lokwa i dap ɛp nu a le nɛ dee sa gbaa de nu doodoo ziī butɔ lɛɛ pya i miɔŋɔ gae kii tɔkpa. Bu mɛ ɛɛ kaāna kɔ m ɛrɛ wa a su  loo waāna zɔɔ lo eyerebah mɛ nɛ kɔ m dap si pya tam a mɛ le bee dookɛ̄ Kpa Kaɛ kɔ doo!

Doodoo tɛ le ka, i bee piiga lo eyerebah nɛ pya i miɔŋɔ kɔ ba a wereloo Jɛhova le tam zue ue. I bee gbī kɔ pya i miɔŋɔ a sagɛ lo esi tam mmɛɛ sɔ̄ nyɔɔ wa loo, e a naale nyɔɔ kɔ i su bah-ekpo wa aā kɔ ba a doo wo. I wee kɔ kɛ̄ esiatam mmɛɛ sɔ̄ dɔbiī doo wa nɛ. I wee kɔ kɛ̄ Jɛhova eyerebah sa nɛ leelee i butɔ doo, sa kɔnage pya taāŋa i bee kpesī wa nɛ. E i wee muɛ kɔ pya i miɔŋɔ yii gbo pya wuga ba su taāŋabah Jɛhova nua tuatua bu wa dum.

Jɛhova bee nɛ dɛ̄dɛɛ̄ nu a i bɛɛ̄ sɔ̄ i bee le aa kpɔā pya i miɔŋɔ. Kerewo m wee piiga kuma kɛ̄ m dap doo doodoo tɛ bee tɔ. Pya nu m bee tɛɛ̄ bu sɔ̄ m bee le aba mm sa aa si tam sɛmdee bu keebee sīdee bie barasī kuɛ mma ama, bee mɛ yerebah nɛ kɔ m dap nɔ kɛ̄ ekpoogeloo kpugi i su daānu li deesī doo. Mɛ pio sɔ̄, kaɛlɛɛ kɛ̄ i piiga doo, a ɛrɛ sɔ̄ kɛ̄tɔɔ̄ wee aga sa ii dap doo pio nu i bee doo. Sɔ̄ a sira doo wo, m wee muɛ kɛ̄ Jɛhova i yerebah nɛ doo. Bu edoba, nɔ̄ bee dɔ Suriname aā bu zua 1986 mmɛ 1992. Bu pya zua ama, a bee aga kaāna lo e’ɛrɛ pya nu a i bɛɛ̄. Kerewo Jɛhova bee i nɛ pya nu a i bɛɛ̄.—Mat 6:32.

Jɛhova wee i kuūdɛɛ̄loo dɛ̄dɛɛ̄ sɔ̄ sa i nɛ kaāna ɛɛbu sa doo kɔ pya nu i ɛrɛ a gbɔɛ̄ i loo bu dum. Pya i miɔŋɔ lu kaāna leelee i nɛ, sa bu i ɛɛ kaāna kɔ i kpɔā wa kɔ ba a taāŋabah Jɛhova. Bu i ɛɛnage kɔ ba biaɛfii lo esu dɛ̄dɛɛ̄ wa dum siātam mmɛɛ sɔ̄. Elua ekpɔā Ethniël le Giovanni bie tɔkpa alu ekure, Tɔkpa Pya Zue Ue Buɛ̄-mɛnɛ anyaawo, e wa wa le aba aa gbaa si tam li tɔ naatam a le Suriname anyaawo.

Nyaawo Ethel le mm e’ana, kerewo, i lege aa lu kirikiri bu esiatam Jɛhova doodoo pya sɛmdee bu keebee sīdee. Kɛādoo, i ɛrɛ gbɛnɛ kpo nu edoo a i le bah, lo a doo kɔ m aa sii dapge nɔ yɔp maā mmɛ nyaawo! Mɛ a naa kiɛ̄ mɛ. Sɔ̄ m ɛp dumɛ, m muɛ kɔ na biaɛfii lo esu dɛ̄dɛɛ̄ na dum siātam mmɛɛ sɔ̄, aā sɔ̄ m bee lege zege lu biaɛfii a lee eera.