Bu dua kɛ̄tɔɔ̄ ama, bɔŋanaloo e’ɛp kɔ lo tua iya dam le wa e’ina kuma lo a le lo gbara sikɛ̄ ii dɔɔ̄na wa, e bɔŋanaloo e’ɛpnage kɔ lo aā iya dam le wa a, elua lo lok yerekpotɛ̄. Lo edābeeloo nu anua i kɔ doo wo, doraa i naa ɛp nu Jizɔs bee kɔ akiiloo lɛa wa bah ale aaloo dam, le sikɛ̄ ii aā wa ale iya aā dam.

Dookɛ̄ alu e’ɛm bu kpa Matiu 19:9 doo, Jizɔs bee kɔ aba nu Kpa Kaɛ yerekpotɛ̄ kɔ edap doo kɔ nɛɛ a mmɛ kuma loo ye iya dam le wa. A bee kɔ: “Ɛrɛgeba nɛɛ a kiī ye wa, kɛɛrɛ kɔ nyɔɔ esia nɛɛ, sa ii dɔɔ̄na, ekora wa dɔɔ̄na nɛɛ.” Aāloo pya ue Jizɔs bee kɔ ama, i nɔ kɔ (1) lo dam ale wa naa bie ziī sa nyɔɔnɛ dɔɔ̄na nɛɛ kunagā, naa ɛrɛ lɔgɔ nu ba edap yira nyɔɔ mmɛ kuma loo wa iya dam le wa dookɛ̄ Kpa Kaɛ kɔ doo, le (2) nɛɛ a lɛa ye wa bah sɔ̄ a naa ɛrɛ lɔgɔ nu a yira nyɔɔ lo Kpa Kaɛ yerekpotɛ̄, sa a sikɛ̄ ii dɔɔ̄na wa ekora wa dɔɔ̄na nɛɛ. *

Ekɔ pya ue Jizɔs ama kurage kɔ Kpa Kaɛ yerekpotɛ̄ kɔ nɛɛ a nyɔɔnɛ dɔɔ̄na nɛɛwa kunagā sa lɛa ye wa bah luge puɛ lo e’ii dɔɔ̄na wa ni? Naa aadee le doo wo. Sɔ̄ dam nyɔɔnɛ dɔɔ̄na nɛɛwa kunagā, ye wa ue naa bee a ebiaɛfii lo a le e’aaloo nɛ ye dam ale a naale e’aaloo ye nɛ. Lo a le lo wa naa aaloo ye nɛ, sa ba kwa kpa anialoo ziī, lo sɔ̄ baɛ aba lu puɛ lo e’ii ale iya dɔɔ̄na nɛɛ aba sɔ̄ ba esua kpa anialoo ziī sah.

Bu dɔɔ̄na sīdee, a dap lege aa taɛ lo nɛɛ ue naa bee a kɔ lo iya dam le wa a kiisī, sa a kpɛ̄naloo e’aaloo nɛ ye dam. E lo alu kɔ lo dam naa yiga kɔ wa iya dam le wa a kiisī, sa a kwa kpa anialoo sɔ̄ ye wa aa gbīge kɔ ba ebee kiiesī lo elu dam le wa ni a? Nyɔɔbee lo wa aa gbīge e’aaloo ye nɛ, le kɔ aa gbīnage kɔ lo iya dam le wa a kiisī a, Kpa Kaɛ naa yerekpotɛ̄ kɔ ye dam ama lu puɛ lo e’ii dɔɔ̄na wa. Lo a kiisī lo elɛɛbeekɛɛ̄ lok Kpa Kaɛ ama, sa ii dɔɔ̄na wa sɔ̄ Kpa Kaɛ naa yerekpotɛ̄ kɔ alu puɛ lo e’ii dɔɔ̄na wa, lo ama kura kɔ ekueranage wa dɔɔ̄na sɔ̄, lo sɔ̄ bɔŋanaloo esikɛ̄ ye biaɛ biaɛ loo dɔɔ̄na sɔ̄.—1 Kɔr 5:1, 2; 6:9, 10.

Lo a le ziī nɛɛ obia ii dɔɔ̄na wa sɔ̄ Kpa Kaɛ naa yerekpotɛ̄ kɔ alu puɛ lo edoo wo, mɛ sīdee na bɔŋanaloo e’ɛp lo tua iya dam le wa, le lo aā iya dam le wa ani? Ekɔ lo tua iya dam le wa lege aa kiisī sɔ̄ alu e’ɛp aāloo nu Kpa Kaɛ kɔ ni? Ekɔ lo nɛɛ ue naa bee a, edapge sikɛ̄ biaɛfii lo e’aageloo nɛ, ale a naale e’aaloo nɛ ye tua dam ni? Ekɔ lo aā iya dam le wa a, elu e’ɛp doodoo bee Kpa Kaɛ naa yerekpotɛ̄ ni?

Sɔ̄ akii adumɛ, bɔŋanaloo wee ɛp kɔ Kpa Kaɛ naa yerekpotɛ̄ lo aā iya dam le wa a, kuma sɔ̄ alu kɔ lo nɛɛ ue naa bee a lege dum sa naa ii ale iya dɔɔ̄na nɛɛ, ale bee a naa nyɔɔnɛ dɔɔ̄na nɛɛwa ale nɛɛdam kunagā. Kerewo, Jizɔs naa bee kɔ nu akiiloo nɛɛ ue naa bee sɔ̄ a gaa bee kɔ nu akiiloo lɛa wa bah ale aaloo dam, le sikɛ̄ ii ale iya dɔɔ̄na nɛɛ. Taāwo a bee baatɛ̄ kɔ, nɛɛ a lɛa ye wa bah sɔ̄ a naa ɛrɛ lɔgɔ nu a yira nyɔɔ lo Kpa Kaɛ yerekpotɛ̄, sa a sikɛ̄  ii dɔɔ̄na wa, ekuera wa dɔɔ̄na nɛɛ. Sɔ̄ nu a le doo wo ama sira, a kura kɔ lɛa wa bah le sikɛ̄ ii dɔɔ̄na wa, lo Jizɔs bee kɔ alu kue wa dɔɔ̄na nɛɛ a, eyere kumaloo lo tua iya dam le wa.

Sɔ̄ alu eyere kuma loo iya dam le wa nyɔɔbee elua ekwa kpa anialoo ziī, sa sikɛ̄ ii ale iya dɔɔ̄na nɛɛ, lɔgɔ nu nɛɛ ue naa bee a esikɛ̄ doo naale, kereadoo a bee gbī e’aaloo ale a naa bee gbī e’aaloo nɛ lo nɛɛ ue bee a. Nyɔɔwo, a naa luna ebɛɛ̄ kɔ lo wa a nɛ taāŋa loo ye, tɛ̄maloo e’ɛrɛ gbɛnɛ ekɛɛrɛ akiiloo lo a le e’aageloo ale a naale e’aaloo nɛ ye dam a bee ye bie a. Lo dɔɔ̄na, kɛ̄ bɔŋanaloo e’ɛp lo aā iya dam le wa a doo, naale edɛɛa nyɔɔ kɔ lo nɛɛ ue naa bee a sikɛ̄ u sɔ̄ esaa, esiakɛ̄ ii ale iya dɔɔ̄na nɛɛ ale kɔ a nyɔɔnɛ dɔɔ̄na nɛɛ kunagā.  *

Bu edoba i bee kɔ nu akiiloo a, lo dam bee nyɔɔnɛ dɔɔ̄na nɛɛwa, lo a doo kɔ a lɛa ye wa bah. E lo alu kɔ lo dam naa nyɔɔnɛ dɔɔ̄na nɛɛwa kunagā, kerewo a lɛa ye wa bah sa sikɛ̄ ii dɔɔ̄na wa ni a? Ale alu kɔ lo dam naa nyɔɔnɛ dɔɔ̄na nɛɛwa kunagā lɛɛ a gae lɛa ye wa bah, mɛ a doo wo sɔ̄ elɛa ye wa bah sah, sa sikɛ̄ ii dɔɔ̄na wa, kereadoo ye wa lege aa kpɛ̄naloo e’aaloo ye nɛ ni a? Aāloo pya edoba elua enɛ ama, lɛa wa bah le sikɛ̄ ii dɔɔ̄na nɛɛ, lo a le kue wa, edora kɔ lo tua iya dam le wa a ina kuma. Lo aā iya dam le wa lu lo lok yerekpotɛ̄.Watchtower November 15, 1979, page 32 bee kɔ: “Nyaawo lo nɛɛdam e’ina bu aā iya dam le wa, e a naa waɛna kɔ a dap aadee mmɛ kuma loo lo aā iya dam le wa sa sikɛ̄ obia kii loo ye tua wa. Lo tua iya dam le wa ebee ina kuma nyɔɔbee ebee lɛa ye wa bah, kue wa sa iinage dɔɔ̄na wa.”

Kɛ̄ elua esikɛ̄ dābeeloo doo ama naa kura kɔ iya dam le wa lu nu elu esu biā-bii, ale bee nyɔɔnɛ dɔɔ̄na nɛɛ kunagā naa lu si gbɛnɛ pɔrɔ. Nɛɛ a lɛa ye wa bah sɔ̄ a naa ɛrɛ lɔgɔ nu a yira nyɔɔ lo Kpa Kaɛ yerekpotɛ̄, sa ii dɔɔ̄na wa sɔ̄ Kpa Kaɛ naa yerekpotɛ̄ kɔ alu puɛ lo edoo wo, elu ebiaɛ ye biaɛ loo bu bɔŋanaloo nyɔɔbee ekuera wa dɔɔ̄na nɛɛ. (Lo alu kɔ ye aā wa lu Nɛɛ Kraist, elunage ebiaɛ ye biaɛ loo bu bɔŋanaloo nyɔɔbee esua dam dɔɔ̄na nɛɛ.) Kereadoo lo aā iya dam le wa naale elu e’ɛp nua kunagā, kaka a le na bee, Kpa Kaɛ naa yerekpotɛ̄. E lo nɛɛdam a doo nu a le doo wo naale edap nyim tura lɔgɔ keebee dɔtam bu bɔŋanaloo Bari bu gbɛnɛ-edo zua, mmɛ sɔ̄ pah ale kɛɛ a aaloo nu a bee doo, le kɛ̄ a bee zia pya dɔɔ̄na doo ekira kɛ̄. E lɛɛ a gae lu enɛ ye ɛrɛgeba keebee dɔtam bu bɔŋanaloo, elunage edasī ɛp kɛ̄tɔɔ̄ lo tua wa a bee dap lu edag a, le pya ye miɔŋɔ a bee gbabie sɔ̄ ba bee lege etera a.—Mal 2:14-16.

Nyɔɔbee pya pɔrɔ nu a wee sira aabu sɔ̄ nɛɛ lɛa wa bah ale sɔ̄ wa aaloo ye dam, alu nu suānu le loo kɔ Pya Nɛɛ Kraist a ɛp iya dam le wa nua nɔɔnɔɔnu a le kaɛ dookɛ̄ Jɛhova ɛp doo.—Eklis 5:4, 5; Hib 13:4.