1-2. Ziī ena anua i ɛrɛ taɛ bu kpa Mumuuna a?

 EBEE luge ekɔ a nɛ kɔ o ɛp pya foto ziī nɛɛ ni? Kuma sɔ̄ o gaa ɛp a, o bee muɛ pya nɛɛ oo suāloo. Kerewo, a ɛrɛ taɛ lo o ɛp kaāna. Ena anua ani? Nyɔɔbee o le bu lo foto. Kuma sɔ̄ o aa ɛp a, o bee piiga lo enyɛŋiabu sɔ̄ a bee lu esu lo foto, le kɛ̄ a bee lu esu bie. O bee gbīnage esuāloo dɛ̄dɛɛ̄ pya a le bu lo foto. Lo foto ɛrɛ kaāna nu a a kura nɛ.

² Kpa Mumuuna le doodoo lo foto. Ena anua a? A ɛrɛ baɛ nu anua. Tuatua, bee lu e’ɛm kpa Baibol ama nyɔɔ ili. Bu tua barakpaɛ̄ a le loo, i buū kɔ: “Mumuuna lo Jizɔs Kraist, lo Bari bee nɛ kɔ a tɔgɛ pya ye zooro nu a enwaaba dooa; e a doo kɔ alu esuā tɛ̄maloo yeyere ye ɛnjɛl ma ye zooro Jɔn.” (Mum 1:1) Nyɔɔwo, pya nu alu e’ɛm bu kpa ama naale nɛ pya dɔɔ̄na nɛɛ, mɛ a le nɛ ili pya zooro Bari lo ekīnaloo ye nɛ. Doodoo pya nɛɛ Bari, aa i lu nyɛŋialoo kɔ i aa ɛrɛ epoo bu doo gbɔ̄mɛɛ̄ pya mɔmanudɛɛ̄ a le bu kpa a kpeloo ama. Nyɔɔwo, bu dɔɔ̄na sīdee i muɛ aba ii “bu lo foto.”

3-4. Dookɛ̄ kpa Mumuuna kɔ doo, mɛ sɔ̄ na pya ye ue mɔmanudɛɛ̄ edooa gbɔ̄mɛɛ̄ a, e amunu pah na a lee kɔ a ɛrɛ nyɔɔ ziī ziī ii a?

³ Eree baɛ nu anua ɛrɛ nu edoo kiiloo sɔ̄ pya lo mɔmanudɛɛ̄ edooa gbɔ̄mɛɛ̄. Nɛɛ lɛɛratam Jɔn ebee ana ama bee yere nukuādɛɛ̄loo lo sɔ̄, sɔ̄ a kɔ: “M bee le bu edɔɔ̄ nyɔɔ dee Nɛɛ-a-i-ɛrɛ.” (Mum 1:10) “Dee Nɛɛ-a-i-ɛrɛ” bee lege ebini, sɔ̄ Jɔn bee ɛm pya ue ama bu zua 96 C.E. (Mat 25:14, 19; Luk 19:12) Mɛ dookɛ̄ mɔmanudɛɛ̄ Baibol kɔ doo, lo dee bee bɔātɛ̄ bu zua 1914 sɔ̄ a bee lu ewu Jizɔs nua Mɛnɛ li bunyɔɔ. Aāge lo sɔ̄ kiisī, pya mɔmanudɛɛ̄  a ɛrɛ nu edoo kiiloo pya nɛɛ Bari bee bɔātɛ̄ edooa gbɔ̄mɛɛ. Bu kaka, nii’ee i aa tɔɔ̄dum bu “dee Nɛɛ-a-i-ɛrɛ”!

⁴ Nyɔɔbee i aa tɔɔ̄dum bu sɔ̄ ama, a lee kɔ i ɛp zuurabahtɔ̄ a le bu kpa Mumuuna 1:3 leere, lo a kɔ: “Leelee a le nɛ nɛɛ a buū le pya a dā dɛ̄dɛɛ̄ lo zue ue ama, le pya a sere nu a bee lu e’ɛm bu; nyɔnɛbee lo sɔ̄ ewara.” Bu kaka, alu ebɛɛ̄ kɔ i ‘buū dāna muɛ̄ nɛ nyɔɔ,’ lo edā “dɛ̄dɛɛ̄ lo zue ue,” sa wa “sere.” Pio amunu ue na a bɔloo kɔ i sere a?

5. Bu mɛ sīdee na kpa Mumuuna kɔ siībahdɛɛ̄ kɛ̄ alu ebɛɛ̄ doo kɔ i doo kɔ i taāŋabah alu lo Jɛhova dap su a?

⁵ Aāloo tua ekobee loo kpa Mumuuna, i muɛ kɔ Jizɔs aa muɛ dɛ̄dɛɛ̄ nu a gaa sira bu bɔŋanaloo pya ye nɛɛ. (Mum 1:12-16, 20; 2:1) Jizɔs bee doo kɔ alu esuā lo ama aāloo ue a bee yere ma ɛrɛba bɔŋanaloo a bee le barasī Asia Minor. Bu pya lo yereue, a kɔ taɛtaɛ nu Pya Nɛɛ Kraist a bee le bu tua sɔ̄ o’oo tup zua edoo lokwa Jɛhova dap su wa taāŋabah. Kerewo, pya nu a bee kɔ bu lo yereue ɛrɛ nu edoo kiiloo dɛ̄dɛɛ̄ pya nɛɛ Bari a le anii’ee. Ena i dap nɔ aāloo ani? I Nɛɛ Zaāsī lo a le Jizɔs Kraist suā nu akiiloo i kɛ̄tɔɔ̄ bu edɔɔ̄. Jizɔs gaa i baɛbee, sa lɔgɔ nu naa gɔā ye kɛ̄dɛɛ̄. A suā nu alu ebɛɛ̄ kɔ i doo lokwa i kiisī lo e’ɛrɛ yerekpotɛ̄ a aabah Jɛhova. Amunu zuurabahtɔ̄ na a bee nɛ lo alu ebɛɛ̄ kɔ i gbaɛ̄tɔ̄loo anii’ee ani?

6. (a) Dookɛ̄ ue Jizɔs a le bu kpa Mumuuna 2:3, 4 tɔgɛ doo, amunu taāŋa na pya a bee le bu bɔŋanaloo Ɛfɛsɔs bee ɛrɛ a? (b) Ena i nɔ aāloo lo ama a?

⁶ Buū Mumuuna 2:3, 4. Ii ɛrɛ epeere tua wereloo i bee ɛrɛ kumaloo Jɛhova. Yereue Jizɔs bee ɛm ma pya a bee le bu bɔŋanaloo Ɛfɛsɔs tɔgɛ kɔ ba bee ɛrɛ egerebu sa kiisī lo etaāŋabah Jɛhova kaɛlɛɛ keekee nu finiabah ba gaa bee kpesī. Kerewo, ba bee peere wereloo ba bee ɛrɛ tua sɔ̄. Bee lu ebɛɛ̄ kɔ ba a doo kɔ wa wereloo a sikɛ̄ agatɛ̄, lokwa a dap lu esu wa taāŋabah. Bu aba lo sīdee anii’ee, i ɛrɛ edoo nu a eenyɔɔ aba e’egerebu. Alu ebɛɛ̄ kɔ ekɛɛrɛ a le dumɛ nu anua i egerebu alu lo a bɔloo. Ilii Bari ɛrɛ nia bu nu i doo le nu anua i doo lo nu. Ekɛɛrɛ a le dumɛ ɛrɛgeba nu i doo kuī ye loo, nyɔɔbee a gbī kɔ i taāŋa ye bah aāloo togatoga wereloo le nia i ye ɛrɛ kumaloo.—Kam 16:2; Maak 12:29, 30.

7. (a) Dookɛ̄ ue a le bu kpa Mumuuna 3:1-3 tɔgɛ doo, amunu taāŋa na Jizɔs bee muɛ loo pya a bee le bu bɔŋanaloo Sardis a? (b) Ena alu ebɛɛ̄ kɔ i doo a?

⁷ Buū Mumuuna 3:1-3. I ɛrɛ ekiisī lo etɔɔ̄ yeere sa nwaɛ̄dɛɛ̄. A ɛrɛ taāŋa lo pya a bee le bu bɔŋanaloo Sardis bee ɛrɛ, lo a bee lu kee loo lo pya Ɛfɛsɔs. Kereadoo ba bee bɛamiā bu edɔɔ̄ bu pya sɔ̄ a tɛɛ̄ kii adumɛ, ba bee bɔātɛ̄ e’ɔloo bu taāŋabah Bari. Nyɔɔwo, Jizɔs bee wa kɔ nɛ kɔ ba a ‘aakɛ̄.’ Ena alu zuurabahtɔ̄ i ɛrɛ aāloo a? Alu kaka kɔ Jɛhova naale e’ibere pya tam i esia ye nɛ. (Hib 6:10) Kerewo, ii le edɛɛa nyɔɔ aba pya tam i ebee si nɛ Jɛhova sɔ̄ a tɛɛ̄ kii adumɛ. A dap lu kɔ a ɛrɛ pya nu ii aa dapna doo anyaawo dookɛ̄ i wee doo tua sɔ̄, mɛ alu ebɛɛ̄ kɔ i “si tam Nɛɛ-a-i-ɛrɛ eenyɔɔ dɛ̄dɛɛ̄ sɔ̄,” sa kiisī lo etɔɔ̄ yeere sa bia bu nwaɛ̄dɛɛ̄ mmɛ kuma.—1 Kɔr 15:58; Mat 24:13; Maak 13:33.

8. Dɛɛa nyɔɔ ue a le bu kpa Mumuuna 3:15-17, ena i nɔ aāloo pya ue Jizɔs bee kɔ nɛ pya wuga a bee le Leodisia a?

 ⁸ Buū Mumuuna 3:15-17. I ɛrɛ ebɛamiā sa doo kɔ i taāŋabah a aa bu dɛ̄dɛɛ̄ i beenyiɛ. Ue Jizɔs bee yere ma pya wuga a bee le Leodisia tɔgɛ dɔɔ̄na taāŋa ba bee ɛrɛ, lo alu kee loo lo pya dɔɔ̄na bɔŋanaloo. Ba bee lu “ɔrɛɔrɛ” bu wa taāŋabah. Nyɔɔbee wa kɛ̄tɔɔ̄ a ɔloo ama, Jizɔs bee wa kɔ nɛ kɔ ba lu pya “nɛɛ a bee muɛ lɛadɛɛ̄, nɛɛ a bɔloo toesaɛ̄.” A bee lu ebɛɛ̄ kɔ ba a sikɛ̄ ɛrɛ gbɛnɛ mɛm sa bɛamiā bu taāŋabah Jɛhova. (Mum 3:19) Ena i nɔ aāloo a? Lo ii aa bɛanamiā dookɛ̄ i wee doo, alu ebɛɛ̄ kɔ i sikɛ̄ tɔgɛ kaāna nialoo pya lele zɔ bu edɔɔ̄ lo Jɛhova le ye bɔŋanaloo aa i nɛ. (Mum 3:18) Ii le eyiga kɔ tɔɔ̄ ekpeloo dum a dabara i ekɛɛrɛ, sa doo kɔ i aa suna pya nu bu edɔɔ̄ nua tuatua.

9. Dookɛ̄ pya ue Jizɔs bee yere ma Pya Nɛɛ Kraist a le Pagamɔm le Taiataira tɔgɛ doo, amunu nu alu gɛɛgɛɛloo na a bɔloo kɔ i kpooraloo lɛɛloo a?

⁹ I ɛrɛ ekiī tɔgɛnu pya anna yira. Jizɔs bee kāmɛnɛ pio Pya Nɛɛ Kraist a bee le Pagamɔm nyɔɔbee ba gaa bee yere epoo epoo le labalaba bu bɔŋanaloo. (Mum 2:14-16) A bee kaɛgɛ pya a bee le Taiataira lo ba bee kiī “nu gɔā lo Setan a toga,” e a bee wa zū kɔ ba a “aabaloo” kaka ue agɛrɛ. (Mum 2:24-26) Bee lu ebɛɛ̄ kɔ Pya Nɛɛ Kraist a bee le lo kɛ̄ a kiiya, lo ba ebee ɔloo sa aaloo kɔ alu edag wa tɛ̄maloo ekwɔ tɔgɛnu. E ili anii’ee a? I ɛrɛ ekiī ɛrɛgeba tɔgɛnu a be sa naa gbaaloo ekɛɛrɛ Jɛhova. Pya anna yira dap “ɛrɛ ekoo enwadɛɛ̄ Bari,” kerewo, “ba ana ye ekpo.” (2 Tim 3:5) Lo i nɔ Muɛ̄ Ue Bari kaāna, naale e’aga i loo lo esuāloo sa kiī ekwɔ tɔgɛnu.—2 Tim 3:14-17; Jud 3, 4.

10. Dɔɔ̄na ena i dap nɔ aāloo nu Jizɔs bee kɔ nɛ pya bɔŋanaloo a bee le Pagamɔm le Taiataira ani?

¹⁰ I ɛrɛ ekiī dɛ̄dɛɛ̄ sīdee kunagā. A ɛrɛ dɔɔ̄na taāŋa lo pya wuga a bee le Pagamɔm le Taiataira bee ɛrɛ. Jizɔs bee kɔgara ue pio nɛɛ a bee le bu pya lo bɔŋanaloo nyɔɔbee ba naa bee kiī dum kunagā. (Mum 2:14, 20) Ena i nɔ aāloo a? Lo i yii bu ɛrɛgeba sīdee kunagā, ii le e’ɛmadɛɛ̄ kɔ Jɛhova e’ɛp tɛrɛ doo pippip, kere alu kɔ i etaāŋa ye bah bu gbɛnɛ-edo zua sa ɛrɛnage pya dɔtam a i le bah bu bɔŋanaloo anyaawo. (1 Sam 15:22; 1 Pit 2:16) A gbī kɔ i tɔɔ̄ nyɔɔ  ye daakuu a kii nyɔɔ sa ɛɛ, kaɛlɛɛ kɛ̄ tɔɔ̄dum a ɛɛ aa dɔ kiikɛ̄ bu nyɔuwe doo.—Ɛfɛs 6:11-13.

11. Ena i enɔā aā sɔ̄ a? (Buū ekpo a kɔ “ Pya Nu Ili Nɔ Aāloo Anii’ee.”)

¹¹ Ena i enɔā aāloo pya nu i ekɔa aā sɔ̄ a? I emɔna kɔ i ɛrɛ edoo kɔ i taāŋabah alu lo Jɛhova esu baɛbah suā. Lo a ɛrɛ ziī nu i gaa doo a dap doo kɔ aa lu esu i taāŋabah, a bɔloo kɔ i nwaabah doo dogo sa kwabaloo. (Mum 2:5, 16; 3:3, 16) A ɛrɛnage dɔɔ̄na nu Jizɔs bee kɔ bu yereue a bee yere ma pya lo bɔŋanaloo. Ena lo nu ani?

12. Ena i dap nɔ aāloo nu Jizɔs bee kɔ nɛ pya wuga a bee le Smurna le Filadɛlfia a? (Mumuuna 2:10)

¹² Doraa i naa kɔ nu akiiloo ue Jizɔs bee yerema pya bɔŋanaloo a le Smurna le Filadɛlfia. A bee kɔ nɛ Pya Nɛɛ Kraist a le lo kɛ̄ kɔ bɔɔ aa wa aa loo tɛ̄ŋaloo, nyɔnɛbee Jɛhova enɛ wa ekpɛanu lo ba bia bu bɔ ture nyiɛ loo. (Buū Mumuuna 2:10; 3:10) Ena ili nɔ aāloo anii’ee a? I ɛrɛ e’ɛmadɛɛ̄ kɔ a dap lu etɛ̄ŋa i loo, sa kpɛ̄naloo e’egerebu. (Mat 24:9, 13; 2 Kɔr 12:10) Ena anua ue ama lu nu a kuī a?

13-14. Bu mɛ sīdee na siranu alu ebaatɛ̄ bu kpa Mumuuna 12 ekobee ɛrɛ pah nyɔɔ pya nɛɛ Bari a?

¹³ Kpa Mumuuna doo kɔ i suā kɔ elu etɛ̄ŋaloo pya nɛɛ Bari bu ilii dee ama, lo a le “bu dee Nɛɛ-a-i-ɛrɛ.” Kpa Mumuuna 12 ekobee kɔ nɔ̄ bee dɔ bunyɔɔ aba sɔ̄ a bee lu ewu Jizɔs nua Mɛnɛ. Maikɛl—lo a le Jizɔs a le ye dɔ ka, gbaāloo pya ye gbo nɔ̄ bee bebeloo Setan le pya ye gbo-yɔ. (Mum 12:7, 8) E nu a bee sira aabu na kɔ, a bee lu ebe eebah pya nɛɛ baa Bari ama sa wa top tɛrɛ kɛnɛkɛ̄. E lo ama bee doo kɔ pya nɛɛ a le nyɔɔ kɛnɛkɛ̄ a sikɛ̄ tɔga ereloo. (Mum 12:9, 12) Mɛ, bu mɛ sīdee na nu a bee sira ama bee ɛrɛ pah nyɔɔ pya nɛɛ Bari a?

¹⁴ Kpa Mumuuna kɔ kɛ̄ Setan sikɛ̄ doo dogo doo. Kuma sɔ̄ a naa dapna ɛrɛ dee lo ekii bunyɔɔ a, a kiira ye saŋ kpee pya a siga yɛɛ pya a bee lu etɔ̄ nɔɔ̄ bee, lo a le pya a yira dɔ Buɛ̄-mɛnɛ Bari a kɛnɛkɛ̄ le pya a “yira ekeebee loo Jizɔs.” (Mum 12:17; 2 Kɔr 5:20; Ɛfɛs 6:19, 20) Mɔmanudɛɛ̄ ama dooa gbɔ̄mɛɛ̄ doodoo wa?

15. Ba mɛɛ na a tɔɔ̄dɔ “baɛ . . . nɛɛ ekeebee” alu ekɔ ue kumaloo bu kpa Mumuuna 11 ekobee a, e ena a bee wa siraloo a?

¹⁵ Setan bee doo kɔ pya nɛɛ baa Bari a bebeloo pya i wuga alu etɔ̄ nɔɔ̄ bee lo ba gaa bee zaāsī tam zue ue Buɛ̄-mɛnɛ. Pya a gaa bee zaāsī tam yɛɛ pya a bee lu  etɔ̄ nɔɔ̄ bee na a bee lu ekɔ ue kumaloo bu sīdee a tɔɔ̄dɔ nu kɔ ba lu “baɛ . . . nɛɛ ekeebee” a bee lu efɛ a. * (Mum 11:3, 7-11) Bu zua 1918, pya tɔbiaɛ bee dɛrɛ ue ɛrɛtaa pya wuga nɛɛdam a bee le yɛɛ pya wuga nɛɛdam a bee lu etɔ̄ nɔɔ̄ bee ama kɔ ue bee wa, sa ba bee biaɛ kɔ ziī ziī aba a tɔɔ̄ kpɔgɔrɔ bu nyɔɔnyɔɔ sɔ̄. Aāloo kɛ̄ nɛɛ ɛp nu doo, a bee bee kɔ tam pya alu etɔ̄ nɔɔ̄ bee ama elua “efɛ.”

16. Amunu nu alu nyɛŋia na a bee sira bu zua 1919 a, kerewo ena Setan aa kiigesī lo edoo a?

¹⁶ Mɔmanudɛɛ̄ a le bu kpa Mumuuna 11 ekobee kɔnage kɔ elu e’obara “baɛ [lo] nɛɛ ekeebee” sere dum, sɔ̄ ziī nwī sɔ̄ etɛ̄na. Mɔmanudɛɛ̄ ama bee dooa gbɔ̄mɛɛ bu sīdee alu nyɛŋia, sɔ̄ a sii lu ziī zua aā sɔ̄ a bee lu eyere wa kpɔgɔrɔ. Bu bagara sɔ̄ bu zua 1919, bee lu elɛɛ pya wuga nɛɛdam a bee lu etɔ̄ nɔɔ̄ bee ama kpɔgɔrɔ, e sɔ̄ esaa pya lo tɔbiaɛ bee kpaɛ̄ kpa loo ue ba bee wa dɛrɛ a. Aba lo sɔ̄, pya lo wuga bee sikɛ̄ bɔātɛ̄ ezaāsī tam zue ue Buɛ̄-mɛnɛ dookɛ̄ ba bee le aa doo. Kerewo, Setan naa bee ɔbɛ ebebeloo pya nɛɛ Bari. Aāge lo sɔ̄ mmɛ anyaawo, Setan edora kɔ tɛ̄ŋaloo a le doodoo “maā” a uuwa nyɔɔ pya nɛɛ Bari. (Mum 12:15) Bu kaka, “kɛ̄ ama na nyɔɔnyɔɔ egerebu le yira” lu ebɛɛ̄ kɔ ziī ziī ii i ɛrɛ a.—Mum 13:10.

17. Amunu yerebah a naa bee lu e’ɛmadɛɛ̄ na pya nɛɛ Bari e’ɛrɛ kereadoo Setan aa kiigesī lo ebe wa be loo a?

¹⁷ Mumuuna 12 ekobee kɔ pya nɛɛ Bari e’ɛrɛ yerebah aākɛ̄ a naa bee lu e’ɛmadɛɛ̄. E le doodoo bee “kɛnɛkɛ̄” yɔgara dɛ̄dɛɛ̄ lo “pɛnɛ” a, lo a le tɛ̄ŋaloo pya nɛɛ Bari aa bee tɛɛ̄bu a. (Mum 12:16) Taɛ nu a sira lo. Pio sɔ̄, pya nyɔuwe doodoo siga pya biaɛ edora dogo suānu le loo tɛ̄maloo e’agara pya nɛɛ Bari. Gbɛnɛ-edo sɔ̄, pya zooro Jɛhova e’erabah keekee ue a bee lu eyere tɔbiaɛ, e lo ama edora kɔ ba a dap ɛrɛ wa loo bu pio sīdee. Ba esua ɛrɛ wa loo ama daānu doodoo wa ni? Ba su ɛrɛgeba dee a wa kpaānɛ siātam Jɛhova enɛā wa. (1 Kɔr 16:9) Pya ena alu lo tam a?

18. Ena alu tam alu enɛ i kɔ i si bu kpɛdumɛ dee ama a?

 ¹⁸ Jizɔs bee kɔ sere kɛ̄ kɔ pya ye nɛɛ gaa le zue “le yereue . . . lo Buɛ̄-mɛnɛ” Bari tɛ̄ma ɛŋɛnɛ dɛ̄dɛɛ̄ nyɔuwe lɛɛ kuma gae lu. (Mat 24:14) Sɔ̄ ba aa doo wo, ba ɛrɛ yerekpotɛ̄ a aabah eku pya ɛnjɛl ale ziī ɛnjɛl, lo alu ekɔ ue kumaloo kɔ a ɛrɛ “le yereue a naa wee tah lo ezue nɛ pya a tɔɔ̄ bu nyɔuwe, nɛ dɛ̄dɛɛ̄ edonyɔɔ, le edo, le edɛm, le pya nɛɛ.”—Mum 14:6.

19. Dɔɔ̄na amunu yereue na pya a wereloo Jɛhova ɛrɛ ezue a?

¹⁹ Naale aba le yereue akiiloo Buɛ̄-mɛnɛ na pya nɛɛ Bari ezue a. Alunage ebɛɛ̄ kɔ ba a yerekpotɛ̄ tam pya ɛnjɛl alu ebaatɛ̄ bu kpa Mumuuna 8 mmɛ 10 ekobee aa si. Pya ɛnjɛl ama aa kɔ siā keekee nu ezia pya a kiī Buɛ̄-mɛnɛ Bari. Nyɔɔwo, Pya Ekeebee Jɛhova aa zue yereue biaɛ siā, lo a le doodoo “beebee maā le miā,” e lo ama tɔgɛ biaɛ Bari nyɔɔ keekee gah a le loo nyɔuwe Setan. (Mum 8:7, 13) Alu ebɛɛ̄ kɔ pya nɛɛ a suā kɔ kuma lo nyɔuwe ama ewara, lokwa ba dap nyaana wa sīdee tɔɔ̄dum sa tɛɛ̄ yeebah dee gbɛnɛ saŋ Jɛhova. (Zef 2:2, 3) Kerewo, yereue ama naa bokɛ̄. Kɔkɔ yereue ama gbī e’agaloo i aābah. Bu sɔ̄ gbɛnɛ etɛɛrɛloo, kpɛdumɛ yereue biaɛ i zue elu lo a agabah sa yere saŋ bu pya nɛɛ, ee lo i aa zue anyaawo.—Mum 16:21.

20. Ena i gaa le nɔ bu baɛ ekobee ue a nyɔɔnɛ a?

²⁰ Alu ebɛɛ̄ kaāna kɔ i gbaɛ̄tɔ̄loo ‘ue mɔmanudɛɛ̄ ama’ nyɔnɛbee dooa gbɔ̄mɛɛ̄ nu i buū bu kpa Mumuuna ɛrɛnage nu edoo kiiloo ili. (Mum 1:3) Mɛ, bu mɛ sīdee na i dap yira agɛrɛ kɛ̄bah tɛ̄ŋaloo sa kiinagesī lo esu e’agaloo zuema pya yereue ama a? A ɛrɛ baɛ nu enɛ i e’agaloo: lo tuatua na, nu kpa Mumuuna kɔ siā akiiloo pya nɛɛ baa Bari, e lo eree baɛ na, leelee i gaa le ɛrɛ li deesī lo i kiisī lo ebia bu bɔ ture nyiɛ loo. I gaa le nɔ pya nu ama bu baɛ ekobee ue a nyɔɔnɛ.