1. Ena anua i dap nɔnu aābah pya nama nɛɛ a?

 LU EBƐƐ̄ kɔ alu ebaɛloo dɛ̄dɛɛ̄ ii sɔ̄ i gaa doo pya biaɛfii a kuī bu dum. i dap ɛrɛ gbɛnɛkpo pya baɛloo ama aābah pya kanɛɛ le pya wuga a nyim tura. Lo ba nama i, i aa nwaabah kɔ wa zuurabahtɔ̄ naa lee. Jɛhova gbī kɔ i nɔ nu aābah pya a i nama. Ba esua gbɛnɛkpo zua tɛ̄mabu booboo kɛ̄tɔɔ̄, ɛā edaābeeloo nu ee kɛ̄ ili doo.—Job 12:12.

2. Ena i gaa le nɔ bu lo ekobee ue ama a?

² Bu sɔ̄ Baibol, Jɛhova bee su pya nama nɛɛ a bɔloo eture nyiɛ loo yeā mɛm loo sa baɛloo pya ye nɛɛ. Bu edobah, naa kɛɛrɛbu Mozis, Devid, le nɛɛ lɛɛratam Jɔn. Ba bee tɔɔ̄dum keekee eku sɔ̄, kɛ̄ wa kɛ̄tɔɔ̄ bee lunage kee loo ziī doolo. Sɔ̄ wa tɔɔ̄dum esaa e’ina kuma, ba bee nɛ kaāna zuurabahtɔ̄ suānu le loo pya zege. Ziī ziī pya nama nɛɛ a bɔ loo eture nyiɛ loo ama bee tɔgɛ kɛ̄ alu ebɛɛ̄ doo lo egbaɛ̄tɔ̄loo Bari. Jɛhova bee sere wa ue suānu ama bu Baibol lokwa i dap buū sa nɔ nu aāloo anii’ee. Kere i le zege ale i e’ana, i dap ɛrɛ biī aāloo tɛ̄maloo e’ɛrɛ ekɛɛrɛ nyɔɔ wa zuurabahtɔ̄. (Rom 15:4; 2 Tim 3:16) Bu ekobee ue ama, i gaa le nɔ kpɛdumɛ ue taa pya a bɔloo eture nyiɛ loo ama bee kɔ le nu i dap wa nɔ aāloo.

“O GAA LE EGEREBU NYƆƆNYƆƆ SƆ̄”

3. Pya amunu tam na Mozis bee si a?

³ Mozis bee su dɛ̄dɛɛ̄ ye dum siātam nɛ Jɛhova. A bee le nɛɛ mɔmanudɛɛ̄, nɛɛ biaɛ, nɛɛ a wee zaāsī nɔ̄, le nɛɛ  kɔ eloh kere. Mozis bee dābeeloo gbɛnɛ-edo nu bu dum! A bee zaāsī pya edonyɔɔ Izrɛl aābu zooro li Ijipt sa muɛ gbɛnɛ-edo nyɛŋia tam Jɛhova. Jɛhova bee ye su ɛma o’oo tua kpa a le bu Baibol, Le-yɔɔ 90, le naadabah Le-yɔɔ 91. A bee dapnage ɛmnage nu a le bu kpa Job.

4. Mɛɛ na Mozis bee nɛ yere mɛmloo a, e ena anua a?

⁴ Nwī gbagbara sɔ̄ lɛɛ a gae u, sɔ̄ elua 120 zua, Mozis bee bɔŋɛnɛloo dɛ̄dɛɛ̄ pya miɔŋɔ Izrɛl sa wa nyɛŋiabu pya nu ba e mɔna sa tɛɛ̄bu. Bu wa dee zege, pio pya a bee gbaɛ̄tɔ̄loo Mozis bee muɛ booboo nyɛŋia tam Jɛhova bee si le biaɛ A bee su nua nyɔɔ pya Ijipt. (A’aa 7:3, 4) Ba bee muɛ sɔ̄ Jɛhova bee poo mii mii pɛnɛ sa ba kiā tɛɛ̄bu. E ba bee muɛnage sɔ̄ Jɛhova gbeesī Fero le pya ye nɔ̄. (A’aa 14:29-31) Ba bee muɛ kɛ̄ Jɛhova bee wa baɛloo sa wa kpega doo bie bu kpo-sagara-wii. (Deut 8:3, 4) Sɔ̄ pya edonyɔɔ Izrɛl ewaraloo eyii bu Buɛ A Bee Lu Eyira Yiiloo, Mozis su kpedumɛ dee a ye kpaānɛ ama wa yeā mɛm loo. a

5. Kpɛdumɛ ue Mozis a le bu kpa Deuteronomy 30:19, 20 bee nɛ amunu bɛābu pya miɔŋɔ Izrɛl?

⁵ Ena Mozis bee kɔ a? (Buū Deuteronomy 30:19, 20.) A bee nyɛŋia bu pya edonyɔɔ Izrɛl kɔ ba ɛrɛ le kɛ̄tɔɔ̄ li deesī. Tɛ̄maloo leelee Jɛhova, Pya miɔŋɔ Izrɛl edap tɔɔ̄ nyɔɔnyɔɔ dee dum bu buɛ a bee wa yira yii loo nɛ. Naa ɛp kɛ̄ lo buɛ bee kpedɛɛ̄ sa ɛrɛ le beebee te doo a! Mozis bee wa baatɛ̄ nɛ kɔ: “Booboo gbɛnɛ buɛ a kuī sa lee, lo oo bee wu, le booboo tɔ lele nu mma bu, lo oo bee doo kɔ ba a mma, le booboo bana maā a bee lu edɔɔra, lo oo bee dɔɔra, le booboo kere uwe vine le booboo te olive, lo oo bee foh.”—Deut 6:10, 11.

6. Ena anua Bari bee lɛɛbahloo kɔ pya dɔɔ̄na edonyɔɔ a be eebah Pya Izrɛl a?

⁶ Mozis bee nɛnage ziī zuurabahtɔ̄ pya miɔŋɔ Izrɛl. Lokwa ba kiisī lo etɔɔ̄ bu ekpedɛɛ̄ buɛ̄ alu ebɛɛ̄ kɔ ba a kiisī lo esere lok Jɛhova. Mozis bee wa kɔ nɛ kɔ ba a “sagɛ dum” tɛ̄maloo egbaɛ̄tɔ̄loo Jɛhova sa ye “dabaloo.” Kerewo, pya Izrɛl bee kiī Jɛhova. Nyɔɔwo Bari bee lɛɛbahloo kɔ Pya Asiria, e sɔ̄ esaa Pya Babilon a be wa eebah sa wa aa kuma bu zooro.—2 Mɛnɛ 17:6-8, 13, 14; 2 Edoo 36:15-17, 20.

7. Ena i dap nɔ aāloo ue Mozis a? (Ɛpnage foto.)

⁷ Ena i nɔ aāloo a? Gbaɛ̄tɔ̄loo wee nua dum. Doodoo Pya Izrɛl lo ba ebee sah eyii bu Buɛ̄ A Bee Lu Eyira Yii Loo, ili esaa eyii bu aā nyɔuwe Bari yira yii loo, lo elu ekiira nua paradais. (Ais 35:1; Luk 23:43) Pɔrɔ-edɔɔ le pya ye gbo yɔ naale elena. (Mum 20:2, 3) Ekwɔ sīdee taāŋabah naale esinakɛ̄ dag pya nɛɛ lɛɛ dumɛ Jɛhova. (Mum 17:16) Bɛbɛɛ miɔŋɔ nɛɛ naale esinakɛ̄ bii pya a wa le kɛɛ̄ kumakɛ̄. (Mum 19:19, 20) Naale elu elɛɛbahloo pya a lɛɛbeekɛɛ̄ kɔ ba a tɔɔ̄ bu paradais. (Yɔɔ 37:10, 11) Pya nɛɛ a le bu yube nyɔuwe gaa le gbaɛ̄tɔ̄loo lok Jɛhova, lo edoo kɔ pya nɛɛ a gbaaloo sa le bu efɛɛloo. Nyɔɔwo, ba ewereloo sa dɛrɛ nyiɛ nyɔɔ ɛnia aba. (Ais 11:9) Naa ɛp pya nyɛŋia leelee! E lo a eetɔɔ̄, lo i gbaɛ̄tɔ̄loo Jɛhova, i dap kiisī lo etɔɔ̄dum  bu paradais a nyɔɔ kɛnɛkɛ̄ mmɛɛ deedee!—Yɔɔ 37:29; Jɔn 3:16.

8. Bu mɛ sīdee na yii akiiloo dum anaa tah bee yerebah nɛ ziī wuga esiatam bu dɔɔ̄na edo bu nyɔɔnyɔɔ sɔ̄ a? (Jud 20, 21)

⁸ Io i kiisī lo ekɛɛrɛbu loo dum anaa tah lo Bari eyira yii loo, i tɔɔ̄ ye bialoo kaɛlɛɛ ɛrɛgebah doā-ɛp i kpesī. (Buū Jud 20, 21.) Yii ama dapnage doo kɔ i ɛrɛ e’agaloo sɔ̄ loo i ɔ. Ziī nɛɛ esiatam bu dɔɔ̄na edo bu nyɔɔnyɔɔ sɔ̄ li Africa lo a bee kiisī lo ebebe loo e’ɔloo kɔ: “Sɔ̄ m suā kɔ na bɛābu lo etɔɔ̄ dum mmɛ deedee dap lɔh bee doo kɔ m bebeloo lo taāŋa sa yere kara bu e’agabah nɛ Jɛhova. M bee dap be eebah tɛ̄maloo ye yerebah.”

“LOKWA O DAP KIISĪ LEERE”

9. Pya amunu taāŋa na Devid bee tɛɛ̄bu bu ye dum a?

⁹ Devid bee le gbɛnɛ mɛnɛ. A bee lunage nɛɛ uɛ yɔɔ, nɛɛ ɛm loo, nɛɛ a para be nɔ, le nɛɛ mɔmanudɛɛ̄. Gbɛnɛ-edo taāŋa bee ye siraloo. A bee teera gɔā bu gbɛnɛkpo zua, nyɔnɛbee Mɛnɛ Saul gaa bee gbī efɛ ye. Sɔ̄ Devid elua mɛnɛ, a bee sikɛ̄ teera nyɔɔ ye dum nyɔnɛbee ye nwiīnɛɛdam Absalɔm gaa bee gbī efɛ ye lo esu ye dɔ. Kaɛlɛɛ pya taāŋa Devid bee tɛɛ̄bu le pya ekwɔ a bee tɛɛ̄, a bee kiisī lo etɔɔ̄ agara ye nɛ mmɛ sɔ̄ a u. Jɛhova bee kɔ alu “nɛɛ a nia [Ye] beenyiɛ.” Devid wee nɛ zuurabahtɔ̄ a dɔbiī!—Doonu 13:22; 1 Mɛnɛ 15:5.

10. Ena anua Devid bee nɛ zuurabahtɔ̄ ye nwiīnɛɛdam Solomon lɛɛ a gaa lu mɛnɛ a?

¹⁰ Bu edobah, naa kɛɛrɛbu zuurabahtɔ̄ Devid bee nɛ ye nwiīnɛɛdam Solomon lo a bee yii ye dɔ. Jɛhova bee sagɛ lo zege gbara kɔ a nyimɛ logaloga taāŋabah sa wu ziī tɔ kaɛ lo enua ka loo Bari. (1 Edoo 22:5) Solomon ekpesī taāŋa. Ena Devid ekɔ ye nɛ a? I naa ɛp.

11. Dookɛ̄ 1 Pya Mɛnɛ-Buɛ̄ 2:2, 3 kɔ doo, amunu zuurabahtɔ̄ na Devid bee nɛ Solomon a, e lo ama bee dooa doo doo wa? (Ɛpnage foto.)

¹¹ Ena Devid bee kɔ a? (Buū 1 Pya Mɛnɛ-Buɛ̄ 2:2, 3.) Devid bee kɔ nɛ ye nwiīnɛɛdam kɔ lo a gbaɛ̄tɔ̄loo Jɛhova, a gaa le kiisī leere bu dum. E bu gbɛnɛkpo zua, Solomon bee kiisī leere. (1 Edoo 29:23-25) A bee wu gbɛnɛ tɔkaɛ a kpedɛɛ̄ sa ɛm pio kpa a le bu Baibol le pio ue a le bu pya dɔɔ̄na kpa a le bu Baibol. Bee lu esuā ye loo nyɔɔ kɛ̄ a ɛrɛ gbɛnɛ suānu le zɔ doo. (1 Mɛnɛ 4:34) Mɛ dookɛ̄ Devid bee kɔ doo, Solomon e kiisī leere aba sɔ̄ a gbaɛ̄tɔ̄loo Jɛhova Bari. Lu ekiɛ̄nu kɔ sɔ̄ esaa, Solomon bee kiiya nyɔɔnɛ pya dɔɔ̄na bari. Jɛhova naa  bee ye yerena kpotɛ̄ sa Solomon bee peere suānu lo ebɛɛ bu kaāna dogo le kaāna biaɛ.—1 Mɛnɛ 11:9, 10; 12:4.

12. Ena i dap nɔ aāloo pya ue Devid bee kɔ a?

¹² Ena i nɔ aāloo a? Gbaɛ̄tɔ̄loo wee doo kɔ nɛɛ a kiisī leere. (Yɔɔ 1:1-3) Kerewo, Jɛhova naa yira yii kɔ enɛe i zɔ le ka doodoo Solomon. Mɛ lo i gbaɛ̄tɔ̄loo Bari, a gaa le nɛ i suānu lo edoo kɔ i biaɛnu fii leere. (Kam 2:6, 7; Jem 1:5) Ye suānu dap i baɛloo kiiloo dua tam i si, dua enɔā kpa i nɔ, dua ɛrɛ ekpeloo, le kiiloo kpugi. Su suānu Bari yere bu dogo e baɛ i loo doo kɔ i yɔ Bari ɛrɛ le gbānialoo sa i ɛrɛ dum a naa tah. (Kam 2:10, 11) I ɛrɛ le le gbo. E ebaɛ i loo doo kɔ i butɔ a le bu ɛɛbu.

13. Bu mɛ sīdee na Carmen bee doo kɔ ye dum a kiisī leere a?

¹³ Carmen a tɔɔ̄ Mozambique, bee kɛɛrɛ kɔ si gbɛnɛ tɔkpa na a doo kɔ nɛɛ a kiisī leere a. A bee yii gbɛnɛ tɔkpa sa nɔ kɛ̄ etɔ̄ tɔ doo. A bee kɔ “Nu m gaa bee nɔ bee mɛ nia gbɛnɛ. Mɛ a bee mɛ su sɔ̄ bah gbɛnɛ sa mɛ ɔɛloo nyɔnɛbee m wee kii tɔkpa aā 7:30 lɔɔrɛ mmɛ 6:00 loo uunɛ. A naa wee waɛ kɔ m tura enɔānu, e mm bee ɛrɛna le gbaniāloo kiikɛ̄ Jɛhova le. Bu na beenyiɛ m bee muɛ kɔ m gaa bee sitam nɛ baɛ tɛ-tɔ.” (Mat 6:24) A bee yere kara kumaloo lo kɛ̄tɔɔ̄ sa gbītɛ̄nu kumaloo aābu pya i kpa. A kɔ yere loo kɔ: “Sɔ̄ pya wuga nɛɛdam enyima tura le na ka bee mɛ nɛ kaāna zuurabahtɔ̄ m biaɛfii lo elɛɛbahloo esi gbɛnɛ tɔkpa sa kii wee sitam mmɛ sɔ̄ nɛ Jɛhova. Lo ama eyerebah mɛ nɛ kɔ m sagɛ nu a lee eera, e a naa kiɛ̄ mɛ doo pippip.”

14. Ena alu gbɛnɛ ue Mozis le Devid bee kɔ a?

¹⁴ Mozis le Devid bee wereloo Jɛhova sa suā kɔ alu ebɛɛ̄ lo egbaɛ̄ ye tɔ̄loo. Sɔ̄ ba ebee sah e’u ba bee yere mɛm loo pya nɛɛ kɔ ba a daba bialoo Jɛhova wa Bari. Baɛ aba bee nɛ zuurabahtɔ̄ kɔ pya a’aaloo Jɛhova epeere ye ewonu le leelee a bee wa yira yiiloo nɛ. Wa zuurabahtɔ̄ dɔbiī i nɛ anii’ee. Sɔ̄ booboo zua etɛna, dɔɔ̄na zooro Bari bee kɔ kɛ̄ alu gbɛnɛ  doo lo etaāŋabah Bari bu bɔ ture nyiɛ loo.

“LƆGƆ GBƐNƐ ƐƐŊA”

15. Ena nɛɛ lɛɛrɛtam Jɔn bee muɛ sɔ̄ a bee le dum a kɛnɛkɛ̄ a?

¹⁵ Jɔn bee le gbo le nɛɛ lɛɛratam Jizɔs Kraist. (Mat 10:2; Jɔn 19:26) Jɔn bee nyɔɔnɛ Jizɔs bu ye esiātam, mɔmadɛɛ̄ pya nyɛŋiatam a bee si, sa bee kiisī lo etɔɔ̄ agara ye nɛ. A bee yira ɛp sɔ̄ ba gaa fɛ Jizɔs sa ye muɛ sɔ̄ e’aara kɛ̄ bu luh. A bee muɛnage kɛ̄ pya a nyɔɔnɛ dumɛ Kraist bee nyim yiiloo doo. Aābu nwiīgbaragbara eku pya a bɔloo eture niyɛ loo mmɛ sɔ̄ “le yere ue . . . lu ezue nɛ dɛ̄dɛɛ̄ nu a le kɛɛ̄ bunyɔɔ.”—Kɔl 1:23.

16. Ba mɛɛ na a ɛrɛ biī aāloo Kpa Jɔn bee ɛm a?

¹⁶ Sɔ̄ Jɔn ebee ana gbɛnɛ sa esaa e’u, a bee lu enɛ ye edɔɔ̄ kɔ a le yɛɛ pya a ɛm Muɛ̄ Ue Bari. A bee ɛrɛ dee lo e’ɛm kpa akura Mumuuna. (Mum 1:1) Jɔn Bee Ɛm Kpa Le Yere Ue. E a bee ɛmnage taa lɛta, 1 Jɔn, 2 Jɔn, le 3 Jɔn. A bee ɛm ye taa Kpa ma ziī Nɛɛ Kraist a bɔloo eture nyiɛ loo lo akura Gaius, lo Jɔn bee ɛp nua nwiī a wereloo bu edɔɔ̄. (3 Jɔn 1) Bu lo sɔ̄, Jɔn ebee ɛrɛ gbɛnɛ-edo pya nɛɛ ebee dap su nua ye nwiī bu edɔɔ̄. Nu Jɔn a bɔloo eture nyiɛ loo bee ɛm ama bee yere mɛm loo pya a bee nyɔɔnɛ dumɛ Jizɔs mmɛ bu ilii dee ama.

17. Dookɛ̄ 3 Jɔn 4 kɔ doo, ena anua gbɛnɛ ɛɛbu a?

¹⁷ Ena Jɔn bee ɛm a? (Buū 3 Jɔn 4.) Bu lo eree taa Kpa Jɔn bee ɛm, a bee kɔ kɛ̄ a ye ɛɛrɛbu doo sɔ̄ a muɛ pya wuga nɛɛdam le nɛɛwa a gbaɛ̄tɔ̄loo Bari. Mɛ bu lo sɔ̄, pya nɛɛ gaa bee tɔgɛ ekwɔ ekwɔ tɔgɛnu sa tɛrɛ gbɛnɛ taāŋa bu bɔŋanaloo. Kerewo, pya dɔɔ̄na bee kiisī lo e “tɔɔ̄dum bu kaka.” Ba bee gbaɛ̄tɔ̄loo Jɛhova sa “tɔɔ̄dum bu dɛ̄dɛɛ̄ ye lok.” (2 Jɔn 4, 6) Pya Nɛɛ Kraist a bɔloo eture nyiɛ loo ama bee doo kɔ bu Jɔn le Jɛhova a ɛɛ.—Kam 27:11.

18. Ena i dap nɔ aāloo ue Jɔn a?

¹⁸ Ena i dap nɔ aāloo a? Bɔ ture nyiɛ loo wee nua ɛɛbu. (1 Jɔn 5:3) Bu edobah, i ɛrɛ ɛɛbu nyɔnɛbee i doo kɔ bu Jɛhova a ɛɛ. Bu Jɛhova ɛɛ sɔ̄ a i muɛ i su kaka ue sa kiī doā-ɛp a aabu nyɔuwe. (Kam 23:15) Bu pya ɛngel a le bunyɔɔ ɛɛnage (Luk 15:10) Bu ili wee ɛɛnage sɔ̄  i muɛ pya wuga a bia bu bɔ ture nyiɛ loo, eetɔɔ̄ sɔ̄ ba le bu doā-ɛp le tɛ̄ŋaloo. (2 Tɛs 1:4) Sɔ̄ nyɔuwe Setan etɛ̄na aa, bu i e’ɛɛ kɔ i bia bu bɔ ture nyiɛ loo nɛ Jɛhova.

19. Ena ziī wuga nɛɛwa akura Rachel bee kɔ akiiloo tɔgɛ kaka ue pya dɔɔ̄na a? (Ɛpnage foto.)

¹⁹ Bu i wee ɛɛ kaāna sɔ̄ i kɔ kaka ue akiiloo Jɛhova nɛ pya dɔɔ̄na. Rachel, lo a bee tɔɔ̄ Dominican Republic, su nua gbɛnɛ dee a ye kpaānɛ lo ezue kaka ue akiiloo Jɛhova nɛ pya dɔɔ̄na. Sɔ̄ a kɛɛrɛbu loo pya a bee tɔgɛnu, a bee kɔ: “A’aga mɛ loo ekɔ duā ɛɛbu m ɛrɛ sɔ̄ m muɛ pya m bee tɔgɛnu a gaa nyim kiisī bu taāŋabah Jɛhova, ye dɛrɛ nyiɛ nyɔɔ, sa nyaana bahloo wa sīdee tɔɔ̄dum lo edoo kɔ bu Jɛhova a ɛɛ. Duā ɛɛbu ama kuī ee ɛrɛgebah epiaga le sɔ̄ m bee pee lo etɔgɛ wa nu.”

BIĪ I ƐRƐ AĀLOO KPƐDUMƐ UE PYA A BƆLOO ETURE NYIƐ LOO BEE ƐM

20. Ena Mozis, Devid, Jɔn le ii gbaa ɛrɛ a?

²⁰ Mozis, Devid, le Jɔn bee tɔɔ̄dum nyɔɔnyɔɔ sɔ̄ akii adumɛ e wa kɛ̄tɔɔ̄ bee lu kee loo ili. Mɛ i bee ziī bu gbɛnɛ-edo sīdee. Ba bee taāŋabah lo kaka Bari dookɛ̄ ili gaa doo. Doodoo alaba, i yere kara nɛ Jɛhova, ye dɛɛa nyɔɔ, sa gbī baɛloo a ye aābah. Doodoo pya nɛɛ a bee le a dee kere ama, i dɛrɛ nyiɛ nyɔɔ kɔ Jɛhova wee nɛ leelee pya a ye gbaɛ̄tɔ̄loo.

21. Pya amunu leelee na a gaa tɔɔ̄ baɛ pya a su zuurabahtɔ̄ pya nɛɛ a bee taāŋabah Bari leere doodoo Mozis, Devid, le Jɔn a?

²¹ Doraa i nyɔɔnɛ kpɛdumɛ zuurabahtɔ̄ pya nama nɛɛ ama lo egbaɛ̄tɔ̄loo Jɛhova. Lo sɔ̄ i kiisī leere kaāna bu dɛ̄dɛɛ̄ nu i doo. I gaa le ɛrɛ dum le “nyɔɔnyɔɔ dee,” aiī, dum a naa tah! (Deut 30:20) E i ɛrɛ ɛɛbu sɔ̄ i doo nu a nia i wereloo Tɛ a le li bunyɔɔ, lo a wee doo ye yii mmɛnɛ bu sīdee ii ɛmadɛɛ̄.—Ɛfɛs 3:20.