“Naa le aba kɔ Pya Ekeebee ama bee lu fɛgɛ loo pya nɛɛ, mɛ ba bee lunage fɛgɛ loo pya na gbo. A ɛrɛ dee Elaine, lo a bee le eyira kpaɛ̄ kpe yere kpa bu kigere bee dɔɔ̄ ekiā nɛ pya na gbo. Aā lo dee, ɛrɛgeba sɔ̄ i tɛɛ̄ lo kɛ̄ pya na gbo wee gbī ezuura mɛ kuma kpaɛ̄ Pya Ekeebee ama, lokwa ba wa nɛ ekiā.

“Aā ziī enɔɔ̄ yii ziī, pya na gbo wee le aa taa ekiā pya lo nɛɛ wee wa nɛ, e mda wee le aa ɛrɛ ekpeloo loo ue m bee le aa nyɔɔnɛ Pya Ekeebee ama kɔnia. Mɛ mm bee gbī eyii wa loo gbɛnɛ. M ebee yeeloo 70 zua, e m sii bee suā nu Pya Ekeebee yira. M bee kɛɛrɛ kɔ elee lo m nɔ Baibol nyɔɔ na loo, nyɔɔbee m bee muɛ kɔ nu pya tɔbari tɔgɛ naa lu kaka.

“Bu pya sɔ̄ ama, m wee le aa muɛ dɔɔ̄na Pya Ekeebee bie keekee kɛ̄ bu lo gbɛnɛ buɛ̄, lo ba lenage kpaɛ̄ kpe yere kpa bu kigere. E alaba wee yiinage loo nɛɛ kaāna. Ba wee su Baibol aŋana pya na ebip, e lo ama bee doo kɔ m agɛrɛbah wa dɛrɛ nyiɛ nyɔɔ.

“Ziī dee, Elaine bee mɛ bip kɔ: ‘O yigage kɔ keekee kanu lu dɔɔ̄nu a aabah Bari ni?’ M bee agara kɔ: ‘Aiī, m yiga kaāna!’ Lo sɔ̄, Elaine bee buū nu a le bu kpa Aisaia 11:6-9 mɛ nɛ. Nu a bee sira ama bee doo kɔ m nyaana nyiɛ, kere mm wee yiga esu wa kpa.

“Bu pya dee a nyɔɔnɛ, m bee nyɔɔnɛ Elaine le ye dam Brent kɔnia ue, e a bee mɛ kpeloo. Ba bee mɛ kɔ nɛ kɔ m dap buū Baibol aā Matiu mmɛ Doonu Pya Nɛɛ Lɛɛratam lokwa m dābeeloo nu a kura lo elu Nɛɛ Kraist. Nyɔɔwo, m bee doo wo. Sɔ̄sɔ̄ naa binia, m bee yiga kɔ Brent le Elaine a nyɔɔnɛ mɛ nɔ Baibol. Lo ama bee sira bu kunakunabah loo zua 2016.

“A wee le aa mɛ taɛ lo enɔ Baibol ziī ziī kaɛ le lo esi enɔānu bie Tɔ Nɔnu Buɛ̄-mɛnɛ. Bu mɛ bee ɛɛ lo enɔ taɛ nu a le bu Baibol. Sɔ̄ nu a bia kina alu baɛ zua etɛ̄na, m bee liamaā sa lu Nɛɛ Ekeebee Jɛhova. Nyaawo, m elua 79 zua, e m suā kɔ m emɔna kaka sīdee taāŋabah. Jɛhova enɛā mɛ leelee tɛ̄maloo edoo kɔ m le yɛɛ pya ye zooro a ye kiīloo nɛ lo ba le tɛɛ̄ ɛŋɛnɛ nyɔuwe.”