1. Ena i dap ɛmadɛɛ̄ a, e ena i suā leere a?

 I ƐMADƐƐ̄ kɔ pio nɛɛ dap i gbanasī sɔ̄ i gaa zue ue. E ba dap i gbanasī eewo li deesī. (Dan 11:44; 2 Tim 3:12; Mum 16:21) Kerewo, i suā leere kɔ Jɛhova eyerebah i nɛ sɔ̄ alu ebɛɛ̄. Ena anua a? Jɛhova wee yerebah nɛ pya ye zooro dɛ̄dɛɛ̄ sɔ̄ kɔ ba a dap si pya tam a wa nɛ, kaɛlɛɛ kɛ̄ a bee kɔ lo tam aga doo. Lo enɛ edoba, i naa ɛp pio nu a bee siraloo nɛɛ mɔmanudɛɛ̄ Ezekiel, lo a bee zue ue nɛ pya Juu ba bee le zooro li Babilɔn.

2. Jɛhova bee kɔ mɛ dua pya nɛɛ na Ezekiel ezue ue nɛ a, e ena i gaa le nɔ bu ekobee ue ama a? (Ezekiel 2:3-6)

² Mɛ dua pya nɛɛ na Ezekiel bee zue ue nɛ a? Jɛhova bee kɔ ba lu “pya a naa ɛrɛ enwadɛɛ̄,” “pya e’aga dɛɛ̄,” le pya “lɛɛbeekɛɛ̄.” Ba bee bee piya doodoo suu sa dap fɛ nɛɛ doodoo peere. Nu anua a lo Jɛhova bee kɔ nɛ Ezekiel gbɛnɛ-edo sɔ̄ kɔ: “O a wa ɛrɛ bɔɔ loo”! (Buū Ezekiel 2:3-6.) Ezekiel bee dap si tam zue ue a bee lu enɛ ye nyɔnɛbee a bee le (1) Jɛhova na a bee ye yere a, (2) bee lu enɛ ye ekpo tɛ̄maloo kaɛ edɔɔ̄ Bari, e (3) Muɛ̄ Ue Bari bee ye agɛrɛloo. Taa pya nu ama bee yerebah nɛ Ezekiel doodoo wa? E ba yerebah i nɛ anii’ee doodoo wa?

3. Pya amunu ue na a bee dap nɛ e’agaloo Ezekiel a, e bu mɛ sīdee na Jɛhova bee doo kɔ a suā kɔ eyeree ye kpotɛ̄ a?

³ Jɛhova bee kɔ nɛ Ezekiel kɔ: “M lɛɛra a.” (Ezek 2:3, 4) Ue ama bee dap yere mɛm loo Ezekiel. Ena anua a? Nu anua na bee Ezekiel bee dap nyɛŋiabu kɔ Jɛhova  bee kɔ dua ue ama nɛ Mozis le Aisaia sɔ̄ a bee wa yere doodoo pya ye nɛɛ mɔmanudɛɛ̄. (A’aa 3:10; Ais 6:8) Ezekiel bee suānage kɛ̄ Jɛhova bee yerebah nɛ baɛ nɛɛ mɔmanudɛɛ̄ ama lo ebe eebah pya nu a bee wa gbanasī doo. Nyɔɔwo, sɔ̄ Jɛhova bee kɔ nɛ Ezekiel baɛ sɔ̄ kɔ: “M lɛɛra a,” nɛɛ mɔmanudɛɛ̄ ama bee dap ture nyiɛ loo kɔ Jɛhova eyeree ye kpotɛ̄. Gbaāloo wo, alu e’ɛm bu kpa Ezekiel gbɛnɛ kpo sɔ̄ kɔ: “Muɛ̄ Ue Jɛhova bee mɛ lu loo.” (Ezek 3:16) E a bee ɛm gbɛnɛkpo sɔ̄ kɔ: “Ue Jɛhova bee mɛ lu loo.” (Ezek 6:1) Bu kaka, Ezekiel bee suā leere kɔ Jɛhova na a ye yeree a. Gbaāloo wo, naa daba tɛ Ezekiel a bee le nɛɛ ewɔp bee ye kɔ nɛ kɔ Jɛhova wee yerebah nɛ pya ye nɛɛ mɔmanudɛɛ̄ aa kere. Jɛhova bee kɔnage nɛ Aizik, Jekɔb, le Jeremaia, kɔ: “Mda le a loo.”—Jɛn 26:24; 28:15; Jer 1:8.

4. Amunu ue egbɔ̄nyiɛ na a bee dap nɛ e’agaloo Ezekiel a?

⁴ Pya Izrɛl bee doo dogo doodoo wa sɔ̄ Ezekiel wa zue ue nɛ? Jɛhova bee kɔ: “Pya tɔ Izrɛl naale gbaɛ̄ a tɔ̄ loo; nyɔnɛbee ba naa gbī egbaɛ̄ mɛ tɔ̄.” (Ezek 3:7) Sɔ̄ ba kiī Ezekiel, Jɛhova na pya lo nɛɛ kiī a. Ue ama doo kɔ Ezekiel a suā kɔ kere pya nɛɛ kiī ye, naale bee a naa si ye tam leere doodoo nɛɛ mɔmanudɛɛ̄. Jɛhova bee doonage kɔ Ezekiel a suā kɔ sɔ̄ biaɛ a gaa zue edoo a, “ba gaa le suā kɔ ziī nɛɛ zue ue bee wa le yɛɛ.” (Ezek 2:5; 33:33) Lɔgɔ baɛbaɛ beenyiɛ naale loo kɔ ue a nɛ egbɔ̄nyiɛ ama bee dap nɛ ekpo Ezekiel sa doo kɔ a dap si ye tam mmɛnɛ.

5. Ena kpa Aisaia 44:8 kɔ enɛ i e’agaloo a?

⁵ Ili ɛrɛnage e’agaloo nyɔnɛbee i suā kɔ Jɛhova na a i yere kɔ i zue ue a. A yere i ka loo tɛ̄maloo ekure i pya ye “ekeebee.” (Ais 43:10) Mɛ dua ka a i yereloo sɛh! Dookɛ̄ Jɛhova bee yere mɛm loo Ezekiel doo kɔ: “O a wa ɛrɛ bɔɔ loo,” Jɛhova gaa i yerenage mɛm loo kɔ: “Bɔɔ aa i aa.” Ena anua ii le e’ɛrɛ bɔɔ loo pya a i gbanasī a? Doodoo Ezekiel, ɛɛ Jɛhova na a i yere a, sa a gaa i yerekpotɛ̄.—Buū Aisaia 44:8.

6. (a) Bu mɛ sīdee na Jɛhova doo kɔ i suā kɔ eyeree i kpotɛ̄ a? (b) Ena a i nɛ mɛm le egbɔ̄nyiɛ a?

⁶ Jɛhova yira yii i nɛ kɔ eyeree i kpotɛ̄. Bu edoba, lɛɛ Jɛhova gae kɔ: “Bɔɔlo na pya mdaa ekeebee a,” a bee kɔ: “Sɔ̄ o tɛɛ̄ bu booboo maā m gaa le le a loo; sɔ̄ o tɛɛ̄ bu booboo pɛnɛ, ba naale bu a ee bee; sɔ̄ o kiā tɛɛ̄ bu miā a naale etaa a, e edɛm miā naale e’ɔp a lɛɛ.” (Ais 43:2) Sɔ̄ i gaa zue ue, pio sɔ̄ i wee kpesī gbɛnɛ-edo gbanasī a le doodoo pɛnɛ maā le doā-ɛp i dap dooreloo miā. Kerewo, Jɛhova yerebah i nɛ kɔ i kiisī lo ezue ue. (Ais 41:13) Gbɛnɛ-edo nɛɛ anii’ee kiī lo yereue dookɛ̄ ba bee doo bu dee Ezekiel. Mɛ nu i seea nyiɛ na bee, lo ama naa kura kɔ ii zue ue leere. I ɛrɛ mɛm le egbɔ̄nyiɛ sɔ̄ i suā kɔ a ɛɛrɛ bu Jɛhova sɔ̄ i kiisī lo ezue ue leere. Nɛɛ lɛɛratam Pɔɔl bee kɔ: “Ziī ziī [nɛɛ] esu ye ekpɛanu dookɛ̄ ye tam le doo.” (1 Kɔr 3:8; 4:1, 2) Ziī wuga nɛɛwa esiatam sɛmdee bu nyɔɔnyɔɔ sɔ̄ bee kɔ: “Bu mɛ wee ɛɛ lo esuā kɔ Jɛhova ekpɛnu loo i epiaga.”

7. Amunu pah na mɔmanudɛɛ̄ Ezekiel bee muɛ bee ye ɛrɛ nyɔɔ ɛrɛgeba sɔ̄ a kɛɛrɛbu loo a? (Ɛp foto a le nyɔɔ eko.)

⁷ Ezekiel bee muɛ kɛ̄ edɔɔ̄ Bari si ekpo doo. Bu mɔmanudɛɛ̄, Ezekiel bee muɛ kɔ kaɛ edɔɔ̄ Bari bee yerebah nɛ pya ɛnjɛl ba ɛrɛ ekpo sa doo kɔ pya gbɛnɛ gbɛnɛ wheel a le loo ziī fah-kɛnɛkɛ̄ a kiā. (Ezek 1:20, 21) Ezekiel bee doo dogo doodoo wa kumaloo? A bee ɛm nu a bee sira kɔ: “E sɔ̄ m bee ye muɛ, m bee dɔ uusīkɛ̄.” A bee lu nyɛŋia loo Ezekiel mmɛ kɛ̄ a dɔ uusīkɛ̄. (Ezek 1:28) Ɛrɛgeba sɔ̄ Ezekiel sikɛ̄ kɛɛrɛ nu akiiloo mɔmanudɛɛ̄ ama, a bee ye dap yere mɛm loo sɔ̄ a suā kɔ tɛ̄maloo yerebah a aaloo kaɛ edɔɔ̄ Bari edap si ye tam zue ue leere.

8-9. (a) Ena a bee siraloo Ezekiel sɔ̄ Jɛhova bee ye kɔ nɛ kɔ a yira nyɔɔ baɛ tɔ ye a? (b) Bu mɛ sīdee na Jɛhova bee sikɛ̄ yere mɛm loo Ezekiel lokwa a dap zue ue bie ye kɛ̄ zue ue a bee aga a?

⁸ Jɛhova bee kɔ nɛ Ezekiel kɔ: “Nwiī nɛɛ, yira nyɔɔ baɛ tɔ a, e m gaa le kɔ ue a nɛ.” Mɛm bee yiiloo Ezekiel sɔ̄ Jɛhova bee ye kɔ nɛ kɔ a yira nyɔɔ baɛ tɔ ye, e a bee yira nyɔɔ baɛ tɔ ye. Ezekiel bee ɛm kɔ: “Edɔɔ̄ bee mɛ yii bu sa bee mɛ wu yira nyɔɔ baɛ tɔ mɛ.” (Ezek 2:1, 2) Sɔ̄ esaa, bah Bari lo a le ye kaɛ edɔɔ̄, bee baɛloo Ezekiel bu yube ye tam zue ue. (Ezek 3:22; 8:1; 33:22; 37:1; 40:1) Kaɛ edɔɔ̄ Bari bee yere mɛm loo Ezekiel lo esitam a bee lu enɛ ye ama, lo a le zue ue nɛ pya “e’aga gbɔɔsī le e’aga beenyiɛ” ba bee le ye kɛ̄ zue ue. (Ezek 3:7) Jɛhova bee kɔ nɛ Ezekiel kɔ: “M edoora kɔ oloo sī a aga lo edoo dɛ̄dɛɛ̄ wa sī, e o gbɔɔsī aga lo edoo dɛ̄dɛɛ̄ wa  gbɔɔsī. Doodoo dɛm adamant, lo a aga eenyɔɔ nwi-dɛm-naa, na m bee daā o gbɔɔsī; o a wa ɛrɛ bɔɔ loo, ale ɛrɛ aabɔɔ wa kɛ̄ sī.” (Ezek 3:8, 9) A le doodoo bee Jɛhova aa bee kɔ nɛ Ezekiel kɔ: ‘O aa yira kɔ wa e’aga ekobee a ɔɛ a loo. M gaa le agɛrɛ a loo.’

⁹ Sɔ̄ esaa, edɔɔ̄ Bari bee yerebah nɛ Ezekiel bu ye kɛ̄ zue ue. Ezekiel bee ɛm kɔ: “Bah Jɛhova bee le [e’aga] mɛ nyɔɔ.” A bee su ziī kaɛ bah Ezekiel lo enɔ sa dābeeloo yereue a bee ye le bah lo ezue, lokwa a dap kɔ doodoo nu a suā. (Ezek 3:14, 15) Lo sɔ̄ Jɛhova bee kɔ nɛ Ezekiel kɔ a kii bu ziī ɔgara sī kɛ̄, kɛ̄ “edɔɔ̄ a bee [ye] yii bu.” (Ezek 3:23, 24) Ezekiel bee kpɛ̄naloo lo ebɔātɛ̄ ye tam zue ue.

10. Amunu yerebah na a i bɛɛ̄ lokwa i dap kiisī lo ezue ue a, e ena anua a?

¹⁰ Amunu yerebah na a i bɛɛ̄ lokwa i dap kiisī lo esitam zue ue a? Lo e’agara ebip ama, naa kɛɛrɛbu nu a bee siraloo Ezekiel. Lɛɛ a gae bɔātɛ̄ ye tam zue ue, edɔɔ̄ Bari bee ye nɛ ekpo a ye bɛɛ̄. Nii’ee, aba kaɛ edɔɔ̄ Bari na a i dap yerebah nɛ kɔ i si tam zue ue dookɛ̄ a bee yerebah nɛ Ezekiel doo a. Ena anua a? Nu anua na bee Setan gaa i bebe loo lokwa i ɔbɛ tam zue ue. (Mum 12:17) Aāloo kɛ̄ nɛɛ ɛp nu doo, a bee kɔ ii le edap eebah Setan sa kiisī bu i tam zue ue. Kerewo, i gaa ye be eebah tɛ̄maloo i tam zue ue! (Mum 12:9-11) Bu mɛ sīdee? Sɔ̄ i zue ue, i tɔgɛ kɔ ii ɛrɛ bɔɔ loo Setan kere a gbī eyere i bɔɔ bu. Ziī ziī sɔ̄ i zue ue, i tɔgɛ kɔ i gaa be eebah Setan. Nyɔɔwo, ena i suā leere a sɔ̄ i muɛ kɔ i gaa kiigesī lo ezue ue kaɛlɛɛ kɛ̄ pya i baa i gbanasī doo a? A sirapie kɔ kaɛ edɔɔ̄ Bari yerebah i nɛ, sa Jɛhova yere i kpotɛ̄.—Mat 5:10-12; 1 Pit 4:14.

11. Ena kaɛ edɔɔ̄ Bari edoo i nɛ a, e ena i dap doo lokwa i kiisī lo e’ɛrɛ a?

 ¹¹ Dɔɔ̄na ena i dap suā sɔ̄ i kɛɛrɛbu kɛ̄ Jɛhova bee yere mɛm loo Ezekiel doo a? Edɔɔ̄ Bari dap i yerebah nɛ kɔ i be eebah ɛrɛgeba gbanasī a i lu loo sɔ̄ i gaa zue ue. (2 Kɔr 4:7-9) Lo a le wo, ena i doo lokwa i kiisī lo e’ɛrɛ edɔɔ̄ Bari a? Alu ebɛɛ̄ kɔ i yere kara bara kaɛ edɔɔ̄ dɛ̄dɛɛ̄ sɔ̄, sa dɛrɛ nyiɛ nyɔɔ kɔ Jɛhova e’agara i nɛ. Jizɔs bee tɔgɛ pya a wee ye nyɔɔnɛ dumɛ kɔ: “Baraa, . . . gbiā, . . . tɔābaloo.” E Jɛhova e’agara lo kara tɛ̄maloo “enɛ kaɛ edɔɔ̄ pya a ye bara.”—Luk 11:9, 13; Doonu 1:14; 2:4.

12. Aāloo nu a le bu kpa Ezekiel 2:9–3:3, mɛ kɛ̄ na lo ui-kpa aa a, e ena alu e’ɛm bu a?

¹² Naale aba edɔɔ̄ Bari na a bee nɛ e’agaloo Ezekiel lo ezue ue a. Muɛ̄ Ue Bari bee agɛrɛnagetɛ̄ yira Ezekiel. Bu mɔmanudɛɛ̄, Ezekiel bee muɛ ziī ui-kpa a le bah nɛɛ. (Buū Ezekiel 2:9–3:3.) Mɛ kɛ̄ na lo ui-kpa aa ani? Ena a le bu lo ui-kpa a? Bu mɛ sīdee na a bee agɛrɛtɛ̄ yira Ezekiel a? I naa ɛp. Lo ui-kpa aaloo kasi mɛnɛ Bari. Dap lu kɔ Jɛhova su ziī yɛɛ nia pya ɛnjɛl Ezekiel bee muɛ tua sɔ̄ a ye nɛa lo ui-kpa. (Ezek 1:8; 10:7, 20) Nu a le bu lo ui-kpa na Muɛ̄ Ue Bari, lo a bee lu nyɔɔnyɔɔ dɛɛ̄ yereue biaɛ Ezekiel ezue nɛ pya a lɛɛbeekɛɛ̄ ba bee le zooro dɔɔ̄na buɛ̄. (Ezek 2:7) Yereue ama bee lu e’ɛm nyɔɔ sī le dumɛ lo ui-kpa.

13. Ena Jɛhova bee kɔ nɛ Ezekiel kɔ a doo loo lo ui-kpa a, e ena anua a bee kpe a?

¹³ Jɛhova bee kɔ nɛ ye nɛɛ mɔmanudɛɛ̄ ama kɔ a de lo ui-kpa sa “doo kɔ a mma [ye] bu.” Ezekiel bee gbaɛ̄tɔ̄loo sa de dɛ̄dɛɛ̄ lo ui-kpa. Ena lo gah mɔmanudɛɛ̄ ama kura a? Lu ebɛɛ̄ kɔ Ezekiel a dābeeloo yereue a gaa le zue ama kaāna. A ɛrɛ e’ɛrɛ yira bu lo yereue lokwa a ye zū kɔ a zue. Lo sɔ̄ ziī nu alu nyɛŋia bee sira. Ezekiel bee muɛ kɔ lo ui-kpa “kpe doodoo nɔɔ-yaayo.” (Ezek 3:3) Ena anua a? Kii kɛ̄ Ezekiel le, lulu nɛɛ a yira dɔ Jɛhova bee ye nia ale a bee ye kpeloo. (Yɔɔ 19:8-11) Bu ye bee ɛɛ kaāna kɔ Jɛhova esuae ye nua ye nɛɛ mɔmanudɛɛ̄.

14. Ena a bee yerebah nɛ Ezekiel kɔ a si ye tam a?

¹⁴ Sɔ̄ esaa, Jɛhova bee kɔ nɛ Ezekiel kɔ: “Dɛ̄dɛɛ̄ pya na ue m gaa le kɔ a nɛ su yaa beenyiɛ a, sa o gbaɛ̄nage o baɛ tɔ̄ loo.” (Ezek 3:10) Tɛ̄maloo pya zuurabahtɔ̄ ama, Jɛhova bee kɔ nɛ Ezekiel kɔ a nyɛŋiabu nu alu e’ɛm bu lo ui-kpa sa kɛɛrɛ ekɛɛrɛ kumaloo kaāna. E dodoo wo bee agɛrɛtɛ̄ yira Ezekiel. A doonage kɔ a suā e’agabah yereue a gaa le zue nɛ pya nɛɛ. (Ezek 3:11) Sɔ̄ Ezekiel edaābeeloo yereue Bari sa ɛrɛ yira bu, a bee kpɛ̄naloo lo esi ye tam zue ue mmɛnɛ.—Dooreloo Le-yɔɔ 19:14.

15. Lokwa i dap egerebu, ena alu ebɛɛ̄ kɔ i su “yaa beenyiɛ” i a?

¹⁵ Lokwa i dap egerebu sa kiisī lo ezue ue, i ɛrɛ ekiinagesī lo e’agɛrɛtɛ̄ i yira tɛ̄maloo Muɛ̄ Ue Bari. Alu ebɛɛ̄ kɔ i su dɛ̄dɛɛ̄ ue Jɛhova i kɔ nɛ “yaa beenyiɛ.” Nii’ee, Jɛhova gaa i kɔ ue nɛ tɛ̄maloo ye Muɛ̄ Ue alu e’ɛm bu Baibol. Bu mɛ sīdee na i dap doo kɔ Muɛ̄ Ue Bari a  ɛrɛ pah nyɔɔ i ekɛɛrɛ, i beenyiɛ, le i dogo a?

16. Ena i doo loo Muɛ̄ Ue Bari a, e bu mɛ sīdee na e’agɛrɛtɛ̄ i yira a?

¹⁶ Dookɛ̄ i wee sikɛ̄ ɛrɛ ekpo sɔ̄ i de nuede sa a laaga i yiiloo doo, kɛ̄ i yira wee sinage kɛ̄ agatɛ̄ sɔ̄ i nɔ Muɛ̄ Ue Bari sa ɛrɛ ekɛɛrɛ nyɔɔ doo lo. Ii le e’ibere nu i nɔ aāloo lo ui-kpa. Jɛhova gbī kɔ i de ye Muɛ̄ Ue “doo kɔ a mma [i] bu,” lo a le kɔ i dābeeloo ye muɛ ue leere. I dap doo wo tɛ̄maloo yere kara, būbuū ye Muɛ̄ Ue sa ɛrɛ ekɛɛrɛ nyɔɔ. Tuatua, i dasī yere kara kpɛ̄naloo i beenyiɛ lo esu nu Bari kɔ. Lɛɛ i buū ziī dɔ a le bu Baibol. Sɔ̄ esaa, i sikɛ̄ yira kina sa bura bura nyɔɔ, lo ekɛɛrɛbu nu i buū a kaāna. Ena esira aabu a? Kɛ̄ i ɛrɛ ekɛɛrɛ nyɔɔ doo, kɛ̄ i dānage bee loo Muɛ̄ Ue Bari sa a agɛrɛtɛ̄ i yira doolo.

17. Ena anua i ɛrɛ e’ɛrɛ ekɛɛrɛ nyɔɔ nu i buū aābu Baibol a?

¹⁷ Ena anua alu gbɛnɛ kɔ i buū Baibol sa ɛrɛ ekɛɛrɛ nyɔɔ a? Dodoo wo eyere i mɛm loo lo ezue yereue Buɛ̄-mɛnɛ anyaawo le lo ezue e’agabah yereue biaɛ lo i dap zue li deesī. Gbaāloo wo, sɔ̄ i ɛrɛ ekɛɛrɛ nyɔɔ le le elap dogo Jɛhova ɛrɛ, edoo kɔ gbanialoo i ye ɛrɛ kumaloo a agɛrɛbah agatɛ̄. Nu esira na bee i ɛrɛ kaāna nu a kpe ale nu a i nia, lo a le efɛɛloo sa loo i sukɛ̄.—Yɔɔ 119:103.

18. Ena pya nɛɛ a le i kɛ̄ zue ue esuā a, e ena anua a?

¹⁸ Ii le pya nɛɛ mɔmanudɛɛ̄ dookɛ̄ Ezekiel bee le doo. Kerewo, i biaɛfii lo ekiisī lo ekɔ yaari pya yereue lo Jɛhova e’ɛma sere kɛ̄ bu ye Muɛ̄ Ue mmɛ sɔ̄ e kɔ eleera. Sɔ̄ elu ebiaɛ biaɛ loo pya nɛɛ, pya a le i kɛ̄ zue ue naale edap kɔ a naa bee lu ezuurae wa bah tɔ̄ ale kɔ Bari ɛbe wa tɛrɛ. (Ezek 3:19; 18:23) Taāwo, ba esuā kɔ yereue i bee wa zue nɛ a bee aabah Bari.

19. Ena eyerebah i nɛ kɔ i si i tam zue ue mmɛnɛ a?

¹⁹ Ena eyerebah i nɛ kɔ i dap si i tam zue ue mmɛnɛ a? Ɛɛ na taa nu a bee yerebah nɛ Ezekiel. I gaa kiisī lo ezue ue nyɔnɛbee i suā kɔ Jɛhova na a i yere a, le kɔ kaɛ edɔɔ̄ Bari nɛ i ekpo, sa i ɛrɛ e’agaloo aāloo Muɛ̄ Ue Bari. Tɛ̄maloo yerebah Jɛhova i ɛrɛ ekpo lo esitam zue ue sa “egerebu mmɛ kuma.”—Mat 24:13.