Paul: A bee i nia gbɛnɛ! Bu Lop Le Ziī Enɔɔ̄ bu zua 1985, i gaa bee kii Liberia li West Africa lo alu tua kɛ̄ i zue ue dɔɔ̄na edo. Fah bunyɔɔ̄ i bee yii bu bee yira Senegal, e Anne kɔ “bia aba ziī awa i ina Liberia!” Lɛɛ i dā nɛ muɛ̄ kɔ: “Pya a gaa kii Liberia a aabu lo fah bunyɔɔ. Ii lee dap dɛɛa nyɔnɛbee pya nɔ su ekpo suā bɛbɛɛ li Liberia.” I bee sikɛ̄ tɔɔ̄ Senegal lop biradee kpaɛ̄ pya zue ue dɔɔ̄na edo sa gaa dā yereue a aa Liberia kiiloo pya nɛɛ alu efɛ sa nɔɔ bu gbɛnɛ gbɛnɛ te fah le kɔ alu etaā pya gbee lok.

Anne: I wee ɛrɛ bɔɔ gbɛnɛ. Bu kaka, aā sɔ̄ m bee le nwī ba wee mɛ kure Annie Nɛɛ Bɔɔ. Bɔɔ wee mɛ aanage lo efia dee! I bee biaɛfii kɔ i kiie kɛ̄ alu eyere i ture uwe tam.

Paul: Anne le mm bee mɛā bie aba barasī li west England. Baɛ ii bee gbaa si tam sɛmdee aba sɔ̄ i aa sɛkɔndri school, aāloo kɛ̄ na ka le na te le ka Anne bee mɛ yere mɛm loo doo. Ba bee yerekpotɛ̄ i taɛ lo eyii bu tam mmɛ sɔ̄. Sɔ̄ m ebee lu 19 zua, m bee ɛrɛ dee lo ekii Bɛtɛl, e Anne bee mɛ gbaaloo sɔ̄ i e iya zii sa a bu zua 1982.

Anne: Tam Bɛtɛl nia i mɛ a wee i taɛ lo ekii wee sitam kɛ̄ ebɛɛ̄ le. Nyɔɔnɛ pya a bee sitam dɔɔ̄na edo sɔ̄ akii adumɛ sitam bie Bɛtɛl bee doo kɔ i agɛrɛbah ɛrɛ lo taɛ. I bee yere kara kumaloo lo ama dɛ̄dɛɛ̄ uunɛ lo taa zua. Nyɔɔwo bu i bee ɛɛ sɔ̄ a bee lu ekue i bu zua 1985 kɔ i le yɛɛ eree 79 eku pya a si tɔkpa Gilead! Bee lu eyere i ture Liberia, li West Africa.

Paul: I bee yii bu tua fah bunyɔɔ a sikɛ̄ lu enɛ dee kɔ a yii Liberia. Gbɛnɛ bɔɔ bee le, e a bee lu enɛ lok kɔ pya nɛɛ aa kiāŋa ya. Bɔɔ bee aa pya nɛɛ mmɛ kɛ̄ lo fah buŋia siā muɛ dɛ̄dɛɛ̄ nɛɛ teera! I wee gbaa buū pio dɔ a le bu kpa Le-yɔɔ dɛ̄dɛɛ̄ uunɛ lo edoo kɔ loo i a sukɛ̄. I bee wereloo i esiatam kaāna kaɛlɛɛ kɛ̄ kɛ̄tɔɔ̄ bee aga doo bu lo edo. Anne gaa bee sitam dɔɔ̄na edo, e mda gaa bee nyɔɔnɛ John  Charuk sitam Bɛtɛl. M bee nɔnu aāloo kɛ̄ a suānu sa dābeeloo kɛ̄tɔɔ̄ pya wuga nɛɛdam le nɛɛwa doo.

Anne: Ena anua Liberia bee nwaabah i nia a? Nyɔɔbee pya i wuga nɛɛdam le nɛɛwa. Ba bee ɛrɛ wereloo, i yii loo sa ɛrɛ yira. Loo i bee wa suloo, eba bee lu i aā butɔ. Pya wa zuurabahtɔ̄ bee i yere mɛm loo bu etaāŋabah Bari. Dua kɛ̄ i bee gbī ezue uwe na ama. Bu tɛ-ɛrɛ-tɔ e biira lo o nwaabah kii! Pya nɛɛ wee kɔgara sɔ nyɔɔ ue a aabu Kpa Kaɛ bie nyɔɔ dee. O dap wa aadee kiā yiiloo sa o nyɔɔnɛ wa kɔnia. I bee ɛrɛ gbɛnɛ-edo pya a gaa nɔ Baibol lo a bee doo kɔ a’aga i bah lo enɔɛ̄nu dɛ̄dɛɛ̄ aba. Lo kɛ̄ zue ue bee lee gbɛnɛ!

Paul: Sɔ̄ efɛɛloo elea bu nia zua, kɛ̄tɔɔ̄ bee nyaa gbɛnɛ sɔ̄ lo edo bee be enia aba a bu zua 1989. Pya a bee bebeloo pya bɛbɛɛ bee ɛrɛ ekpo bee barasī Bɛtɛl bee le nyɔɔ 2 Biradee Bu Ɛrɛba Enɔɔ̄, 1990. Bu pio enɔɔ̄ ii bee dap mmɛna muɛ loo lɔgɔ nɛɛ a naa le lo edo, gbaāloo pya i butɔ le beekɛ̄ i esiatam bu yube nyɔuwe. Kii bee le e pya nɛɛ bee doo ɛrɛgebah nu a wa nia, sa sunage ba-ekpo aā nɛɛ maloo. Taāŋa ama bee kiisī bu yubeloo 14 zua bu dɛ̄dɛɛ̄ kɛ̄ lo edo.

Anne: Pya alu pio barasī bee bebe sa fɛ pya alu dɔɔ̄na barasī. Pya a gaa bebe bee yaa bɛloo nɔ̄ sa aara gbɛnɛ gbɛnɛ nu nɔ̄ kiāga ya, gbagara dɛ̄dɛɛ̄ tɔ sa su nu a le bu. Ii nɛɛ bee buera nyɔɔ ziī bie nyɔɔ dee kɛ̄ pya nɔ tɔɔ̄, ba bee fɛ nɛɛ mmɛ kɛ̄ pya nɛɛ kɔ “elua efɛ nɛɛ bee nwī-kɔɔ̄.” pio kɛ̄ ama bee waɛkpaɛ tɔ naatam. Pya Ekeebee ba ɛrɛ yira bee lu efɛ, gbaāloo baɛ pya i wuga i wereloo a gaa bee sitam ba aa dɔɔ̄na edo.

Ɛrɛgebah sɔ̄ pya a wee be nɔ bee muɛ pya a naa aa wa barasī bu wa wee biraa sa ba fɛ wa. Pya wuga bee su wa dum yere bu kɛ̄tɔɔ̄ a yere bɔɔ lo egɔ̄ pya i wuga nɛɛdam le nɛɛwa sa wa kpɔā. Pya zue ue dɔɔ̄na edo le pya a le Bɛtɛl bee doonage wo. Bie Bɛtɛl pio pya i wuga bee i nyɔɔnɛ tɔɔ̄ i tɔ, e pio aba bee tɔɔ̄ dee kɛnɛkɛ̄ loo lo tɔ. Ɛrɛba pya dɔɔ̄na bee tɔɔ̄ i tɔ.

Paul: Ziī ziī biradee pya nɔ̄ wee lu ina Bɛtɛl wee ɛp lo a le i gaa gɔ pya nɛɛ naa e. Ɛrɛgebah sɔ̄ a sira doo wo, baɛ nɛɛ wee si nu gɔ wee kɔ ue wa enɛ, e baɛ nɛɛ wee le gaa ɛp nu a gaa sira tɛ̄ma nu nwī-bū. Lo a le baɛ pya a le nudee gɔ su bah sere deesī wa, suā leere kɔ dɛ̄dɛɛ̄ nu le le. Mɛ lo ba su bah wa sere dumɛ wa, suā kɔ pya lo nɔ̄ gaa ɛrɛ gbɛnɛ biirabu,  nyɔɔwo pya a gaa ɛp tɛ̄ma nu nwībū a nwaabah si wee gɔ pya i wuga.

Anne: Sɔ̄ pio kaɛ etɛ̄na, ziī eku pya nɔ̄ bee su bah-ekpo yima bu gɔ. Mda le ziī wuga nɛɛwa bee gɔā bu ziī cupboard a le tɔ maā. Lo wuga nɛɛwa bee ugiri bu lo cupboard. Pya lo nɔ̄ ba aara gbɛnɛ gbɛnɛ naā bee lu deenyɔɔ lo tɔ. Ba su biirabu zaŋa i bū. Paul bee gbī ekpaɛ̄ wa, nyɔɔwo a bee kɔ, “Na wa le bu tɔ maā.” Sɔ̄ m bee kpaɛ̄bū kɛ̄ lo nwiīnɛɛwa bee gɔā, a bee yere kɔma. M bee nɔɔ dɛ̄dɛɛ̄ nu kɔ a le nyɔɔ etaā e a bee mɛ su sɔ̄ bah. M bee suā kɔ pya lo nɔ̄ gaa le kɛɛrɛ nu m gaa doo, e bɔɔ bee mɛ aa mmɛ kɛ̄ dɛ̄dɛɛ̄ loo mɛ bee yeb. M doodoo wa kpaāna lo bū? M bee yere kara bu nyiɛ mɛ, bara Jɛhova kɔ a yerebah mɛ nɛ. E m bee kpaāna lo bū sa wa kana muɛ̄ bu sīdee a bɔloo. Ziī aba bee mɛ taābah lɛɛ sa yii tɔ kii taɛ kɛ̄ cabinet le, kpaāna lo cabinet, sa lɛɛ dɛ̄dɛɛ̄ nu a bee le bu. Naa bee ye su loo kɔ a naa muɛ lɔgɔ nu bu. Alɛ le pya a ye gbaāloo bee ɛp dɛ̄dɛɛ̄ pya dɔɔ̄na tɛm le deenyɔɔ lo tɔ. Kerewo ba naa bee muɛ lɔgɔ nu.

Paul: Bu pio enɔɔ̄ ii bee ɛrɛna gbɛnɛkpo nuede. Mɛ nuede bu edɔɔ̄ na a bee i nɛ mɛm bu dum a. Nu a le nɛ dee a bee lu edoo bie Bɛtɛl na a bee lu i “nuede lɔɔrɛ a,” Bu dɛ̄dɛɛ̄ ii bee ɛɛ aaloo biī le mɛm i bee ɛrɛ aāloo.

I bee suā kɔ lo a le i kii ee wee gbī ziā le maā e’ɔ̄, ii le edap kpɛga pya i wuga i gaa bee gɔ̄ ama, e a dap lu efɛ wa. Pio sɔ̄ Jɛhova bee i nɛ pya nu a i bɛɛ̄ taɛ sɔ̄ a bɔloo le bu nyɛŋia sīdee! Jɛhova bee kuūdɛɛ̄loo pya i ebɛɛ̄ sa i yerebah nɛ kɔ i aa ɛrɛ bɔɔ yekɛ̄.

Kɛ̄tɔɔ̄ lo barasī bee kiisī lo ebee piya, mɛ kaka ue bee i nɛ bɛābu. Dɛ̄dɛɛ̄ sɔ̄, pya i wuga nɛɛdam le nɛɛwa bee teera lo ekpɔā wa dum, ba bee kiisī lo e’agɛrɛtɛ̄ wa yira sa tɔɔ̄bu efɛɛloo kaɛlɛɛ e’aga kɛ̄tɔɔ̄ ba gaa bee tɛɛ̄ bu ama. Pio aba bee kɔ egerebu e’aga sɔ̄ ama gaa doo kɔ ba a “kpɛ̄naloo baɛ sɔ̄ gbɛnɛ etɛɛraloo.” Pya kanɛɛ le pya zege wuga nɛɛdam bee piiga sa yere mɛm loo pya wuga nɛɛdam le nɛɛwa. Pya wuga nɛɛdam le nɛɛwa ba teera kii aba kɛ̄ bee yerebah nɛ ziī, e ba bee bɔātɛ̄ ezue ue bie lo kɛ̄. Ba bee su ɛrɛgebah nu ba muɛ bu kuɛ kwaa Tɔ Nɔnu Buɛ-Mɛnɛ sa nɔnu bu. Bu pya sɔ̄ bɔɔ bee le ama si enɔānu le zue ue nɛ pya dɔɔ̄na bee doo kɔ pya wuga nɛɛdam le nɛɛwa a ɛrɛ kaāna mɛm le bɛābu. Sɔ̄ a bee lu edɔɔ̄ nu wa ma, wee i tɔaloo kɔ pya i wuga ama bee bara kɔ alu edɔɔ̄ bɛrɛ siā enɔānu le uwe zue ue wa nɛ ee bɛloo. Pya ba le bu ekiɛ̄nu le biirabu bee gbaɛ̄tɔ̄loo le yereue. A bee wa lu nyɛŋialoo kɛ̄ ba muɛ Pya Ekeebee le bu ɛɛbu doo, ba bee mɔ doodoo ɛɛdee bu ziī. (Mat 5:14-16) Mɛ mɛm pya i wuga bee ɛrɛ bu tam zue ue bee doo kɔ pio pya a wee be nɔ̄ alu pya i wuga.

Paul: Pio sɔ̄ i bee aa lo barasī taa sɔ̄ ale baɛ sɔ̄ bu ziī zua. Ziī wuga nɛɛwa a wee sitam dɔɔ̄na edo wee kɔ kɛ̄ a bee wa tɔɔ̄loo doo sɔ̄ ba gae aa: “Bie tɔkpa Gilead, bee lu etɔgɛ i kɔ i su dɛ̄dɛɛ̄ i nyiɛ sere nyɔɔ i tam, e i bee doo wo. Aaloo pya i wuga bie bu e’aga kɛ̄tɔɔ̄ ama bee i kiɛ̄ gbɛnɛ sa bee kɔ i beenyiɛ e pea!” Bu i ɛɛ kaāna kɔ i dap yira barasī a waɛ kpaɛ̄ Liberia sa wa yerebah nɛ.

Anne: Bu O’oo Enɔɔ̄ 1996, nia ii bee le bu fah Bɛtɛl lo a ɛrɛ pya kpa a kuī akiiloo tam li Liberia. I bee gbī e’ɔp fah bu nu aluge 16 kilomita (10 mi) lo e’ina kɛ̄ alu kpooga loo a yere lo buɛ̄. Aba lo sɔ̄ nɔ̄ bee dɔ lo barasī. Pya lo nɔ̄ bee bɔātɛ̄ e tānaa kuma bunyɔɔ, sa i aa yiā, su taa ii lɛɛ bu fah, sa ɔp lo fah aā e Paul bee le bu. Ii bee ɛmadɛɛ̄ kɔ dua nu ama esira. Sɔ̄ sɔ̄ naa binia, Paul bee kiā tɛɛ̄ yɛɛ gbɛnɛ eku nɛɛ sa i pii, e mii gaa ye si bee. Tua sɔ̄ i bee kɛɛrɛ kɔ elua etaā ye, mɛ a naa bee sira doo wo, nyɔɔbee a gaa bee i kiā pii! Mɛ nɛɛ nɔ bee ye taābah zimanu sɔ̄ aa bee ye taābah lɛɛ bu fah. I doo Bari yaa, kɔ lo muū naa bee lu gbɛnɛ.

Ziī fah pya nɔ̄ lo a bee i le waɛ kpaɛ̄ e pya a yere bɔɔ bee le emma bu. I bee biaɛfii lo eyii bu lo fah, mɛ lɔgɔ kɛ̄ eyii naa bee le nyɔɔwo i bee kɔmana lo fah. Mɛ nɛɛ a gaa bee ɔp lo fah bee teera lo fah gbɛnɛ. I bee ye bara kɔ a yira, mɛ bɔɔ bee ye aā loo eyira. Mɛ i bee aabahloo lo fah lokwa ii dɔ, esɔ̄ lo fah bee ina kɛ̄ loo i bee ɔ sa bɔɔ bee i aa.

Paul: Nyɔɔwo i bee ɛp ɛnia ii sa muɛ kɔ dɛ̄dɛɛ̄ i bɛloo elua biɛ sa baraa, e a bee i lu nyɛŋialoo kɔ i lege dum mmɛ anyaawo. I bee ma kɛ̄ ee kpaɛ̄ fah bunyɔɔ lo esuu naā ebee taā, lo esu i mmɛ Sierra Leone lo dee a nyɔɔnɛ. Bu i bee ɛɛ kɔ i lege dum mɛ i bee ɛrɛ gbɛnɛ ekɛɛrɛ kiiloo pya i wuga bu yira.

Anne: I bee ina Bɛtɛl a le Freetown, li Sierra Leone, bu kpoogaloo e pya wuga bee i kuūdɛɛ̄loo leere. M bee bɔātɛ̄ nyɛŋiabuloo pya nu akii adumɛ. Dɛ̄dɛɛ̄ sɔ̄ bɔɔ wee mɛ aa sa m kɛɛrɛ kɔ ziī pɔrɔ nu gaa le sira, sa mm dap kɛɛrɛ nu leere, e dɛ̄dɛɛ̄ nu a mɛ tɛɛ̄ ɛŋɛnɛ̄ bee bee kɔ a naa lu kaka. E taɛ pie edɛɛ̄, m wee aa daa bu gbɛnɛ bɔɔ sa kɛɛrɛ kɔ ziī pɔrɔ nu dap mɛ siraloo. A bee mɛ agabah esere piogi. Paul bee mɛ aabahloo sa mɛ nyɔɔnɛ yere kara. I bee uɛ yɔɔ Buɛ̄-Mɛnɛ mmɛ sɔ̄ lo bɔɔ bee ɔb. A bee mɛ tɔɔ̄loo kɔ beenyiɛ mɛ epea sa kɛɛrɛ kɔ m ɛrɛ gbɛnɛ dumɛloo nyɔɔbee dɛ̄dɛɛ̄ nu a bee sira ama.

Mm le edap ibere nu a bee sikɛ̄ sira. Taɛ bu lo kaɛ i bee ɛrɛ baɛ ekpo magazines. Ziī ka bee le Awake! Lo ni’ii enɔɔ̄ 8, 1996. A ɛrɛ ekobee ue a kɔ “Coping With Panic Attacks.” Taɛ lo sɔ̄ m bee dābeeloo nu a bee mɛ siraloo. Lo ere baɛ bee le Watchtower O’oo enɔɔ̄ 15, 1996, lo a bee ɛrɛ ekobee ue a kɔ “Where Do They Get Their Strength?” Lo Watchtower bee tɔgɛ foto ego muū le loo. Lo ekobee ue bee baatɛ̄ kɛ̄ ego ye paā ebaara aa kiisī lo epɛɛ sa denu doo kaɛlɛɛ kɔ ye paā baara. Tɛ̄maloo kaɛ edɔɔ̄ Jɛhova i dap kiisī lo eyerebah nɛ pya dɔɔ̄na kereadoo i le bu e’aga kɛ̄tɔɔ̄. Tɛ̄maloo ekobee ue ama Jɛhova bee nɛ nu a mɛ bɛɛ̄ taɛ sɔ̄ a bɔloo. (Mat 24:45) Gbītɛ̄ pya ekobee ue a le doo wo, a kɔ nu akiiloo kɛ̄tɔɔ̄ ama sa bɔŋɛnɛloo dɛ̄dɛɛ̄ ɛɛ yerebu ziī ekpo kpa bee mɛ yerebah nɛ kaāna. Sɔ̄ pio sɔ̄ etɛ̄na, mm bee dap na nyɛŋiabuloo pya pɔrɔ nu a bee mɛ siraloo dookɛ̄ m wee doo tua sɔ̄.

Paul: Ɛrɛgebah sɔ̄ i wee obia ina Liberia, bu i wee ɛɛ kaāna. Bu kpɛdumɛ loo zua 2004 na a ere 20 zua bu i esiatam a. Ebu lo sɔ̄ nɔ̄ bee ina kuma. E a gaa bee lu enɔɔ kɔ alu ekwabahloo tɔ-naatam. Mɛ sɔ̄ sɔ̄ naa binia a bee lu enɛ i aā esiatam.

Lo ama bee i ɛɛrɛbu kaāna. E bu i bee ɛɛ loo pya i wuga nɛɛdam le nɛɛwa a bee le Liberia. Ba bee le doodoo pya i butɔ, sa ii bee gbī e’aa wa loo. Mɛ i bee muɛ tua sɔ̄ kɛ̄  Jɛhova bee nɛ leelee sa yerebah nɛ pya i butɔ sɔ̄ i bee wa aaloo sa kii tɔkpa Gilead, nyɔɔwo i bee su lo aā esiatam. E a bee lu eyere i ture barasī Ghana a i waɛloo.

Anne: I bee to gbɛnɛ to sɔ̄ i bee aa Liberia. A bee i lu nyɛŋialoo sɔ̄ nɛɛ kanɛɛ a ɛrɛ suānu loo ye bee kura Frank, bee i kɔ nɛ kɔ: “O dap i ibere!” Lo sɔ̄ a bee baatɛ̄ kɔ: “I suā kɔ oo le e’ibere i, mɛ o ɛrɛ esu dɛ̄dɛɛ̄ o beenyiɛ sere nyɔɔ o aā esiatam ama. Nyɔnɛbee a aabah Jɛhova, nyɔɔwo kuūdɛɛ̄loo pya wuga nɛɛdam le nɛɛwa a le lo kɛ̄.” Nyɔɔwo nu lo wuga bee kɔ bee i yerebah nɛ kɔ i ɛrɛ aā gbo bu barasī kɛ̄ dɛ̄dɛɛ̄ nɛɛ naa suā i loo sa dɛ̄dɛɛ̄ nu elu i aāloo.

Paul: Kerewo, a naa bee i su nyɔɔnyɔɔ sɔ̄ bah lo esuāloo pya i wuga nɛɛdam le nɛɛwa a le Ghana. Gbɛnɛ-edo pya Ekeebee bee le lo barasī! I bee nɔ gbɛnɛ-edo nu aāloo tɔɔ̄ agara le e’agatɛ̄ yira pya i aā gbo bee ɛrɛ. Sɔ̄ i bee sitam barasī Ghana bu nu alu 13 zua, i bee ɛrɛ dɔɔ̄na aā esiatam. A bee lu ekɔ i sitam tɔ naatam a le East Africa li Kenya. Nyɔɔwo i bee peere pya i wuga nɛɛdam le nɛɛwa a le Ghana le Liberia kaāna, mɛ i bee nwabah yii gbo pya wuga nɛɛdam le nɛɛwa i wereloo li Kenya. Dookɛ̄ gbɛnɛ-edo kɛ̄ zue ue le Ghana le Liberia doo, kɛ̄ a lenage Kenya doo loo.

Anne: Bu na dum, m etɛ̄na bu keekee e’aga kɛ̄tɔɔ̄, e booboo sɔ̄ bɔɔ wee mɛ aa. Pya kɛ̄tɔɔ̄ a yere bɔɔ le e’ɔaloo wee ɛrɛ pah nyɔɔ na dum. Ii dap ɛmadɛɛ̄ kɔ Jɛhova a kpega i lɛɛloo pya nu ama. Sɔ̄ m dā muɛ naā sa muɛ miā a aaloo bomb lo alu ekure artillery fire, bɔɔ wee mɛ aa. Mɛ m enɔā sa dɛɛa nyɔɔ dɛ̄dɛɛ̄ yerebah lo Jɛhova gaa i nɛ lo eyere i mɛm loo, gbaāloo yerekpotɛ̄ a aabah pya i wuga nɛɛdam le nɛɛwa. Mɛ m muɛ lo ba ama sɔ̄ m nɔnu nyɔɔ na loo, yere kara, si enɔānu le uwe zue ue, Jɛhova dap i yerebah nɛ loo i esiatam.

Paul: Pio pya nɛɛ bip kɔ, “O esiatam niage a ni?” Pio barasī dap kpedɛɛ̄, mɛ a ɛrɛ sɔ̄ taāŋa wee yii sa a bee piya. Nyɔɔwo, ena alu nu i wereloo kaāna eelo barasī a? Pya i butɔ, bee le pya wuga nɛɛdam le nɛɛwa a i kuī loo. Kaɛlɛɛ kɔ i bee aa keekee barasī, i kɛɛrɛ sa doo nu dookɛ̄ Jɛhova gbī doo. I bee kɛɛrɛ kɔ a bee lu eyere i kɔ i yere wa mɛm loo, mɛ bu kaka ba bee i yere mɛm loo.

Pya i wuga tɛ̄ma ɛŋɛnɛ dɛ̄dɛɛ̄ nyɔuwe bee lu nyɛŋia dɔɔ̄nu aābah Jɛhova, i bee ɛrɛ butɔ dɛ̄dɛɛ̄ kɛ̄ i kii. Kuma sɔ̄ i le bu ziī bɔŋanaloo, i wee ɛrɛ kpoogaloo. Mɛ i suā kaāna kɔ lo i kiisī lo edɛɛa nyɔɔ Jɛhova, e nɛ i ekpo a i bɛɛ̄.—Fil 4:13.