1. Ena i bee nɔ bie zɔ̄zɔ̄ŋia a wee lu e’ɛrɛ ziī sɔ̄ bu ziī ziī zua bu zua 2023 a?

 BIE zɔ̄zɔ̄ŋia a wee lu e’ɛrɛ ziī sɔ̄ bu ziī ziī zua, bu lo zua 2023, a i bee sikɛ̄ dābeeloo sa kwabahloo pio nu i yiga, e i bee ɛrɛnage ziī yereue a kpeloo kiiloo i tam zue ue. Bu edobah, i bee nɔ kɔ pio nɛɛ dap ɛrɛ dee lo egbaaloo Pya Ekeebee Jɛhova kere sɔ̄ elua egbeesī Babilɔn lo Gbɛnɛ sah. I bee nɔnage kɔ aābu Lop Le Eziī Enɔɔ̄ bu zua 2023, a naale eluna ebɛɛ̄ kɔ pya zue ue a lɛa dɛ̄dɛɛ̄ wa kpɛatam bah. Ekɔ nyaa ama doo kɔ i tam zue ue aa luna tam a kuī ni? Eeye doo pippip!

2. Ena anua i tam zue ue lu gbaragbara kuma sɔ̄ ziī ziī biradee gaa tɛɛ̄ a? (Maak 13:10)

² Kɛ̄ ziī ziī biradee aa tɛɛ̄ doo, kɛ̄ i tam zue ue lunage gbaragbara doolo. Ena anua a? Nyɔbee sɔ̄ a siga lu ekpuru. Naa kɛɛrɛbu nu Jizɔs bee kɔ akiiloo i tam zue ue bu kpɛdumɛ dee. (Buū Maak 13:10.) Dookɛ̄ Matiu bee ɛm doo, Jizɔs bee kɔ lo le yereue elu ezue tɛ̄ma ɛŋɛnɛ  dɛ̄dɛɛ̄ nyɔuwe lɛɛ “kuma” gae lu. (Mat 24:14) Ue ama kiiloo sɔ̄ nyɔuwe Setan e’ina kuma. Jɛhova esere taɛ “dee le hour” sɔ̄ nu ama esudɔ. (Mat 24:36; 25:13; Doonu 1:7) Ziī ziī biradee a gaa tɛɛ̄ doo kɔ i tɔɔ̄ waɛloo lo sɔ̄ kaāna. (Rom 13:11) Nyɔɔwo, i kiisī lo ezue ue mmɛ sɔ̄ kuma elu.

3. Ena a i zū kɔ i zue le yereue a?

³ Kuma sɔ̄ i gaa kɛɛrɛbuloo i tam zue le yereue, lee i kɛɛrɛbu loo ebip ama: Ena anua i zue le yereue a? Nyɔɔbee wereloo zū i kɔ i doo wo. Nu i doo sɔ̄ i le uwe zue ue tɔgɛ dua wereloo i ɛrɛ—lo a le wereloo i ɛrɛ loo tam zue ue, wereloo i ɛrɛ loo pya nɛɛ, e lo a kuī eera na wereloo i ɛrɛ kumaloo Jɛhova le ye bee. Dooraa i kɛɛrɛbuloo ziī ziī aba.

I ZUE UE NYƆƆBEE I WERELOO LE YEREUE

4. Wee i tɔɔ̄loo doodoo wa sɔ̄ i dā le yereue?

⁴ O dapge nyɛŋiabu kɛ̄ a bee a tɔɔ̄loo doo sɔ̄ o bee dā ziī le yereue—doodoo sɔ̄ ziī o manamana maɛ nwiī ale sɔ̄ alu esu a loo tam ni? Baɛbaɛ beenyiɛ naale loo kɔ bu a bee ɛɛ sa aba lo sɔ̄ o bee si wee kɔ nɛ pya o nɛɛ le pya o gbo. Ekɔ kɛ̄ a bee a siranageloo doolo sɔ̄ o bee dā lo gbɛnɛ yereue a lee eenyɔɔ—lo a le yereue loo Buɛ̄-mɛnɛ ni?

5. Bee a tɔɔ̄loo doodoo wa tua sɔ̄ o bee nɔ kaka ue aābu Muɛ̄ Ue Bari ni? (Ɛpnage pya foto a nyɔɔnɛ.)

⁵ Naa kɛɛrɛbu kɛ̄ a bee a tɔɔ̄loo doo sɔ̄ o bee bɔātɛ̄ nɔ kaka ue aābu Muɛ̄ Ue Bari. O bee nɔ kɔ i Tɛ a le li bunyɔɔ were a loo, sa gbī kɔ o le yɛɛ pya butɔ a gaa ye taāŋabah. O bee nɔnage kɔ Bari eyira yii lo edoo kɔ dɛ̄dɛɛ̄ i taāŋa le ezialoo a ina kuma, le kɔ o dap sikɛ̄ muɛ pya o wereloo ba ebee u sɔ̄ elu elɛɛ wa kɛ̄ bu luh bu aā nyɔuwe—le pya lo dɔɔ̄na. (Maak 10:29, 30; Jɔn 5:28, 29; Rom 8:38, 39; Mum 21:3, 4) Pya kaka ue ama bee a tɔaloo beenyiɛ kaāna sa doo kɔ bu a a ɛɛ. (Luk 24:32) O bee wereloo pya nu o gaa bee nɔ ama, sa o bee gbī ekɔ pya kaka ue a kuī  ama nɛ dɛ̄dɛɛ̄ nɛɛ!—Dooreloo Jeremia 20:9.

6. Ena o nɔ aāloo nu a bee siraloo Ernest le ye wa Rose a?

⁶ Naa kɛɛrɛbu nu a bee siraloo ziī wuga nɛɛdam ye bee kura Ernest b lo ebee lu nu a waɛloo lop zua sɔ̄ ye tɛ bee u. Ernest bee kɔ: “M bee kɛɛrɛ kɔ: ‘Ekɔ na tɛ ekira bunyɔɔ ni? Sɛh e’ua mmɛ deedee ni?’ M bee bɔātɛ̄ wiibu loo pya miɔŋɔ wa tɛ le dum.” Ernest wee kii kɛ̄ ba bee li ye tɛ dɛ̄dɛɛ̄ sɔ̄, sa kūnɛ zū kɛ̄ nyɔɔ kpoli ye tɛ sa yere kara kɔ: “Bari, soosoo, m gbī esua kɛ̄ na tɛ le.” Sɔ̄ nu alu 17 zua etɛ̄na aā sɔ̄ ye tɛ bee u, Pya Ekeebee bee kɔ nɛ Ernest kɔ ba enyɔɔnɛe ye nɔ Baibol, e a bee yiga. Bu ye bee ɛɛ sɔ̄ a bee nɔ kɔ pya e’ua naa suāna lɔgɔ nu, mɛ ba le bu gbɛnɛ daa, le kɔ Baibol yira yii kɔ elu elɛɛ pya e’ua kɛ̄ bu luh li deesī. (Eklis 9:5, 10; Doonu 24:15) Bu kpɛdumɛ, a bee muɛ ture pya ebip a wee ye nɛ taāŋa bu nyɔɔnyɔɔ sɔ̄ akii adumɛ! Bu Ernest bee ɛɛ kaāna loo kaka ue a gaa nɔ aābu Baibol. Ye wa Rose bee ye gbaaloo nɔ Baibol, e bu ye wa bee ɛɛ, sa pya nu ba gaa nɔ bee nianage alɛ. Bu zua 1978, ba bee liamaā. Ba bee su e’agaloo le mɛm zuema kaka ue ba enɔā ama nɛ pya wa butɔ, pya wa gbo, le pya dɔɔ̄na. E nu a sira aabu na kɔ, Ernest le Rose eyerebah nɛ nu a eeloo 70 pya nɛɛ kɔ ba a suāloo Jɛhova sa liamaā.

7. Ena a wee sira sɔ̄ pya nu i nɔ aābu Baibol i nia a? (Luk 6:45)

⁷ Bu kaka, sɔ̄ pya nu i nɔ aābu Baibol i nia, a wee i zū kɔ i kɔ nɛ pya dɔɔ̄na. (Buū Luk 6:45.) Kɛ̄ a bee tɔɔ̄loo pya a wee nyɔɔnɛ dumɛ Jizɔs doo na a tɔɔ̄nage loo ili a. Ba bee kɔ: “Ii dap aaloo ekɔ nu i bee muɛ sa dā.” (Doonu 4:20) I wereloo kaka ue kaāna sa i gbī ekɔ nɛ gbɛnɛ-edo nɛɛ kumakɛ̄ i ekpo toora doo.

I ZUE UE NYƆƆBEE I WERELOO PYA NƐƐ

8. Ena a i zū kɔ i zue le yereue nɛ pya nɛɛ a? (Ɛp ekpo a kura“ Wereloo Pya Nɛɛ —Zue Ue.”) (Ɛpnage foto.)

⁸ I wereloo pya nɛɛ dookɛ̄ Jɛhova le ye Nwiīnɛɛdam Jizɔs doo. (Kam 8:31; Jɔn 3:16) I ɛrɛ esaɛ̄ beenyiɛ kumaloo pya ba naa “suāloo Bari” le pya a naa ɛrɛ “lɔgɔ bɛābu.” (Ɛfɛs 2:12) Nyɔɔbee ba gaa tɛɛ̄bu gbɛnɛ-edo taāŋa, a tɔɔ̄ wa loo kɔ ba le bu ziī gbɛnɛ bana a toga, e i ɛrɛ eziī a dap wa zuura lɛɛbu lo bana—lo a le yereue lo Buɛ̄-mɛnɛ Bari. Nyɔnɛbee i were wa loo sa ɛrɛ esaɛ̄ beenyiɛ wa kumaloo, i piiga kumakɛ̄ i dap doo lo ezue le yereue wa nɛ. Sɔ̄ ba dā le yereue ama edoo kɔ ba a ɛrɛ bɛābu, eyerebah kɔ ba a ɛrɛ ɛɛbu  anyaawo, sa edoonage kɔ ba a ɛrɛ dee lo e’ɛrɛ “kaāna dum”—lo a le dum a naatah bu aā nyɔuwe Bari.—1 Tim 6:19.

9. Amunu zuurabahtɔ̄ na i kɔ akiiloo deesī a, e ena anua a? (Ezekiel 33:7, 8)

⁹ Wereloo i ɛrɛ loo pya nɛɛ zūnage i kɔ i kɔ wa nɛ kɔ lo pɔrɔ nyɔuwe ama esaa e’ina kuma. (Buū Ezekiel 33:7, 8.) I ɛrɛ toesaɛ̄ loo dɛ̄dɛɛ̄ pya nɛɛ, gbaāloo pya i butɔ ba naa gaa taāŋabah Jɛhova. Gbɛnɛ-edo nɛɛ tɔɔ̄dum sa naa suā nu a gaa lu li deesī—lo a le “gbɛnɛ etɛɛrɛloo . . . dua lo a sii bee le aā bɔātɛ̄ nyɔuwe mmɛ nyaawo, eeye, naale elenage.” (Mat 24:21) I gbī edoo kɔ ba a suā nu a gaa le esira bu sɔ̄ biaɛ—edasī lu egbeesī ekwɔ sīdee taāŋabah lɛɛ alu egbeesī dɛ̄dɛɛ̄ pɔrɔ nyɔuwe ama bu nɔ̄ Amagidɔn. (Mum 16:14, 16; 17:16, 17; 19:11, 19, 20) I gaa yere kara bara Bari kɔ a doo kɔ gbɛnɛ-edo nɛɛ a dā lo yereue sa biaɛfii lo egbaa i loo bu logaloga taāŋabah anyaawo. Mɛ ena esiraloo pya a naa gbaɛ̄ i tɔ̄ loo anii’ee, doodoo pya i butɔ̄ i wereloo a?

10. Ena anua alu ebɛɛ̄ kɔ i kiisī lo ekɔ nu esira nwīgbagbara sɔ̄ aā anyaawo nɛ pya nɛɛ a?

¹⁰ Dookɛ̄ a bee lu ebaatɛ̄ bu elua ekobee ue a doo, a dap lu niā Jɛhova lo ekpɔā pya nɛɛ a nyaana wa sīdee tɔɔ̄dum sa ye ɛrɛ yira bu sɔ̄ ba muɛ gbeerasī Babilɔn lo Gbɛnɛ. Lo a le wo, alu gbaragbara kaāna kɔ i kiisī lo ekɔ lo yereue wa nɛ anyaawo. Naa kɛɛrɛbu nu ama: Pya nu i wa kɔ nɛ anyaawo dap doo kɔ ba a ɛrɛ nu ba enyɛŋiabuloo lo sɔ̄. (Dooreloo Ezekiel 33:33.) Naadabah, ba dap nyɛŋiabu pya zuurabahtɔ̄ i bee wa kɔ nɛ sa biaɛfii lo egbaa i loo taāŋabah Jɛhova lɛɛ sɔ̄ gae tah loo. Doodoo nɛɛ baɛloo tɔkpɔgɔrɔ bu buɛ̄ Philippi lo a bee nyaana ye sīdee tɔɔ̄dum sɔ̄ emɔ̄na “gbɛnɛ nyɔŋa kɛnɛkɛ̄” a sira, pya nɛɛ a naa gbaɛ̄tɔ̄ anyaawo dap nyaana wa beenyiɛ sɔ̄ ba emɔ̄na kɔ elua egbeesī Babilɔn lo gbɛnɛ sah.—Doonu 16:25-34.

I ZUE UE NYƆNƐBEE I WERELOO JƐHOVA LE YE BEE

11. Bu mɛ sīdee na i nɛ ka, enwadɛɛ̄, le ekpo Jɛhova a? (Mumuuna 4:11) (Ɛpnage pya foto a nyɔɔnɛ.)

¹¹ Ziī gbɛnɛ nu anua i zue le yereue na kɔ i wereloo Jɛhova le ye bee a le kaɛ. I ɛp i tam zue ue nua ziī sīdee eleera ilii Bari i wereloo. (Buū Mumuuna 4:11.) Aābu dɛ̄dɛɛ̄ i beenyiɛ, i yiga kɔ Jɛhova Bari bɔloo esu ka, le enwadɛɛ̄, le ekpo aābah dɛ̄dɛɛ̄ pya aa ye taāŋabah. I nɛ ye ka le enwadɛɛ̄ sɔ̄ i kɔ nu i suā a ye kiiloo nɛ pya dɔɔ̄na kɔ alɛ na a bee “dɛm dɛ̄dɛɛ̄ nu” a, le kɔ i tɔɔ̄dum nyɔɔbee a nɛ i dum. I nɛ ye ekpo—lo a le ili ekpo—sɔ̄ i su i sɔ̄, i mɛm, le pya nu i ɛrɛ yeākpotɛ̄ tam  zue ue dookɛ̄ i kɛ̄tɔɔ̄ i nɛ dee doo. (Mat 6:33; Luk 13:24; Kɔl 3:23) Bu kaka, a wee i nia ekɔ nu akiiloo Bari i wereloo ama. A wee i taɛnage ekɔ nu a kiiloo ye bee nɛ pya dɔɔ̄na le nu lo bee kura. Ena anua a?

12. Bu mɛ sīdee na i sere bee Jɛhova kaɛ bu i tam zue ue a?

¹² Wereloo i ɛrɛ loo Jɛhova zū i kɔ i sere ye bee kaɛ. (Mat 6:9) Lo ama kura kɔ i gbī ekɔ nɛ pya dɔɔ̄na kɔ dɛ̄dɛɛ̄ nu Setan bee kɔ kumaloo Jɛhova lu esah. (Jɛn 3:1-5; Job 2:4; Jɔn 8:44) Sɔ̄ i kii wee zue ue, a taɛ i lo ekɔ dua nɛɛ Jɛhova lu nɛ ɛrɛgebah pya a gbī egbaɛ̄tɔ̄. I gbī edoo kɔ dɛ̄dɛɛ̄ nɛɛ a suā kɔ ye elap dogo a kuī eera na wereloo, ye bɛbɛɛ lu lo a kaāna sa lee, le kɔ sɔ̄ sɔ̄ naa biniā ye Buɛ̄-mɛnɛ gaa le mmɛ kumaloo dɛ̄dɛɛ̄ mɔ̄na taāŋa sa su efɛɛloo le ɛɛbu nua loo dɛ̄dɛɛ̄ nɛɛ. (Yɔɔ 37:10, 11, 29; 1 Jɔn 4:8) Sɔ̄ i kɔ pya nu akiiloo Jɛhova nɛ pya dɔɔ̄na, i sere ye bee kaɛ. Bu i ɛɛ nyɔɔbee i gaa doo nu a bɔloo kɔ i doo doodoo Pya Ekeebee Jɛhova. Ena anua i kɔ doo wo a?

13. Ena anua alu nu ka i nɛ kɔ alu ekure i Pya Ekeebee Jɛhova a? (Aisaia 43:10-12)

¹³ Jɛhova esagɛ i kɔ i lu pya alɛɛ “ekeebee.” (Buū Aisaia 43:10-12.) Bu pio zua akii adumɛ, ziī kpa a aabah Eku A Baɛbee bee kɔ: “Ziī gbɛnɛ ka i ɛrɛ na sɔ̄ alu ekue i Nɛɛ Ekeebee Jɛhova.” c Ena anua a le doo wo a? Naa kɛɛrɛbu edobah ama. Naa su kɔ alu edɛrɛ a ue sa o gbī nɛɛ ekɔ a ue bee bie tɔbiaɛ, o gaa le sagɛ nɛɛ o suāloo sa dɛrɛ nyiɛ nyɔɔ, nɛɛ a para kɔ ue sa pya nɛɛ wee ye nɛ enwadɛɛ̄ sa dɛrɛ nyiɛ nyɔɔ ye ue. Tɛ̄maloo esagɛ i kɔ i lu pya alɛɛ Ekeebee, Jɛhova tɔgɛ kɔ a suāe i loo kaāna, e a dɛrɛe i nyiɛ nyɔɔ kɔ i gaa le kɔ  nɛ pya dɔɔ̄na kɔ aba alɛ na kaka Bari a. Ka i ɛrɛ lo elu pya alɛɛ Ekeebee zū i kɔ i su dɛ̄dɛɛ̄ dee a i kpaānɛ ye kɔā ue bee, sa tɔgɛ kɔ dɛ̄dɛɛ̄ pɔrɔ pɔrɔ nu a bee lu ekɔ ye kumaloo lu esah. Tɛ̄maloo edoo wo, i tɔgɛ kɔ i doo nu i bee kura, le kɔ bu i ɛɛ loo lo bee, lo a le Pya Ekeebee Jɛhova!—Yɔɔ 83:18; Rom 10:13-15.

I GAA LE KIISĪ LO EZUE UE MMƐ KUMA

14. Pya amunu siranu a kpeloo na a gaa le sira sɔ̄ sɔ̄ naa biniā aā anyaawo a?

¹⁴ Pya siranu a kpeloo gaa le sira sɔ̄ sɔ̄ naa biniā! Tɛ̄maloo yerebah Jɛhova, i bɛābu kɔ gbɛnɛ-edo nɛɛ gaa le su kaka lɛɛ gbɛnɛ etɛɛrɛloo gae bɔātɛ̄. Gbaāloo wo, a nianage i kɔ bu sɔ̄ nu e’aga gbɛnɛ li deesī—lo a le bu gbɛnɛ etɛɛrɛloo, gbɛnɛkpo nɛɛ dap kiiya aabu nyɔuwe Setan lo esaa e’ina kuma, sa i nyɔɔnɛ taāŋabah Jɛhova!—Doonu 13:48.

15-16. Ena i kiisī lo edoo a, e mmɛ mɛ sɔ̄?

¹⁵ Nyaawo, i ɛrɛ tam esi. I ɛrɛ dee lo esi ziī gbɛnɛ tam lo a naale esinakɛ̄ lu esi. Ɛɛna tam zue le yereue akiiloo Buɛ̄-mɛnɛ Bari tɛ̄ma ɛŋɛnɛ dɛ̄dɛɛ̄ nyɔuwe. Aba lo sɔ̄, i ɛrɛ ekiinagesī lo ezuurabahtɔ̄ pya nɛɛ kiiloo gbeerasī a gaa lu li deesī. Lu ebɛɛ̄ kɔ pya nɛɛ a suā kɔ kuma lo sɔ̄ eku ama ewaraloo. E sɔ̄ lo sɔ̄ e’ina, ba gaa le suā kɔ ue i bee wa zue nɛ aabah Jɛhova Bari.—Ezek 38:23.

¹⁶ Nyɔɔbee wo, ena i biaɛfii lo edoo ani? Nyɔɔbee wereloo i ɛrɛ kumaloo le yereue, wereloo i ɛrɛ kumaloo pya nɛɛ, e lo a eera na wereloo i ɛrɛ kumaloo Jɛhova le ye bee, i gaa le kiisī lo esu mɛm le e’agaloo zuema ue bu gbaragbara mmɛ sɔ̄ Jɛhova ekɔ, “Eleera, bui aa zuena!”