1. Amunu yereue na nɛɛ mɔmanudɛɛ̄ Aisaia bee kɔ nɛ pya ye nɛɛ Izrɛl a?

 NƐƐ mɔmanudɛɛ̄ Aisaia kɔ Jɛhova lu “Bari kaka.” Bee ue alu etap nua “kaka” taɛ nu a kura na “amɛn.” (Ais 65:16, ftn NWT.) Nu “amɛn” kura na “a le doo wo,” ale “taɛ kɛ̄ a le doo lo.” Sɔ̄ alu esu bee ue a kura “amɛn” kɔā ue bu Baibol kumaloo Jɛhova ale Jizɔs, a doo kɔ i suā leere kɔ nu aa lu ekɔ ue kumaloo lu kaka. Nyɔɔwo, nu yereue Aisaia bee kɔ nɛ pya ye nɛɛ Izrɛl kura na kɔ: Ɛrɛgeba nu Jɛhova kɔ wee sira dookɛ̄ a bee kɔ doo. Jɛhova etɔgɛ lo ama siā tɛ̄maloo edoo gbɔ̄mɛɛ pya ye yii.

2. Ena anua i dap dɛrɛ nyiɛ nyɔɔ pya yii Jɛhova eyira kiiloo deesī a, e pya amunu ebip na i kɛɛrɛbu loo a?

² I dapge dɛrɛ nyiɛ nyɔɔ pya yii Jɛhova eyira kiiloo deesī bu aba lo sīdee ni? Sɔ̄ nu a waɛloo 800 zua etɛ̄na aā sɔ̄ Aisaia bee le dum, nɛɛ lɛɛratam Pɔɔl bee baatɛ̄ nu anua a dap lu edɛrɛ nyiɛ nyɔɔ pya yii Bari eyira dɛ̄dɛɛ̄ sɔ̄. Pɔɔl bee kɔ: “Bari naa dap kɔ esah.” (Hib 6:18) Dookɛ̄ aba ziī ezi-maā naa dap ɛrɛ tɔɔ maā le maā-lah doo, kɛ̄ Jɛhova alu Nɛɛ kaka ue tɛɛ̄ aabah naa dapnage kɔ esah doo lo. Nyɔɔwo, i dap dɛrɛ nyiɛ nyɔɔ dɛ̄dɛɛ̄ nu Jɛhova ekɔa, gbaāloo pya yii eyira kiiloo deesī. Bu ekobee ue ama i agara pya ebip a kɔ: Ena Jɛhova eyira  yii lo enɛ i li deesī a? E ena a tɔgɛ kɔ Ye yii edooa a?

3. (a) Amunu yii na a nia pya zooro Bari kaāna a? (Mumuuna 21:3, 4) (b) Pio nɛɛ doo dogo doodoo wa sɔ̄ i kɔ nu akiiloo yii ama wa nɛ ni?

³ Yii i gaa le kɛɛrɛbu loo lu yii a nia pya zooro Bari ba le tɛɛ̄ ɛŋɛnɛ nyɔuwe kaāna. (Buū Mumuuna 21:3, 4.) Jɛhova yira yii kiiloo sɔ̄ “luh naale elena, ale ekiɛ̄nu, ale to, ale yɔyɔ.” Gbɛnɛ-edo ii wee buū dɔ Baibol ama lo enɛā egbɔ̄nyiɛ pya nɛɛ kiiloo kɛ̄ Paradais emɛā doo sɔ̄ i gaa zue ue. Pio nɛɛ doo dogo doodoo wa sɔ̄ i kɔ nu akiiloo yii ama wa nɛ ni? Ba dap kɔ, “Lo ama naale esira.”

4. (a) Ena Jɛhova bee suā kɔ esira a? (b) Kaɛlɛɛ yira yii, dɔɔ̄na ena Jɛhova bee doo a?

⁴ Sɔ̄ Jɛhova bee su ye kaɛ edɔɔ̄ daā kɔ nɛɛ lɛɛratam Jɔn a ɛm nu akiiloo yii kɛ̄ dum bu Paradais emɛā doo, a bee suā kɔ ili i kɔnage nu akiiloo bɛābu ama nɛ pya nɛɛ sɔ̄ i gaa zue ue akiiloo Buɛ̄-mɛnɛ Bari anii’ee. Jɛhova bee suānage kɔ e’aga loo gbɛnɛkpo nɛɛ lo eyiga bu yii a bee yira kiiloo “keekee aā nu.” (Ais 42:9; 60:2; 2 Kɔr 4:3, 4) Nyɔɔwo, bu mɛ sīdee na i dap nɛ agɛrɛ nyiɛ pya dɔɔ̄na le aba ii kɔ pya leelee alu ekɔ nu akiiloo bu kpa Mumuuna 21:3, 4 gaa le dooa a? Jɛhova naa aadee yira yii ama, mɛ a tɔgɛnage pya nu anua i dap dɛrɛ nyiɛ nyɔɔ lo yii. Pya ena a i tɔgɛ a?

5. Pya ena anua i dɛrɛ nyiɛ nyɔɔ pya yii Bari eyira kiiloo Paradais a, e mɛ kɛ̄ na i dap gbī muɛ a?

⁵ I ɛrɛ pya nu anua i dɛrɛ nyiɛ nyɔɔ yii Jɛhova yira kiiloo Paradais bu pya dɔ Kpa Kaɛ a nyɔɔnɛ ama. A buū kɔ: “Nɛɛ a le ɛŋɛtɛ̄ nyɔɔ kasi mɛnɛ bee kɔ, “Ɛp, m aa doo dɛ̄dɛɛ̄ nu kɔ ba alu aā.” A bee kɔnage kɔ, “Ɛm, lo ba ama, nyɔnɛbee lo ue ama bɔloo eture nyiɛ loo sa lu kaka.” E a bee mɛ kɔ nɛ, “Edoora! Mda na Alfa le Omɛga, lo bɔātɛ̄ le lo kuma.”—Mum 21:5, 6a.

6. Ena anua pya ue alu e’ɛm bu kpa Mumuuna 21:5, 6 agɛrɛtɛ̄ kɛ̄ i dɛrɛ nyiɛ nyɔɔ pya yii Bari doo a?

⁶ Ena anua pya dɔ Baibol ama doo kɔ i agɛrɛbah dɛrɛ nyiɛ nyɔɔ pya yii Bari a? Kpa a kura Revelation Climax kɔ doo wo ama kumaloo pya dɔ ama kɔ: “A le doodoo bee Jɛhova aa doo kɔ pya nɛɛ a Ye tɔɔ̄ agara nɛ a suā leere kɔ pya yii ama ɛrɛge edooa, ale doodoo bee a biibah tɛ̄ kpa kiiloo pya leelee eyira yii loo li deesī kɔ a ɛrɛge edooa.” b Alu e’ɛm pya yii Bari ama bu kpa Mumuuna 21:3, 4. Mɛ bu ye 5 le 6 barakpaɛ̄, i muɛ ue a bee kɔ Jɛhova biibahtɛ̄ kpa lo etɔgɛ kɛ̄ Ye yii lu kaka doo. Doraa i naa ɛp leere pya bee ue Jɛhova su kɔā ue lo etɔgɛ kɔ i dap ye dɛrɛ nyiɛ nyɔɔ.

7. Mɛɛ na a bɔātɛ̄ ekɔ ue a le bu kpa Mumuuna 21:5 barakpaɛ̄ a, e ena anua alu keebee a?

⁷ Ye 5 barakpaɛ̄ bɔātɛ̄ tɛ̄maloo pya ue a kɔ: “Nɛɛ a le e’ɛŋɛtɛ̄ nyɔɔ kasi mɛnɛ bee kɔ.” (Mum 21:5a) Pya ue ama lu keebee nyɔɔbee dɔ ama na ziī yɛɛ taa sɔ̄ Jɛhova kɔ ue bu kpa Mumuuna a. Naale ziī ɛnjɛl a ɛrɛ ekpo ale Jizɔs sɔ̄ e’aarakɛ̄ bu luh na a doo kɔ i suā kɔ lo yii naale elɔ a, mɛ Jɛhova alɛɛ loo! Lo ama tɔgɛ kɔ i dap dɛrɛ nyiɛ nyɔɔ pya lo ue a kɔ nyɔɔnɛ. Ena anua a? Nu anua na bee  Jɛhova naale e “kɔ esah.” (Tait 1:2) Ue ama doo kɔ i dap dɛrɛ nyiɛ nyɔɔ pya ue a le bu kpa Mumuuna 21:5, 6 kaāna.

8. Bu mɛ sīdee na Jɛhova kɔ siībahdɛɛ̄ kɔ ye yii ɛrɛge edoo a? (Aisaia 46:10)

⁸ Nyaawo, i naa kɔ nu akiiloo bee ue a kɔ “Ɛp!” (Mum 21:5) Bee ue Grik alu etap kure “Ɛp!” lu esu kɔā ue gbɛnɛ-edo sɔ̄ bu kpa Mumuuna. Ziī ue alu e’ɛm kiiloo kɛ̄ alu e’ɛm bee ue “Ɛp!” doo, kɔ a bee “lu e’ɛm ye bu sīdee ekue ekɛɛrɛ nɛɛ a gaa buū kumaloo pya ue alu ekɔ nyɔɔnɛ.” Ena Bari bee kɔ nyɔɔnɛ a? A bee kɔ: “M aa doo dɛ̄dɛɛ̄ nu kɔ ba alu aā.” Lu kaka kɔ Jɛhova gaa kɔ nu edoo li deesī. Kiikɛ̄ Jɛhova le, pya yii ama ɛrɛge edooa, nyɔɔwo a kɔ nu akiiloo pya lo yii doodoo bee ba e’ina gaa dooa.—Buū Aisaia 46:10.

9. (a) Baɛ amunu tam Jɛhova na etaā ue a kɔ “doo dɛ̄dɛɛ̄ nu kɔ ba alu aā” gaa kɔ nu akiiloo a? (b) Ena esiraloo lo “bunyɔɔ” le “kɛnɛkɛ̄” a le anyaawo a?

⁹ Doraa i naa ɛp ue a sikɛ lu ekɔ bu kpa Mumuuna 21:5 lo a kɔ: “Doo dɛ̄dɛɛ̄ nu kɔ ba alu aā.” Bu 21 ekobee loo kpa Mumuuna lo etaā ue gaa kɔ nu akiiloo baɛ nu Jɛhova edoo. Tuatua, Jɛhova egbeesī lo pɔrɔ sɔ̄ eku ama. Lo eree baɛ, Jɛhova enua ziī aā sɔ̄ eku. Kpa Mumuuna 21:1, buū kɔ: “Tuatua bunyɔɔ le lo tua nyɔuwe ebee tɛɛ̄ aa.” “Lo tuatua bunyɔɔ” tɔɔ̄dɔ bɛbɛɛ miɔŋɔ nɛɛ lo Setan le pya gbo yɔ gaa baɛbee. (Mat 4:8, 9; 1 Jɔn 5:19) Pya nɛɛ a le bu nyɔuwe na Baibol kure “nyɔuwe” a. (Jɛn 11:1; Yɔɔ 96:1) Nyɔɔwo, “tuatua nyɔuwe” na pya bag dogo a le anii’ee. Jɛhova naale e’aadee kwa kina baloo lo “bunyɔɔ” le “nyɔuwe” a le anyaawo, taāwo, a gaa le gbee wa sī lɛɛ sa yere lo dɔɔ̄na wa dɔ. A gaa le su “aā bunyɔɔ” le “aā nyɔuwe,” lo a le aā bɛbɛɛ le aā eku miɔŋɔ nɛɛ sere dɔ lo bunyɔɔ le nyɔuwe a le anii’ee.

10. Ena Jɛhova edoo kɔ alu aā a?

¹⁰ Bu kpa Mumuuna 21:5, i sīkɛ buū nu Jɛhova kɔ akiiloo pya nu a gaa le doo kɔ alu aā. Yere nukuādɛɛ̄ loo kɔ Jɛhova naa kɔ, “M gaa doo dɛ̄dɛɛ̄ aā nu.” Taāwo a kɔ: “M aa doo dɛ̄dɛɛ̄ nu kɔ ba alu aā.” Bu dɔɔ̄na amunu sīdee na Jɛhova e doo kɔ dɛ̄dɛɛ̄ nu alu aā a? Jɛhova ebo nyɔuwe le miɔŋɔ nɛɛ doo kɔ ba a mmana. Dookɛ̄ Aisaia bee mɔmanudɛɛ̄ kiiloo doo, elu ekwa yube nyɔuwe kpeedɛɛ̄ doo kɔ a bee gɔh Idɛn. Sa edoonage kɔ i lu aā tɛ̄maloo eboh ziī ziī ii leere. Elu ebo pya kɔga, pya zimadɛɛ̄ le pya bɔnɔ sa elu elɛɛ kunɛ pya ebee u kɛ̄ bu luh.—Ais 25:8; 35:1-7.

11. Amunu lok na Jɛhova bee nɛ Jɔn a, e ena anua a?

¹¹ Dɔɔ̄na ena Bari kɔ lo edoo kɔ i dɛrɛ ye nyiɛ nyɔɔ a? Jɛhova bee kɔ nɛ Jɔn kɔ, “ɛm lo ba ama, nyɔnɛbee lo ue ama bɔloo eture nyiɛ loo sa lu kaka.” (Mum 21:5) Jɛhova naa aadee ye kɔ nɛ kɔ a “ɛm” pya lo ue. A bee kɔnage nu anua. A kɔ: “Lo ue ama bɔloo eture nyiɛ loo sa lu kaka,” lo a kura kɔ Muɛ̄ Ue Bari lu kaka sa bɔloo edɛɛa nyɔɔ. Bu i ɛɛ kɔ Jɔn bee gbaɛ̄tɔ̄loo sɔ̄ a bee lu e kɔ ye nɛ kɔ a “ɛm.” Nu anua lo i dap buū nu akiiloo yii Bari yira kiiloo Paradais sa ɛrɛ  ekɛɛrɛ kumaloo pya leelee alu nyɛŋia lo a gaa i tɔɔ̄baɛ.

12. Ena anua Jɛhova bee kɔ: “Edoora!” a?

¹² Ena Bari sikɛ̄ kɔ a? “Edoora!” (Mum 21:6) Bu dɔ ama, Jɛhova gaa kɔ ue kumaloo dɛ̄dɛɛ̄ yii alu eyira kiiloo Paradais li deesī doodoo bee edooa. E a bɔloo kɔ a kɔ doo wo nyɔnɛbee lɔgɔ nu naale edap ye kpaɛ̄ lo e’mmɛnɛ ye ekɛɛrɛ. Jɛhova sīkɛ̄ kɔ dɔɔ̄na nu alu gbɛnɛ lo edoo kɔ i suā kɔ ye ekɛɛrɛ ɛrɛge edooa. Lo nu na e?

13. Ena anua Jɛhova bee kɔ: “Mda na Alfa le Omɛga” a?

¹³ Dookɛ̄ a bee lu ekɔ doo tua sɔ̄, Jɛhova bee kɔ ue taa sɔ̄ bu mɔmanudɛɛ̄ a bee nɛ Jɔn. (Mum 1:8; 21:5, 6; 22:13) Ziī ziī sɔ̄ ama Jɛhova kɔ, “Mda na Alfa le Omɛga” a. Alfa na tua eyuu kpa pya Grik, e omɛga na wa kpɛdumɛ eyuu kpa a. Tɛ̄maloo ekɔ “Mda na Alfa le Omɛga” a, Jɛhova gaa i yerebah nɛ kɔ i suā kɔ ɛrɛgeba nu a bɔātɛ̄ a wee doo mmɛ kɛ̄.

14. (a) Naa nɛ edoba a tɔgɛ sɔ̄ Jɛhova bee kɔ “Alfa” bu sīdee a tɔɔ̄dɔ nu, le sɔ̄ ekɔ “Omɛga.” (b) Ena pya ue a le bu kpa Jɛnɛsis 2:1-3 doo kɔ i suā leere a?

¹⁴ Jɛhova bee kɔ nɛ Adam le Iv nu alu Ye ekɛɛrɛ kumaloo miɔŋɔ nɛɛ le kɛnɛkɛ̄. Baibol kɔ: “E Bari bee wa nɛ leelee, e Bari bee wa kɔ nɛ ‘Manaa sa yiiloo, sa mma bu nyɔuwe, sa ye su seea kɛɛ̄ i.’” (Jɛn 1:28) Tua sɔ̄ Jɛhova bee kɔ ye ekɛɛrɛ, a bee le doodoo bee a kɔ, “Alfa.” A bee kɔ taɛ nu alu ye ekɛɛrɛ kɔ: A gaa le ɛrɛ sɔ̄ miɔŋɔ Adam a mmana sa gbaɛ̄tɔ̄loo e’mma a kɛnɛkɛ̄ sa ye kwa  nua paradais. Deesī li sɔ̄ lo sɔ̄ e’ina, ele doodoo bee Jɛhova kɔ “Omɛga.” Sɔ̄ Jɛhova edɛma “bunyɔɔ le kɛnɛkɛ̄ sah, le dɛ̄dɛɛ̄ nu a wa le bu,” a bee kɔ ziī nu lo a tɔgɛ kɔ ye ekɛɛrɛ ɛrɛge edooa. Lo ue lu egbī muɛ bu kpa Jɛnɛsis 2:1-3. (Buū.) Jɛhova bee sere lo eree ɛrɛba biradee nua kaɛ nɛ ye loo. Ena lo ama kura a? Jɛhova yira yii kɔ a naale elɔɛ edoo gbɔ̄mɛɛ ye ekɛɛrɛ kumaloo kɛnɛkɛ̄ le miɔŋɔ nɛɛ. Elu edoo ye gbɔ̄mɛɛ sɔ̄ eree ɛrɛba biradee e’ina kuma.

15. Ena anua a bee bee kɔ Setan egbeera nu alu ekɛɛrɛ Bari kumaloo miɔŋɔ nɛɛ a?

¹⁵ Sɔ̄ Adam le Iv bee lɛɛbeekɛɛ̄, ba bee lu pya pɔrɔ sa tɛ̄ma pɔrɔ le luh nɛ pya wa miɔŋɔ. (Rom 5:12) E lo ama bee bee kɔ Setan egbeera nu a bee lu ekɛɛrɛ Bari kɔ pya nɛɛ a mmana lo ba ye gbaɛ̄tɔ̄loo etɔɔ̄ a nyɔɔ kɛnɛkɛ̄. A le doodoo bee Setan edora kɔ Jɛhova aa dapna kɔ “Omɛga.” Setan bee dap kɛɛrɛ kɔ Jɛhova naale edapna doo ye yii gbɔ̄mɛɛ. Ziī nu a bee kɛɛrɛ na kɔ Jɛhova efɛ Adam le Iv sa a sikɛ̄ dɛm pya dɔɔ̄na nɛɛ a mmana lokwa a dap doo gbɔ̄mɛɛ nu a bee lu Ye ekɛɛrɛ kumaloo pya nɛɛ. Mɛ lo Bari bee doo wo, Pɔrɔ-edɔɔ̄ ebee Ye dɛrɛ ue kɔ alu nɛɛ esah. Ena anua a? Nyɔɔbee dookɛ̄ alu e’ɛm bu kpa Jɛnɛsis 1:28 doo, Jɛhova ebee kɔ nɛ Adam le Iv kɔ pya wa manamana e’mma bu nyɔuwe.

16. Ena anua Setan bee dap kɛɛrɛ kɔ edabe dɛrɛ ue Jɛhova kɔ a naa doo ye yii gbɔ̄mɛɛ a?

¹⁶ Ena Setan bee dap kɛɛrɛ kɔ alu dɔɔ̄na nu Bari edoo a? Naadaba Setan bee kɛɛrɛ kɔ Jɛhova elɛɛbaloo Adam le Iv kɔ ba a maɛ̄ pya miɔŋɔ lo ba naale edap mmana lɔgɔ dee. (Eklis 7:20; Rom 3:23) Lo a bee sira doo wo, Pɔrɔ-edɔɔ̄ ebee dɛrɛ ue Jɛhova kɔ a naa dap doo Ye yii gbɔ̄mɛɛ. Ena anua a? Nyɔɔbee lo ama naale edap doo nu alu ekɛɛrɛ Bari gbɔ̄mɛɛ, kɔ pya manamana Adam le Iv ba mmana lo ba Ye gbaɛ̄tɔ̄loo a tɔɔ̄bu Paradais a kɛnɛkɛ̄.

17. Bu mɛ sīdee na Jɛhova sere bee loo ue akiiloo lɛɛbeekɛɛ̄ lo Setan le tua dam le wa bee doo a, e ena esira aabu a? (Ɛpnage foto.)

¹⁷ Jɛhova bee sere bee loo ue akiiloo lɛɛbeekɛɛ̄ lo Setan le tua dam le  wa a, bu sīdee Setan naa bee ɛmadɛɛ̄. (Yɔɔ 92:5) Lo etɔgɛ kɔ Jɛhova naa kɔ esah, a bee lɛɛbaloo Adam le Iv kɔ ba a ɛrɛ gbomiɔŋɔ. E Jɛhova bee tɔgɛ kɔ ɛrɛgeba nu a kɔ a wee doo. A bee doo nu alu Ye ekɛɛrɛ gbɔ̄mɛɛ tɛ̄maloo edoo kɔ a ɛrɛ ziī ‘eyuu’ alu manamana Adam le Iv lo ekpɔā pya wa miɔŋɔ a gbaɛ̄tɔ̄loo. (Jɛn 3:15; 22:18) Nɔɔnɔɔnu waara zɔɔ a’agara lo Jɛhova doo bee dap ɔbɛ Setan kaāna! Ena anua a? Alu nɔɔnɔɔnu a tɔgɛ wereloo wiibu naale loo. (Mat 20:28; Jɔn 3:16) Lo elap ama naale bu Setan, nyɔɔbee alu nɛɛ wiibu. Nyɔɔwo, ena esira nyɔɔbee nɔɔnɔɔnu waara zɔɔ a’agara a? Sɔ̄ bɛbɛɛ Baɛ Boo Le Lop Tup Zua e’ina kuma, pya miɔŋɔ Adam le Iv lo ba mmana etɔɔ̄ bu Paradais a kɛnɛkɛ̄ dookɛ̄ Jɛhova bee kɔ doo. Lo sɔ̄ ele doodoo bee Jɛhova kɔ “Omɛga.”

18. Taa amunu ue agɛrɛ nyiɛ na Bari i nɛ a? (Ɛpnage ekpo a kura “ Taa Nu Anua I Dɛrɛ Nyiɛ Nyɔɔ Yii Jɛhova.”)

¹⁸ Aāloo pya nu i ekɔnia, ena i dap kɔ nɛ pya ba naa yiga kɔ pya yii Bari akiiloo Paradais edoo a? Tuatua Jɛhova na a yira lo yii a. Kpa Mumuuna kɔ: “Nɛɛ a le ɛŋɛtɛ̄ nyɔɔ kasi mɛnɛ bee kɔ, ‘Ɛp, m aa doo dɛ̄dɛɛ̄ nu kɔ ba alu aā.’” A ɛrɛ suānu, ekpo, le taɛ̄ lo edoo ye yii gbɔ̄mɛɛ. Eree baɛ, Jɛhova suā kɔ nu ekɔa ɛrɛge edooa. Nu anua a bee kɔ kɔ: “Ue ama bɔloo eture nyiɛ loo sa lu kaka. . . . Edoora!” Eree taa, sɔ̄ Jɛhova bɔātɛ̄ ziī nu a wee doo mmɛ kuma. Nu anua a kɔ: “Mda na Alfa le Omɛga” lo. Setan lu nɛɛ kɔ esah lo a naa dap kpaɛ̄ Jɛhova lɛɛloo edoo nu alu ye ekɛɛrɛ.

19. Lo pya nɛɛ naa yiga yii Bari yira kiiloo Paradais ena o doo a?

¹⁹ Nyɛŋiabu kɔ ɛrɛgeba sɔ̄ o kɔ nu akiiloo pya yii Bari eyira nɛ pya nɛɛ bie uwe zue ue, o gaa agɛrɛtɛ̄ yira o ɛrɛ bu pya yii Jɛhova eyira. Nyɔɔwo, dɔɔ̄na sɔ̄ o buū nu akiiloo ekpeloo yii akiiloo Paradais alu ebaatɛ̄ bu kpa Mumuuna 21:4 sa ziī nɛɛ kɔ, “Lo ama naale edap sira,” ena o doo ani? Ena anua oo buū ye 5 le 6 barakpaɛ̄ sa ye baatɛ̄ nɛ a? Sa tɔgɛ kɛ̄ Jɛhova tɔgɛ kɔ pya ye yii ɛrɛge edooa doo tɛ̄maloo ebiibahtɛ̄ bu sīdee a tɔɔ̄dɔ nu.—Ais 65:16.