19 EKOBEE UE ENƆ
YƆƆ 22 Lo Buɛ̄-mɛnɛ Esua Dɔ—Doolo A Lu!
Ena I Suā Akiiloo Kɛ̄ Jɛhova Ebiaɛ Pya Nɛɛ Doo Li Deesī A?
“Jɛhova . . . naa gbī kɔ lɔgɔ nɛɛ a pe.”—2 PIT 3:9.
NU I NƆ
I sua leere kɔ bu aā nyɔuwe Jɛhova gaa le biaɛ kaāna biaɛ yɛɛ pya nɛɛ.
1. Ena anua i dap kɔ i gaa tɔɔ̄dum sɔ̄ pya nu alu nyɛŋia aa sira a?
I TƆƆ̄DUM sɔ̄ pya nu alu nyɛŋia aa sira! Ziī ziī biradee, i gaa muɛ mɔmanudɛɛ̄ Baibol a gaa dooa gbɔ̄mɛɛ̄. Bu edobah, i muɛ “mɛnɛ-buɛ̄ dee mmnyɔɔ” le “mɛnɛ-buɛ̄ dee kerekɛ̄” ba gaa bebe loo ziī lo ebɛɛ nyɔuwe. (Dan 11:40) I muɛ le yereue loo Buɛ̄-mɛnɛ a gaa lu ezue tɛ̄ma ɛŋɛnɛ dɛ̄dɛɛ̄ nyɔuwe, e gbɛnɛ-edo miliɔn pya nɛɛ esagɛ lo etaāŋabah Jɛhova. (Ais 60:22; Mat 24:14) I gaa ɛrɛnage nuede bu edɔɔ̄ “taɛ ye sɔ̄.”—Mat 24:45-47.
2. Ena i suā leere a, e ena i ɛrɛ eyere nukuādɛɛ̄loo a?
2 Jɛhova aa i yerebah nɛ kɔ i agɛrɛbah dābeeloo pya siranu a kuī lo esira nwīgbagbara sɔ̄ aā anyaawo. (Kam 4:18; Dan 2:28) I suā leere kɔ lɛɛ gbɛnɛ etɛɛrɛloo gae bɔātɛ̄, i gaa le suā dɛ̄dɛɛ̄ nu alu ebɛɛ̄ kɔ i suā lokwa i dap egerebu, bia bu bɔ ture nyiɛ loo sa nyɔɔnɛ pya i wuga tɔɔ̄bu gbaaloo bu sɔ̄ nu e’aga ama. Kerewo, i ɛrɛ eyere nukuādɛɛ̄loo kɔ, a ɛrɛ pio nu ii suā akiiloo deesī. Bu ekobee ue ama, i dasī kɔ nu anua i ekwaabahloo nu i bee kɔ kiiloo pio siranu ama sɔ̄ akii adumɛ. Lɛɛ i kɔnia pio nu i suā akiiloo deesī, le nu i Tɛ a le li bunyɔɔ edoo.
PYA NU II SUĀ
3. Mɛ sɔ̄ na i bee kɔ Jɛhova ekpaɛ̄dee sa doo kɔ pya nɛɛ aa dapna ɛrɛ dee lo etaāŋa ye bah a, e ena anua i bee kɛɛrɛ doo wo a?
3 Sɔ̄ akii adumɛ, i bee kɔ aba sɔ̄ gbɛnɛ etɛɛrɛloo bɔātɛ̄, lɔgɔ nɛɛ a sii bee taāŋabah Jɛhova naale edapna ye ɛrɛ yira bu sa tɛɛ̄ yeebah Amagidɔn. Nu anua i bee kɔ doo wo lo sɔ̄ na kɔ, i bee kɛɛrɛ kɔ nu a bee sira bu sɔ̄ Yiimaā bu dee Noa tɔɔ̄dɔ nu esira li deesī. Bu edobah, i bee kɛɛrɛ kɔ dookɛ̄ lɔgɔ nɛɛ naa bee dapna yiibu fah sɔ̄ Jɛhova ‘ekpāna bū’ lo fah doo, kɛ̄ lɔgɔ nɛɛ naale edapna ɛrɛ yira bu Jɛhova sa ɛrɛ kpɔā sɔ̄ gbɛnɛ etɛɛrɛloo ebɔānagetɛ̄ doolo.—Mat 24:37-39.
4. Ena anua ii kɛɛrɛna kɔ dɛ̄dɛɛ̄ nu a bee sira bu dee Noa ɛrɛ ye gbɛnɛ dooa gbɔ̄mɛɛ̄ li deesī a? Naa baatɛ̄.
4 A lerage lo ekɔ ziī ziī nu a bee sira bu sɔ̄ Yiimaā Noa tɔɔ̄dɔ nu esira li deesī ni? Ye ture na eeye. Ena anua a? Nyɔnɛbee lɔgɔ dɔ Kpa Kaɛ naa kɔ doo wo. a Alu kaka kɔ Jizɔs bee su “dee Noa” dooreloo ye lulu. Kerewo, a naa bee kɔ dɛ̄dɛɛ̄ nu a bee sira bu dee Noa, doodoo sɔ̄ Jɛhova bee kpaɛ̄ bū lo fah ɛrɛ ye gbɛnɛ dooa gbɔɔ̄mɛɛ̄ li deesī. Mɛ lo ama naa kura kɔ a naa ɛrɛ lɔgɔ nu i dap nɔ aāloo nu a bee sira bu dee Noa le lo Yiimaā.
5. (a) Ena Noa bee doo lɛɛ Yiimaā gae lu a? (Hibru 11:7; 1 Pita 3:20) (b) Bu mɛ sīdee na ilii tam zue ue anii’ee beenage lo bu dee Noa a?
5 Sɔ̄ Noa bee dā yereue zuurabahtɔ̄ Jɛhova bee ye nɛ, a bee doo nu a tɔgɛ kɔ a ɛrɛ yira tɛ̄maloo eka lo fah. (Buū Pya Hibru 11:7; 1 Pita 3:20.) Bu aba lo sīdee, pya a dā le yereue akiiloo Buɛ̄-mɛnɛ Bari anii’ee ɛrɛnage edoo nu a tɔgɛ kɔ ba ɛrɛ yira, tɛ̄maloo edoo nu ba dā. (Doonu 3:17-20) Pita bee su Noa kure “nɛɛ zue ue kaāna dogo.” (2 Pit 2:5) Kerewo, dookɛ̄ i bee kɔ doo bu ekobee ue i aa a, ii suā sɛh Noa bee zuege ue nɛ dɛ̄dɛɛ̄ nɛɛ a tɔɔ̄dum a nyɔɔ kɛnɛkɛ̄ lo sɔ̄ lɛɛ Yiimaā gae yii naa e. Nii’ee, ili aa piiganage lo ezue ue nɛ pya nɛɛ bu dɛ̄dɛɛ̄ kɛ̄ a le bu nyɔuwe, e i gaa su mɛm zuema. Kerewo, kaɛlɛɛ kɛ̄ i piiga doo, ii le edap zue ue nɛ dɛ̄dɛɛ̄ nɛɛ a le bu yube nyɔuwe lɛɛ kuma gae lu. Ena anua ii le edap ani?
6-7. Ena anua i dap kɔ ii le edap zue le yereue nɛ dɛ̄dɛɛ̄ nɛɛ a le bu nyɔuwe lɛɛ kuma gae lu a? Naa baatɛ̄.
6 Naa kɛɛrɛ nu Jizɔs bee kɔ akiiloo tam zue le yereue. Jizɔs ebee kɔ serekɛ̄ kɔ elu ezue le yereue Buɛ̄-mɛnɛ “tɛma ɛŋɛnɛ dɛ̄dɛɛ̄ nyɔuwe, doodoo nu ekeebee nɛ dɛ̄dɛɛ̄ edonyɔɔ.” (Mat 24:14) Mɔmanudɛɛ̄ ama aa dooa gbɔ̄mɛɛ̄ anii’ee ee tua sɔ̄. Elua e’ɛm yereue Buɛ̄-mɛnɛ ama yerebu nu a eeloo 1,000 muɛ̄ ue. E tɛ̄maloo i dɔ intanɛt jw.org, gbɛnɛ-edo nɛɛ a le bu nyɔuwe anii’ee dap dā le yereue akiiloo Buɛ̄-mɛnɛ Bari.
7 Jizɔs bee kɔ nɛ pya a wee ye nyɔɔnɛ dumɛ kɔ ba naale edap zue ue ina dɛ̄dɛɛ̄ kɛ̄ a le bu “dɛ̄dɛɛ̄ buɛ̄,” ale zue ue nɛ dɛ̄dɛɛ̄ nɛɛ a le bu dɛ̄dɛɛ̄ buɛ̄ lɛɛ alɛ gae lu. (Mat 10:23; 25:31-33) Pya ue Jizɔs bee kɔ ama edooanage bu ilii dee ama. Gbɛnɛ-edo miliɔn pya nɛɛ anii’ee tɔɔ̄ kɛ̄ alu ekpaɛ̄ i tam zue ue. Gbaānage loo wo, gbɛnɛ-edo pya miɔŋɔ aa mɛā bu ziī ziī minit bu ziī ziī biradee. Nyɔɔwo, kaka ue a le na kɔ, ii le edap zue ue nɛ dɛ̄dɛɛ̄ nɛɛ a le nyɔɔ kɛnɛkɛ̄ ama lɛɛ kuma gae lu, kaɛlɛɛ kɛ̄ i piiga doo lo ezue ue nɛ pya nɛɛ a aa “dɛ̄dɛɛ̄ edonyɔɔ le edɛm le muɛ̄ ue.”—Mum 14:6.
8. Ena i dap bip kiiloo kɛ̄ Jɛhova e biaɛ pya nɛɛ doo li deesī a? (Ɛpnage pya foto a nyɔɔnɛ.)
8 Nyɔɔwo, aāloo pya nu i ekɔa ama, i dap bip kɔ: Kiiloo pya nɛɛ ba naa bee ɛrɛ dee lo edā le yereue lɛɛ gbɛnɛ etɛɛrɛloo gae bɔātɛ̄ ni a? Bu mɛ sīdee na Jɛhova le ye Nwiīnɛɛdam, lo etubobahloo kɔ a biaɛ, ebiaɛ pya a le doo wo a? (Jɔn 5:19, 22, 27; Doonu 17:31) Ekobee ue enɔānu ama kɔ Jɛhova “naa gbī kɔ lɔgɔ nɛɛ a pe.” Taāwo, a gbī kɔ “dɛ̄dɛɛ̄ nɛɛ a lu ina loo kikiiya.” (2 Pit 3:9; 1 Tim 2:4) Nyɔɔwo, Jɛhova sii i kɔ nɛ kɛ̄ a gaa le biaɛ pya nɛɛ a naa bee ɛrɛ dee loo edā le yereue ama doo. Kerewo, naale edasī i kɔ nɛ nu edoora ale nu edoo.
Bu mɛ sīdee na Jɛhova ebiaɛ biaɛ loo pya nɛɛ a naa bee ɛrɛ dee lo edā le yereue lɛɛ gbɛnɛ etɛɛrɛloo gae bɔātɛ̄ a? (Ɛp 8 barakpaɛ̄) c
9. Ena Jɛhova edoora kɔ i suā tɛ̄maloo Baibol a?
9 Jɛhova ekɔa pio nu a gaa le doo i nɛ tɛ̄maloo ye Muɛ̄ Ue. Bu edobah, kpa Baibol kɔ i nɛ kɔ Jɛhova gaa le lɛɛ pya “pɔrɔ dogo” kɛ̄ bu luh, pya nɛɛ a naa bee ɛrɛ dee lo edā le yereue sa nyaana wa sīdee tɔɔ̄dum. (Doonu 24:15; Luk 23:42, 43) Lo ama lɛɛ pya dɔɔ̄na ebip a kuī kɛ̄.
10. Pya amunu dɔɔ̄na ebip na a sikɛ̄ aakɛ̄ a?
10 Ekɔ dɛ̄dɛɛ̄ pya a gaa le u bu sɔ̄ gbɛnɛ etɛɛrɛloo elu egbee wa sī mmɛ deedee sa ba naale e’ɛrɛ bɛābu aakɛ̄ bu luh ni? Kpa Baibol doo kɔ i suā leere kɔ pya nɛɛ a gbānasī Jɛhova, sa alu egbee wa sī bu nɔ̄ Amagidɔn tɛ̄mabah Jɛhova le pya ye gbo nɔ̄ naale e’aa kɛ̄ bu luh. (2 Tɛs 1:6-10) E kiiloo pya dɔɔ̄na nɛɛ a dap u lo sɔ̄, bu edobah nyɔɔbee eyɔloo, ana, bugia siranu, ale alu efɛ wa tɛ̄mabah pya dɔɔ̄na nɛɛ ni a? (Eklis 9:11; Zek 14:13) Ekɔ pio pya nɛɛ ama ele yɛɛ pya “pɔrɔ dogo” lo elu elɛɛ kɛ̄ bu luh bu aā nyɔuwe ni? Bu kaka ii suā doo pippip.
PYA NU I SUĀ
11. Ena elu eyira nyɔɔ biaɛ pya nɛɛ bu nɔ̄ Amagidɔn a?
11 I suā booboo nu esira li deesī. Bu edobah, i suā kɔ bu Amagidɔn, elu ebiaɛ pya nɛɛ dɛɛa nyɔɔ kɛ̄ ba bee aara pya wuga Kraist doo. (Mat 25:40) Pya elu ebiaɛ nua naana pee na pya a bee yerekpotɛ̄ pya alu etɔ̄ nɔɔ̄ bee sa yerenage kpotɛ̄ Kraist. I suānage kɔ siga Pya Nɛɛ Kraist alu etɔ̄ nɔɔ̄ bee elenage a nyɔɔ kɛnɛkɛ̄ sɔ̄ gbɛnɛ etɛɛrɛloo ebɔātɛ̄, e a naale elu esu wa kuma bunyɔɔ mmɛ sɔ̄ nɔ̄ Amagidɔn esaa ebɔātɛ̄. Kuma sɔ̄ siga pya alu etɔ̄ nɔɔ̄ bee edasī le a nyɔɔ kɛnɛkɛ̄ ama, a dap sira kɔ pio pya nɛɛ le beenyiɛ e’ɛrɛ dee lo eyere wa kpotɛ̄ sa yerenage kpotɛ̄ tam ba gaa si. (Mat 25:31, 32; Mum 12:17) Ena anua pya nu ama lu ebɛɛ̄ a?
12-13. Pio nɛɛ edoo dogo doodoo wa sɔ̄ ba emuɛ “Babilɔn lo Gbɛnɛ” elua egbeesī? (Ɛpnage pya foto a nyɔɔnɛ.)
12 Sɔ̄ gbɛnɛ etɛɛrɛloo esira sah, a dap sira kɔ pya nɛɛ a bee muɛ gbɛɛrasī “Babilɔn lo Gbɛnɛ” a nyɛŋiabu kɔ gbɛnɛ-edo zua akii adumɛ Pya Ekeebee Jɛhova ebee kɔ nu akiiloo siranu ama. Ekɔ pio pya emuɛ siranu ama enyaage sa ɛrɛ yira bu Bari ni?—Mum 17:5; Ezek 33:33.
13 Lo a sira doo wo, ebee taɛ nu a bee sira bie Ijipt bu dee Mozis sɔ̄ “gbɛnɛkpo nɛɛ alu keekee “ bee nyɔɔnɛ pya Izrɛl aa Ijipt. Pio pya nɛɛ ama bee bɔātɛ̄ e’ɛrɛ yira sɔ̄ ba bee muɛ kɔ Lop Nu A Wee Nua Luh lo Mozis bee zuurabahtɔ̄ pya nɛɛ kumaloo a bee dooa gbɔ̄mɛɛ̄. (A’aa 12:38) Dookɛ̄ a bee siraloo pya Izrɛl doo, lo nu a mɛā doo wo sira sɔ̄ elua egbeesī Babilɔn lo Gbɛnɛ sah, ekɔ i kɛɛrɛ kɔ a naa bɔloo kɔ pya nɛɛ a gbaa i loo sɔ̄ kuma ewaraloo kɛ̄ ni? Eeye doo pippip! Nyɔɔbee i gbī ebee i Tɛ a le li bunyɔɔ, lo alu “Bari . . . toesaɛ̄ le ewonu, lo a naa wee nwaaba ɛrɛ saŋ, sa mma bu wereloo a naa wee nyaa le kaāna yira.” b—A’aa 34:6.
Pio nɛɛ emuɛ sɔ̄ elu egbeesī “Babilɔn lo Gbɛnɛ” enyɛŋiabu kɔ Pya Ekeebee Jɛhova ebee kɔ nu akiiloo kɔ dua nu a le doo wo esira (Ɛp 12-13 barakpaɛ̄) d
14-15. Ekɔ dum a naatah ziī ziī nɛɛ e’ɛrɛ li deesī dɛɛage nyɔɔ sɔ̄ a u le kɛ̄ a bee tɔɔ̄ ni? Naa baatɛ̄. (Le-yɔɔ 33:4, 5)
14 Pio sɔ̄, i wee dā sɔ̄ pio pya wuga nɛɛdam le nɛɛwa wee kɔ, “Ebee lee lo pya na manamana a naa gaa taāŋabah Jɛhova u lɛɛ gbɛnɛ etɛɛrɛloo gae bɔātɛ̄ lokwa ba ɛrɛ bɛābu aakɛ̄ bu luh.” Bu kaka, a ɛrɛ le ekɛɛrɛ a le dumɛ ue ama. Mɛ dum a naatah lo nɛɛ e’ɛrɛ li deesī naa dɛɛa nyɔɔ sɔ̄ lo nɛɛ bee u. Jɛhova na kaāna nɛɛ biaɛ a—ye biaɛ wee lee sa kaāna. (Buū Le-yɔɔ 33:4, 5.) I ɛrɛ bɛābu kɔ “Nɛɛ Biaɛ loo dɛ̄dɛɛ̄ nyɔuwe” gaa le doo nu a lee.—Jɛn 18:25.
15 Alunage nu suānu le loo lo ekɛɛrɛ kɔ dum a naatah ziī ziī nɛɛ e’ɛrɛ li deesī naa dɛɛa nyɔɔ kɛ̄ lo nɛɛ bee tɔɔ̄. Jɛhova naale ebiaɛ gbɛnɛ-edo miliɔn pya nɛɛ nua “kunɛ pee” nyɔɔbee ba bee tɔɔ̄ kɛ̄ ba naa ɛrɛ dee lo edā yereue Buɛ̄-mɛnɛ. (Mat 25:46) Lo Nɛɛ Biaɛ loo dɛ̄dɛɛ̄ nyɔuwe kuudɛɛ̄loo ziī ziī pya nɛɛ ama eekɛ̄ ili doo. Ii suā kɛ̄ Jɛhova esere bahloo nu doo bu sɔ̄ gbɛnɛ etɛɛrɛloo. Naadabah siga pya nɛɛ ama e’ɛrɛ dee lo enɔ nu akiiloo Jɛhova, ye ɛrɛ yira bu, sa ye tɔɔ̄nɛ, sɔ̄ ba emuɛ sɔ̄ Jɛhova gaa sere ye bee kaɛ bu yube nyɔuwe.—Ezek 38:16.
Sɔ̄ gbɛnɛ etɛɛrɛloo ebɔātɛ̄, . . . ekɔ pio pya a muɛ pya nu a gaa sira enyaana wa nyiɛ ni?
16. Ena i esuā akiiloo Jɛhova a? (Ɛpnage foto.)
16 Aāloo pya nu i enɔā aābu Baibol, i esuā kɛ̄ dum pya nɛɛ kuīloo Jɛhova doo. A nɛ ye Nwiīnɛɛdam kɔ a u i bee lokwa dɛ̄dɛɛ̄ ii ɛrɛ dee lo etɔɔ̄ dum a naatah. (Jɔn 3:16) Dɛ̄dɛɛ̄ ii emɔ̄na wereloo le toesaɛ̄ Jɛhova. (Ais 49:15) Jɛhova suā bee ziī ziī ii. Kere i u, a suā loo ziī ziī ii kaāna mmɛ lo dɔ a dap obara dɛ̄dɛɛ̄ nu a bee le bu i ekɛɛrɛ le dɛ̄dɛɛ̄ kɛ̄ i bee mɛā doo lɛɛ i gae u sere taɛ kɛ̄ a bee le doo! (Mat 10:29-31) Bu kaka, i ɛrɛ kaāna bɛābu kɔ i wereloo Tɛ a le li bunyɔɔ gaa le biaɛ ziī ziī nɛɛ dookɛ̄ a bɔloo doo nyɔɔbee alu nɛɛ a kaāna, suānu, sa ɛrɛ toesaɛ̄.—Jem 2:13.
I suā leere kɔ Jɛhova ebiaɛ ziī ziī nɛɛ bu sīdee a mma, kaāna, sa tɔgɛ toesaɛ̄ (Ɛp 16 barakpaɛ̄)
17. Ena i kɔnia bu lo dɔɔ̄na ekobee ue a?
17 Pya aā edaābeeloo ama doo kɔ i suā kɔ i tam zue ue elu gbaragbara eekɛ̄ a wee le doo. Ena anua i kɔ doo wo a? Ena a i zū kɔ i kiisī lo ezue le yereue sa ii biewo a? I kɔniā pya ye ture bu lo dɔɔ̄na ekobee ue i nɔ.
YƆƆ 76 Ziī Tam A Kpeloo Nɛɛ
a Lo edābeeloo yereloo nu anua alu edoo pya kwabahloo nu ama, buū ekobee ue a kɔ “This Is the Way You Approved,” lo a le bu The Watchtower March 15, 2015, pp. 7-11.
b Sɔ̄ elua egbeesī Babilɔn lo Gbɛnɛ sah, elu edɔā ɛp dɛ̄dɛɛ̄ pya zooro Jɛhova sɔ̄ Gog lo Magog ebebeloo pya nɛɛ Bari. Elunage edɔā ɛp ɛrɛgebah nɛɛ a gbaaloo pya nɛɛ Bari sɔ̄ elua egbeesī Babilɔn lo Gbɛnɛ sah.
c PYA UE A BAATƐ̄ FOTO A LE: Taa ka foto a tɔgɛ nu anua le yereue a gaa lu ezue bu yube nyɔuwe naale edap inaloo pio nɛɛ: (1) Ziī wa a tɔɔ̄ kɛ̄ sīdee yigabari a ɛrɛ ekpo wa barasī naa nɛ ye dee kɔ a dap dā le yereue, (2) dam le wa a tɔɔ̄ kɛ̄ pya bɛbɛɛ naa nɛ dee kɔ alu ezue le yereue, le (3) ziī gbara a tɔɔ̄ kɛ̄ a binia kaāna sa a naa ɛrɛ dee o dap tɛɛ̄nyɔɔ ina lo kɛ̄, e wo doo kɔ pya wuga aa dap ina sa zue ue.
d UE A BAATƐ̄ FOTO: Ziī zege nwiīnɛɛwa lo ebee ɔbɛ etaāŋabah Jɛhova nyɛŋiabu nu a bee nɔ kiiloo gbeerasī “Babilɔn lo Gbɛnɛ.” A bee nyaana ye nyiɛ sa biaɛfii lo e’obia pii Jɛhova sa nyɔɔnɛ pya ye te le ka ba lu Pya Nɛɛ Kraist. Lo nu a le doo wo sira, i gaa le tɔgɛ toesaɛ̄ le fɛgɛ dogo dookɛ̄ i Tɛ a le li bunyɔɔ wee doo, sa ɛrɛ ɛɛbu kɔ ziī nɛɛ pɔrɔ ekiiya.
