1-2. Ena alu “le tam” pya kanɛɛ gaa si a?

 Lo a le o gaa si tam doodoo nɛɛ yerebah tam, o dap le gaa piiga kaāna lo e’ɛrɛ pya elap dogo alu egbī a aābah lokwa o lu nɛɛ kanɛɛ. E niage a lo esi “le tam” pya kanɛɛ gaa si ni”?—1 Tim. 3:1.

² Ena alu tam nɛɛ kanɛɛ a? A su zaāsī bu tam zue uwe, si e’aga tam le e’tɔgɛnu le lo eyere mɛm loo pya dɔɔ̄na, le lo edoo kɔ bɔŋanaloo a nyim kiīsī tɛ̄maloo ye ekɔaue le le edobah. A ɛrɛ gbɛnɛ-edo nu anua Baibol kure pya kanɛɛ a gaa si e’aga tam bu bɔŋanaloo “pya dɔɔ̄nu bu nɛɛ.”—Ɛfɛs 4:8.

3. Bu mɛ sīdee na wuga nɛɛdam edap nyim tura lo elu nɛɛ kanɛɛ a? (1 Timɔti 3:1-7; Taitɔs 1:5-9)

³ Bu mɛ sīdee na o dap nyim tura lo esitam doodoo nɛɛ kanɛɛ a? Naale bahtam nɛɛ ɛrɛ na a doo kɔ nɛɛ a nyim tura lu nɛɛ kanɛɛ a. Lɛɛ o gaa le ɛrɛ ziī tam bu nyɔuwe, a wee kura kɔ o ɛrɛ bahtam nɛɛ esu a loo tam gaa gbī. Bu kiiyasī, lo a le o gbī elu nɛɛ kanɛɛ naale aba bee o lu nɛɛ a para zue uwe le tɔgɛnu. Alu ebɛɛ̄ kɔ o nyim tura dɛɛ̄ nu kpa 1 Timɔti 3:1-7 le Taitɔs 1:5-9. (Buū.) kɔ lo elu nɛɛ kanɛɛ. Ekobee ue ama gaa le kɔ taa kpog bee nu alu e’ɛmadɛɛ̄ aābah pya kanɛɛ: ɛrɛ le bee aābah pya a le bu bɔŋanaloo le pya a naale bu bɔŋanaloo, sere le edobah doodoo tɛ bee tɔ, le su ɛɛbu siātam bu bɔŋanaloo.

 ƐRƐ LE BEE

4. Ena akura lo elu “nɛɛ ba naa dap kɔ gbee” a?

⁴ Lo elu nɛɛ kanɛɛ, o ɛrɛ elu “nɛɛ ba naa dap kɔ gbee,” lo a le, ɛrɛ le bee bu bɔŋanaloo nyɔnɛbee o le elap. Gbaāloowo, o ɛrɛ “le ekeebee aābah pya a le ee.” Pya a naa yira dap gbɛ nu o yira doodoo Nɛɛ Kraist, mɛ a naa lee kɔ ba a ɛrɛ kaāna nu anua ba gaa a dɛrɛ ue. (Dan 6:4, 5) Bip aba ɔɔ kɔ, ‘m ɛrɛge le bee bu bɔŋanaloo le yɛɛ pya a le ee ni?’

5. Bu mɛ sīdee na o tɔgɛ kɔ o lu “nɛɛ a wereloo le nu” a?

⁵ Lo a le o lu “nɛɛ a wereloo le nu” o ɛp le nu a le bu pya dɔɔ̄na sa wa ka loo wa le le elap. O ɛrɛnage ɛɛbu lo edoo le nɛ pya dɔɔ̄na, emanyɔɔ kɛ̄ alu e’ɛmadɛɛ̄ a aābah doo. (1 Tɛs 2:8; Taitɔs 1:8.) Ena anua elap ama lu ebɛɛ̄ nɛ pya kanɛɛ a? Nyɔnɛbee esu gbɛnɛ-edo ye sɔ̄ su yea mɛm loo pya wuga sa kuūdɛɛ̄loo pya dɔɔ̄na tam bu bɔŋanaloo. (1 Pit 5:1-3) Kereadoo pya lo tam kuī, a ɛrɛ gbɛnɛ ɛɛbu aāloo esi tam sa yerebah nɛ pya dɔɔ̄na.—Doonu 20:35.

6. Ena akura lo e “aara saanɛɛ” a? (Hibru 13:2, 16; ɛpnage foto.)

⁶ O tɔgɛ kɔ o lu nɛɛ a “ɛp saanɛɛ leere” sɔ̄ o doo le nu loo pya dɔɔ̄na, gbaāloo pya a naa tɔɔ̄ a waɛloo. (1 Pit 4:9) Ziī kpa baatɛ̄ nɛɛ a para aara saanɛɛ kɔ: “Nɛɛ a para aara saanɛɛ lu fɛgɛ loo dɛ̄dɛɛ̄ nɛɛ kere pya nɛɛ a naa suā loo sa wa kue nua ye tɔ bu ɛɛbu.” Bip aba ɔɔ kɔ, ‘Ekɔ pya nɛɛ ɛpge mɛ nua nɛɛ apara aara saanɛɛ ni?’ (Buū Pya Hibru 13:2, 16.) Nɛɛ a para aara saanɛɛ wee dɔɔ̄ nu a ɛrɛ nɛ pya dɔɔ̄na, bu edobah, wee lu fɛgɛ loo pya kporo, pya a aa dɔɔ̄na bɔŋanaloo lu wee nɛ ekɔaue bu wa bɔŋanaloo, le pya dɔɔ̄na ba gaa si e’aga tam lo eyere mɛm loo pya wuga nɛɛdam le nɛɛwa bu bɔŋanaloo doodoo pya kuūdɛɛ̄loo sɛkiut.—Jɛn 18:2-8; Kam 3:27; Luk 14:13, 14; Doonu 16:15; Rom 12:13.

7. Bu mɛ sīdee na nɛɛ kanɛɛ etɔgɛ kɔ a “naa lu nɛɛ a wereloo kpugi” a?

⁷ “Nɛɛ a naa wereloo kpugi.” Lo ama kura kɔ oo sere ekɛɛrɛ nyɔɔ kponia  zɔ. Kereadoo o lu mɛnɛ ale o lu kporo, taāŋabah Jɛhova alu gbɛnɛ nu bu o dum. (Mat 6:33) Su o sɔ̄, mɛm, le pya dɔɔ̄na nu o ɛrɛ su taāŋabah Jɛhova, sa kuūdɛɛ̄loo pya o bu tɔ, sa sitam bu bɔŋanaloo. (Mat 6:24; 1 Jɔn 2:15-17) Bip o loo kɔ: ‘M wee ɛp kpugi doodoo wa ni? Nu m ɛrɛ gbɔmɛge mɛ loo ni? Ale m wee gbī e’ɛrɛ gbɛnɛ-edo kpugi le zɔ ni?’—1 Tim 6:6, 17-19.

8. Pio amunu sīdee na o tɔgɛ kɔ o “kuūnadɛɛ̄ bu dogo” sa “aa o loo” a?

⁸ Lo a le o lu “nɛɛ buā bee” le “nɛɛ a aa ye loo,” o lu nɛɛ a kuūnadɛɛ̄ bu dɛ̄dɛɛ̄ o sīdee tɔɔ̄dum. Bu edobah, oo lu nɛɛ gbɛnɛ de, nɛɛ a ɔ̄ miī gbɛnɛ, nɛɛ a yaanu sa sere zia leere, sa sagɛ leere pya nu o ɛā ekpeloo. Oo nɔ sīdee yaanu pya nyɔuwe ba naa gaa taāŋabah Jɛhova. (Luk 21:34; Jem 4:4) Oo le edoo dogo bu sīdee a naa lee kere pya nɛɛ naa aara a leere. O lu “nɛɛ a naa ɔ̄ miī tɛā dɛɛ̄”; e pya nɛɛ naale esuā a loo doodoo nɛɛ a wee ɔ̄ miī gbɛnɛ. Bip aba ɔɔ kɔ, ‘Sīdee m tɔɔ̄dum tɔgɛge kɔ m lu nɛɛ a kuūnadɛɛ̄ bu dogo sa aa na loo ni?’

9. Ena akura “nɛɛ ye ekɛɛrɛ mma” le “nɛɛ ye dogo bɔloo” a?

⁹ Lo o lu “nɛɛ ye ekɛɛrɛ mma,” o aabahloo taāŋa dɛɛa nyɔɔ daakuu Baibol. O kɛɛrɛbu loo pya daakuu ama, eyerebah a nɛ kɔ o dābeeloo sa biaɛ nu fii leere. Oo le ebiaɛfii nu bu sīdee a naa lee. Taāwo, o dasī dābeeloo leere kɔ o ɛrɛ dɛ̄dɛɛ̄ yereue alu ebɛɛ̄ kɔ o ɛrɛ. (Kam 18:13) Nu esira aabu na bee, o biaɛfii egbaaloo ekɛɛrɛ Jɛhova. Lo o lu “nɛɛ ye dogo bɔloo,” o nɔnu leere sa nwaabah doo. Ba esuā a loo nua nɛɛ a bɔloo edɛrɛ nyiɛ nyɔɔ sa nyɔɔnɛ leredeebah. Pya elap dogo ama edoo kɔ o ɛrɛ le bee. Doraa i naa kɔnia kɛ̄ i dap nyim tura pya daakuu Baibol lo esere le edobah doodoo tɛ bee tɔ.

SERE LE EDOBAH DOODOO TƐ BEE TƆ

10. Bu mɛ sīdee na dam elu “nɛɛ a para e’aara ye tɔ” leere a?

¹⁰ Lo o e’ira wa sa o gbī elu nɛɛ kanɛɛ, alunage ebɛɛ̄ kɔ pya o tɔ a sere le edobah nɛ pya dɔɔ̄na. Nyɔɔwo, alu ebɛɛ̄ kɔ o lu “nɛɛ a para e’aara ye tɔ.” Alu ebɛɛ̄ kɔ o kuudɛɛ̄loo pya o butɔ bu wereloo sa biaɛnu fii leere nɛ pya o butɔ. Lo ama kura kɔ o su zaāsī bu dɛ̄dɛɛ̄ sīdee taāŋabah. Ena anua lo ama kuī a? Nɛɛ lɛɛratam Pɔɔl bee kɔ: “Nyɔnɛbee lo a le nɛɛ naa para e’aara ye tɔ etɛɛ̄ doodoo wa ɛp bɔŋanaloo Bari leere ni?”—1 Tim 3:5.

11-12. Bu mɛ sīdee na dogo pya a le o tɔ e’ɛrɛ a pah nyɔɔ a? (Ɛpnage foto.)

¹¹ Lo a le o lu tɛ, pya o gbagbara miɔŋɔ ɛrɛ elu “pya a [a] tɔɔ̄ kɛɛ̄ sa [a] gbaɛ̄tɔ̄ bu dɛ̄dɛɛ̄ sīdee.” Alu ebɛɛ̄ kɔ o tɔgɛ wa nu sa wa kpɔā bu wereloo. Kerewo, doodoo pya miɔŋɔ, ekpe wa loo ekɛgɛ mɔm sa bira bii. Mɛ lo o kpɔā wa leere, ba elu pya a gbaɛ̄tɔ̄loo, ɛrɛ enwadɛɛ̄, sa tɔɔ̄dum a lee. Gbanageloo wo, o piiga lo yerebah nɛ pya o miɔŋɔ kɔ ba a ɛrɛ le gbānialoo kiikɛ̄ Jɛhova le, tɔɔ̄dum a dɛɛa nyɔɔ daakuu Baibol sa nyim kiisī lo ekiīloo nɛ sa liamaā.

¹² “Ɛrɛ gbo miɔŋɔ a yira, a naa tɔɔ̄tɔɔ̄ dum pe, naale pya lo a naa yira etɔɔ̄ kɛɛ̄ lok.” Lo a le ziī nwiī eliamaā a le o tɔ si gbɛnɛ pɔrɔ, lo ama e’ɛrɛ pah nyɔɔ tɛ bee tɔ doodoo wa ni? Lo a le tɛ bee tɔ naa nɛ zuurabahtɔ̄ a bɔloo, bu kaka naale  enyim tura lo elu nɛɛ kanɛɛ.—Ɛp October 15, 1996, issue of The Watchtower, p. 21, pars. 6-7.

KUŪDƐƐ̄LOO BƆŊANALOO

13. Bu mɛ sīdee na o tɔgɛ kɔ o lu nɛɛ a ɛrɛ “le beenyiɛ,” sa “naa ɛrɛ e’aga ekobee” a?

¹³ Pya wuga nɛɛdam a ɛrɛ elap dogo Nɛɛ Kraist ba lu yerebah nɛ bɔŋanaloo. Nɛɛ a ɛrɛ “le beenyiɛ” wee piiga lo esere efɛɛloo. Lo a le o gbī kɔ alu esuā a loo nua nɛɛ a ɛrɛ le beenyiɛ, gbaɛ̄tɔ̄loo pya dɔɔ̄na sa suā kɛ̄ nu wa tɔɔ̄loo doo. Bie zɔ̄zɔ̄ŋia pya kanɛɛ, eniage a enyɔɔnɛ biaɛfii gbɛnɛ-edo nɛɛ yerekpotɛ̄ a naa gbee daakuu Baibol ni? “Naa ɛrɛ e’aga ekobee” nu akura na kɔ oo le kɔ pya dɔɔ̄na a doo nu dookɛ̄ o gbī doo. O tɔgɛ nia loo ekɛɛrɛ pya dɔɔ̄na. (Jɛn 13:8, 9; Kam 15:22) O lu “nɛɛ a naa bebe” ale “naa nwaba ɛrɛ biirabu.” Taā o lu nɛɛ a agabah sa amkɛ̄, o lu nɛɛ a fɛɛrɛloo sa lu fɛgɛ loo pya nɛɛ. Doodoo nɛɛ efɛɛrɛloo o piiga lo enyɔɔnɛ pya dɔɔ̄na tɔɔ̄bu efɛɛloo, keresɔ̄ kɛ̄tɔɔ̄ aga. (Jem 3:17, 18) O efɛɛloo ture ue edoo kɔ pya nɛɛ aa ɛrɛ biirabu, kere pya nɛɛ a gbānasī nu i yira.—Biaɛ 8:1-3; Kam 20:3; 25:15; Mat 5:23, 24.

14. Ena akura “naale aā nɛɛ bu bɔŋanaloo” le “nɛɛ a nwadɛɛ̄ nu kaɛ” a?

¹⁴ Wuga nɛɛdam a nyim tura lo elu nɛɛ kanɛɛ “naale aā nɛɛ bu bɔŋanaloo.” O gbī sɔ̄ lo elu Nɛɛ Kraist enyima tura, lo ama naa kura kɔ gbɛnɛ-edo zua ɛrɛ etɛɛ̄ sɔ̄ o eliamaā sah. Lɛɛ a gae lu etube abahloo nua nɛɛ kanɛɛ, o ɛrɛ etɔgɛ elap dogo doodoo Jizɔs, o kumalookɛ̄ sa tɔɔ̄baɛ ɛrɛgebah tam Jɛhova enɛ a. (Mat 20:23; Fail 2:5-8) O tɔgɛ kɔ o lu “nɛɛ a nwadɛɛ̄ nu kaɛ” tɛ̄maloo egbaɛ̄tɔ̄loo Jɛhova le ye daakuu kaāna dogo sa nyɔɔnɛ leredeebah a i nɛ tɛ̄maloo ye bɔŋanaloo.—1 Tim 4:15.

15. Ekɔ nɛɛ kanɛɛ ɛrɛ elu nɛɛ a para nɛ ekɔaue taɛkɛ̄ gbɛnɛ ni, naa baatɛ̄?

 ¹⁵ Kpa Kaɛ baatɛ̄ leere kɔ nɛɛ a ɛp bɔŋanaloo ɛrɛ elu “nɛɛ a para tɔgɛnu.” Ekɔ lo ama kura kɔ o ɛrɛ elu nɛɛ a para nɛ ekɔaue taɛ kɛ̄ gbɛnɛ ni? Eeye. Nyɔnɛbee gbɛnɛ-edo nɛɛ a nyim tura lo elu nɛɛ kanɛɛ, naa para nɛ ekɔaue, tɔgɛnu bie uwe zue ue ale para yere mɛm loo nɛɛ. (1 Timɔti 3:2; dooreloo 1 Pya Kɔrint 12:28, 29 le Ɛfɛsɔs 4:11.) Kereadoo a naa lu ebɛɛ̄ kɔ o para nɛ ekɔaue gbɛnɛ, mɛ o kiisī lo enɔ kɛ̄ elu nɛɛ a para tɔgɛnu doo. Bu mɛ sīdee na o dap lu nɛɛ a para tɔgɛnu a?

16. O doodoo wa lokwa o para tɔgɛnu yere loo ni? (Ɛpnage foto.)

¹⁶ “Nɛɛ a aa ue a bɔloo eture niyɛ loo.” Lo elu nɛɛ a para tɔgɛnu, doo kɔ o tɔgɛnu le zuurabahtɔ̄ o nɛ pya wuga nɛɛdam le nɛɛwa a dɛɛa nyɔɔ Muɛ̄ Ue Bari. Kɛ̄ edoo lo ama doo, o ɛrɛ enɔ Baibol le pya i kpa leere. (Kam 15:28; 16:23; Taitɔs 1:9.) Sɔ̄ o gaa nɔnu, gbaɛ̄tɔ̄loo leere kɛ̄ pya i kpa baatɛ̄ dɔ Baibol doo lokwa o dap su daānu bu sīdee a bɔloo. Esɔ̄ o gaa tɔgɛnu, piiga lo eyerebah nɛ pya nɛɛ kɔ ba a wereloo Jɛhova, sa wa zū kɔ ba a su nu ba nɔ yerebu dogo. O dap para etɔgɛnu lo a le o bip sa nyɔɔnɛ zuuratɔ̄bah a aabah pya kanɛɛ a para tɔgɛnu. (1 Tim 5:17) Alu ebɛɛ̄ kɔ pya kanɛɛ “a . . . zuurabahtɔ̄” pya wa wuga nɛɛdam le nɛɛwa. Kerewo, pio sɔ̄ pya kanɛɛ “esu pɔrɔ . . . [pya wuga wa] kɔ si.” Ɛrɛgebah kɛ̄ a le doo, pya kanɛɛ ɛrɛ edoo wo bu fɛgɛ dɛ̄dɛɛ̄ sɔ̄. Lo a le o lu fɛgɛ, tɔgɛ wereloo sa o tɔgɛnu dɛɛa nyɔɔ Muɛ̄ Ue Bari, o para tɔgɛnu nyɔnɛbee o nɔ lo Gbɛnɛ Nɛɛ Tɔgɛnu lo a le Jizɔs.—Mat 11:28-30; 2 Tim 2:24.

 KIISĪ LO EPIIGA

17. (a) Ena edap yerebah nɛ pya yerebahtam kɔ ba a kiisī lo epiiga lokwa ba lu nɛɛ kanɛɛ a? (b) Ena pya kanɛɛ e’ɛp sɔ̄ ba gaa gbī etubebahloo ziī wuga nɛɛdam a? (Ɛp ekpo akura, “ Suaa Suānu Daānu Sɔ̄ Bui Gaa Ɛp Lo A Le Ziī Wuga Nɛɛdam Dap Lu Etube Ye Bahloo Nua Nɛɛ Kanɛɛ.”)

¹⁷ Sɔ̄ ba e‘ɛba nu alu egbī bah pya kanɛɛ, pio pya yerebahtam wee kɛɛrɛ kɔ ba naale edap nyim lu nɛɛ kanɛɛ. Mɛ nyɛŋiabu kɔ Jɛhova ale ye bɔŋanaloo naa ɛmadɛɛ̄ kɔ o dasī tɔgɛ pya dogo ama bu sīdee a mma. (1 Pit 2:21) E kaɛ edɔɔ̄ Jɛhova a si ekpo na eyerebah a nɛ kɔ o ɛrɛ pya elap dogo ama a. (Fail 2:13) Ekɔ a ɛrɛ ziī elap dogo lo elee kɔ o kwabahloo ni? Yere kara nɛ Jɛhova wa kumaloo. Gbītɛ̄nu nyɔɔ lo elap dogo, sa kɔ nɛ ziī nɛɛ kanɛɛ kɔ a dobah kɛ̄ o kwabahloo doo.

18. Ena alu eyere mɛm loo dɛ̄dɛɛ̄ pya yerebahtam kɔ ba a doo a?

¹⁸ Doolo dɛ̄dɛɛ̄ ii gbaāloo pya kanɛɛ, kiisī lo enɔ pya elap dogo alu ekɔ bu ekobee ue ama. (Fail 3:16) Ekɔ o lu nɛɛ yerebahtam ni? Piiga lokwa o nyim tura lo esitam nɛ pya o wuga! Bara Jɛhova kɔ a kpɔā a sa a kwabahloo lokwa o dap sitam bu bɔŋanaloo sa ye taāŋabah leere. (Ais 64:8) Doolo Jɛhova nɛ leelee o epiiga lo enyim tura lo elu nɛɛ kanɛɛ.