E na anua Jizɔs bee kɔ ue a le bu Le-yɔɔ 22:1 lɛɛ a gae u a?

Ziī yɛɛ pya ue Jizɔs bee kɔ lɛɛ a gae u na lo a le bu kpa Matiu 27:46 le kpa Maak 15:34 lo a kɔ: “Na Bari, na Bari, e na o mɛ bie aba am loo a?” Tɛ̄maloo ekɔ ue ama, Jizɔs bee doo gbɔ̄mɛɛ ue nɛɛ uɛ le-yɔɔ Devid alu e’ɛm bu kpa Le-yɔɔ 22:1. Elu ekwɔ lo i kɔ kpaā kɔ Jizɔs bee kɔ pya ue ama nyɔɔbee a kɛɛrɛ kɔ elua elɔgarae ye, ale kɔ a bee peere ye yira bu lo kere sɔ̄. Jizɔs bee dābeeloo taɛ nu anua alu ebɛɛ̄ kɔ a u, e a bee kpɛ̄naloo lo edoo wo. (Mat 16:21; 20:28) A bee suānage kɔ sɔ̄ esaa e’u Jɛhova elɛɛ ye ‘nu kpega’ loo. (Job 1:10) Nyɔɔwo, Jɛhova bee lɛɛbaloo Jizɔs kɔ a tɔgɛ kɔ ebɔeloo ture nyiɛ loo mmɛ kɛ̄ kaɛlɛɛ kɛ̄ ye luh aga doo.—Maak 14:35, 36.

Nyɔɔwo, e na anua Jizɔs bee kɔ ue a le bu kpa le-yɔɔ ama a? Kereadoo ii aa dee suā leere, doo i naa kɛɛrɛ pio nu a bee dap nua. *

Lege nu Jizɔs aa bee kɔ na bee Jɛhova naale eyereebah ye nɛ sɔ̄ esaa e’u ni? Bee lu ebɛɛ̄ kɔ Jizɔs a waara zɔɔ lo e’agara pya nɛɛ kere Jɛhova naa yerebah ye nɛ. A bee ɛrɛ ezialoo doodoo nɛɛ sa bee lu ebɛɛ̄ kɔ a u lokwa a “daa edɛm loo luh nyɔɔ dɛ̄dɛɛ̄ nɛɛ.”—Hib 2:9.

Tɛ̄maloo ekɔ pio ue a le bu kpa le-yɔɔ ama, ekɔ a bee gbī kɔ pya nɛɛ a kɛɛrɛbu dɛ̄dɛɛ̄ ue a le bu kpa le-yɔɔ ni? Alu nu a  wee le lo sɔ̄ kɔ pya Juu wee aa pio dɔ a le bu kpa le-yɔɔ biea bee wa. Sɔ̄ ba dā ziī dɔ a aabu kpa le-yɔɔ, aba lo sɔ̄ ba wee nwaabah kɛɛrɛbu pya nu a legara dɔɔ̄na dɔ bu kpa le-yɔɔ. Lo a le nu Jizɔs aa bee kɛɛrɛ lo, o suā kɔ a bee gbī eyerebah nɛ pya a wee ye nyɔɔnɛ dumɛ ba lu pya Juu kɔ ba a nyɛŋiabu gbɛnɛ-edo mɔmanudɛɛ̄ a le bu kpa le-yɔɔ a kɔ nu akiiloo ye luh. (Yɔɔ 22:7, 8, 15, 16, 18, 24) Gbaāloo wo, pya kpɛdumɛ barakpaɛ̄ a le lo dɔ kpa le-yɔɔ leera Jɛhova kɔ alɛ na mɛnɛ a bɛɛ dɛ̄dɛɛ̄ nyɔuwe a.—Yɔɔ 22:27-31.

Sɔ̄ Jizɔs bee kɔ ue Devid bee kɔ ama, lege nu aa bee kɔ na bee ue naa bee ye ni? Lɛɛ a elu efɛ Jizɔs, a bee egerebu sɔ̄ alu ebiaɛ ye bege bu elɔ sīdee kɔ a kɔ Bari gbee. (Mat 26:​65, 66) Ba bee nwaabah biaɛ lo ue taɛ pie edɛɛ̄ lo a naa gbaaloo lok a wee le kɛ̄. (Mat 26:59; Maak 14:56-59) Tɛ̄maloo ekɔ pya ue a le bu kpa Le-yɔɔ 22:​1, a bee le doodoo bee Jizɔs gaa kɔ, “Na Bari, na Bari, e na o mɛ bie aba am loo sɔ̄ mm doo lɔgɔ pɔrɔ nu a?” Nyɔɔwo, dap lu kɔ Jizɔs aa bee doo kɔ ba a suā kɔ a naa dooe lɔgɔ pɔrɔ nu.

Ekɔ Jizɔs aa bee dooge kɔ pya dɔɔ̄na a kɛɛrɛ kɔ nu anua a bee lu elɛɛbaloo Devid a bee ɛm lo yɔɔ ama kɔ a tɔga na bee a bee peere ewonu a aabah Jɛhova ni? Ebip Devid bee bip ama naa tɔgɛ kɔ a naa bee ɛrɛna yira. Sɔ̄ ebiba lo ebip sah, a bee bɔātɛ̄ ekɔ kɛ̄ a ture nyiɛ loo ekpo kpɔā Jɛhova doo, e Jɛhova bee kiisī lo enɛ ye leelee. (Yɔɔ 22:23, 24, 27) Bu aba lo sīdee, kereadoo Jizɔs alu “Nwiī Devid” bee tɔga bie nyɔɔ te tɔga, Jɛhova bee kiisī lo eyere ye kpotɛ̄.—Mat 21:9.

Lua Jizɔs aa bee tɔgɛ ekiɛ̄nu nyɔɔbee Jɛhova bee ye lɛɛbaloo kɔ a tɔgɛ ye kaāna yira mmɛ kɛ̄ ni? Aā bɔātɛ̄, Jɛhova naa bee nɔɔ kɔ ye Nwiīnɛɛdam a tɔga sa u. Lo ama bee lu ebɛɛ̄ aā sɔ̄ Adam le Iv bee lɛɛbeekɛɛ̄. Jizɔs naa bee doo lɔgɔ pɔrɔ nu, mɛ a bee lu ebɛɛ̄ kɔ a tɔga sa u lokwa a dap tɔgɛ kɔ Setan kɔ esah, sa nɛ waara zɔɔ a’agara a bee lu ebɛɛ̄ lokwa a dap obara nu Adam ebee peere sere dɔ. (Maak 8:31; 1 Pit 2:21-24) Aba nu a dap doo kɔ lo ama a waɛ na lo a le Jɛhova lɛɛ ye kpega loo Jizɔs bu ziī nwī sɔ̄, e lo ama na tua sɔ̄ edoo wo a.

Ekɔ Jizɔs aa bee gbī kɔ pya a wee ye nyɔɔnɛ dumɛ a bie ekɛɛrɛ nyɔɔ nu anua Jɛhova lɛɛ ye baloo kɔ a u bu lo sīdee ama ni? * Jizɔs bee suā kɔ fɛfɛ ye nyɔɔ te tɔga doodoo nɛɛ bag dogo edoo kɔ gbɛnɛ-edo nɛɛ a dɔ daa zaɛ̄. (1 Kɔr 1:23) Lo pya a wee ye nyɔɔnɛ dumɛ bie ekɛɛrɛ nyɔɔ taɛ nu anua a bee u, ba edābeeloo nu lo ama kura. (Gal 3:13, 14) Lo sɔ̄ ba e’ɛp ye nua wa nɛɛ kpɔā e a naale nɛɛ bag dogo.

Kaɛlɛɛ nu anua Jizɔs kɔ pya ue ama, a bee suā kɔ nu aa bee doo bee le nu Jɛhova gbī kɔ a doo. Nwīgbagbara sɔ̄ sɔ̄ Jizɔs ekɔa ue a le bu kpa le-yɔɔ sah, a bee kɔ: “Etaa.” (Jɔn 19:30; Luk 22:37) Bu kaka, nyɔɔbee Jɛhova lɛɛ ye kpega loo Jizɔs bu nwīkere sɔ̄ a, bee doo kɔ a dap doo gbɔ̄mɛɛ̄ nu a bee ye yere nua nyɔuwe lo edoo. A doonage kɔ a dap doo mmɛnɛ dɛ̄dɛɛ̄ nu a bee lu e’ɛm ye “kumaloo bu lok Moses le pya zue ue le Le-yɔɔ.”—Luk 24:44.