1. I tɛɛ̄ doodoo wa suā kɔ Jɛhova gbī etɔɔ̄ i waɛloo?

 JƐHOVA kue i kɔ i tɔɔ̄e ye waɛloo. (Jem 4:8) A gbī elu i Bari, i Tɛ, le i Gbo. A agara i kara sa i yerebah nɛ sɔ̄ i aa kpesī e’aga kɛ̄tɔɔ̄. E a su ye bɔŋanaloo i tɔŋɛ nu sa i kpega. Mɛ, ena i ɛrɛ edoo lo etɔɔ̄ waɛloo Jɛhova ani?

2. Bu mɛ sīdee na i dap tɔɔ̄ waɛloo Jɛhova a?

² I dap tɔɔ̄ waɛloo Jɛhova tɛ̄maloo eyere kara ye nɛ, buū ye Muɛ̄ Ue sa ɛrɛ ekɛɛrɛ nyɔɔ. Lo i doo wo, edoo kɔ i were ye loo sa ye tɔgɛ nia loo. Lu ezū i kɔ i nwa ye dɛɛ̄ sa ye nɛ ka a ye kuu. (Mum 4:11) Kuma kɛ̄ i kiisī lo esuā loo Jɛhova doo, kɛ̄ i turenage ye nyiɛ loo le ye bɔŋanaloo lo a i su yeābah nɛ doolo.

3. Bu mɛ sīdee na Pɔrɔ-edɔɔ̄ aa gbī ekpoora i lɛɛ loo Jɛhova a, mɛ ena eyerebah i nɛ kɔ i aa lɛɛbaloo Jɛhova le ye bɔŋanaloo a? (Le-yɔɔ 31:13, 14)

³ Kɛādoo, Pɔrɔ-edɔɔ̄ gbī ekpoora i lɛɛloo Jɛhova, eetɔɔ̄ na sɔ̄ i gaa tɛɛ̄bu e’aga kɛ̄tɔɔ̄. Mɛ sīdee na a doo lo ama ani? Bu kinakina, a gbī edoo kɔ i aa turena nyiɛ loo Jɛhova le ye bɔŋanaloo. Kerewo, i dap be eebah pya ye kiāŋana ama. Lo i ɛrɛ e’agatɛ̄ yira sa dɛrɛ nyiɛ nyɔɔ Jɛhova kaāna edoo kɔ i aa lɛɛbaloo i Bari le ye bɔŋanaloo.—Buū Le-yɔɔ 31:13, 14.

4. Ena i kɔnia bu ekobee ue ama a?

⁴ Bu ekobee ue ama, i kɔnia taa nu finiabah lo a naa aabu bɔŋanaloo, lo ziī ziī ɛɛ dap doo kɔ i aa dɛrɛna nyiɛ nyɔɔ Jɛhova le ye bɔŋanaloo. Pya nu finiabah ama dap i  kpoora lɛɛloo Jɛhova doodoo wa? E ena i dap doo lo ebe eebah pya nu Setan gbī edoo ama a?

5. Bu mɛ sīdee na taāŋa dap doo kɔ i aa dɛrɛna nyiɛ nyɔɔ Jɛhova le ye bɔŋanaloo a?

⁵ Pio sɔ̄, i wee kpesī taāŋa, doodoo sɔ̄ pya i butɔ i gbanasī ale alu elɛɛ i loo tam. Bu mɛ sīdee na dua taāŋa ama dap doo kɔ i aa dɛrɛna nyiɛ nyɔɔ bɔŋanaloo Jɛhova sa i kpoora lɛɛ loo Jɛhova a? I dap ɛrɛ gbɛnɛ biirabu sa pee beenyiɛ i, lo a le i tɔɔ̄ bu taāŋa bu nyɔɔnyɔɔ sɔ̄. Setan gbī esu lo sɔ̄ daā kɔ i kɛɛrɛ kɔ Jɛhova naa were i loo. Setan gbī kɔ i kɛɛrɛ kɔ Jɛhova ale ye bɔŋanaloo na aa doo kɔ i tɔga a. Dua nu ama bee siraloo pio pya Izrɛl bie Ijipt. Tua sɔ̄ ba bee yiga kɔ Jɛhova na a bee tubebaloo Mozis le Erɔn kɔ a agara wa lɛɛ bu zooro a. (A’aa 4:29-31) Mɛ sɔ̄ Fɛro bee wa sikɛ̄ agɛrɛbah tɔg, ba bee bege ue Mozis le Erɔn loo wa taāŋa sa wa kɔ nɛ kɔ: “Bui edoora kɔ i lu nu anua saŋ loo Fɛro le pya ye zooro, sa bee wa yere gɛ̄ nɔ̄ bah lo efɛ i.” (A’aa 5:19-21) Ba bee bege ue pya zooro Bari ba bɔloo eture nyiɛ loo ama. Ɛp kɛ̄ alu nu ekiɛ̄nu doo a! Lo o biabu taāŋa bu nyɔɔnyɔɔ sɔ̄, mɛ sīdee na o dap kiisī lo edoo kɔ kɛ̄ o dɛrɛ nyiɛ nyɔɔ Jɛhova le ye bɔŋanaloo doo a agatɛ̄ a?

6. Ena i nɔ aāloo nɛɛ mɔmanudɛɛ̄ Habakuk kiiloo kɛ̄ etāma i taāŋa doo a? (Habakuk 3:17-19)

⁶ Kɔ dɛ̄dɛɛ̄ o kɛ̄tɔɔ̄ nɛ Jɛhova bu kara, sa gbī yerebah ye aābah. Nɛɛ mɔmanudɛɛ̄ Habakuk bee kpesī gbɛnɛ-edo taāŋa. A ɛrɛ sɔ̄ a bee ɛrɛ baɛbaɛ beenyiɛ lo a le Jɛhova aa ye kuūege dɛɛ̄ loo naa e. Nyɔɔwo a bee kɔ dɛ̄dɛɛ̄ kɛ̄ nu ye tɔɔ̄loo doo nɛ Jɛhova bu kara. A bee kɔ: “Aa Jɛhova, ina mɛ sɔ̄ na m gaa le to yerebah, e oo le dā? Ale to a loo, e’agabah dogo! e oo le kpɔā? . . . Ena anua kɔ o doo kɔ m muɛ dɛ̄dɛɛ̄ piya nu sa ɛp nyɔɔ etɛɛrɛloo a?” (Hab 1:2, 3) Jɛhova bee agara kara ye zooro a bɔ ture nyiɛ loo bee yere ama. (Hab 2:2, 3) Sɔ̄ Habakuk bee kɛɛrɛbu kɛ̄ Jɛhova bee agara pya ye nɛɛ doo, a bee sikɛ̄ ɛrɛ ɛɛbu. A bee suā leere kɔ Jɛhova kuūe ye dɛɛ̄ loo sa eyerebah ye nɛ kɔ a tāma ɛrɛgebah taāŋa. (Buū Habakuk 3:17-19.) Ena i nɔ aāloo a? Sɔ̄ o le bu taāŋa, yere kara nɛ Jɛhova sa kɔ kɛ̄ nu a tɔɔ̄loo doo ye nɛ. Lɛɛ o gbī yerebah ye aābah. Lo o doo wo, suā leere kɔ Jɛhova eyerebah a nɛ kɔ o dap egerebu. Sɔ̄ o muɛ kɛ̄ a a yerebah nɛ doo, e’agɛrɛtɛ̄ yira o ye ɛrɛ bu.

7. Ena ziī manamana wuga nɛɛwa a kura Shirley bee gbī kɔ a yiga a, e ena a bee doo kɔ aa peere ye yira bu Jɛhova a?

⁷ Wee doo pya nu edoo kɔ o tɔɔ̄ bialoo Jɛhova. Naa ɛp kɛ̄ dodoo wo bee yerebah nɛ ziī wuga nɛɛwa ye bee kura Shirley a tɔɔ̄ Papua New Guinea doo, sɔ̄ a bee le bu e’aga kɛ̄tɔɔ̄. b Pya butɔ Shirley bee lu kporo sa pio sɔ̄, a naa wee wa waɛbah lo e’ɛrɛ nuede. Ziī ye manamana bee gbī edoo kɔ aa turena nyiɛ loo Jɛhova. A bee kɔ: “O kɔ kaɛ edɔɔ̄ Bari gaa a yerebah nɛ, mɛ kɛ̄ na lo yerebah le a? Pya o butɔ lege aa lu kporo. O gaa pee sɔ̄ kɔ o aa zuee ue.” Ue ama bee gbee nyiɛ Shirley sa a kɔ: “M bee bip aba mm kɔ: ‘Ekɔ Bari aa i kuūge dɛɛ̄loo ni?’ Nyɔɔwo, m bee yere kara nɛ Jɛhova aba lo sɔ̄, sa kɔ dɛ̄dɛɛ̄ kɛ̄ nu mɛ tɔɔ̄loo doo ye nɛ. M bee kiisī lo ebuū Baibol le  pya i kpa, sa kiinagesī lo ezue ue sa si enɔānu.” Sɔ̄ sɔ̄ naa binia, a bee bɔātɛ̄ emuɛ kɔ Jɛhova aa kuūdɛɛ̄loo pya ye butɔ. Pya ye butɔ naa bee kaɛ ziā, e ba bee le bu ɛɛbu. Shirley kɔ: “M bee muɛ kɔ Jɛhova gaa agara na kara.” (1 Tim 6:6-8) Lo o kiisī lo edoo pya nu edoo kɔ o tɔɔ̄ bialoo Jɛhova, edoonage kɔ o a lɛɛbaloo kɔ e’aga kɛ̄tɔɔ̄ ale baɛbaɛ beenyiɛ a kpoora a lɛɛloo Jɛhova.

8. Ena a dap siraloo pya wuga ba gaa kuūdɛɛ̄loo bɔŋanaloo Jɛhova a?

⁸ Pya i baa aa kɔ esah loo pya wuga a gaa kuūdɛɛ̄loo bɔŋanaloo tɛ̄ma nyɔɔ radio, TV le intanɛt. (Yɔɔ 31:13) Elua e’aa pio pya i wuga sa wa dɛrɛ ue kɔ ba lu pya bag dogo. Kɛ̄ a bee siranage loo Pya Nɛɛ Kraist bu tua sɔ̄ o’oo tup zua doolo, sɔ̄ a bee lu edɛrɛ esah ue nɛɛ lɛɛratam Pɔɔl sa ye aa nyɔɔ nu a naa doo. Ba bee doo dogo doodoo wa kumaloo ni?

9. Pio Pya Nɛɛ Kraist bee doo dogo doodoo wa sɔ̄ a bee lu eyere nɛɛ lɛɛratam Pɔɔl kpɔgɔrɔ?

⁹ Pio Pya Nɛɛ Kraist a bee le bu tua sɔ̄ o’oo tup zua bee ɔbɛ eyerebah nɛ nɛɛ lɛɛratam Pɔɔl sɔ̄ a bee lu eyere ye kpɔgɔrɔ bie Rom. (2 Tim 1:8, 15) Ena anua a? Lu kɔ kɛɛ bee wa bɔp loo Pɔɔl nyɔɔbee pya nɛɛ bee ye ɛmadɛɛ̄ nua nɛɛ bag dogo ni? (2 Tim 2:8, 9) Sɛh bɔɔ bee wa aa kɔ elu etɛ̄ŋanageloo alaba ni? Kaɛlɛɛ ɛrɛgeba nu a bee nua, naa kɛɛrɛ kɛ̄ nu bee dap tɔɔ̄loo Pɔɔl doo. E a bee tāma gbɛnɛ-edo e’aga kɛ̄tɔɔ̄, sa bee kpɛ̄na nage loo e’u wa bee. (Doonu 20:18-21; 2 Kɔr 1:8) Doraa ii le ebee pya a naa bee yiga eyerebah nɛ Pɔɔl sɔ̄ a bee le bu ebɛɛ̄! Ena a bɔloo kɔ i kɛɛrɛbu sɔ̄ alu etɛ̄ŋaloo pya wuga a gaa kuūdɛɛ̄loo bɔŋanaloo a?

10. Ena a bɔloo kɔ i nyɛŋiabu sɔ̄ alu etɛ̄ŋaloo pya wuga nɛɛdam ba aa kuūdɛɛ̄loo bɔŋanaloo a, e ena anua a?

¹⁰ Nyɛŋiabu nu anua alu etɛ̄ŋa i loo le nɛɛ a doo kɔ alu etɛ̄ŋa i loo. Eree  baɛ kpa Timɔti 3:12 kɔ: “Mɛ a elu tɛ̄ŋaloo dɛ̄dɛɛ̄ pya a gbī etɔɔ̄dum enwadɛɛ̄ Bari bu Kraist Jizɔs.” Nyɔɔwo, a naa lee kɔ a ɔbɛ i kɔ Setan aa bebe loo pya i wuga nɛɛdam lo ba aa kuūdɛɛ̄loo bɔŋanaloo. Taɛ nu aa gbī na lo e’ɔɛloo wa tɔɔ̄ agara nɛ Jɛhova sa i yere bɔɔ bu.—1 Pit 5:8.

11. Ena i nɔ aāloo edoba Ɔnisifɔrɔs a? (2 Timɔti 1:16-18)

¹¹ Kiisī lo eyerekpotɛ̄ pya o wuga sa wa tɔɔ̄ bialoo. (Buū 2 Timɔti 1:16-18.) Ziī nɛɛ ye bee kura Ɔnisifɔrɔs a bee le bu tua sɔ̄ o’oo tup zua bee doo dogo alu kee sɔ̄ a bee lu eyere Pɔɔl kpɔgɔrɔ. “Kɛɛ naa bee ye bɔp [sɔ̄ Pɔɔl bee le] kpɔgɔrɔ.” Taāwo, Ɔnisifɔrɔs bee gbī Pɔɔl, sa sɔ̄ a ye muɛ a bee gbī pya sīdee lo a dap ye yeābah nɛ. Ɔnisifɔrɔs bee kpɛ̄naloo epee ye dum lo edoo wo. Ena i nɔ aāloo a? Ii le eyiga kɔ ɛrɛ bɔɔ loo nɛɛ a ɔɛ i loo, ale doo kɔ i aa yerena kpotɛ̄ pya i wuga a gaa lu etɛ̄ŋaloo. Taāwo, i kɔ wa ue bee sa wa yerebah nɛ. (Kam 17:17) Lu ebɛɛ̄ kɔ i were wa loo sa wa yerekpotɛ̄.

12. Ena i nɔ aāloo pya i wuga nɛɛdam le nɛɛwa ba le Russia a?

¹² Naa kɛɛrɛbu edoba pya i wuga nɛɛdam le nɛɛwa ba le Russia, kɛ̄ ba eyerebah nɛ pya wa wuga bu yira sɔ̄ alu eyere wa kpɔgɔrɔ doo. Sɔ̄ aa lu ebiaɛ ue loo pio aba, gbɛnɛ-edo pya i wuga nɛɛdam le nɛɛwa wee si lo tɔbiaɛ lo eyere wa kpotɛ̄. Ena i nɔ aāloo a? Sɔ̄ alu ekɔ esah loo pya i wuga nɛɛdam a le dɔ esiatam bu bɔŋanaloo, sa wa yere kpɔgɔrɔ ale alu etɛ̄ŋa wa loo, bɔɔ aa a aa. Yere wa kara bee, kuūdɛɛ̄loo pya wa butɔ, sa gbī pya dɔɔ̄na sīdee lo eyeābah wa nɛ.—Doonu 12:5; 2 Kɔr 1:10, 11.

13. Bu mɛ sīdee na sɔ̄ pya nɛɛ i kɛgɛ dap doo kɔ i aa dɛrɛna nyiɛ nyɔɔ Jɛhova le ye bɔŋanaloo a?

¹³ Pya i manamana lo ba naa yira, le pya le ii le kɛ̄tam ale pya le ii le tɔkpa dap i kɛgɛ nyɔɔ i tam zue ue ale nyɔɔ kɔ i gbī etɔɔ̄dum tɛ̄maloo pya daakuu Jɛhova a kii nyɔɔ sa ɛɛ. (1 Pit 4:4) Ba dap kɔ: “Bu mɛ ɛɛ a loo, mɛ bui yigabari agabah sa buii doo nu dookɛ̄ pya nɛɛ aa doo.” Siga aba dap i bege ue loo kɛ̄ i aara nɛɛ alu ekpo lɛɛ bu bɔŋanaloo doo, sa kɔ: “ Bui tɛɛ̄ doodoo wa kɔ bui ɛrɛe wereloo?” Pya ue a le doo wo ama dap doo kɔ i ɛrɛ baɛbaɛ beenyiɛ. I dap bɔātɛ̄ ekɛɛrɛ kɔ: ‘Ekɔ Jɛhova gaa ɛmadɛɛ̄ kɔ m doo nu a yeekɛ̄ ni? Ekɔ ye bɔŋanaloo lu lo a bɔp nɛɛ gbɛnɛ ni?’ Lo o gaa kpesī dua kɛ̄tɔɔ̄ ama, mɛ sīdee na o dap tɔɔ̄ bialoo Jɛhova le ye bɔŋanaloo a?

14. Ena i doo a sɔ̄ pya dɔɔ̄na i kɛgɛ nyɔɔbee i nyɔɔnɛ pya daakuu Jɛhova a? (Le-yɔɔ 119:50-52)

¹⁴ Biaɛfii lo enyɔɔnɛ pya daakuu Jɛhova. Job bee le nɛɛ a bee nyɔɔnɛ pya daakuu Jɛhova kere ba bee ye kɛgɛ sɔ̄ a doo wo. Ziī nɛɛ a bee sereloo doodoo bee alue kaāna gbo Job bee gbī kɔ a yiga kɔ Bari naa ɛp nua lɔgɔ nu, kere Job nyɔɔnɛ pya ye daakuu ale a naa nyɔɔnɛ. (Job 4:17, 18; 22:3) Mɛ Job naa bee yiga pya esah ama. A bee suā kɔ pya daakuu Jɛhova akiiloo nu a lee le nu a bee piya lu lo a lera, e a bee biaɛfii lo enyɔɔnɛ. A naa bee yiga kɔ pya dɔɔ̄na a gbee ye kaāna yira. (Job 27:5, 6) Ena i nɔ aāloo a? O a yiga kɔ kɛ̄ pya nɛɛ a gbɛɛrɛ daa loo doo a ɔbɛ a lɛɛloo enyɔɔnɛ pya daakuu Jɛhova. Naa kɛɛrɛbu loo pya nu esira a loo bu dum. Ekɔ o sii muɛge kɔ pya daakuu Jɛhova lu lo a lee sa a dɔbiī nɛ  dɛ̄dɛɛ̄ sɔ̄ ni? Biaɛfii lo eyerekpotɛ̄ bɔŋanaloo a nyɔɔnɛ pya daakuu ama. Lo sɔ̄ lɔgɔ kɛ̄ pya nɛɛ a kɛgɛ doo naale edap a kpoora lɛɛloo Jɛhova.—Buū Le-yɔɔ 119:50-52.

15. Ena anua a bee lu ekɛgɛ Brizit a?

¹⁵ Naa kɛɛrɛ nu a bee siraloo ziī wuga nɛɛwa a le India a kura Brizit. Pya ye butɔ wee ye kɛgɛ nyɔɔ ye yira. Nwīgbagbara sɔ̄ aā sɔ̄ a bee liamaā sah bu zua 1997, bee lu elɛɛ ye dam lo a naa wee taāŋabah Jɛhova loo tam. Nyɔɔwo ye dam bee biaɛfii kɔ alɛ, Brizit, le pya wa miɔŋɔ nɛɛwa ekii kpaɛ̄ ye ka le ye tɛ wee tɔɔ̄, lo ba wee tɔɔ̄ dɔɔ̄na buɛ̄. Mɛ Brizit esikɛ̄ kpesī pya dɔɔ̄na nu finiabah. Nyɔɔbee ye dam naa bee lena loo tam a, Brizit bee si tam dɛ̄dɛɛ̄ sɔ̄ lokwa a dap yerebah nɛ pya ye butɔ. Gbaāloo wo, aba bɔŋanaloo a bee waɛloo kɛ̄ ba tɔɔ̄ bee le nu alu 350 kilomita (220 mi) aāloo kɛ̄ ba tɔɔ̄. Alu nu ekiɛ̄nu kɔ pya nɛɛ ye dam bee ye gbanasī nyɔɔbee ye yira. Lo kɛ̄tɔɔ̄ bee aga mmɛ kɛ̄ pya butɔ Brizit bee sikɛ̄ aa kpaɛ̄ pya butɔ ye dam. Mɛ a sira kɔ ye dam bee u sɔ̄ ba naa bee ɛmadɛɛ̄. Sɔ̄ esaa, dumɛloo kansa bee fɛ ziī ye nwiīnɛɛwa lo ebee lu 12 zua. E nu a bee doo kɔ ye kɛ̄tɔɔ̄ a sikɛ̄ gbedɛɛ̄ na bee pya nɛɛ Brizit bee ye begee ue kɔ dɛ̄dɛɛ̄ nu a sira ama lu ye bah. Ba bee kɔ, lo a naa bee lu ziī nɛɛ Ekeebee Jɛhova dɛ̄dɛɛ̄ taāŋa ama naale ebee sira. Kerewo, a bee kiisī lo eture nyiɛ loo Jɛhova sa biabu ye bɔŋanaloo.

16. Mɛ sīdee na Brizit bee ɛrɛ leelee sɔ̄ a bee tɔɔ̄ bialoo Jɛhova le ye bɔŋanaloo a?

¹⁶ Kuma sɔ̄ Brizit wee tɔɔ̄ kɛ̄ a binia aaloo kɛ̄ bɔŋanaloo le a, ziī nɛɛ kuūdɛɛ̄loo sɛkiut bee ye kɔ nɛ kɔ a zue ue bie kɛ̄ a gaa tɔɔ̄ sa sere enɔānu bie ye tɔ. Tua sɔ̄, a bee kɛɛrɛ kɔ a naale edabe doo nu ama. Mɛ a bee nyɔɔnɛ zuurabahtɔ̄ lo wuga bee ye nɛ. A bee zue le yereue nɛ pya dɔɔ̄na, sere enɔānu bɔŋanaloo bie ye tɔ, sa nɔɔ̄ sɔ̄ lo enyɔɔnɛ pya ye miɔŋɔ ɛrɛ enɔānu butɔ. Ena a bee sira aabu a?  Brizit bee bɔātɛ̄ nyɔɔnɛ gbɛnɛ-edo nɛɛ nɔ Baibol, e gbɛnɛ-edo pya a wee nɔɛ̄nu bee liamaā. A bee bɔātɛ̄ tam sɛmdee bu zua 2005. A bee ɛrɛ ekpɛanu loo kɛ̄ a bee ture nyiɛ loo Jɛhova le kɛ̄ a tɔɔ̄ agara nɛ ye bɔŋanaloo doo. Baɛ pya ye miɔŋɔ nɛɛwa gaa si tam nɛ Jɛhova bu bɔ ture nyiɛ loo, e baɛ ka bɔŋɔnaloo e’ina lo kɛ̄ anyaawo! Brizit muɛ leere kɔ Jɛhova na a ye nɛ ekpo kɔ a dap tāma ye e’aga kɛ̄tɔɔ̄ sa egerebu sɔ̄ pya ye butɔ bee ye kɛgɛ a.

17. Ena i biaɛfii lo edoo a?

¹⁷ Setan gbī kɔ i yiga kɔ Jɛhova naale eyerebah i nɛ sɔ̄ i le bu e’aga kɛ̄tɔɔ̄, e nu e’agɛrɛbah i agaloo lo i yerekpotɛ̄ Ye bɔŋanaloo. Setan gbī kɔ i ɛrɛ bɔɔ sɔ̄ alu etɛ̄ŋaloo pya wuga a ɛrɛ dɔtam bu bɔŋanaloo, wa gbee bee, ale sɔ̄ alu eyere wa tɔ kpɔgɔrɔ. E tɛ̄maloo ekɛgɛ i doo wo ama, a gbī e’ɔɛloo kɛ̄ i dɛrɛ nyiɛ nyɔɔ pya daakuu Jɛhova le Ye bɔŋanaloo doo. Kerewo, i suā pya pɔrɔ sīdee a su daānu ama, sa a naa dap i dag. (2 Kɔr 2:11) Biaɛfii lo ekiī pya esah Setan ama sa tɔɔ̄nɛ Jɛhova le ye bɔŋanaloo. Nyɛŋiabu, Jɛhova naale elɛɛ a baloo doo pip pip. (Yɔɔ 28:7) Nyɔɔwo, o a yiga kɔ lɔgɔ nu a kpoora a lɛɛloo Jɛhova!—Rom 8:35-39.

18. Ena i kɔnia bu elua ekobee ue li a?

¹⁸ Bu ekobee ue ama, i ekɔnia pya nu finiabah i dap kpesī a aabah pya a naale bu bɔŋanaloo. Mɛ a dapnage lu edoā-ɛp kɛ̄ i dɛrɛ nyiɛ nyɔɔ Jɛhova le ye bɔŋanaloo doo tɛ̄maloo pya nu finiabah a aabu bɔŋanaloo. Mɛ sīdee na i dap be eebah pya lo nu finiabah a? I kɔnia lo ama bu elua ekobee ue li.