1-2. Bu mɛ sīdee na a dap lu edoo i pɔrɔ biaɛ loo a?

 JIZƆS bee kɔ kam akiiloo ziī wa ua dam lo a bee bara ziī nɛɛ biaɛ kɔ a yerebah ye nɛ nyɔɔ pya taāŋa a gaa tɛɛ̄ bu. Pya a wee nyɔɔnɛ dumɛ Jizɔs bee dap suā kɛ̄ nu bee tɔɔ̄loo lo wa doo, nyɔnɛbee a naa bee lu e’aara gbɛnɛ-edo nɛɛ leere lo sɔ̄. (Luk 18:1-5) Nii’ee ili dapnage dābeeloo nu lo wa bee tɛɛ̄ bu, nyɔɔbee aa lu e’aara dɛ̄dɛɛ̄ ii bu pɔrɔ sīdee aā ziī sɔ̄ yii ziī.

² Bu nyɔuwe anii’ee, pɔrɔ biaɛ, ɛp nɛɛ kumakɛ̄, le biīnɛkɛ̄ le dɛ̄dɛɛ̄ kɛ̄, nyɔɔwo naa lu i nyɛŋialoo kɔ alu e’aara i bu pɔrɔ sīdee. (Eklis 5:8) Bu kaka, ii ɛmadɛɛ̄ kɔ ziī wuga nɛɛdam ale wuga nɛɛwa e’aara i bu pɔrɔ sīdee, mɛ adap sira doo wo. Kerewo, pya wuga nɛɛdam le nɛɛwa naale doodoo pya a i gbānasī sa i tɛ̄ŋaloo eba naa gbī e’aara i bu pɔrɔ sīdee. Nyɔɔbee ba naa mma. Kerewo, i dap nɔ gbɛnɛ-edo nu aāloo kɛ̄ Jizɔs bee doo dogo kiiloo pɔrɔ biaɛ a aabah pya bag dogo a bee ye gbānasī doo. Lo a le i dap egerebu loo pya nɛɛ a i gbānasī sɔ̄ ii doo pɔrɔ kɛ̄ i egerenage bu loo pya i wuga doolo! A tɔɔ̄loo Jɛhova doodoo wa sɔ̄ alu e’aara i bu pɔrɔ sīdee tɛ̄mabah pya i wuga a le bu bɔŋanaloo ale tɛ̄mabah pya dɔɔ̄na nɛɛ ni? Ekɔ a kuūge i dɛɛ̄ loo ni?

3. Sɔ̄ i kpesī pɔrɔ biaɛ ekɔ Jɛhova kuūge i dɛɛ̄loo ni, e ena anua a?

³ Jɛhova gbī kɔ alu e’aara i bu sīdee a lee e a yere nukuādɛɛ̄loo sɔ̄ alu e’aara i bu pɔrɔ sīdee tɛ̄mabah pya  dɔɔ̄na. “Jɛhova wereloo kaāna biaɛ.” (Le-yɔɔ 37:28) Jizɔs doo kɔ i suā kɔ Jɛhova gaa le “enwabah . . . biaɛ” taɛ sɔ̄ a bɔloo. (Luk 18:7, 8) Mɛ sɔ̄ sɔ̄ naa bīnia a gaa le lɛɛ dɛ̄dɛɛ̄ i taāŋā e a naale e yiga na kɔ i sikɛ̄ kpesī pɔrɔ biaɛ.—Yɔɔ 72:1, 2.

4. Amunu yerebah na Jɛhova i yere nɛ anii’ee a?

⁴ I ɛrɛ e yira baɛ sɔ̄ Jɛhova e lɛɛ dɛ̄dɛɛ̄ taāŋā a le bu nyɔuwe ama. Mɛ kere nyaawo, a yerebah i nɛ sɔ̄ pya dɔɔ̄na i aara bu pɔrɔ sīdee. (2 Pit 3:13) A tɔgɛ i kɛ̄ i lɛɛbahloo edoonu bu sīdee suānu naale loo doo sɔ̄ alu e’aara i bu pɔrɔ sīdee. Tɛ̄maloo ye Nwiīnɛɛdam, Jɛhova tɔgɛ i kaāna edobah kɛ̄ i dap tɔ̄ma pɔrɔ biaɛ doo. Jɛhova nɛ i zuurabahtɔ̄ a le bu Baibol akiiloo pya nu i doo sɔ̄ alu e’aara i bu pɔrɔ sīdee.

NWAƐ̄DƐƐ̄ KƐ̄ O DOO DOGO KIILOO PƆRƆ BIAƐ DOO

5. Ena anua i nwaɛ̄dɛɛ̄ kiiloo kɛ̄ i doo dogo kumaloo pɔrɔ biaɛ doo a?

⁵ Pɔrɔ biaɛ dap doo kɔ i ɛrɛ biira bu le ekiɛ̄nu. (Eklis 7:7) Kɛ̄ nu bee tɔɔ̄nage loo pya zooro a bɔloo eture nyiɛ̄ loo doodoo Job le Habakuk doolo. (Job 6:2, 3; Hab 1:1-3) A bɔloo kɔ i ɛrɛ dua ekɛɛrɛ ama. Mɛ a bɔloo kɔ i nwaɛ̄dɛɛ̄ lokwa ii doo dogo alu ezu.

6. Ena i nɔ aāloo edobah Absalɔm a? (Ɛpnage foto.)

⁶ Sɔ̄ ziī nɛɛ i doo pɔrɔ nu loo i dap gbī e’obara ye kpɛ. Lo i doo wo edoo kɔ lo kɛ̄tɔɔ̄ agɛrɛbah bee piya. Naa kɛɛrɛbu loo nwī Mɛnɛ Devid akura Absalɔm. A bee ɛrɛ gbɛnɛ saŋ sɔ̄ ye wuga nɛɛdam bu dɔɔ̄na ka akura Amnon bee su bah ekpo aā ye wuga Tama sa maloo. Dookɛ̄ lok Mozis kɔ doo, bɔloo efɛ Amnon nyɔɔ nu a bee doo ama. (Lev 20:17) A naa bee bee piya kɔ bu Absalɔm biira mɛ a bee bee piya kɔ a fɛ Amnon—2 Sam 13:20-23, 28, 29.

7. Bu mɛ sīdee na pɔrɔ biaɛ bee ɛrɛ pah nyɔɔ nɛɛ uɛ le-yɔɔ bu ziī nwī sɔ̄ a?

⁷ Sɔ̄ lɔgɔ piya nu naa siraloo pya pɔrɔ dogo, i dap kɛɛrɛ kɔ lɔgɔ biī naale bu doo nu a lee. Naa kɛɛrɛbu loo nɛɛ uɛ le-yɔɔ lo a bee muɛ pya bag dogo a gaa kiisī leere sa ɛrɛ ekpeloo bu dum. A bee kɔ “Pya lo ba ama na pya gbee lok a; ba tɔɔ̄ bu efɛɛloo.” (Yɔɔ 73:12) A bee ɛrɛnage gbɛnɛ ekiɛ̄nu nyɔnɛbee pɔrɔ  biaɛ sa a bee kɛɛrɛ kɔ lɔgɔ biī naale bu taāŋabah Jɛhova: “Mɛ sɔ̄ m bee kɛɛrɛ ekɛɛrɛ kɛ̄ m suā lo ba ama doo, a doodoo tam a mɛ zɔra loo.” (Yɔɔ 73:14, 16) Bu kaka, a bee kɔ sia kɔ: “Mɛ mda mdaa loo siga nwī gbagbara, baɛ na ekaɛtɔ su wa loo lɛɛ dɔ dɛ̄dɛɛ̄ na dɔ ekaɛtɔ ɔrɛɛ mɛ.” (Yɔɔ 73:2) Dua nu ama bee siranage loo wuga nɛɛdam i gaa le kure Alberto.

8. Amunu pah na pɔrɔ biaɛ bee ɛrɛ nyɔɔ ziī wuga nɛɛdam a?

⁸ A bee lu edɛrɛ ue Alberto kɔ a yib kpugi bɔŋanaloo sɔ̄ a naa doo wo. Nu a bee sira aabu na kɔ, bee peere ye dɔ tam bu bɔŋanaloo le kɔ pya nɛɛ a le bu bɔŋanaloo naa bee ye nɛ na enwadɛɛ̄. A bee kɔ “M bee ɛrɛ gbɛnɛ birabu, saŋ, le kɔ a naa lu e’aara mɛ leere.” A bee lɛɛbahloo kɔ ye ekɛɛrɛ beenyiɛ a ɛrɛ ye pah nyɔɔ sa a bee ɔbɛ esī enɔanu bu o’oo zua. Edobah ama tɔgɛ nu a dap i siraloo lo i lɛɛbahloo pɔrɔ biaɛ kɔ a ɛrɛ i pah nyɔɔ.

NƆ KƐ̄ JIZƆS BEE TAMA PƆRƆ BIAƐ DOO

9. Pya amunu pɔrɔ biaɛ na Jizɔs bee egerebu a? (Ɛp nage foto.)

⁹ Jizɔs bee sere le edobah loo kɛ̄ i dap  tama pɔrɔ biaɛ doo. Naa kɛɛrɛbu loo pɔrɔ biaɛ a bee kpesī, aābah pya ye butɔ le pya dɔɔ̄na. A bee lu edɛrɛ ye ue tɛ̄mabah pya ye manamana a naa bee taāŋabah Jɛhova kɔ a bɔ daa, Pya zaāsī yiga bari bee ye dɛrɛ ue kɔ a su ekpo aābah pɔrɔ edɔɔ̄, e pya nɔ̄ Rom bee ye tɔg sa ye fɛ. (Maak 3:21, 22; 14:55; 15:16-20, 35-37) Kerewo, Jizɔs bee egerebu kɛ̄ bah dɛ̄dɛɛ̄ lo pɔrɔ biaɛ sa naa bee wa obara kpɛ. Ena i dap nɔ aāloo ye edobah a?

10. Bu mɛ sīdee na Jizɔs bee egerebu kɛ̄ bah pɔrɔ biaɛ a? (1 Pita 2:21-23)

¹⁰ Buū 1 Pita 2:21-23. a Jizɔs bee sere le edobah i dap nyɔɔnɛ sɔ̄ pya nɛɛ i aara bu pɔrɔ sīdee. A bee suā taɛ sɔ̄ a bɔloo ekɔ ue le sɔ̄ e ɔbɛ piī. (Mat 26:62-64) A naa bee agara dɛ̄dɛɛ̄ esah ue a bee lu ekɔ ye kumaloo. (Mat 11:19) Sɔ̄ a bee kɔ ue, a naa bee gbɛ pya a bee ye gbanasī ale yere wa bɔɔ bu. Jizɔs bee kiisī lo e’aaloo ye, nyɔnɛbee a “ture nyiɛ loo Nɛɛ a biaɛ leere” Jizɔs bee suā kɔ kɛ̄ Jehova ɛp nu doo na a kuī a. A bee dɛrɛ nyiɛ nyɔɔ kɔ Jɛhova esu kuma mmɛ loo pɔrɔ biaɛ taɛ sɔ̄ abɔloo.

11. Pya amunu sīdee na i dap baɛloo i ekɔaue a? (Ɛpnage foto.)

¹¹ I dap nɔ edobah Jizɔs tɛmaloo ebaɛloo nu i kɔ sɔ̄ pya nɛɛ i aara bu pɔrɔ sīdee. Pio pɔrɔ biaɛ naa agabah, e i dap be eebah tɛmaloo ɔbɛ piī. I dapnage ɔbɛ piī lokwa ii kɔ nu enua taāŋa. (Eklis 3:7; Jas. 1:19, 20) Pio sɔ̄, a dap lu ebɛɛ̄ kɔ i kɔ ue sɔ̄ i muɛ kɛtɔɔ̄ a  naa lee ale i gbī ekpega kaka ue. (Doonu 6:1, 2) Lo a le i kɔ ue, i piiga lo edoo bu kumalookɛ̄ le enwadɛɛ̄.—1 Pita 3:15. b

12. Bu mɛ sīdee na i dɛrɛ nyiɛ nyɔɔ “nɛɛ a biaɛ leere a”?

¹² I dap nɔ edobah Jizɔs tɛ̄maloo edɛrɛ nyiɛ nyɔɔ “nɛɛ a biaɛ leere.” Sɔ̄ pya nɛɛ naa biaɛ i leere ale ba naa araa i bu sīdee a bɔloo, i dɛrɛ nyiɛ nyɔɔ kɔ Jɛhova suā dɛ̄dɛɛ̄ nu. Dua dɛrɛ nyiɛ nyɔɔ ama eyerebah i nɛ kɔ i dap egerebu kɛ̄bah pɔrɔ biaɛ nyɔnɛbee i suā kɔ Jɛhova gaa le doo nu a bɔloo. Sɔ̄ i lɛɛbahloo nu bie bah Jɛhova, a doo kɔ i kiī gbɛnɛ biirabu sa doo kɔ i saŋ aa bɛa miā. Pya ekɛɛrɛ ama dap doo kɔ i doo nu a bee piya, edoonage kɔ i aa ɛrɛna ɛɛbu sa gbee i gbaniāloo kiīkɛ̄ Jɛhova le.—Yɔɔ 37:8.

13. Ena edap i yerebah nɛ kɔ i dap egerebu pɔrɔ biaɛ a?

¹³ Kerewo, ii le edap nyɔɔnɛ edobah Jizɔs mmɛɛ. Pio sɔ̄, i dap doo, ale kɔ nu ekiɛ̄ i sɔ̄ esaa. (Jem 3:2) Pio sɔ̄ pya nɛɛ i aara bu pɔrɔ sīdee dap i su ekiɛ̄nu nua nyɔɔ sa doo kɔ loo i a ɔ bu dɛ̄dɛɛ̄ i dee tɔɔ̄dum bu pɔrɔ nyɔuwe ama. Lo lo ama sira a loo, suā leere kɔ Jɛhova suā nu o gaa tɛɛ̄bu. E Jizɔs suānage kɛ̄ nu a tɔɔ̄loo doo, nyɔɔbee a bee kpesī pɔrɔ biaɛ. (Hib 4:15, 16) Gbaāloo enɛ i edobah Jizɔs a mmana ama, Jɛhova nɛ i zuurabahtɔ̄ a aabu Baibol lo eyerebah i nɛ sɔ̄ alu e’aara i bu pɔrɔ sīdee. Doraa i naa kɛɛrɛbu loo baɛ dɔ a le bu kpa Rom lo edap i yerebah nɛ.

“LƐƐBAHLOO NƐ SAŊ BARI”

14. Ena “lɛɛbahloo nɛ saŋ Bari” kura a? (Pya Rom 12:19)

¹⁴ Buū Pya Rom 12:19. Sɔ̄ nɛɛ lɛɛratam Pɔɔl bee kɔ nɛ Pya Nɛɛ Kraist kɔ ba a “lɛɛbahloo nɛ saŋ Bari,” amunu saŋ na a gaa kɔ nu akiiloo a? Dookɛ̄ pya dɔ a waɛ kpaɛ̄ pya dɔ Kpa Kaɛ ama kɔ doo, ɛɛ na saŋ Jɛhova. Tɛ̄maloo elɛɛbahloo kɔ Jɛhova a su ye kaāna biaɛ nua taɛ sɔ̄ a gbī le sɔ̄ a bɔloo tɔgɛ kɔ i lɛɛbahloo saŋ nɛ Jɛhova. Sɔ̄ a bee lu e’aara ziī wuga akura John bu pɔrɔ sīdee, a bee kɔ: “M bee gbī e baɛbee na saŋ lokwa mm doo nu a bee piya, mɛ a naa bee waɛ doo pippip. Kpa Rom 12:19 bee mɛ yerebah nɛ kɔ m tɔɔ̄ baɛ Jɛhova.”

15. Ena anua a bɔloo kɔ i tɔɔ̄baɛ Jɛhova kɔ a kwa lo taāŋa a?.

¹⁵ I ɛrɛ biī aāloo sɔ̄ i tɔɔ̄baɛ Jɛhova kɔ a kwa lo taāŋa. Sɔ̄ i doo wo, i dap ɔbɛ e’ɛrɛ etɛɛrɛloo kɔ i dap kwa pya loo taāŋa. Jɛhova gbī eyerebah i nɛ. E a kɔ, dookɛ̄ a le doo: “Jɛhova kɔ i tɔɔ̄ ye baɛ mɛ a gaa le kwa pya i taāŋa.” Lo i yiga pya yii Jɛhova eyira kɔ “mda esikɛ̄ kpɛ,” i dap lɛɛbahloo dɛ̄dɛɛ̄ lo taāŋa, sa dɛrɛ nyiɛ nyɔɔ kɔ Jɛhova gaa le kwa lo taāŋa taɛ sɔ̄ a bɔloo. Nu a bee yerebah nɛ John, i bee kɔ nu akiiloo tua sɔ̄ lo. A bee kɔ, “Lo m tɔɔ̄ baɛ Jɛhova, e aabahloo lo kɛ̄tɔɔ̄ eekɛ̄ mda m bee doo.”

“MƐ EEMA BAH PƆRƆ TƐ̄MALOO DOO LE”

16-17. (a) Bu mɛ sīdee na kara eyerebah i nɛ kɔ i “eema bah pɔrɔ tɛ̄maloo doo le” a? (Pya Rom 12:21)

¹⁶ Buū Pya Rom 12:21. Pɔɔl bee yerenage mɛm loo Pya Nɛɛ kraist kɔ ba a “eema bah pɔrɔ tɛ̄maloo doo le.” Bu ekɔaue Jizɔs bie nyɔɔ kpokɛ̄, a bee kɔ:  Kiraa sī lo e “wereloo pya bui dam baara sa taāŋa bee pya a i tɛ̄ŋaloo.” (Mat 5:44) Taɛ nu Jizɔs bee doo lo. I nɔ gbɛnɛ-edo nu akiiloo kɛ̄ Jizɔs bee egerebu sɔ̄ a bee lu eka ye nyɔɔ te tɔga tɛ̄mabah pya nɔ Rom doo. I dap kɛɛrɛbu dua ezialoo, le kɛ̄ a bee egerebu kɛ̄ bah pɔrɔ biaɛ doo.

¹⁷ Taāŋa Jizɔs bee kpesī naa bee ye be eebah. Taā a gbɛ pya nɔ Rom, a bee bara kɔ: “Tɛ, aaloo wa nɛ; nyɔnɛbee ba naa suā nu ba gaa doo.” (Luk 23:34) Sɔ̄ i yere kara bee pya a gaa i nua taāŋa nyɔɔ, a dap i yerebah nɛ kɔ i ɛrɛ efɛɛloo beenyiɛ sa ii ɛrɛ biirabu. Eyerenagebah kɔ i kwabahloo kɛ̄ i kɛɛrɛ nu kumaloo pya a i nua taāŋa loo doo.

18. Bu mɛ sīdee na kara bee yerebah nɛ Alberto le John kɔ ba a dap be eebah pɔrɔ biaɛ a?

¹⁸ Kara bee yerebah nɛ baɛ wuga nɛɛdam i bee kɔ nu akiiloo tua sɔ̄ bu ekobee ue ama a kɔ ba a dap be eebah pɔrɔ biaɛ ba bee kpesī. Alberto kɔ: “M bee yere kara bee pya wuga a naa bee mɛ aara leere ama. M bee bara Jɛhova gbɛnɛ-edo sɔ̄ kɔ a yerebah mɛ nɛ lokwa mm ɛrɛ saŋ kiiloo nu a bee mɛ siraloo ama.” Nyaawo, Alberto gaa su ɛɛbu taāŋabah Jɛhova bu bɔ ture nyiɛ loo. John kɔ: “Gbɛnɛ-edo sɔ̄, m bee yere kara bee pya wuga a bee mɛ yere saŋ bu. Dua kara ama bee mɛ yerebah nɛ kɔ m aa ɛrɛna saŋ loo pya nɛɛ a bee mɛ biirebu sa ɔbɛ e biaɛ wa. Kara ama bee doonage kɔ m ɛrɛ efɛɛloo beenyiɛ.”

19. Ena i doo mmɛ sɔ̄ lo sɔ̄ eku ama e’ina kuma a? (1 Pita 3:8, 9)

¹⁹ Dap lu e’aara i bu pɔrɔ sīdee. Kaɛlɛɛ ɛrɛgebah nu i kpesī, dooraa i kiisī lo eyere kara nɛ Jɛhova kɔ a yerebah i nɛ. Gbaānage loo wo, i kiisī lo enɔ sīdee Jizɔs doo dogo kumaloo sɔ̄ a bee lu e’aara ye bu pɔrɔ sīdee, sa kiisī lo esu daakuu Baibol yere bu dogo. Lo a le i doo wo, suā leere kɔ Jɛhova gaa le yerebah i nɛ.—Buū 1 Pita 3:8, 9.