1-2. E na i gaa le nɔ bu ekobee ue ama ani?

I ƐRƐ gbɛnɛ-edo nu a tɔgɛ kɔ i gaa tɔɔ̄dum bu kpɛdumɛ dee ee sɔ̄ akii adumɛ. Sɔ̄ sɔ̄ naa binia Jɛhova le Jizɔs gaa le gbeesī dɛ̄dɛɛ̄ ekpo bɛbɛɛ a gbanasī ye Buɛ̄-mɛnɛ. Lɛɛ lo ama gae sira, mɛnɛ dee mmnyɔɔ le mɛnɛ dee kerekɛ̄ gaa le kiisī lo ebe ziī sa benage pya nɛɛ Bari.

² Bu lo ekobee ue ama, i gaa le nɔ nu akiiloo mɔmanudɛɛ̄ a le bu kpa Daniel 11:40–12:1. I gaa le suāloo nɛɛ alu mɛnɛ dee mmnyɔɔ anii’ee sa nɔnage nu anua i dɛrɛ nyiɛ nyɔɔ kɔ Jɛhova eyerebah i nɛ kaɛlɛɛ ɛrɛgeba nu finiabah i kpesī li deesī.

3-4. Mɛɛ̄ na alu mɛnɛ dee mmnyɔɔ a? Naa baatɛ̄.

³ Sɔ̄ pya Soviet Union bee dɔ a bu zua 1991, pya nɛɛ Bari a bee le lo barasī bee “ɛrɛ nwīgbara yerebah,” lo a le kere sɔ̄ ba bee ɛrɛ wa loo. (Dan 11:34) Nyɔɔwo, dee bee wa kpaā nɛ lo ezue ue, e buā pya zue ue a bee le lo barasī bee nyim yiiloo gbɛnɛ. Sɔ̄ pio zua etɛ̄na, pya Russia le pya a wa le loo bee aakɛ̄ sa lu mɛnɛ dee mmnyɔɔ. Dookɛ̄ a bee lu ekɔ doo bu ekobee ue i aa a, ɛrɛ taa nu ziī bɛbɛɛ ɛrɛ edoo lɛɛ a gae lu mɛnɛ dee mmnyɔɔ ale mɛnɛ dee kerekɛ̄: (1) e ɛrɛ pah nyɔɔ pya nɛɛ Bari, (2) tɛ̄maloo ye dogo etɔgɛ kɔ a baae loo Jɛhova le pya ye nɛɛ, sa (3) dap nage bebe loo mɛnɛ a ye bebe loo.

 ⁴ Pya nu anua i dap kɔ pya Russia le pya a ye gbaaloo na mɛnɛ dee mmnyɔɔ anii’ee na ama: (1) Ba egbānasī pya nɛɛ Bari tɛ̄maloo e’ɔbɛ wa esiatam sa tɛ̄ŋaloo gbɛnɛ-edo pya wuga nɛɛdam le nɛɛwa ba tɔɔ̄ wa barasī. (2) Pya dogo ama tɔgɛ kɔ ba baaloo Jɛhova le pya ye nɛɛ. Le (3) Ba kiisī lo ebebe loo bɛbɛɛ pya Anglo-America lo a le mɛnɛ dee kerekɛ̄. I naa ɛp nu pya Russia le pya a wa gbaaloo edora a tɔgɛ kɔ alaba na mɛnɛ dee kerekɛ̄ a.

5. Amunu eku sɔ̄ na alu ebaatɛ̄ bu kpa Daniel 11:40-43 a, e e na esira lo sɔ̄ a?

⁵ Buū Daniel 11:40-43. Mɔmanudɛɛ̄ ama kɔ nu akiiloo sɔ̄ kpɛdumɛ. Lo dɔ kpa kaɛ kɔ nu akiiloo be a le yɛɛ mɛnɛ dee mmnyɔɔ le mɛnɛ dee kerekɛ̄. Dookɛ̄ Daniel bee kɔ doo, bu sɔ̄ kpɛdumɛ, mɛnɛ dee mmnyɔɔ le mɛnɛ dee kerekɛ̄ “gaa le pima nɔ̄” ziī.—Dan 11:40.

6. E na a tɔgɛ kɔ baɛ pya mɛnɛ ama gaa kiigesī lo ebe ziī ani?

⁶ Mɛnɛ dee mmnyɔɔ le mɛnɛ dee kerekɛ̄ kiisī lo ebe ziī nyɔɔbee ba gbī elu mɛnɛ nyɔuwe. Bu edoba, naa kɛɛrɛ nu a bee sira sɔ̄ pya Soviet Union le pya a ye gbaaloo bee bɛɛ gbɛnɛ-edo kɛ̄ a le barasī Europe sɔ̄ Baɛ Sɔ̄ Nɔ̄ Nyɔuwe bee dɔ sah. Nu mɛnɛ dee mmnyɔɔ doo ama bee doo kɔ mɛnɛ dee kerekɛ̄ a gbaaloo pya dɔɔ̄na edonyɔɔ sa ye bebe loo, e lo gbaaloo ama bee lu ekue NATO. Mɛnɛ dee mmnyɔɔ bee kiisī lo ebebe loo mɛnɛ dee kerekɛ̄ sa kpɛ gbɛnɛ-edo kpugi loo gbɛnɛ gbɛnɛ nu beā nɔ̄. Mɛnɛ dee mmnyɔɔ su pya baa mɛnɛ dee kerekɛ̄ ye su beā, kɛ̄ mɛnɛ dee kerekɛ̄ bee doo nage lo, sa pya a wa gbaaloo aa keekee barasī nyɔuwe a le Africa, Asia, le Latin America. Bu pio zua lo, pya Russia le pya a wa gbaaloo e’ɛrɛ pah nyɔɔ yube nyɔuwe. Ba esua nage kɔmputa beā mɛnɛ dee kerekɛ̄. Baɛ aba edɛrɛ ue ziī kiiloo su kɔmputa gbema wa sīdee gbora le bɛbɛɛ a le wa barasī. Dookɛ̄ Daniɛl bee kɔ doo, mɛnɛ dee mmnyɔɔ kiisī lo ebebe loo pya nɛɛ Bari.—Dan 11:41.

7. E na alu lo “buɛ̄ Ka” a?

⁷ Daniel 11:41 kɔ, mɛnɛ dee mmnyɔɔ eyii “buɛ̄ ka.” Lo buɛ̄ na e? Bu sɔ̄ kere a, buɛ̄ Izrɛl bee le “buɛ̄ a ɛrɛ ka [kpedɛɛ̄] eenyɔɔ dɛ̄dɛɛ̄ buɛ̄.” (Ezek 20:6) Mɛ nu a bee doo kɔ lo buɛ̄ a ɛrɛ ka kaāna na bee a wee lu etaāŋabah Jɛhova bie lo kɛ̄. Aā dee Pɛntikɔst 33 C.E. a, lo “buɛ̄” naa bee lena aba ziī kɛ̄, nyɔnɛbee pya nɛɛ Jɛhova le dɛ̄dɛɛ̄ kɛ̄ a le bu nyɔuwe. Taāwo, lo “buɛ̄ Ka” na esiatam pya nɛɛ Jɛhova lo a le wa taāŋabah tɛ̄maloo si enɔānu le tam zue ue.

8. Mɛnɛ dee mmnyɔɔ bee yii “buɛ̄ Ka” doodoo wa?

⁸ Bu kpedumɛ dee ama, mɛnɛ dee mmnyɔɔ eyira “buɛ̄ Ka” gbɛnɛ-edo sɔ̄. Bu edoba, sɔ̄ bɛbɛɛ Nazi li Germany bee su dɔ mɛnɛ dee mmnyɔɔ bu baɛ sɔ̄ nɔ̄ nyɔuwe a, lo mɛnɛ bee yii “buɛ̄ Ka” tɛ̄maloo etɛ̄ŋaloo sa fɛ pya nɛɛ Bari. Sɔ̄ Baɛ Sɔ̄ Nɔ̄ Nyɔuwe edɔa sah, pya Soviet Union bee su dɔ mɛnɛ  dee mmnyɔɔ, lo mɛnɛ bee yii “buɛ̄ Ka” tɛ̄maloo etɛ̄ŋaloo pya nɛɛ Bari sa wa kpo ture dɔɔ̄na buɛ̄.

9. Bu mɛ sīdee na pya Russia le pya a wa gbaaloo eyira “buɛ̄ Ka” bu ilii dee ama ani?

⁹ Bu pio zua lo, pya Russia le pya a wa gbaaloo eyira nage “buɛ̄ Ka.” Bu mɛ sīdee? Bu zua 2017 a, pya Russia lo alu mɛnɛ dee mmnyɔɔ ani’ee, e’ɔbɛ tam pya nɛɛ Jɛhova sa aa pio pya i wuga nɛɛdam le nɛɛwa yere kpɔgɔrɔ. E ɔ’bɛ nage pya i kpa, gbaāloo New World Translation. Dɔɔ̄na, ba sunage i tɔ naa tam, pya i Tɔ Nɔnu Buɛ̄ mɛnɛ gbaāloo dɛ̄dɛɛ̄ i Asɛmbli Hall li Russia i lɛɛbah. Sɔ̄ lo ama etɛ̄na, bu zua 2018 Eku A Baɛbee bee yere nukuādɛɛ̄ loo kɔ pya Russia le pya a wa gbaaloo na ba lu mɛnɛ dee mmnyɔɔ a. Kɛ̄adoo, kere sɔ̄ pya nɛɛ Jɛhova gaa kpesī e’agabah tɛ̄ŋaloo, ba naa wee sudɔ bu be bɛbɛɛ ale lo enyaana. Taāwo, ba gbaɛ̄tɔ̄ zuurabahtɔ̄ a le bu Baibol a kɔ i bara bee “dɛ̄dɛɛ̄ pya a le gbɛnɛ kɛ̄tɔɔ̄,” lo a eetɔɔ̄ na sɔ̄ ba gaa doo pya biaɛfii a dap i kpaɛ̄ lɛɛ loo i taāŋabah.—1 Tim 2:1, 2.

10. Mɛnɛ dee mmnyɔɔ ebege mɛnɛ dee kerekɛ̄ eebah ni? Naa baatɛ̄.

¹⁰ Mɔmanudɛɛ̄ a le bu kpa Daniel 11:40-45 kɔ gbɛnɛ-edo nu mɛnɛ dee mmnyɔɔ edoo. Lo ama kurage kɔ a gaa le be eebah mɛnɛ dee kerekɛ̄ ni? Eeye. Mɛnɛ dee kerekɛ̄ ele “dum” sɔ̄ Jɛhova le Jizɔs egbeesī dɛ̄dɛɛ̄ bɛbɛɛ miɔŋɔ nɛɛ bie bu nɔ̄ Amagidɔn. (Mum 19:20) I tɛɛ̄ doodoo wa suā ni? Naa ɛp pya nu mɔmanudɛɛ̄ a le bu kpa Daniɛl le kpa mumuuna tɔgɛ ama.

11. E na kpa Daniel 2:43-45 tɔgɛ a? (Ɛp foto a le nyɔɔ eko.)

¹¹ Buū Daniel 2:43-45. Nɛɛ mɔmanudɛɛ̄ Daniel kɔ nu akiiloo keekee eku bɛbɛɛ pya miɔŋɔ nɛɛ lo ba bee ɛrɛ pah nyɔɔ pya nɛɛ Bari. Lu ebaa wa tɛ̄ nua keekee kɛ̄ a le loo gbɛnɛka nwīnɛɛpie a. Kpɛdumɛ ekpo bɛbɛɛ miɔŋɔ nɛɛ lu ekaɛtɔ nwī-nɛɛ-pie alu piga piga kpe le baɛ̄ a. Ye ekaɛtɔ tɔɔ̄dɔ Ekpo Bɛbɛɛ Nyɔuwe Pya Anglo-America. Lo mɔmanudɛɛ̄ tɔgɛ kɔ Anglo-America ele gaa bɛɛ mmɛ sɔ̄ Buɛ̄-mɛnɛ Bari ezip sa tuŋ bɛbɛɛ pya miɔŋɔ nɛɛ lɛɛ.

12. Lo eree ɛrɛba ekobee lo nam kuɛ tɔɔ̄dɔ mɛɛ̄, e e na anua a bɔloo kɔ i suā a?

¹² Nɛɛ lɛɛratam Jɔn bee baa nage tɛ̄ keekee ekpo bɛbɛɛ lo e’ɛrɛ pah nyɔɔ pya nɛɛ Bari. Jɔn bee kɔ pya lo bɛbɛɛ tɔɔ̄dɔ nam kuɛ a ɛrɛ ɛrɛba ekobee. Lo eree ɛrɛba ekobee loo lo nam kuɛ ama tɔɔ̄dɔ Ekpo Bɛbɛɛ Nyɔuwe Pya Anglo-America. A bɔloo eyere nukuādɛɛ̄ loo nyɔnɛbee lo nam naa sīnakɛ̄ ɛrɛ dɔɔ̄na ekobee. Lo eree ɛrɛba ekobee loo lo nam kuɛ ama ele gaa bɛɛ mmɛ sɔ̄ Jizɔs le pya ye gbo nɔ̄ bunyɔɔ egbee ye sī gbaāloo pya dɔɔ̄na nam kuɛ. *—Mum 13:1, 2; 17:13, 14.

13-14. Mɛɛ̄ na Gɔg lo Magɔg a, e e na edoo kɔ a ɛrɛ saŋ sa bebe pima pya nɛɛ Bari ani?

¹³ Ziī mɔmanudɛɛ̄ Ezekiɛl bee ɛm doo kɔ i suā nu a dap sira lɛɛ a gae  lu egbeesī mɛnɛ dee mmnyɔɔ le mɛnɛ dee kerekɛ̄. Lo i ɛp pya mɔmanudɛɛ̄ a le bu kpa Ezekiel 38:10-23; Daniel 2:43-45; 11:44–12:1; le Mummuuna 16:13-16, 21 kɔ a gaa kɔ nu akiiloo aba eku sɔ̄ le aba siranu, a kura kɔ pya siranu a nyɔɔnɛ ama na esira a.

¹⁴ Pio sɔ̄ sɔ̄ gbɛnɛ etɛɛrɛloo ebɔātɛ̄, “pya mɛnɛ dɛ̄dɛɛ̄ nyɔuwe” egbaaloo ziī. (Mum 16:13, 14; 19:19) Lo gbaaloo ziī na Kpa Kaɛ kure “Gɔg loo buɛ̄ magɔg” a. (Ezek 38:2) Lo edonyɔɔ a gbaaloo ziī gaa le be kpɛdumɛ be pima pya nɛɛ Bari. E na eyere wa saŋ bu sa doo kɔ ba a bebe ani? Sɔ̄ Jɔn gaa kɔ nu akiiloo sɔ̄ ama, a bee muɛ̄ gbɛnɛ beebee maā a dɔnia a dɔ nyɔɔ pya nɛɛ baa Bari. Lo beebee maā a tɔɔ̄dɔ nu a, na e’agabah ue biaɛ pya nɛɛ Jɛhova gaa le kɔ siā. Edap sira kɔ lo yereue biaɛ na edana saŋ bu Gɔg lo Magɔg sa a kɛɛrɛ kɔ efɛe dɛ̄dɛɛ̄ aba lɛɛ a kɛnɛkɛ̄ a.—Mum 16:21

15-16. (a) Dap lu amunu siranu na kpa Daniel 11:44, 45 gaa kɔ a? (b) E na esira loo mɛnɛ dee mmnyɔɔ le Gɔg lo Magɔg a?

¹⁵ Dap lu e’agabah yereue le kpɛdumɛ be pya nɛɛ baa Bari na kpa Daniel 11:44, 45 gaa kɔ a. (Buū.) Kɛ̄ ama Daniɛl kɔ, “pio ue a bee lu edā aā kɛ̄ enaani wee sira aa le dee mmnyɔɔ” gaa le taɛ̄ŋɛ mɛnɛ dee mmnyɔɔ sa doo kɔ a kii ee bu gbɛnɛ “ebɛa miā saŋ.” Mɛnɛ dee mmnyɔɔ enɔɔ lo “egbee sa kpagiri booboo nɛɛ lɛɛ.” Dap lu kɔ “booboo” nɛɛ a gaa lu ekɔ ama na pya nɛɛ Jɛhova. * Daniɛl gaa bee dap kɔ nu akiiloo kpɛdumɛ be elu ebe loo pya nɛɛ Bari.

¹⁶ Be mɛnɛ dee mmnyɔɔ gbaāloo dɛ̄dɛɛ̄ mɛnɛ nyɔuwe gaa le be pima pya nɛɛ Bari ama, na a gaa le dana saŋ Nɛɛ-a-ee-nyɔɔ dɛ̄dɛɛ̄ nu sa doo kɔ nɔ̄ Amagidɔn a dɔ a. (Mum 16:14, 16) Lo sɔ̄ na elu egbeesī mɛnɛ dee mmnyɔɔ le  dɛ̄dɛɛ̄ pya edonyɔɔ a gbaaloo ziī lo a le Gɔg lo Magɔg a, “e lɔgɔ nɛɛ naale yerebah ye nɛ.”—Dan 11:45.

17. Mɛɛ̄ na Maikɛl “lo gbɛnɛ nɛɛ-bee” alu ekɔ nu kumaloo bu kpa Daniel 12:1 a, e e na a bee doo a?

¹⁷ Taɛ lo barakpaɛ̄ a za nyɔɔnɛ bu kpa Daniɛl aara gbɛnɛ-edo ekɔa akiiloo kɛ̄ a elu egbeesī mɛnɛ dee mmnyɔɔ le pya ba ye gbaaloo doo, le sīdee a gae lu ekpɔā i. (Buū Daniel 12:1.) Taɛ e na lo dɔ ama gaa kɔ a? Maikɛl na dɔɔ̄na bee Jizɔs Kraist ilii mɛnɛ a gaa bɛɛ a. Aā sɔ̄ a bee lu ewu ye nua mɛnɛ li bunyɔɔ bu zua 1914, a gaa “ɛp pya . . . nɛɛ” Bari. Sɔ̄ sɔ̄ naa binia, a gaa le ‘yira nɛ’ pya ye nɛɛ sa doo dogo lo egbeesī pya ye baa bu nɔ̄ Amagidɔn. Lo be ama na kpɛdumɛ be lo Daniɛl kure gbɛnɛ “sɔ̄ etɛɛrɛloo” bu eloh kere a. Mɔmanudɛɛ̄ Jɔn alu e’ɛm bu kpa Mumuuna bee kɔ “gbɛnɛ etɛɛrɛloo” gaa le le, lɛɛ nɔ̄ Amagidɔn gae su dɔ.—Mum 6:2; 7:14.

18. E na anua bɔɔ naale e’aa i loo nu esira li deesī a?

¹⁸ I dap dɛrɛ nyiɛ nyɔɔ kɔ elu ekpɔā i nyɔnɛbee Daniɛl le Jɔn bee kɔ Jɛhova le Jizɔs ekpɔā pya wa nɛɛ bu gbɛnɛ etɛɛrɛloo li deesī. Daniɛl bee kɔ pya etɛɛ̄ yeebah elu “e’ɛm [wa] bee bu kpa.” (Dan 12:1) E na i doo lokwa i bee le bu lo kpa a? I ɛrɛ etɔgɛ kɔ i ɛrɛe yira bu Jizɔs, lo a le nwiī naana pee Bari. (Jɔn 1:29) Lu ebɛɛ̄ kɔ i kiī i loo nɛ Bari sa liamaā. (1 Pit 3:21) E i tɔgɛ kɔ i yereekpotɛ̄ Buɛ̄-mɛnɛ Bari tɛ̄maloo eyerebah nɛ pya dɔɔ̄na kɔ ba a nɔ nu akiiloo Jɛhova.

19. E na i doo anyaawo a, e e na anua a?

¹⁹ Nyaawo na sɔ̄ etɔɔ̄ agara nɛ Jɛhova le ye bɔŋanaloo a ɛrɛ pya zooro a ye tɔɔ̄ agara nɛ a. Nyaawo na sɔ̄ eyerekpotɛ̄ Buɛ̄-mɛnɛ Bari a. Lo i doowo, elu ekpɔā i sɔ̄ Buɛ̄-mɛnɛ Bari egbeesī mɛnɛ dee mmnyɔɔ le mɛnɛ dee kerekɛ̄.