EKƆ A wee a’agabah loo enɔnu sa ɛrɛ ekpɛloo aāloo ni? A wee siraloo dɛ̄dɛɛ̄ ii pio sɔ̄. Mɛ naa kɛɛrɛbu loo pio nu i wee doo, lo a le doodoo bira maā. Log nu wee i sunage sɔ̄ le epiaga bah, mɛ i wee ɛrɛ iinaloo sɔ̄ i e’saa! Enɔānu Baibol dap lu esu dooreloo iinaloo loo bira maā wee nɛ nɛɛ “tɛ̄maloo maā gbaāloo bee ue.” (Ɛfɛs 5:26) kɛɛrɛbu loo pio lɛra ekɛɛrɛ a i dap yerebah nɛ:

• Sere sɔ̄ loo. Nɔ Baibol nyɔɔ o loo le yɛɛ “nu a lee kaāna” Pya Nɛɛ Kraist naale e’ɛp tɛrɛ. (Fil 1:10) Nu eyerebah a nɛ lokwa oo ibere sɔ̄ o bee sere, ɛm lo biradee le sɔ̄ o su nɔānu nyɔɔ eba kpa serekɛ̄ ewaɛbah emuɛ. Ale o doo kɔ o fon a nyɛŋia a bu lɛɛ sɔ̄ o enɔānu elee.

• Kɛɛrɛbu loo nu eyerebah a nɛ. A wee a waɛbah lo esere ekɛɛrɛ nyɔɔnu nyɔɔnyɔɔ sɔ̄ ale nwiīgbaragbara sɔ̄ ni? O suā o kɛ̄tɔɔ̄ leere. Nyɔɔwo nɔɔ sɔ̄ o enɔānu kiiloo pya nu ama. Lo a naa taɛ a lo enɔnu sɔ̄ o bee sere, ena anua oo nɔɔ lo enɔ kere aba lop minit a? Tɛ̄maloo enɔnu bu nwī keresɔ̄ doo wo, o dap ɛrɛ gbɛnɛ-edo biī aāloo ee kɛ̄ o bee kɛɛrɛ doo. E aba sɔ̄ o bɔātɛ̄, e zū a kɔ o kiisī lo enɔnu.—Fil 2:13.

• Sagɛ ekobee ue o nɔnu nyɔɔ serekɛ̄. Lo a le i ɛŋɛtɛ̄kɛ̄ sa bɔātɛ̄ ekɛɛrɛ nu i nɔnu nyɔɔ, ii le edap “su [i] sɔ̄ leere” (Ɛfɛs 5:16) Ena anua oo su pya kpa ale ekobee ue o nɔnu nyɔɔ serekɛ̄ a? Ɛrɛgebah ebip o ɛrɛ, o dap ɛm serekɛ̄. Sɔ̄ o enɔānu sa ziī ziī biradee, o dap su pya dɔɔ̄na ekɛɛrɛ o ɛrɛ ama yereloo nu o nɔnu nyɔɔ dɔɔ̄na sɔ̄.

• Kwabahloo nu alu ebɛɛ̄. Piiga lo ekwabahloo o nɔɔnɔɔnu, doodoo bua sɔ̄ o wee su nɔānu, ale ekobee ue o sagɛ lo enɔ. Naale nu a kuī na—sɔ̄ o sagɛ lo enɔnu, buā sɔ̄ o su nɔā, ale nu o nɔ—mɛ kɛ̄ i kiisī lo enɔnu doo.

Bu kaka i wee ɛrɛ biī aāloo sɔ̄ i nɔnu dɛ̄dɛɛ̄ sɔ̄. I tɔɔ̄ waɛloo Jɛhova, i nɔ lo esu suānu daānu, sa ɛrɛ iinaloo.—Josh 1:8.