Pio pya Nɛɛ Kraist gaa su pya nu alu ekwa anii’ee su nyɔɔnɛ pya butɔ le pya dɔɔ̄na ba lu Pya Ekeebee kɔnia ue. Kerewo, Nɛɛ Kraist a suānu ekɛɛrɛbu zuurabahtɔ̄ a kɔ: “Nɛɛ a ɛrɛ ekɛɛrɛ muɛ̄ pɔrɔ nu sɔ̄ a gaa lu sa gɔ̄ ye loo; mɛ pya a naa ɛrɛ ekɛɛrɛ kii sī sa muɛ̄ etɛɛrɛ aāloo.”—Kam 27:12.

I suā leere kɔ Jɛhova gbī ekpega i. Nyɔɔwo, ii gbī enyɔɔnɛ pya anua popooa, pya alu ekpo, ale pya a nyimɛ ekwɔ tɔgɛnu dānia nu. (Rom 16:17; 1 Kɔr 5:11; 2 Jɔn 10, 11) Pio pya a si enɔānu naa gaa tɔɔ̄dum dookɛ̄ Bari gbī doo. (2 Tim 2:20, 21) Nyɔɔwo, a lee i kɛɛrɛbu lo ama sɔ̄ i gaa sagɛ pya i yii gbo. Naale ewaɛ esuā loo nɛɛ alu le gbo lo a le i yii wa gbo tɛ̄maloo yereue tɛ̄ma bu fon wa ma.

A lee kɔ i nwaɛ̄dɛɛ̄ kaāna sɔ̄ i gaa yii gbo yɛɛ gbɛnɛ eku nɛɛ nyɔɔ intanɛt. Pio pya Nɛɛ Kraist eyira yɛɛ gbɛnɛ eku, sa pɔrɔ nu esira wa loo. Mɛ wuga nɛɛdam ale wuga nɛɛwa enwaɛ̄dɛɛ̄ doodoo wa lo pya a gaa nyɔɔnɛ kɔnia ue kuīkpo sa lu booboo ni? E aga esuā loo dɛ̄dɛɛ̄ pya a le bu lo eku sa suā kɛ̄ ba agaloo bu yira doo. Le-yɔɔ 26:4 kɔ: “Mm yɔ pya kɔ esah ɛŋɛtɛ̄ aba dɔ, ale yɔ pya baɛ sī bɔŋanaloo.” Ekɔ lo ama naa tɔgɛ i kɔ i su pya lo app yeā ue ma aba pya i suāloo sī le sī ni?

Kere pya o gaa yere ue ma naa kuīkpo, a bɔloo kɔ Nɛɛ Kraist a ɛp buā sɔ̄ le taɛ a ɛrɛ bu. Naa kura kɔ i gbī enyɔɔnɛ pya dɔɔ̄na kɔnia sɔh, kaɛlɛɛ nu ba kɔ ue kumaloo ale buā sɔ̄ ba su daā. Pɔɔl bee zuurabahtɔ̄ Timoti kumaloo pya nɛɛ ba “kɔgara ezu ue sa gɔmgɔm” loo pya dɔɔ̄na. (1 Tim 5:13) Nii’ee, waɛnage kɔ i su i fon daā nu a le doo wo.

Lɔgɔ Nɛɛ Kraist a nyim tura naale ekɔ ale gbaɛ̄tɔ̄ pɔrɔpɔrɔ ale gɔā ue akiiloo dɔɔ̄na nɛɛ Ekeebee. (Yɔɔ 15:3; Kam 20:19) E a naale egbaɛ̄tɔ̄ pya yereue alu eyɛgɛ yeekɛ̄ ale lo a sii lu esuā sɛh a luge kaka. (Ɛfɛs 4:25) Alu kaka kɔ i wee ɛrɛ gbɛnɛkpo pya i nuede bu edɔɔ̄ le le yereue i dap dɛrɛ nyiɛ nyɔɔ aābu i JW Broadcasting^® ziī ziī enɔɔ̄ le i dɔ intanɛt jw.org.

Pio pya Ekeebee wee su ue alu eyere tɛ̄ma bu fon oā sa yaā nu, ale su yeā pya nɛɛ loo tam. Lo ama lu sīdee gbora ziī ziī nɛɛ, e a naa kiiloo taāŋabah Jɛhova. Pya Nɛɛ Kraist ɛrɛ esere wa “dum lɛɛloo wereloo kpugi” sa kiī lo esu pya i wuga gbiā kpugi.—Hib 13:5.

E kiiloo susu pya app a wee lu esu yeā ue bima kpugi aābah pya wuga lo esu yeābah nɛ pya wuga a le bu ebɛɛ̄ ale nu bugia siraloo ni a? Gbɛnɛ-edo sɔ̄, aāloo wereloo i ɛrɛ, i wee tɔgɛ taɛ lo eyerebah sa yere mɛm loo pya dɔɔ̄na. (Jem 2:15, 16) Mɛ dodoo wo tɛ̄maloo ziī gbɛnɛ eku a wee gbaa kɔnia ue nyɔɔ intanɛt elu kiiya sī loo nɔɔnɔɔnu tɔ naa tam ale bɔŋanaloo lo eyerebah wa nɛ. (1 Tim 5:3, 4, 9, 10, 16) E alu kaka kɔ lɔgɔ ii naa gbī esereloo bee kɔ alu enɛ i keebee esiatam bee pya naana pee Bari.

A taɛ i edoo nu enɛ ka Bari. (1 Kɔr 10:31) Nyɔɔwo, sɔ̄ o gaa biaɛfii lo o suge pya app a wee lu esu yeā ue ale pya dɔɔ̄na nu elua ekwa daānu ale oo le esu, dasī kɛɛrɛbu pya nu bɔɔ a le bu, sa o nwaɛ̄dɛɛ̄.