Alu nu ekiɛ̄nu kɔ sɔ̄ m ebee lu lop le taa zua, na gbanialoo kii kɛ̄ Jɛhova le bee bɔātɛ̄ e’ɔloo. Bee mɛ tɔɔ̄loo kɔ pya na gbo tɔkpa ɛrɛ wa loo, sa m bee gbī ebee wa. Tɔɔ̄ kɛɛ̄ lok na tɛ le ka le nyɔɔnɛ daakuu tɔɔ̄dum pya Nɛɛ Kraist bee lu dumɛ toh, e m bee ɛp kɔ taāŋabah Jɛhova lu e’aga tam. Kere m yiga kɔ Jɛhova le, m bee bɔātɛ̄ e’ɔloo bu yira.

Kerewo, mm bee biewo zue ue lokwa m kiigesī lo elɛa kpɛatam bah kere a tera. Nyɔɔbee mm wee kpɛ̄naloo sɔ̄ m si uwe zue ue a, wee doo kɔ bɔātɛ̄ ekɔaue a aga mɛ loo. Wo doo kɔ m aa dapna ɛrɛ pya nɛɛ m obia si loo ale sere enɔānu Baibol, sa si uwe zue ue naa wee mɛ kpeloo e adoo kɔ aa mɛ nia na. M wee bip aba mm kɔ: ‘E na anua nɛɛ ekiisī lo ezue ue dɛ̄dɛɛ̄ kaɛ le dɛ̄dɛɛ̄ enɔɔ̄ ani?’

Sɔ̄ m elua 17 zua, m bee gbī etɔɔ̄ nyɔɔ na loo. Nyɔɔwo m bee lab nu aa be sa kii Australia. A bee kiɛ̄ na tɛ le ka sɔ̄ ba muɛ̄ kɔ m gaa aa be. A bee wa taāŋɛ, mɛ ba bee kɛɛrɛ kɔ m kiisī lo etaāŋabah Jɛhova.

 Na kɛ̄tɔɔ̄ bu edɔɔ̄ bee sikɛ̄ gbedɛɛ̄ bie Australia. M bee bɔātɛ̄ lɔɛ enɔānu. M bee bɔātɛ̄ eyii gbo pya zege ba wee sinage enɔānu bee mda, sa ba sinage wee ɔ̄ miī sa yeb yeb bie klɔb uunɛ. Sɔ̄ m sikɛ̄ kɛɛrɛbu, m bee muɛ̄ kɔ ziī tɔ mɛ le bu bɔŋanaloo e ziī tɔ mɛ le bu nyɔuwe, mɛ mm bee suā taɛ lo sī m le.

Sɔ̄ baɛ zua etɛ̄na, m bee zɔ̄ŋia ziī wuga nɛɛwa a bee doo kɔ m kɛɛrɛbu kɛ̄ m aa tɔɔ̄dum doo sɔ̄ a naa suā. Bee le o’oo ii pya wuga nɛɛwa i bee tɔɔ̄ aba tɔ, e i bee kue nɛɛ kuūdɛɛ̄loo sɛkiut le ye wa Tamara, kɔ ba a tɔɔ̄ i tɔ loo ziī kaɛ. Sɔ̄ ye dam aa kuūdɛɛ̄loo nu a kuu bɔŋanaloo, Tamara bee su lo sɔ̄ i tɔ̄ma kpaɛ̄ sa i nyɔɔnɛ kɛgɛ mɔm. Lo ama bee mɛ nia kaāna. A bee dābeeloo i kɛ̄tɔɔ̄ leere e a bee waɛ enyɔɔnɛ ye kɔnia ue. A bee mɛ ɔbɛ kɔ nɛɛ nu bu edɔɔ̄ kuī loo doo wo dapnage ɛrɛ sɔ̄ ebiā bii.

Tamara bee lu nɛɛ a ɛrɛ mɛm. Kɛ̄ a wereloo kaka ue le tam zue ue doo lu lo a yee. A bee le aa ɛrɛ ɛɛbu bu si tam kaāna nɛ Jɛhova, mɛ bu mɛ naa bee ɛɛ nyɔɔbee mm dap doo wo. Ye le elap dogo le kaāna ɛɛbu a ɛrɛ bee ɛrɛ le pah nyɔɔ na dum. Ye edoba bee doo kɔ m kɛɛrɛbu ziī kpog-bee kaka ue a le bu kpa Kaɛ a kɔ: Alu nia Jɛhova kɔ dɛ̄dɛɛ̄ ii i si tam ye nɛ “tɛ̄maloo ɛɛbu” le “tɛ̄maloo uɛ yɔɔ ɛɛbu.”—Yɔɔ 100:2.

M bee gbī e’ɛrɛ dua ɛɛbu Tamara ɛrɛ, mɛ alu ebɛɛ̄ kɔ m kwabaloo gbɛnɛ-edo nu bu na dum lokwa m dap ɛrɛ dua lo ɛɛbu. A bee mɛ su sɔ̄ bah, mɛ m bee bɔātɛ̄ enyaa kinakina. M bee bɔātɛ̄ ekpɛ̄naloo loo tam zue ue, sa si tam zue ue bu nwīkere sɔ̄ aā ziī sɔ̄ yii ziī. Lo ama bee mɛ yerebah nɛ kɔ m aa ɛrɛna bɔɔ sa dɛrɛ nyiɛ nyɔɔ kɔ m dabe doo leere. Kɛ̄ m kiisī lo esu Baibol daānu gbɛnɛkpo sɔ̄ bie uwe zue ue doo, kɛ̄ loo mɛ sunage kɛ̄ doolo. Sɔ̄ sɔ̄ naa binia, m bee bɔātɛ̄ esitam sɛmdee bu nwīkere sɔ̄ dɛ̄dɛɛ̄ enɔɔ̄.

M bee bɔātɛ̄ eyii gbo loo pya a gaa doo leere bu bɔŋanaloo sa ɛrɛ ɛɛbu bu wa esiatam nɛ Jɛhova kaɛlɛɛ zua ba elua. Wa le edoba yerebah mɛ nɛ kɔ m sikɛ̄ ɛp pya nu a mɛ kuī loo bu dum sa su pya nu akiiloo  taāŋabah Bari nua tuatua. M bee bɔātɛ̄ e’ɛrɛ ɛɛbu bu tam zue ue, wo bee doo kɔ m lu nɛɛ sɛmdee. Sɔ̄ gbɛnɛkpo zua etɛ̄na, m bee sikɛ̄ ɛrɛ e’agaloo, ɛrɛ ɛɛbu le ziīnɛloo bu bɔŋanaloo.

Sɔ̄ ziī zua etɛ̄na, m bee zɔ̄ŋia Alex alu fɛgɛ, sa lu kaāna nɛɛ a wereloo Jɛhova le tam zue ue. Aa bee si tam doodoo nɛɛ yerebah tam sa esiatam sɛmdee loo ini’ī zua. Alex ebee sinage tam bu nu alu ɛrɛtaa enɔɔ̄ bie kɛ̄ pya zue ue lu ebɛɛ̄ li Malawi. A bee tɔɔ̄ kpaɛ̄ pya zue ue aā ziī edo yii ziī lo ba bee sere le edoba kɛ̄ ye nɛ, e ba bee ye yere mɛm loo kɔ a su tam Buɛ̄-mɛnɛ nua tua tua bu ye dum.

Alex le mm bee iya ziī a bu zua 2003, e i gaa kiisī bu esiatam dɛ̄dɛɛ̄ sɔ̄ aāge lo sɔ̄. I enɔā edo nu, e Jɛhova enɛa i leelee bu gbɛnɛ-edo sīdee.

Bu zua 2009, bee lu ekue i kɔ i si tam doodoo pya zue ue aā ziī edo yii ziī bie Timor-Leste, ziī nwīgbagbara barasī a le kɛ̄ maā tɛɛ̄ ɛŋɛnɛ li Indonesia. A bee i ɔbɛ, i ɛɛrɛbu, sa i aarɛ nage bɔɔ aba lo sɔ̄. Sɔ̄ o’oo enɔɔ̄ etɛ̄na, i bee kii kɛ̄ alu bee kɛ̄ loo lo edo a kura Dili.

Kikii lo kɛ̄ bee doo kɔ i kwabaloo gbɛnɛkpo nu bu i dum. I bee nɔ aā sīdee doonu, muɛ̄ ue, nuede, le kɛ̄ etɔɔ̄. Gbɛnɛkpo sɔ̄ bie uwe zue ue, i wee zɔŋia pya kporo, pya ba naa si tɔkpa, le pya alu ebiinɛkɛ̄. Sa i wee muɛ̄nage pya nɛɛ ebea nɔ̄ ebie wa pah loo bu ekɛɛrɛ le bu namloo. *

Tam zue ue bee lee gbɛnɛ! Bu edoba, ɛrɛ sɔ̄ m bee zɔ̄ŋia ziī nwiīnɛɛwa elua 13 zua a  kura Maria a le bu biirabu. * Ye ka ebee u bu pio zua akii adumɛ, e a naa wee aadee muɛ ye tɛ dɛ̄dɛɛ̄ sɔ̄. Dookɛ̄ gbɛnɛ-edo gbomiɔŋɔ ba lu ye sīkoh le doo, Maria naa bee suā lɔgɔ nu edoo bu dum. M nyɛŋiabu ziī sɔ̄ a bee to sɔ̄ a gaa kɔ kɛ̄ nu ye tɔɔ̄loo doo mɛ nɛ. Kerewo, mm bee dābeeloo nu aa kɔ nyɔɔbee m sii bee para ekɔ wa muɛ̄ ue leere. M bee yere kara nɛ Jɛhova, ye bara kɔ a yerebah mɛ nɛ lokwa m ye dap yere mɛm loo, lɛɛ m bɔātɛ̄ ebuū pya dɔ kpa kaɛ a nɛ egbɔ̄nyiɛ ye nɛ. Bu pio zua a nyɔɔnɛ, m bee muɛ̄ kɛ̄ kaka ue nyaana elap dogo Maria, ye sīdee nyaanu le kɛ̄ a kwaaloo doo. A bee liamaā, e a gaa seregi enɔānu Baibol a nyaawo. Nii’ee, Maria e’ɛrɛ gbɛnɛ-edo pya wuga bu bɔŋanaloo Jɛhova sa emɔna kɔ alu eweree ye loo.

Jɛhova aa nɛ leelee esiatam li Timor-Leste. Kereadoo gbɛnɛ-edo pya zue ue ama bee liamaā bu aba lop zua akii adumɛ, gbɛnɛkpo aba aa si tam doodoo pya sɛmdee, pya yerebah tam, ale pya kanɛɛ. Pya dɔɔ̄na aa si tam bie tɔ tam tap ue, sa yerebah lo esu nuede bu edɔɔ̄ mmɛ loo pya a kɔ muɛ̄ ue lo barasī. A ɛɛrɛ mɛ bu sɔ̄ m dā sɔ̄ ba gaa uɛ yɔɔ bie enɔānu, kɛ̄ bu wa ɛɛ doo, le sɔ̄ m muɛ kɛ̄ ba aa kiisī bu edɔɔ̄ doo.

Dum li Timor-Leste bee lu kaāna kee loo kɛ̄ dum bee le doo li Australia, mɛ lo ama na kaāna dum a. Pio sɔ̄ i wee yiibu nwīgbagbara fah pya nɛɛ mma bu, gbaāloo kpɔ kagara bari le bɔp bɔp yā ee ba yaɛ̄ aā du. Pio dee i wee sere enɔānu Baibol bie nwīgbagbara tɔ a aramiā lo biɛ le mma kɛ̄ tɔ sa kɔɔ̄ le gaa teega kɛ̄. Kaɛlɛɛ pya nu finiabah ama, gbɛnɛkpo sɔ̄ m wee kɔ: ‘Dum ama lee kaāna!’

Sɔ̄ m sikɛ̄ kɛɛrɛbu sɔ̄ akii adumɛ, m doo yaa na tɛ le ka kɔ ba tɔgɛ mɛ nu akiiloo Jɛhova sa mɛ yerekpotɛ̄, kere sɔ̄ m bee ɔloo bu taāŋabah Jɛhova. M emɔna ue kpa Kam 22:6 a dooa bu na dum. Na tɛ le ka ɛɛŋa nyɔɔ Alex le mm; e bu wa ɛɛ sɔ̄ ba muɛ kɛ̄ Jɛhova aa i su siātam doo. I esiatam kuūdɛɛ̄loo sɛkiut li Australasia aāge bu zua 2016 a.

A naa waɛ eyiga kɔ tam zue ue naa bee mɛ kpeloo pio sɔ̄ akii adumɛ. Tam zue ue kpe mɛ loo anyaawo! M emɔna kɔ̄ kaɛlɛɛ nu a sira bu i dum, i ɛrɛ kaāna ɛɛbu aāloo si tam nɛ Bari aābu dɛ̄dɛɛ̄ i beenyiɛ. Bu kaka, 18 zua m enyɔɔnɛ Alex si tam nɛ Jɛhova ama, lu pya zua m e’ɛrɛ gbɛnɛ ɛɛbu bu na tɔɔ̄dum. Nyaawo na m dābeeloo kaka ue nɛɛ uɛ le yɔɔ Devid bee kɔ nɛ Jɛhova kɔ: “Dɛ̄dɛɛ̄ pya a a teera yii bu ɛɛŋa, doolo ba uɛ yɔɔ ɛɛbu dɛ̄dɛɛ̄ sɔ̄. . . . Pya a wereloo o bee ɛrɛ ɛɛbu a bu.”—Yɔɔ 5:11.