Lu ebaatɛ̄ deyii, lo pya beke kure oath nua “ue alu ekɔ agɛrɛ, kɛ̄sī pya nɛɛ ale e’agabah yii alu eyira lo edoo gbɔ̄mɛɛ nu ziī nɛɛ yira kɔ edooe, e gbɛnɛ-edo sɔ̄ a wee lu esu Bari . . . nua nɛɛ ekeebee.” A dap lu esu egā kɔā ale ɛm bu kpa.

Siga nɛɛ dap kɛɛrɛ kɔ a naa lee edeyii nyɔnɛbee Jizɔs bee kɔ: “Bui aa yira yii [deyii] lɔgɔ sɔ̄ . . . Doolo bui ue lu ‘Iī, iī,’ ale ‘Eeye, eeye’; mɛ ɛrɛgeba nu a ee pya lo nu ama lu aaloo pɔrɔ nɛɛ a.” (Mat 5:33-37) Kɛādoo, Jizɔs bee suā kɔ a ɛrɛ pio dɔ a le bu Lok Mozis lo a bee kɔ pya Izrɛl a deyii bu pio kɛ̄tɔɔ̄, e pio pya zooro Bari a bee bɔ ture nyiɛ loo bee denage yii. (Jɛn 14:22, 23; A’aa 22:10, 11) A bee suānage kɔ Jɛhova bee denage yii. (Hib 6:13-17) Nyɔɔwo, naale bee Jizɔs aa bee kɔ i aa deyii doo pippip. Taāwo, a gaa bee nɛ zuurabahtɔ̄ kɔ aalu edeyii loo nu a naa kuī ale nu alu kunɛnu. A bɔloo kɔ i ɛp dodoo pya nu i yiga kɔ i dooe nua nu a le kaɛ. I ɛrɛ edoo nu i bee yiga kɔ i dooe.

Nyɔɔwo, ena o doo lo alu ekɔ a nɛ kɔ o deyii ani? Tuatua, dasī muɛ kɔ nu o waa gbī edeyii loo lu nu o dap doo. Lo a bee kɔ oo le edap doo, elee lo oo de lo yii. Muɛ̄ Ue Bari zuura i bah tɔ̄ kɔ: “A lee kɔ oo le yira yii ee bee o yira yii sa oo kpɛ.” (Eklis 5:5) Lo dɔɔ̄na, kɛɛrɛ pya daakuu Kpa Kaɛ a ɛrɛ nu edoo kiiloo yii o gaa gbī ede a, lɛɛ o su o ekɛɛrɛ beenyiɛ daānu bu sīdee a bɔloo. Pio ena alu pya lo daakuu Kpa Kaɛ a?

Pio deyii naa be nu alu ekɛɛrɛ Bari. Bu edoba, Pya Ekeebee Jɛhova wee yira yii sɔ̄ ba aa iya ziī. Pya yii ama lu ziī sīdee deyii. Pya a gbī e’iya ziī ama wee yira yii kɛ̄sī Bari le pya nɛɛ alu ekeebee a le kɛ̄, kɔ ba ewereeloo, kuūdɛɛ̄loo, sa nwadɛɛ̄ ziī, e ba edooe wo “kuma sɔ̄ [ba] le dum.” (A dap sira kɔ pio dam le wa naa wee kɔ taɛtaɛ pya ue ama sɔ̄ ba gaa iya ziī, kerewo, ba yiranage yii kɛ̄sī Bari.) Lɛɛ alu ekɔ ba elua dam le wa, e alu e’ɛmadɛɛ̄ kɔ wa iya dam le wa ele aa kiisī kuma sɔ̄ ba lege dum. (Jɛn 2:24; 1 Kɔr 7:39) Nɔɔnɔɔnu ama lu nu a bɔloo, lee sa gbaaloo nu alu ekɛɛrɛ Bari.

Pio deyii naa gbaaloo ekɛɛrɛ Bari. Nɛɛ alu kaka Nɛɛ Kraist naale edeyii lo esu nunɔ̄ kpeŋa ye edonyɔɔ ale lo e’anna ye yira bu Bari. Dodoo wo egbee lok Bari. Pya Nɛɛ Kraist naa “le loo nyɔuwe,” nyɔɔwo ii le e’ɛrɛ bah bu bebe le pya taāŋa a gaa kiisī bu nyɔuwe.—Jɔn 15:19; Ais 2:4; Jem 1:27.

Pio deyii lu lo alu edoo dɛɛa nyɔɔ ekɛɛrɛ beenyiɛ. Pio sɔ̄, a dap lu ebɛɛ̄ kɔ i su zuurabahtɔ̄ Jizɔs ɛma yii i gaa gbī ede, lo a kɔ, “nɛa Siza lo Siza, e nɛa Bari lo Bari.”—Luk 20:25.

 Bu edoba, naa su kɔ ziī Nɛɛ Kraist aa gbī elu nwiī-kɛ̄buɛ̄ ziī edonyɔɔ ale aa gbī e’ɛrɛ kpa a wee nɛ dee nɛɛ kɔ a dap kii dɔɔ̄na edo, sa a muɛ kɔ alu egbī ye aābah kɔ a deyii lo etɔɔ̄ agara. Lo a le dedeyii bie lo edonyɔɔ ekura kɔ lo nɛɛ eyira yii lo edoo nu egbee lok Bari, lo sɔ̄ ye ekɛɛrɛ beenyiɛ elua ekpɔā tɛ̄maloo Baibol naale eyiga kɔ a doo wo. Kɛādoo, pya a gaa bɛɛ lo edo, dap ye nɛ dee kɔ a kwabaloo pya nu ekɔ sɔ̄ a gaa de dua yii a le doo wo lokwa ye ekɛɛrɛ beenyiɛ naa bege ye ue.

Sɔ̄ i deyii lo etɔɔ̄ agara lo elua ekwabaloo doo wo, a dap gbaaloo zuurabahtɔ̄ a le bu Pya Rom 13:1, lo a kɔ: “Doolo dɛ̄dɛɛ̄ nɛɛ tɔɔ̄ kɛɛ̄ pya a ɛrɛ gbɛnɛ ekpo ebɛɛ.” Nyɔɔwo, Nɛɛ Kraist dap biaɛfii kɔ a naa bee piya lo eyira yii lo edoo nu Bari gbī kɔ alu edoo.

A leenage kɔ o su o ekɛɛrɛ beenyiɛ daānu lo alu ekɔ o su ziī nu ale doo ziī nu sɔ̄ o gaa deyii. Pya Rom le pya Sitia a dee kere wee su wa gɛ̄nɔ̄ yiā yii, ba wee doo wo lo e’ɛrɛ ekpo aābah wa nwībari nɔ̄, le lo etɔgɛ kɔ a dap lu edɛrɛe wa nyiɛ nyɔɔ. Pya Grik wee dānabah nɛ nyɔɔ sɔ̄ ba aa deyii. Lo ama wee tɔgɛ kɔ ba yiga kɔ Bari aa muɛ pya nu ba gaa kɔ sa doo, le kɔ dɛ̄dɛɛ̄ nɛɛ e’agara ebip bee kɛ̄ ba doonu doo ye nɛ.

Bu kaka, lɔgɔ zooro Jɛhova naale esu lɔgɔ nu a tɔɔ̄dɔ ziī edonyɔɔ lo a ɛrɛ nu edoo kiiloo ekwɔ sīdee taāŋabah yiā yii. Elo alu kɔ, alu ekɔ o dɛrɛbah nyɔɔ Baibol bie tɔbiaɛ sa yira yii kɔ nu o gaa kɔe lu kaka ni a? Lo a sira doo wo, o dap biaɛfii lo edoo, kuma sɔ̄ Kpa Kaɛ kɔnage nu akiiloo pya nɛɛ a bee bɔ ture nyiɛ loo lo ba bee doo pio nu sɔ̄ ba gaa bee deyii a. (Jɛn 24:2, 3, 9; 47:29-31) Alu nu a kuī kɔ o suā kɔ lo o waa de dua yii a le doo wo, a kura kɔ o waa yira yii kɛ̄sī Bari kɔ o kɔe kaka ue. Alu ebɛɛ̄ kɔ o kpɛ̄naloo eture ɛrɛgeba ebip alu ebip a, sa muɛ kɔ pya o ture lu kaka.

Nyɔɔbee gbanialoo i ɛrɛ kumaloo Jɛhova kuī i loo a, a lee kɔ i yere kara kiiloo ɛrɛgeba yii i gaa gbī ede lokwa a naa be i ekɛɛrɛ beenyiɛ ale gbee ɛrɛgeba daakuu Baibol. Lo o biaɛfii lo edeyii, o ɛrɛ edoo dookɛ̄ o bee yira doo.—1 Pit 2:12.