1. Ena ezɔrabah gbɛnɛ-edo ii loo edoo a?

 O EBEE ɛrɛge nu o bee seeasī bu taāŋabah Bari sa a zɔra a bah lo edoo ni? b Lo a le wo, suā kɔ a wee siranage loo pya dɔɔ̄na doo wo. Bu edoba, Philip bee gbī ekwabaloo dua ue a kɔ bu kara sa gbī eyere kara eekɛ̄ a wee doo, mɛ a bee ye zɔra bah lo e’ɛrɛ sɔ̄ eyeā kara. Erika bee nɔɔ kɔ ewee bagarae le kɛ̄ bu zɔ̄zɔ̄ŋia loo tam zue ue; kerewo, a wee biɛ̄ dumɛ gbɛnɛkpo sɔ̄. Tomáš bee piiga gbɛnɛkpo sɔ̄ kɔ ebuūe yube ekpo Baibol lɛɛ. A kɔ: “Baibol naa bee mɛ kpeloo ebuū. M bee piiga taa sɔ̄ kɔ m buuē lɛɛ, mɛ ziī ziī sɔ̄ ama aba bu kpa Levitikɔs na m ina a.”

2. Ena anua a naa lee kɔ loo i a ɔ lo a ɛrɛ nu i bee seeasī bu edɔɔ̄ lo i sii dap doo a?

² Lo a ɛrɛ nu o seeasī sa o sii dap doo, loo a aa ɔ. Kere ewɛp-bah nu nɛɛ seeasī wee su sɔ̄ le epiaga lo edoo. Nyɔɔbee o lege aa gbī edoo nu o bee seeasī a, tɔgɛ kɔ o su gbanialoo o ɛrɛ kiikɛ̄ Jɛhova le nua gbɛnɛ sa gbī esitam ye nɛ kumakɛ̄ o ekpo toora doo. Jɛhova tɔgɛ nialoo o epiaga. Kɛādoo, a naa ɛmadɛɛ̄ nu oo le edap doo a aābah. (Yɔɔ 103:14; Maika 6:8) Nyɔɔwo, pya nu o seeasī alu lo ba o dap doo, dɛɛa nyɔɔ kɛ̄ o kɛ̄tɔɔ̄ a nɛ dee doo. Sɔ̄ o esagɛ nu o seeasī sah, ena o dap doo lokwa o doo nu o bee seeasī a? I naa kɔ pio nu o dap doo.

3. Ena anua alu ebɛɛ̄ kɔ i ɛrɛ taɛ lo edoo nu i seeasī a?

³ Alu ebɛɛ̄ kɔ i ɛrɛ kaāna taɛ lokwa i dap doo nu i bee seeasī bu edɔɔ̄. Nɛɛ a ɛrɛ taɛ, wee dap doo nu a bee  seeasī nyɔɔbee lo taɛ zū ye sa ye yere mɛm loo. I dap su taɛ dooreloo efɔp a gaa taābah fah a le nyɔɔ maā kuma kɛ̄ a gaa lu e’ɔp ye kuma. Lo efɔp kiisī lo etaā ye bah, nɛɛ aa ɔp lo fah edap ina kɛ̄ aa bee kii. E lo lo efɔp agabah enwaabah ina kɛ̄ eekɛ̄ a bee ɛmadɛɛ̄ doo. Bu aba sīdee ama, kɛ̄ taɛ i ɛrɛ kumaloo nu i bee seeasī agabah doo, kɛ̄ i agɛrɛnagebah doo mmɛnɛ doolo. Ziī wuga nɛɛdam a kura David a aa El Salvador kɔ: “Sɔ̄ o ɛrɛ taɛ lo edoo ziī nu, o piiga kaāna lo edoo ye. O piiga sa oo le eyiga kɔ lɔgɔ nu a kpaɛ̄ a lɛɛ loo edoo nu o bee seeasī.” Nyɔɔwo, ena o doo lo e’ɛrɛ gbɛnɛ taɛ kumaloo a?

4. Ena i dap yere kara bara a? (Pya Filipai 2:13) (Ɛpnage foto.)

⁴ Yere kara lo e’ɛrɛ taɛ yereloo. Tɛ̄maloo ye edɔɔ̄ Jɛhova dap doo kɔ o ɛrɛ taɛ lo edoo nu o bee seeasī. (Buū Pya Filipai 2:13.) Pio sɔ̄ i wee ɛrɛ nu i seeasī nyɔnɛbee i suā kɔ a bɔloo kɔ i doo wo, e a lee sɔ̄ i doodoo wo. Mɛ ii dap ɛrɛ kaāna taɛ lo edoo nu i bee seeasī. Kɛ̄ a bee siraloo ziī wuga nɛɛwa li Uganda ye bee kura Norina doolo. A bee seeasī kɔ eseree ziī enɔānu Baibol, mɛ nyɔɔbee a bee kɛɛrɛ kɔ a naa parae tɔgɛe nu a, a naa bee ɛrɛ kaāna taɛ lo edoo wo. Ena a bee ye yerebah nɛ a? A kɔ: “M bee bɔātɛ̄ bara Jɛhova ziī ziī dee kɔ a yerebah mɛ nɛ kɔ m agɛrɛbah ɛrɛ taɛ lo esere enɔānu Baibol. Aba lo sɔ̄ m bee nɔ kɛ̄ etɔgɛ nu leere doo. Sɔ̄ pio enɔɔ̄ etɛ̄na, m bee muɛ kɔ na taɛ lo esere enɔānu Baibol enyima yiiloo. Bu aba lo zua, m bee bɔātɛ̄ esere baɛ enɔānu Baibol.”

5. Ena i dap ɛrɛ ekɛɛrɛ nyɔɔ lo edoo kɔ taɛ i ɛrɛ lo edoo nu i bee seeasī a nyim a?

⁵ Ɛrɛ ekɛɛrɛ nyɔɔ nu Jɛhova edoora a nɛ. (Yɔɔ 143:5) Nɛɛ lɛɛratam Pɔɔl bee ɛrɛ ekɛɛrɛ nyɔɔ ewonu lo Jɛhova bee ye ɛrɛ kumaloo, e lo ama bee ye zū kɔ a agɛrɛbah si tam nɛ Jɛhova. (1 Kɔr 15:9, 10; 1 Tim 1:12-14) Bu aba lo sīdee, kɛ̄ o ɛrɛ ekɛɛrɛ nyɔɔ nu Jɛhova edoora a nɛ doo, kɛ̄ o agɛrɛnagebah ɛrɛ taɛ lo edoo nu o bee seeasī doo lo. (Yɔɔ 116:12) Naa kɛɛrɛbu nu a bee yerebah nɛ ziī wuga nɛɛwa li Honduras kɔ a dap doo nu a bee seeasī lo elu nɛɛ sɛmdee. A kɔ: “M bee kɛɛrɛbu kɛ̄ Jɛhova mɛ wereloo gbɛnɛ doo. E sua mɛ yere yɛɛ pya ye nɛɛ. A kuū mɛ dɛɛ̄loo sa mɛ baɛloo. Dua ekɛɛrɛ ama e’agɛrɛtɛ̄ wereloo m ye ɛrɛ kumaloo sa doo kɔ taɛ m ɛrɛ lo edoo nu m bee seeasī a nyim.”

6. Dɔɔ̄na ena edap i yerebah nɛ kɔ i nyimɛ taɛ i ɛrɛ a?

⁶ Kɛɛrɛbu pya leelee o ɛrɛ lo o doo nu o bee seeasī. Naa ɛp nu a bee yerebah nɛ Erika i bee kue bee tua sɔ̄ a, sɔ̄ a bee  seeasī lo ebagara ina kɛ̄ loo zɔ̄zɔ̄ŋia loo tam zue ue. A kɔ: “M bee muɛ kɔ m gaa peere gbɛnɛ-edo nu sɔ̄ m biɛ̄ dumɛ loo tam zue ue. Sɔ̄ m bagara, m dap kana muɛ̄ pya wuga nɛɛdam le nɛɛwa sa su sɔ̄ wa tɔ̄ma kpaɛ̄. M dapnage dā pya lɛra ekɛɛrɛ lo eyerebah mɛ nɛ kɔ m ɛrɛ ɛɛbu bu na tam zue ue sa ye aabaloo leere.” Erika bee sere ekɛɛrɛ nyɔɔ pya biī e’ɛrɛ aāloo ebagara ina kɛ̄ loo tam zue ue, e a bee doo nu a bee seeasī. Pya amunu leelee na olo dap sere ekɛɛrɛ nyɔɔ a? Lo nu o seeasī na buū Baibol ale yere kara, kɛɛrɛ kɛ̄ eyere mɛm loo gbanialoo o ɛrɛ kumaloo Jɛhova doo. (Yɔɔ 145:18, 19) Lo nu o seeasī na ɛrɛ elap dogo Nɛɛ Kraist, sere ekɛɛrɛ nyɔɔ kɛ̄ enyimɛ gbanialoo o nyɔɔnɛ pya dɔɔ̄na ɛnia doo. (Kɔl 3:14) Ena anua oo ɛm dɛ̄dɛɛ̄ nu anua o gbī edoo nu o bee seeasī a? Wee ɛp nu o bee ɛm a dɛ̄dɛɛ̄ sɔ̄. Tomáš i bee kɔ tua sɔ̄ a kɔ: “Sɔ̄ m ɛrɛ gbɛnɛkpo nu anua m seea ziī nu sī wee doo kɔ loo mɛ aa ɔ lo edoo ye.”

7. Ena a bee yerebah nɛ Julio le ye wa kɔ ba a doo nu ba bee seeasī a?

⁷ Tɔɔ̄ kpaɛ̄ pya eyere a mɛm loo kɔ o doo nu o bee seeasī. (Kam 13:20) Naa kɛɛrɛbu loo nu a bee yerebah nɛ Julio le ye wa kɔ ba a doo nu ba bee seeasī lo eyɛgɛ wa tam zue ue. A kɔ: “I bee yii gbo pya ba yerekpotɛ̄ nu i bee seeasī, e i bee wa nyɔɔnɛ kɔniā nu i bee seeasī. Gbɛnɛ-edo aba ebee doo dua nu i bee seeasī ama, nyɔɔwo ba dap i yerebah nɛ lo edoba kɛ̄ i aabaloo leere doo. Pya i gbo wee i bipnage kɛ̄ pya nu i bee seeasī gaa kiā doo, sa ba yere i mɛm loo sɔ̄ alu ebɛɛ̄.”

8. Ena a dap sira lo i gbī edoo nu i bee seeasī aba sɔ̄ a i taɛ a? (Ɛpnage foto.)

⁸ Bu kaka, dɛ̄dɛɛ ii ɛrɛ sɔ̄ ii wee ɛrɛ taɛ. Ekɔ lo ama kurage kɔ ii le edap doo nu i bee seeasī ni? Eeye. Lo enɛ edoba: Efɔp dap taābah fah a le nyɔɔ maā kaāna kuma kɛ̄ aa kii. Kerewo, pio efɔp ɛrɛ ekpo ee ziī, e pio dee a naale edɔ doo pip pip. Mɛ ekɔ lo ama kurage kɔ nɛɛ aa ɔp fah maā naale edap aa dɔ ni? Eeye doo pip pip. Bu edoba, pio fah maā wee ɛrɛ injin a le tɛ̄, e pio ɛɛ wee ɛrɛ dɔɔ̄-fah. Nɛɛ aa ɔp fah dap su pya sīdee ama daā kɔ lo fah a kiā kii kɛ̄ a gaa bee kii. I dap su taɛ i ɛrɛ dooreloo efɔp. Pio dee a dap agatɛ̄ ee pya dɔɔ̄na dee. E pio dee ii dap ɛrɛ taɛ lo edoo nu i bee seeasī. Nyɔɔwo, lo i doo nu i bee seeasī aba sɔ̄ a i taɛ, ii le edap doo nu i bee seeasī. Mɛ dookɛ̄ nɛɛ a gaa ɔp fah nyɔɔ maā wee gbī pya dɔɔ̄na sīdee lo e’ina kɛ̄ a gaa bee kii doo, ili dapnage piiga lo edoo nu i bee seeasī kere sɔ̄ a naa taɛ i. Kɛādoo, lo ama naale ewaɛ a bah. Mɛ bu a e’ɛɛ lo o piiga lo  edoo nu o bee seeasī. Lɛɛ i gae kɔnia nu i dap doo, doo i naa dasī agara ziī ebip lo a dap aakɛ̄.

9. A beege piya lo ekiisī sa doo nu i bee seeasī kere sɔ̄ a naa taɛ i lo edoo ni? Naa baatɛ̄.

⁹ Jɛhova gbī kɔ i si tam ye nɛ bu ɛɛbu le aābu i beenyiɛ. (Yɔɔ 100:2; 2 Kɔr 9:7) Nyɔɔwo, i kiigesī lo edoo nu i bee seeasī bu edɔɔ̄ kere sɔ̄ a naa taɛ i ni? Naa kɛɛrɛbu edoba nɛɛ lɛɛratam Pɔɔl. A kɔ: “Mɛ mda zip mdaa loo bie pah.” (1 Kɔr 9:25-27, nu enɔ nu nyɔɔ loo ye 27 barakpaɛ̄ NWT) Kere sɔ̄ Pɔɔl naa bee ɛrɛ taɛ loo edoo nu Jɛhova bee kɔ a doo, a bee agɛrɛloo piiga doo. Ekɔ Jɛhova bee suge esiatam Pɔɔl ni? Aiī! E Jɛhova bee ye nɛ leelee loo ye epiaga.—2 Tim 4:7, 8.

10. Pya amunu leelee na i dap ɛrɛ lo a le i piiga lo edoo nu i bee seeasī kere a naa taɛ i a?

¹⁰ Bu aba lo sīdee, bu Jɛhova ɛɛ lo emuɛ i i gaa doo nu i bee seeasī kere sɔ̄ a naa taɛ i edoo wo. Kere ii wereloo edoo lo nu dɛ̄dɛɛ̄ sɔ̄, bu ye ɛɛ nyɔnɛbee i kiisī lo edoo lo nu nyɔɔ wereloo i ye ɛrɛ kumaloo. Dookɛ̄ Jɛhova bee nɛ leelee Pɔɔl doo, enɛnage i leelee lo i piiga. (Yɔɔ 126:5) E kuma sɔ̄ i gaa muɛ leelee a aabah Jɛhova I dap bɔātɛ̄ e’ɛrɛ taɛ lo edoo lo nu. Ziī wuga nɛɛwa a aa Poland ye bee kura Lucyna kɔ: “Pio sɔ̄, naa wee mɛ taɛ esi uwe zue ue eetɔɔ̄ na sɔ̄ loo mɛ ɔ. Kerewo, ɛɛbu m wee ɛrɛ sɔ̄ m aa uwe zue ue wee lu nyɛŋia.” Nyɔɔwo, doraa i naa ɛp nu i dap doo sɔ̄ ii ɛrɛ taɛ lo edoo ziī nu.

11. Bu mɛ sīdee na Jɛhova dap i yerebah nɛ kɔ i dap aa i loo a?

¹¹ Yere kara bara kɔ o dap aa oloo. Aa oloo na, ɛrɛ ekpo lo ebaɛbee o ekɛɛrɛ le o dogo. A wee lu esu kɔā ue kumaloo aa oloo lɛɛ loo doo nu a bee piya. Elap dogo aa i loo lunage ebɛɛ̄ lokwa i dap doo nu a lee, eetɔɔ̄ na sɔ̄ nu alu ekɔ i doo aga ale a naa taɛ i edoo. Nyɛŋiabu kɔ aa oloo lu ziī gah loo eyuu edɔɔ̄, nyɔɔwo, bara Jɛhova kɔ a yerebah a nɛ lo e’ɛrɛ elap dogo a kuī ama. (Luk 11:13; Gal 5:22, 23) David i bee kɔ nu akiiloo tua sɔ̄ a bee kɔ kɛ̄ yere kara ye yerebah nɛ doo. A bee gbī enɔ nu nyɔɔ ye loo eekɛ̄ a wee doo. A kɔ: “M wee bara Jɛhova kɔ a yerebah mɛ nɛ lokwa m dap aa na loo. E tɛ̄maloo ye yerebah, m bee dap nɔɔ lo enɔ nu dɛ̄dɛɛ̄ sɔ̄ eekɛ̄ m wee doo.”

12. Bu mɛ sīdee na ue a le bu kpa Eklisiastis 11:4 eyerebah doo kɔ i dap doo nu i bee seeasī bu edɔɔ̄ a?

¹² O aa yira baɛ sɔ̄ dɛ̄dɛɛ̄ nu elee. Bu Nyɔuwe ama, dɛ̄dɛɛ̄ nu naale edap i lee loo doo pip pip. Lo i yira baɛ sɔ̄ nu elee, ii le edap doo nu i seeasī. (Buū Eklisiastis 11:4.) Ziī wuga nɛɛdam ye bee kura Dayniel kɔ: “Dɛ̄dɛɛ̄ nu naale edap lee doo pip pip. Nyɔɔwo ii le eyira baɛ sɔ̄ dɛ̄dɛɛ̄ nu elee, i aadee bɔātɛ̄.” Ziī wuga nɛɛdam a kura Paul a tɔɔ̄ Uganda kɔ dɔɔ̄na nu anua a naa bɔloo kɔ i pee sɔ̄, sɔ̄ a kɔ: “Sɔ̄ i bɔātɛ̄ kere kɛ̄tɔɔ̄ naa nɛ i dee edoo kɔ Jɛhova a yerebah i nɛ.”—Mal 3:10.

13. Ena anua a lee lo edasī doo pya nu seeasī a tera a?

¹³ Bɔātɛ̄ kinakina. Pio sɔ̄ ii dap ɛrɛ taɛ lo edoo nu i bee seeasī nyɔɔbee a bee kɔ a aga gbɛnɛ. Lo lo ama aa a siraloo, o dapge bɔātɛ̄ edoo lo nu kinakina ni? Lo nu o seeasī na lo e’ɛrɛ ziī elap dogo, o dapge nɔɔ lo etɔgɛ elap dogo ama kinakina ni? Lo nu o seeasī na lo ebuū yube ekpo Baibol lɛɛ, o dap nɔɔ lo ebɔātɛ̄ esu  nwīgbagbara sɔ̄ būŋa. A bee zɔra bah Tomáš i bee kue bee bu nuūnabee a, lo ebuū Baibol lɛɛ bu ziī zua. A kɔ: “M bee muɛ kɔ kuma sɔ̄ m bee sagɛ lo ebuā bee eeloo. Nyɔɔwo m bee biaɛfii lo esikɛ̄ buū, mɛ lo sɔ̄ ama m bee nɔɔ lo ebuū nwī-epoo loo dɔ ziī ziī dee sa ɛrɛ ekɛɛrɛ nyɔɔ. E a bee bɔātɛ̄ ekpe mɛ loo.” Kuma sɔ̄ a bee bɔātɛ̄ kpeloo Tomáš, a bee sikɛ̄ su nyɔɔnyɔɔ sɔ̄ būŋa. Sɔ̄ sɔ̄ aa kiisī a bee buū yube ekpo Baibol lɛɛ. c

14. Pio ena a dap doo kɔ nu i bee seeasī a zɔra i bah lo edoo a?

¹⁴ Lu nu ekiɛ̄nu kɔ ɛrɛgebah kɛ̄ i bee ɛrɛ taɛ ale kɛ̄ i piiga doo, a dap ɛrɛ pya nu edoo kɔ a zɔra i bah lo edoo nu i bee seeasī. Bu edoba, “nu a esira” ii bee ɛmadɛɛ̄ dap doo kɔ i aa ɛrɛna sɔ̄ edaā nu i bee seeasī. (Eklis 9:11) I dap kpesī e’aga kɛ̄tɔɔ̄ lo a i ɔɛloo sa i sah ekpo loo. (Kam 24:10) Nyɔɔbee ii mmana a, i dap tɛɛ̄ ekwɔ lo edoo kɔ a aga i bah lo edoo nu i bee seeasī. (Rom 7:23) Ale loo i dap aadee ɔ. (Mat 26:43) Ena eyerebah i nɛ kɔ i dap be eebah pya nu a doo kɔ a aga i bah lo edoo nu i bee seeasī a?

15. Lo a ɛrɛ nu a doo kɔ a aga i bah lo edoo nu i bee seeasī, ekɔ a kurage kɔ ii le edap doo ni? Naa baatɛ̄. (Le-yɔɔ 145:14)

¹⁵ Nyɛŋiabu kɔ lo a aga a bah lo edoo nu o bee seeasī naa kura kɔ oo le edap doo. Baibol kɔ i dap kpesī keekee taāŋa ale e’aga kɛ̄tɔɔ̄. Kerewo, a doonage kɔ i suā kɔ i dap doo nu i bee seeasī, eetɔɔ̄ na tɛ̄maloo yerebah Jɛhova. (Buū Le-yɔɔ 145:14.) Wuga nɛɛdam a kura Philip i bee kue bee tua sɔ̄ a, kɔ: “M bee dap doo nu m bee seeasī nyɔɔbee mm bee bie ekɛɛrɛ nyɔɔ kuma sɔ̄ mm bee dap doo nu m bee seeasī. Taāwo, m bee bie ekɛɛrɛ nyɔɔ kuma sɔ̄ m gaa bee doo nu m bee  seeasī.” David a bee lu ekue bee tua sɔ̄ a, kɔ: “Mm bee ɛp pya nu a doo kɔ a zɔra mɛ bah lo edoo nu m bee seeasī nua nu gbanasī, mɛ m bee ɛp nua dee a mɛ kpaānɛ lo etɔgɛ Jɛhova kɛ̄ m ye wereloo gbɛnɛ doo.” Bu kaka, sɔ̄ o piiga lo edoo nu o bee seeasī kaɛlɛɛ nu a doo kɔ a zɔra a bah, o gaa tɔgɛ Jɛhova kɔ o gbī edoo nu e’ɛɛrɛ ye bu. Naa ɛp kɛ̄ bu Jɛhova e’ɛɛ sɔ̄ a muɛ kɔ o gaa kiisī lo epiiga sa doo nu o bee seeasī doo a!

16. Ena o dap nɔ aāloo sɔ̄ ziī nu doo kɔ o aa dap doo nu o bee seeasī a?

¹⁶ Nɔ nu aāloo pya nu a doo kɔ o aa dap doo pya nu o bee seeasī. Kɛɛrɛbu nu a bee sira a, sa o bip oloo kɔ, ‘Ena m doo lokwa dua nu ama naa sinakɛ̄ sira a?’ (Kam 27:12) Kerewo, lo nu o bee seeasī aga a bah gbɛnɛ lo edoo, a dap tɔgɛ kɔ nu o bee seeasī a, naa bɔ a loo edoo. Lo o kɛɛrɛ kɔ a naa bɔ a loo; sikɛ̄ ɛp nu o bee seeasī a dɔɔ̄na sɔ̄ sɛh a bɔge a loo naa e. d Jɛhova naale esu kɔ o edɔa lo a le oo dap doo nu o bee seeasī a a eenyɔɔ.—2 Kɔr 8:12.

17. Ena anua i kɛɛrɛbu loo pya nu seeasī i edoora a?

¹⁷ Kɛɛrɛbu loo pya nu seeasī o edoora. Baibol kɔ “Bari naa lu nɛɛ pɔrɔ dogo lo e’ibere bui tam.” (Hib 6:10) Nyɔɔwo, o aa iberenage pya nu o edora. Ɛrɛ ekɛɛrɛ nyɔɔ pya nu o edora doodoo nyɔɔnɛ Jɛhova ɛrɛ le gbanialoo, kɔ nu a ye kiiloo nɛ pya dɔɔ̄na, ale o liamaā. Dookɛ̄ o bee nyim sa doo nu o bee seeasī bu taāŋabah Bari sɔ̄ akii adumɛ doo, o dapnage kiisī lo edoo pya nu o seeasī a nyaawo.—Fil 3:16.

18. Ena i nyɛŋiabu lo edoo kuma sɔ̄ i gaa doo nu i bee seeasī a? (Ɛpnage foto.)

¹⁸ Tɛ̄maloo yerebah Jɛhova, o dap doo nu o bee seeasī, dookɛ̄ nɛɛ a gaa ɔp fah nyɔɔ maā wee ina kɛ̄ a gaa kii bu ɛɛbu doo. Mɛ nyɛŋiabu kɔ gbɛnɛ-edo pya a ɔp fah maā wee ɛrɛnage ekpeloo sɔ̄ ba gaa ɔp. Bu aba sīdee ama, kuma sɔ̄ o gaa kiisī lo edoo nu o bee seeasī bu edɔɔ̄ a, wee piiga lo emuɛ kɛ̄ Jɛhova gaa a yerebah nɛ sa a nɛ leelee doo, e lo ama edoo kɔ o le bu ɛɛbu sɔ̄ o gaa doo nu o bee seeasī a. (2 Kɔr 4:7) Lo oo lɛɛbahloo edoo nu o bee seeasī, o ɛrɛnage pya leelee a kuī eewo.—Gal 6:9.