1. Amunu gbɛnɛ biaɛfii na dɛ̄dɛɛ̄ nɛɛ ɛrɛ edoo a?

 DƐ̄DƐƐ̄ nɛɛ ɛrɛ ziī gbɛnɛ biaɛfii lo edoo anii’ee. Ba eyerege kpotɛ̄ Jɛhova Bari doodoo Nɛɛ A Bɔloo Ebɛɛ dɛ̄dɛɛ̄ nu, sɛh ba eyerekpotɛ̄ ye gbɛnɛ nɛɛ baa, lo a le Setan ni? Dɛ̄dɛɛ̄ nɛɛ ɛrɛ esagɛ lo nɛɛ ba ele nɛ, e lɔgɔ kɔ oo le sī ale oo le dumɛ naale. Ɛrɛgeba biaɛfii ba doo etɔgɛ lo a le ba e’ɛrɛ dum a naatah li deesī. (Mat 25:31-33, 46) Bu sɔ̄ “gbɛnɛ etɛɛrɛloo,” elu eyere wa kuu loo nua pya etɛɛ̄ yeebah ale pya e’ɛrɛ gbeerasī.—Mum 7:14; 14:9-11; Ezek 9:4, 6.

2. (a) Ena Pya Hibru 10:35-39 i yere mɛm loo kɔ i doo a? (b) Kpa Mumuuna dap i yerebah nɛ doodoo wa?

² Buū Pya Hibru 10:35-39. Lo o esagɛ lo eyerekpotɛ̄ bɛbɛɛ Jɛhova, a kura kɔ o edora ziī biaɛfii suānu le loo. A taɛnage a kaāna lo eyerebah nɛ pya dɔɔ̄na kɔ ba a doonage wo. Nyɔɔwo, o dap su yereue a le bu kpa Mumuuna wa yeābah nɛ. Kpa alu keebee ama muuna nu esiraloo pya a gbanasī Jɛhova, le leelee pya nɛɛ a yerekpotɛ̄ ye bɛbɛɛ e’ɛrɛ. A lee kɔ i nɔ nu akiiloo pya kaka ue ama. Dodoo wo edoo kɔ i agɛrɛtɛ̄ i biaɛfii lo ekiisī lo etaāŋabah Jɛhova. Gbaāloo wo, i dap su pya nu i enɔā yeābah nɛ pya dɔɔ̄na kɔ ba a kiisī lo etaāŋabah Jɛhova sa ye daba bialoo.

3. Ena i kɔ ue nyɔɔ bu ekobee ue ama a?

³ Bu ekobee ue ama, i kɔ ue nyɔɔ pya ebip a kɔ: Ena a gaa tɔɔ̄baɛ pya a yerekpotɛ̄ bɛbɛɛ Bari a? E ena esiraloo pya a yerekpotɛ̄ nam kuɛ a kum-doh alu ekɔ nu akiiloo bu kpa Mumuuna ani?

4. Amunu eku na nɛɛ lɛɛratam Jɔn bee muɛ kpaɛ̄ Jizɔs li bunyɔɔ a?

⁴ Bu ziī mɔmanudɛɛ̄, nɛɛ lɛɛratam Jɔn bee muɛ baɛ eku nɛɛ lo ba yerekpotɛ̄ bɛbɛɛ Jɛhova sa ɛrɛ dum a naatah. Buā lo tua eku nɛɛ bee lu 144,000 pya nɛɛ. (Mum 7:4) Alu esu wa aā a kɛnɛkɛ̄ kɔ ba a nyɔɔnɛ Jizɔs bɛɛ bu Buɛ̄-mɛnɛ bunyɔɔ. Ba enyɔɔnɛ ye bɛɛ nyɔuwe. (Mum 5:9, 10; 14:3, 4) Bu lo mɔmanudɛɛ̄, Jɔn bee wa muɛ ba le eyira kɛ̄sī Jizɔs nyɔɔ Kpokɛ̄ Zion li bunyɔɔ.—Mum 14:1.

5. Sɔ̄sɔ̄ naa binia ena esiraloo pya a siga yɛɛ 144,000 pya nɛɛ a?

⁵ Aāge bu tua sɔ̄ o’oo tup zua mmɛ anii’ee, elua esagɛ booboo nɛɛ yere yɛɛ 144,000 pya nɛɛ ama. (Luk 12:32; Rom 8:17) Kerewo, a bee lu ekɔ nɛ Jɔn kɔ kunɛ nwīepoo aba na ba ele dum a kɛnɛkɛ̄ bu kpɛdumɛ dee a. ‘Pya a siga’ ama, e’ɛrɛ wa “nukuādɛɛ̄” a aabah Jɛhova lɛɛ gbɛnɛ etɛɛrɛloo gae bɔātɛ̄. (Mum 7:2, 3; 12:17) Bu sɔ̄ gbɛnɛ etɛɛrɛloo aa kiisī, elu esu pya a siga yɛɛ lo 144,000 nɛɛ kuma bunyɔɔ, lokwa ba gbaaloo pya lo ebee u bu bɔ ture nyiɛ loo. Lo kɛ̄ na ba enyɔɔnɛ Jizɔs bɛɛ bu Buɛ̄-mɛnɛ Bari a.—Mat 24:31; Mum 5:9, 10.

6-7. (a) Amunu eku na Jɔn bee sikɛ̄ muɛ a, e ena alu edoo kɔ i suā a wa kiiloo a? (b) Ena anua alu ebɛɛ̄ kɔ pya nwīgbagbara eku le lo eku alu “gbɛnɛ edo nɛɛ” a ɛrɛ taɛ bu nu a le bu kpa Mumuuna 7 ekobee a?

⁶ Sɔ̄ Jɔn emɔna pya lo eku ekii bunyɔɔ sah, a bee sikɛ̄ muɛ “gbɛnɛ edo nɛɛ.” Naa lu esuā buā gbɛnɛ-edo nɛɛ ama dookɛ̄ alu esuā buā lo eku alu 144,000 nɛɛ a doo. (Mum 7:9, 10) Ena alu edoo kɔ i suā a wa kiiloo a? Bee lu ekɔ nɛ Jɔn kɔ: “Ba alaba ama na pya ba bee aabu gbɛnɛ etɛɛrɛloo a, e ba loga wa bɛloo sa doo kɔ ba a ɛɛ bu miī Nwiī-naana-pee.” (Mum 7:14) Sɔ̄ ba etɛ̄na yeebah gbɛnɛ etɛɛrɛloo sah, “gbɛnɛ edo nɛɛ” ama etɔɔ̄dum a nyɔɔ kɛnɛkɛ̄ sa ɛrɛ ekpeloo loo gbɛnɛ-edo leelee.—Yɔɔ 37:9-11, 27-29; Kam 2:21, 22; Mum 7:16, 17.

⁷ Bu sīdee a tɔɔ̄dɔ nu, ekɔ i muɛge i loo bu ue alu e’ɛm bu kpa Mumuuna 7 ekobee, kere elua esagɛ i lo ele yɛɛ pya ekii bunyɔɔ ale pya etɔɔ̄ a nyɔɔ kɛnɛkɛ̄ ni? A lee kɔ i muɛ i loo doo wo. Mɛ dua ekpeloo sɔ̄ baɛ eku pya zooro Bari ama gaa tɔɔ̄ baɛ sɛh! I gaa le ɛrɛ kaāna ɛɛbu kɔ i bee sagɛ lo eyerekpotɛ̄ bɛbɛɛ Jɛhova. Dɔɔ̄na ena kpa Mumuuna doo kɔ i suā akiiloo gbɛnɛ etɛɛrɛloo ani?—Mat 24:21.

8. Mɛ sīdee na gbɛnɛ etɛɛrɛloo ebɔātɛ̄ a, e gbɛnɛ-edo nɛɛ edoo dogo doodoo wa?

⁸ Dookɛ̄ a bee lu ekɔ doo bu ekobee ue i aa a, sɔ̄sɔ̄ naa binia pya bɛbɛɛ ebebe loo Babilɔn lo Gbɛnɛ, lo a le bɔŋɛnɛ ekwɔ sīdee taāŋabah bu yube nyɔuwe. (Mum 17:16, 17) Lo ama na elu bɔātɛ̄ gbɛnɛ etɛɛrɛloo a. Ekɔ wo edoo kɔ gbɛnɛ-edo nɛɛ a bɔātɛ̄ etaāŋabah Jɛhova ni? Eeye. Taāwo, Mumuuna 6 ekobee tɔgɛ kɔ bu sɔ̄ kɛ̄tɔɔ̄ e’aga ama, pya a naa gaa taāŋabah Jɛhova egbī kpega aābah pya bɛbɛɛ le pya gbɛnɛ uradu nyɔuwe, lo alu esu wa dooreloo egu. Kuma sɔ̄ pya lo nɛɛ naale eyerekpotɛ̄ Buɛ̄-mɛnɛ Bari a, Jɛhova e’ɛp wa nua pya a ye gbanasī.—Luk 11:23; Mum 6:15-17.

9. Bu mɛ sīdee na pya nɛɛ Jɛhova elu kee bu sɔ̄ gbɛnɛ etɛɛrɛloo a, e ena esira aabu a?

 ⁹ Bu kaka, pya zooro Jɛhova ba bɔ ture nyiɛ loo etɔɔ̄ kee bu sɔ̄ kɛ̄tɔɔ̄ e’aga ama. Ba elenage aa lu aba pya a gaa taāŋabah Jɛhova Bari a nyɔɔ kɛnɛkɛ̄ sa naa yerekpotɛ̄ lo “nam kuɛ.” (Mum 13:14-17) Wa yira agara ama edoo kɔ pya a gbanasī Jɛhova a ɛrɛ gbɛnɛ saŋ wa pima. E wo edoo kɔ dɛ̄dɛɛ̄ edonyɔɔ a gbaaloo ziī sa bebe loo pya nɛɛ Bari lo ba le dɛ̄dɛɛ̄ kɛ̄ a le a kɛnɛkɛ̄. Bu mɔmanudɛɛ̄ Baibol, alu ebaatɛ̄ wa gbɛnɛ saŋ ama nua be a aabah Gɔg lo Magɔg.—Ezek 38:14-16.

10. Dookɛ̄ alu ekɔ bu kpa Mumuuna 19:19-21 doo, ena Jɛhova edoo loo pya a gbī egbeesī pya ye nɛɛ a?

¹⁰ Ena Jɛhova edoo loo pya a gbī egbeesī pya ye nɛɛ ama ani? A kɔ i nɛ kɔ: “Mdaa gbɛnɛ saŋ gaa le aakɛ̄.” (Ezek 38:18, 21-23) Mumuuna 19 ekobee kɔ nu a sikɛ̄ sira nyɔɔnɛ. Jɛhova lɛɛra ye Nwiīnɛɛdam kɔ a kpega pya Ye nɛɛ sa gbeesī pya wa nɛɛ baa. Pya “gbo nɔ̄ bunyɔɔ”, lo a le pya ɛnjɛl ba bɔ ture nyiɛ loo le pya 144,000 egbaaloo Jizɔs sa be lo be. (Mum 17:14; 19:11-15) Ena esira aabu lo nɔ̄ ani? Elu egbeesī dɛ̄dɛɛ̄ pya nɛɛ a gbanasī Jɛhova gbaānage loo ɛrɛgeba bɔŋanaloo a ye gbanasī!—Buū Mumuuna 19:19-21.

11. Amunu siranu a kuī na alu keebee yɛɛ dɛ̄dɛɛ̄ siranu a le bu kpa Mumuuna a?

¹¹ Naa kɛɛrɛ kɛ̄ etɔɔ̄loo pya a bɔ ture nyiɛ loo a le a kɛnɛkɛ̄ doo, sɔ̄ ba etɛna yeebah gbeerasī a dɔ nyɔɔ pya nɛɛ baa Bari. Mɛ dua sɔ̄ ɛɛbu sɛh! Kereadoo gbɛnɛ kpā ɛɛbu ele bunyɔɔ sɔ̄ elua egbeesī Babilɔn lo Gbɛnɛ lɛɛ, a ɛrɛnage dɔɔ̄na nu enua gbɛnɛ ɛɛbu. (Mum 19:1-3) Ɛɛ na ziī gbɛnɛ siranu a nɛ ɛɛbu lo a le bu kpa Mumuuna, lo a le doonu “i’ii wa lo Nwiī-naana-pee.”—Mum 19:6-9.

12. Dookɛ̄ alu etɔgɛ doo bu kpa Mumuuna 21:1, 2, mɛ sɔ̄ na doonu ii’ii wa lo Nwiī-naanapee esudɔ a?

¹² Mɛ sɔ̄ na lo doonu ii’ii wa su dɔ a? Dɛ̄dɛɛ̄ nɛɛ a nuūna 144,000 nɛɛ ekii bunyɔɔ lɛɛ nɔ̄ Amagidɔn gae bɔātɛ̄. Kerewo, a naale taɛ lo sɔ̄ na elu edoo doonu ii’ii wa lo Nwiī-naanapee a. (Buū Mumuuna 21:1, 2.) Doonu ii’ii wa lo Nwiī-naanapee sudɔ sɔ̄ nɔ̄ Amagidɔn edɔa sah, sa elua egbeesī dɛ̄dɛɛ̄ pya nɛɛ baa Bari.—Yɔɔ 45:3, 4, 13-17.

13. Taɛ ena doonu ii’ii wa lo Nwiī-naanapee kura nɛ pya lo doonu kuu a?

¹³ Taɛ ena doonu ii’ii wa lo Nwiī-naanapee kura nɛ pya lo doonu kuu a? Kɛādoo, dookɛ̄ iya dam le wa wee su nɛɛdam le nɛɛwa gbaloo ziī doo, kɛ̄ iya dam le wa a tɔɔ̄dɔ nu ama sunage Jizɔs Kraist le “wa iya dam”, lo a le 144,000 pya nɛɛ gbanage loo ziī doolo. Gbɛnɛ doonu ama ebɔātɛ̄ aā bɛbɛɛ lo ebɛɛ nyɔuwe loo 1,000 zua.—Mum 20:6.

14-15. Ena kpa Mumuuna 21 ekobee su 144,000 nɛɛ dooreloo a? (Ɛp foto a le nyɔɔ eko.)

¹⁴ Kpa Mumuuna 21 ekobee sikɛ̄ su 144,000 pya nɛɛ a, dooreloo ziī gbɛnɛ buɛ̄ a kpedɛɛ̄ a kura “Aā Jerusalɛm.” (Mum 21:2, 9) Buɛ̄ ama lu ewu nyɔɔ 12 ekpodɛm alu esu wuā ye ekatɛ̄ be. E nu alu e’ɛm nyɔɔ lo 12 ekpodɛm na “lop le baɛ bee lop le baɛ pya nɛɛ lɛɛratam loo Nwiī-naanapee.” Ena anua Jɔn bee ɛrɛ taɛ bu mɔmanudɛɛ̄ ama ani? Nyɔɔbee  a bee muɛ alɛɛ bee alu e’ɛm nyɔɔ ziī lo ekpodɛm. Lo ama lu kaāna nu ka!—Mum 21:10-14; Ɛfɛs 2:20.

¹⁵ Lɔgɔ buɛ̄ a bee buɛ̄ a tɔɔ̄dɔ nu ama naale. Bee lu esu kaāna gold kwaā nyɔɔ dee lo buɛ̄, e a bee lu esu pearl kwaā 12 ye nudee, sa a bee lu esu dɛm a kūnaloo, kpedɛɛ̄ sa si gbɛnɛ du kwaā ye ekpadɛɛ̄ le ye ekatɛ̄ be. (Mum 21:15-21) Kerewo, a bee bee kɔ a ɛrɛ nu a naale bu lo buɛ̄! Yere nukuādɛɛ̄loo nu Jɔn sikɛ̄ kɔ: “E mm bee muɛ lɔgɔ tɔkaɛ ye bu, nyɔnɛbee Nɛɛ-a-i-ɛrɛ Bari lo a bɛɛ dɛ̄dɛɛ̄ nu le Nwiī-naana-pee lu ye tɔkaɛ. E buɛ̄ a due ale enɔɔ̄ naa bɛɛ̄ ye, lo emɔ ye nyɔɔ, nyɔnɛbee nyɛŋia lo Bari na ye ɛɛdee a, e ye numiā na Nwiī-naana-pee.” (Mum 21:22, 23) Pya a nuūna Aā Jerusalɛm e’ɛrɛ dee lo ele kpaɛ̄ Jɛhova. (Hib 7:27; Mum 22:3, 4) Nyɔɔwo, Jɛhova le Jizɔs na ba lu tɔkaɛ bu lo buɛ̄ a.

16. Ena esiraloo pya miɔŋɔ nɛɛ kɛɛ̄ Bɛbɛɛ Baɛ Boo Le Lop Tup Zua loo Buɛ̄-Mɛnɛ Bari a?

¹⁶ A kpeloo pya alu etɔ̄ nɔɔ̄ bee sɔ̄ ba kɛɛrɛ nu akiiloo buɛ̄ ama. Kerewo, a ɛrɛnage nu anua pya a ɛrɛ bɛābu lo etɔɔ̄ a kɛnɛkɛ̄ e’ɛrɛ taɛ bu. Aā Jerusalɛm enua gbɛnɛ-edo leelee bu Bɛbɛɛ Baɛ Boo Le Lop Tup Zua loo Buɛ̄-Mɛnɛ Bari. Jɔn bee muɛ pya lo leelee ama a gaa tɛɛ̄ doodoo “pɛnɛ maa dum.” E “te dum” le baɛ sīloo pɛnɛ a, lo ye epanya lu lo a “bo dɛ̄dɛɛ̄ edonyɔɔ.” (Mum 22:1, 2) Dɛ̄dɛɛ̄ pya nɛɛ a le dum lo sɔ̄ e’ɛrɛ dee lo e’ɛrɛ biī aāloo pya leelee ama. Kinakina, elu edoo kɔ dɛ̄dɛɛ̄ nɛɛ a gbaɛ̄tɔ̄loo Jɛhova alu pya a mmana. Eyɔloo naale elena, ale ezialoo, e to le ekiɛ̄nu naale elena.—Mum 21:3-5.

17. Dookɛ̄ Mumuuna 20:11-13 tɔgɛ doo, ba mɛɛ̄ na e’ɛrɛ biī aāloo Bɛbɛɛ Baɛ Boo Le Lop Tup Zua a?

¹⁷ Ba mɛɛ̄ na e’ɛrɛ biī aāloo pya leelee ama ani? Tuatua, ɛɛ pya gbɛnɛ eku nɛɛ a tɛɛ̄ yeebah nɔ̄ Amagidɔn, gbaāloo pya miɔŋɔ emɛā bu aā nyɔuwe. Kpa Mumuuna 20 ekobee yira yii i nɛ kɔ pya a bee u e’aakɛ̄ bu luh. (Buū Mumuuna 20:11-13.) Pya “kaāna dogo” a bee u sɔ̄ akii adumɛ gbaāloo “pya pɔrɔ dogo” lo ba naa bee ɛrɛ dee lo enɔnu akiiloo Jɛhova, e’aakɛ̄ bu luh sa sikɛ̄ tɔɔ̄dum a kɛnɛkɛ̄. (Doonu 24:15; Jɔn 5:28, 29) A kurage kɔ elu elɛɛ dɛ̄dɛɛ̄ nɛɛ kɛ̄ bu  luh kɔ ba a tɔɔ̄dum a nyɔɔ kɛnɛkɛ̄ kɛɛ̄ Bɛbɛɛ Baɛ Boo Le Lop Tup Zua ni? Eeye doo pippip. Pya a bee ɛmɛnɛbee kiī dee a bee wa kpaānɛ lo etaāŋabah Jɛhova lɛɛ ba gae u naale elu elɛɛ wa kɛ̄ bu luh. Ba bee ɛrɛ dee a wa kpaānɛ, kerewo ba bee doo nu a tɔgɛ kɔ ba naa bɔeloo e’ɛrɛ dum a naatah bu Paradais a kɛnɛkɛ̄.—Mat 25:46; 2 Tɛs 1:9; Mum 17:8; 20:15.

18. Kɛ̄tɔɔ̄ nyɔuwe ele doodoo wa sɔ̄ 1,000 zua e’ina kuma?

¹⁸ Lɛɛ 1,000 zua gae ina kuma, elu edoo kɔ dɛ̄dɛɛ̄ pya a le a nyɔɔ kɛnɛkɛ̄ a mmana. Pɔrɔ a bee lu e’ɛrɛ aābah Adam naale e’ɛrɛna bah ekpoloo pya nɛɛ a tɔɔ̄dum lo sɔ̄. (Rom 5:12) Elu elɛɛ kaɛnu a aaloo pɔrɔ Adam. Bu lo sīdee pya ba le a kɛnɛkɛ̄ “[esikɛ̄] le dum” doodoo pya nɛɛ a mmana bu kuma lo 1,000 zua.—Mum 20:5.

19. Ena anua kpɛdumɛ doā-ɛp lu ebɛɛ̄ a?

¹⁹ I suā kɔ Jizɔs bee amana epiaga Setan bee doo lo etɛrɛ ye kaāna yira. A bee kiisī lo ebɔ ture nyiɛ loo kɛ̄bah doā-ɛp. Mɛ ekɔ dɛ̄dɛɛ̄ pya a mmana edooge wo sɔ̄ elu enɛ dee Setan kɔ a doā wa ɛp ni? Ziī ziī nɛɛ e’agara ebip ama nyɔɔ ye loo, sɔ̄ elu elɛɛ Setan bu abyss sɔ̄ Bɛbɛɛ Baɛ Boo Le Lop Tup Zua e’ina kuma. (Mum 20:7) Pya a bia bu bɔloo ture nyiɛ loo bu lo kpɛdumɛ doā-ɛp e’ɛrɛ dum a naatah sa ɛrɛ wa loo kaāna. (Rom 8:21) Elu egbeesī pya a lɛɛbeekɛɛ̄, gbaāloo Pɔrɔ-edɔɔ̄ le pya ye gbo-yɔ mmɛ deedee.—Mum 20:8-10.

20. Pya ekpeloo ue mɔmanudɛɛ̄ a le bu kpa Mumuuna tɔɔ̄ a loo doodoo wa?

²⁰ Kerebah nu i enɔā aābu kpa Mumuuna ama tɔɔ̄ a loo doodoo wa? Ekɔ a naa ɛɛrɛ a bu lo emuɛ sɔ̄ pya mɔmanudɛɛ̄ ama esira ni? Ekɔ a naa doo kɔ a taɛ a lo ekue pya dɔɔ̄na kɔ ba a gbaa i loo lo etaāŋabah i Bari ni? (Mum 22:17) Kuma sɔ̄ i enɔā nu esira li deesī a, a zū i kɔ i kɔ dua ue nɛɛ lɛɛratam Jɔn bee kɔ, lo a kɔ: “Amɛn. Lu, Nɛɛ-a-i-ɛrɛ Jizɔs.”—Mum 22:20.