1. E na alu kaka akiiloo pya zege wuga nɛɛdam a?

PYA zege wuga nɛɛdam, bui ɛrɛ gbɛnɛ-edo nu edoo bu bɔŋanaloo. Gbɛnɛ-edo bui le e’agaloo sa lege e’ɛrɛ mɛm. (Kam 20:29) O gaa si gbɛnɛ-edo tam lo eyerebah nɛ bɔŋanaloo. Sa dap lu kɔ o gaa ɛmadɛɛ̄ sɔ̄ elu etubo a baloo nua nɛɛ yerebah tam. Kerewo, o dap kɛɛrɛ kɔ pya dɔɔ̄na ɛp kɔ o lege etera ale o sii suā gbɛnɛ-edo nu kɔ alu enɛ a dua tam a kuī ama. Kereadoo o lege zege, a ɛrɛ pya nu o dap doo anyaawo lokwa pya o bɔŋanaloo a dap dɛrɛ nyiɛ nyɔɔ sa a nwadɛɛ̄.

2. E na i gaa le nɔ bu ekobee ue ama a?

² Bu ekobee ue ama, i gaa le kɛɛrɛ nu akiiloo nu a bee sira loo Mɛnɛ Devid. I nɔnage kerebah nu akiiloo baɛ mɛnɛ Juda, lo a le Asa le Jɛhoshafat. I gaa le nɔ nu akiiloo pya nu finiabah taa nɛɛ ama bee kpesī, nu ba bee doo kumaloo, le nu pya wuga nɛɛdam ba lege zege dap nɔ aāloo wa edoba.

3. Ziī amunu sīdee na pya zege dap yerebah nɛ pya nama nɛɛ a le bu bɔŋanaloo a?

³ Sɔ̄ Devid bee le zege, a bee nɔ pya nu a dap su daānu nɛ pya dɔɔ̄na. Alu kaka kɔ a bee doo nu a nia Bari, a bee nɔ yɔɔ sa lu nɛɛ a para uɛ yɔɔ, e a bee su kari ama yeābah nɛ mɛnɛ Bari bee tubobaloo a kura Sɔɔl.  (1 Sam 16:16, 23) Ekɔ bɔɔlo pya nɛɛdam a le zege ɛrɛge kari a dap dɔbiī nɛ pya dɔɔ̄na a le bu bɔŋanaloo ni? Gbɛnɛ-edo bui ɛrɛ. Bu edoba, o dap muɛ̄ kɔ a nia pya nama nɛɛ sɔ̄ alu etɔgɛ wa kɛ̄ ba dap su wa gbɛnɛka fon daānu bie enɔānu le sɔ̄ ba gaa nɔnu nyɔɔ wa loo doo. Nyɔɔbee o para esu pya nu ama daānu a, o dap su yeābah nɛ pya nama nɛɛ ama.

4. Doodoo Devid, pya amunu elap dogo na a bɔloo kɔ pya zege wuga nɛɛdam a ɛrɛ a? (Ɛp foto a le nyɔɔ eko.)

⁴ Aā ziī dee yii ziī, Devid bee tɔgɛ kɔ a nyim e tura sa bɔloo edɛrɛ ye nyiɛ nyɔɔ. Bu edoba, sɔ̄ a bee le zege, a bee piiga kaāna lo ekuūdɛɛ̄loo naana pee ye tɛ. Lo ama bee lu gbɛnɛ tam a yere bɔɔ. Sɔ̄ esaa Devid bee kɔ nɛ Mɛnɛ Sɔɔl kɔ: “O zooro wee tɔɔ̄ loo gbo naana ye tɛ; e sɔ̄ ziī sasa-ekpo, ale ziī bear bee lu, sa bee su ziī nwī naana aāloo gbo naana a, mda bee ye nyɔɔnɛ sa bee ye fɛ sa bee ye zuura lɛɛ bu ye egā.” (1 Sam 17:34, 35) Devid bee muɛ̄ kɔ alu toh a ye le e bee lo ekuūdɛɛ̄loo lo gbo naana leere, e a bee bebe lo ekpega wa. Pya zege wuga nɛɛdam dap nɔ edoba Devid tɛ̄maloo esah ɛrɛgeba tam alu enɛ wa.

5. Dookɛ̄ Le-yɔɔ 25:14 kɔ doo, e na alu kaāna nu a kuī pya zege wuga nɛɛdam edoo a?

⁵ Sɔ̄ Devid bee lege zege, a bee ɛrɛ kaāna gbanialoo kumaloo Jɛhova. Lo gbanialoo bee kuī ee mɛm ale kari uɛma yɔɔ lo Devid bee ɛrɛ. Naale aba bee kɔ Jɛhova bee lu Bari Devid, mɛ a bee lunage ye gbo, kaāna gbo a ye tɔɔ̄ waɛloo. (Buū Le-yɔɔ 25:14.) Pya zege wuga nɛɛdam, kaāna nu a kuī a bɔloo kɔ bui doo na e’agɛrɛtɛ̄ gbanialoo bui ɛrɛ kumaloo bui Tɛ a le li bunyɔɔ, e lo ama edoo kɔ bui ɛrɛ gbɛnɛ-edo nu edoo bu bɔŋanaloo.

6. Pya dɔɔ̄na bee ɛp Devid doodoo wa?

⁶ Bee lu ebɛɛ̄ kɔ Devid a be eebah sɔ̄ pya dɔɔ̄na ye ɛp kumakɛ̄. Bu edoba, sɔ̄ Devid bee su loo nɛ lo ebe be loo Goliat, Mɛnɛ Sɔɔl bee gbī e’ɔbɛ ye tɛ̄maloo ekɔ: “O lege nwiī zuguru.” (1 Sam 17:31-33) Lɛɛ a gae lu lo sɔ̄, wuga Devid ebee ye kɔ nɛ kɔ a sii nyim tura. (1 Sam 17:26-30) Kerewo, Jɛhova naa bee ɛp Devid kɔ a naa nyim tura ale kɔ  a lege etera. A bee suāloo lo zege nɛɛ. E Devid bee dap fɛ Goliat nyɔɔbee a bee dɛɛa nyɔɔ ye Gbo Jɛhova.—1 Sam 17:45, 48-51.

7. E na o dap nɔ aāloo ziī e’ɛma akiiloo Devid a?

⁷ E na o dap nɔ aāloo nu a bee siraloo Devid a? I nɔ kɔ a bɔloo kɔ i egerebu. A dap su sɔ̄ bah pya nɛɛ a bee a suāloo sɔ̄ o bee le nwiī kɔ ba a ɛp kɔ o enyima tura nɛɛ. Kerewo, o dap suā leere kɔ Jɛhova muɛ̄ emanyɔɔ kɛ̄ o mɛā le doo. A suā dua nɛɛ o lu le nu o dap doo. (1 Sam 16:7) Agɛrɛtɛ̄ o gbanialoo kumaloo Bari. Devid bee doo wo tɛ̄maloo e’ɛp pya nu Jɛhova edɛma. Devid bee kɛɛrɛ nu pya tam ama ye tɔgɛ akiiloo Nɛɛ dɛmnu. (Yɔɔ 8:3, 4; 139:14; Rom 1:20) Dɔɔ̄na nu o dap doo na ebara e’agaloo aābah Jɛhova. Bu edoba, ekɔ pio pya o gbo tɔkpa wee a kɛgɛ kɔ o lu ziī nɛɛ Ekeebee Jɛhova ni? Lo a le doo wo, bara Jɛhova kɔ a yerebah a nɛ lo ebe eebah nu finiabah ama. Lɛɛ o su pya zuurabahtɔ̄ o gbī muɛ̄ bu ye Muɛ̄ Ue, pya kpa i wee nɔā Baibol le vidio yere bu dogo. Ɛrɛgeba sɔ̄ o muɛ̄ kɔ Jɛhova eyerebah a nɛ kɔ o be eebah ziī nu finiabah, kɛ̄ o ye dɛrɛ nyiɛ nyɔɔ doo enyim yiiloo. Gbaāloo wo, sɔ̄ pya dɔɔ̄na muɛ̄ kɔ o dɛɛa nyɔɔ Jɛhova, ba edɛrɛ a nyiɛ nyɔɔ.

8-9. E na a bee yerebah nɛ Devid kɔ a dap egerebu mmɛ sɔ̄ alu esu ye nua mɛnɛ a, e e na pya wuga nɛɛdam a le zege dap nɔ aāloo ye edoba a?

⁸ Naa ɛp dɔɔ̄na nu finiabah Devid bee kpesī ama. Sɔ̄ ebee lu etɔ̄ nɔɔ̄ bee Devid nua mɛnɛ sah, a bee ɛrɛ eyira bu gbɛnɛ-edo zua lɛɛ a gae bɛɛ doodoo mɛnɛ Juda. (1 Sam 16:13; 2 Sam 2:3, 4) E na a bee ye yerebah nɛ kɔ a dap egerebu bu pya sɔ̄ ama a? Taā Devid sere ekɛɛrɛ nyɔɔ pya nu a ye dap ɔɛloo, a bee sere ekɛɛrɛ nyɔɔ nu a dap doo. Bu edoba, sɔ̄ a bee le uwe tee bie barasī pya Filistia, Devid bee su sɔ̄ ama beā be loo pya nɛɛ baa Izrɛl. Dodoo wo bee doo kɔ a kpega pya kɛ̄ kuma loo kɛ̄ a kuu pya Juda.—1 Sam 27:1-12.

⁹ E na pya wuga nɛɛdam a le zege dap nɔ aāloo edoba Devid a? Su pya dee a a kpaā nɛ siātam nɛ pya o wuga. Naa kɛɛrɛbu nu a bee siraloo ziī wuga nɛɛdam a kura Ricardo. * Sɔ̄ ebee dap lu lop zua, a bee gbī elu nɛɛ sɛmdee. Mɛ pya kanɛɛ bee kɔ a dasī yira. Taā a pee beenyiɛ ye sa ɛrɛ saŋ, Ricardo bee sikɛ̄ si uwe zue ue yereloo ee kɛ̄ a wee doo. Alɛ bee kɔ: “Sɔ̄ m kɛɛrɛbu sɔ̄ akii adumɛ, m bee muɛ̄ kɔ a bee lu ebɛɛ̄ kɔ m nyim yiiloo. M bee kiisī lo ekiā tura ɛrɛgeba nɛɛ a tɔgɛ taɛ sa kpɛ̄naloo lɛɛ m gae obia wa siloo. M bee sere na tua enɔānu Baibol. Kɛ̄ m kiisī lo ezue ue doo, kɛ̄ bɔɔ bee mɛ tah nage loo doolo.” Ricardo gaa su mɛm siātam doodoo nɛɛ sɛmdee dɛ̄dɛɛ̄ sɔ̄ le nɛɛ yerebah tam anyaawo.

10. E na Devid bee doo ziī sɔ̄ lɛɛ a gae biaɛfii ziī nu a kuī a?

¹⁰ Naa ɛp dɔɔ̄na nu a bee sira nage loo Devid ama. Sɔ̄ alɛ le pya ye nɛɛ bee lege dee tee, ba bee lɛɛbaloo pya wa butɔ bie sa kii uwe be nɔ̄. Sɔ̄ ba bee lege uwe nɔ̄, pya wa baa bee gbee wa kɛ̄ etɔɔ̄ sa aa pya wa butɔ aā. Devid ebee dap biaɛfii kɔ aāloo dɛ̄dɛɛ̄ suānu e’ɛrɛ doodoo nɛɛ nɔ̄, mɛ a dabe nɔɔ nu elu edoo lo e’agara pya ebee lu  e’aa kuma a. Taāwo, Devid bee gbī yerebah aābah Jɛhova. Tɛ̄maloo yerebah nɛɛ wɔp zɔɔ a kura Abiata, Devid bee bip Jɛhova kɔ: “M gaa le kponiage eku ama?” Jɛhova bee kɔ nɛ Devid kɔ a doo wo, e a bee doo kɔ a suā kɔ e’eebah. (1 Sam 30:7-10) E na o dap nɔ aāloo nu a bee sira ama a?

11. E na o dap doo lɛɛ o gae biaɛ nu fii a?

¹¹ Gbī yerebah aābah pya dɔɔ̄na lɛɛ o gae biaɛ nu fii. Kɔ ue nɛ o tɛ le o ka. O dapnage ɛrɛ kaāna zuurabahtɔ̄ tɛ̄maloo ekɔ ue nɛ pya kanɛɛ. Jɛhova dɛrɛ nyiɛ nyɔɔ pya wuga nɛɛdam alu etubobaloo ama, e olo dapnage doo wo. Jɛhova ɛp wa nua “dɔɔ̄nu” nɛ bɔŋanaloo. (Ɛfɛs 4:8) O dap ɛrɛ biī aāloo nɔnɔ wa yira le gbāgbaɛ̄tɔ̄loo pya ekɛɛrɛ ba a tura nɛ. Nyaawo, doo i naa kɛɛrɛbu nu i dap nɔ aāloo Mɛnɛ Asa.

12. Pya amunu elap dogo na Mɛnɛ Asa bee ɛrɛ sɔ̄ a bee bɔātɛ̄ bɛɛ a?

¹² Mɛnɛ Asa bee kumalookɛ̄ sa ɛrɛ mɛm sɔ̄ a bee le zege. Bu edoba, sɔ̄ a bee lu mɛnɛ sɔ̄ ye tɛ Abija u sah, a bee lɛɛ dɛ̄dɛɛ̄ taāŋabah yɔ a bee le bu buɛ̄ a. A bee “nɛ lok Juda lo egbī Jɛhova, Bari pya wa tɛ, sa sere lok le etɔānu.” (2 Edoo 14:1-7) E sɔ̄ Zera nɛɛ Etiopia bee su baɛ boo le lop tup sɔ̄ baɛ boo le lop tup (1,000,000) gbo nɔ̄ beā be loo Juda, Asa bee gbī yerebah aābah Jɛhova sɔ̄ a kɔ: “Aa Jɛhova, lɔgɔ nɛɛ yerebah a a bee naale, yɛɛ nɛɛ a ɛrɛ ekpo le nɛɛ loo ɔ. Yerebah i nɛ, Aa Jɛhova ilii Bari, nyɔnɛbee olo na i ture nyiɛ loo a.” Gbɛnɛ le ue ama tɔgɛ dua kɛ̄ Asa bee dɛrɛ nyiɛ nyɔɔ ekpo Jɛhova ɛrɛ lo ekpɔā ye le pya ye nɛɛ doo. Asa bee ture nyiɛ loo ye Tɛ a le li bunyɔɔ, sa “Jɛhova bee eeba pya Etiopia.”—2 Edoo 14:8-12.

13. E na a bee sikɛ̄ siraloo Asa a, e e na anua a?

¹³ O dap yiga kɔ bebe loo baɛ boo le lop tup sɔ̄ baɛ boo le lop tup (1,000,000) gbo nɔ̄ lu gbɛnɛ nu finiabah, mɛ Asa bee be eebah. Kerewo, alu ekiɛ̄nu kɔ sɔ̄ lo nwīgbagbara nu finiabah bee ye kpesī, Asa naa bee barana yerebah aābah Jɛhova. Sɔ̄ a bee kpesī Mɛnɛ Izrɛl a bee erabee a kura  Baasha, Asa bee bara yerebah aābah mɛnɛ Siria. Pɔrɔ nu bee sira aabu lo biaɛfii! Jɛhova bee kɔ nɛ Asa tɛ̄ma nu nɛɛ mɔmanudɛɛ̄ Hanani kɔ: “Nyɔnɛbee o bee ture nyiɛ loo mɛnɛ-buɛ̄ Siria, sa oo bee ture nyiɛ loo Jɛhova o Bari, gbɛnɛ gbo nɔ̄ mɛnɛ-buɛ̄ Siria eteera a aaloo.” Alu kaka kɔ aā lo sɔ̄ kiisī, Asa bee kpesī ebea nɔ̄ aā ziī sɔ̄ yii ziī. (2 Edoo 16:7, 9; 1 Mɛnɛ 15:32) E na i nɔ aāloo ani?

14. Bu mɛ sīdee na o dap dɛɛa nyɔɔ Jɛhova a, e dookɛ̄ 1 Timɔti 4:12 kɔ doo, e na esira lo o doo wo a?

¹⁴ Kiisī lo e kumalookɛ̄ sa dɛɛa nyɔɔ Jɛhova. Sɔ̄ o bee liamaā, o bee tɔgɛ kɔ o ɛrɛ e’agatɛ̄ yira sa ture nyiɛ loo Jɛhova. E Jɛhova bee su ɛɛbu a suā kɔ o lu ziī yɛɛ pya ye butɔ. Nu a bɔloo edoo anyaawo na kiisī lo edɛɛa nyɔɔ Jɛhova. Dap lu kɔ a wee a waɛbah edɛɛa nyɔɔ Jɛhova sɔ̄ o gbī ebiaɛfii nu alu gbɛnɛ, mɛ lo alu biaɛfii a naa lu gbɛnɛ ni a? Naa ɛp kɛ̄ alu nu a kuī doo kɔ i ture nyiɛ loo Jɛhova sɔ̄ i gaa biaɛ nu fii kiiloo ɛrɛ ekpeloo, tam esi, le nu i seea sī bu dum a! O aa dɛɛa nyɔɔ oloo suānu. Taāwo, gbī pya biakɛ̄ lok Baibol a gbaaloo o kɛ̄tɔɔ̄, sa doo dogo a gbaaloo lo zuurabahtɔ̄. (Kam 3:5, 6) Lo o doo wo, o doo kɔ bu Jɛhova a ɛɛ sa pya a le bu o bɔŋanaloo enwa a dɛɛ̄.—Buū 1 Timɔti 4:12.

15. Dookɛ̄ alu e’ɛm doo bu 2 Nu a bee lu edoo 18:1-3; 19:2, pya amunu ekwɔ na Mɛnɛ Jɛhoshafat bee tɛɛ̄ a?

¹⁵ Bu kaka, oo mmana dookɛ̄ dɛ̄dɛɛ̄ ii ii mmana doo, nyɔɔwo o dap tɛɛ̄ ekwɔ siga sɔ̄. Kerewo, o aa yiga kɔ lo ama a kpaɛ̄ a lɛɛ loo edoo dɛ̄dɛɛ̄ nu o dap bu esiatam nɛ Jɛhova. Kɛɛrɛbu edoba Mɛnɛ Jɛhoshafat. A bee ɛrɛ le le elap dogo. Sɔ̄ a bee lege zege, “a bee gbī Bari loo ye tɛ sa kiā bu dɛ̄dɛɛ̄ ye lok.” Gbaāloo wo, a bee yerenage pya nɛɛbee kɔ ba a kiāŋa bu dɛ̄dɛɛ̄ gbɛnɛ buɛ̄ Juda sa tɔgɛ nu akiiloo Jɛhova pya nɛɛ. (2 Edoo 17:4, 7) Kaɛlɛɛ kɛ̄ Jɛhoshafat kaāna doo, a ɛrɛ sɔ̄ a bee biaɛ nu fii bu pɔrɔ sīdee. Nyɔɔbee ziī lo pɔrɔ biaɛfii, Jɛhova bee su ziī ye nɛɛtam ye zuūnabahtɔ̄. (Buū 2 Nu a  bee lu edoo 18:1-3; 19:2.) E na o dap nɔ aāloo e’ɛma ama a?

16. E na o dap nɔ aāloo nu a bee siraloo Rajeev a?

¹⁶ Su zuurabahtɔ̄ sa yere bu dogo. O dap le gaa piiga lo e’ɛrɛ pya le nu o seea sī, dookɛ̄ pya dɔɔ̄na zege nɛɛdam gaa doo. Loo a aa ɔ. Naa yere nukuādɛɛ̄ loo nu a bee siraloo ziī zege wuga nɛɛdam a kura Rajeev. A bee kɔ kumaloo pya zua a bee lege zege kɔ: “Siga sɔ̄ wee bee kɔ mm suā nu esu na dum daā. Dookɛ̄ booboo pya zege gaa doo, wee mɛ nia ebira bii laɛgɛloo ee si enɔānu le uwe zue ue.” E na a bee yerebah nɛ Rajaav a? Ziī nɛɛ kanɛɛ alu fɛgɛ bee ye zuurabahtɔ̄. Rajaav bee kɔ: “A bee mɛ yerebah nɛ kɔ m ɛrɛ ekɛɛrɛ nyɔɔ zuurabahtɔ̄ a le bu 1 Timɔti 4:8.” Rajaav bee su lo zuurabahtɔ̄ sa bee sikɛ̄ ɛp pya nu a seea si bu dum. A bee kɔ: “M bee biaɛfii lo esu nu bu edɔɔ̄ seea sī.” E na a bee sira aabu a? Rajeev kɔ, “Pio zua aā sɔ̄ a bee lu enɛ mɛ lo zuurabahtɔ̄, m bee nyim tura lo elu nɛɛ yerebah tam.”

17. A tɔɔ̄loo pya nama nɛɛ doodoo wa sɔ̄ ba muɛ̄ pya zege nɛɛdam ba gaa si tam nɛ Jɛhova ni?

¹⁷ Pya nama nɛɛ tɔgɛ kaāna nia loo bɔɔlo pya zege a gaa wa nyɔɔnɛ si tam nɛ Jɛhova bu “aba beenyiɛ.” (Zef 3:9) Bu wa ɛɛ loo kɛ̄ o bɛamiā bu edɔɔ̄ sa su mɛm le taɛ siātam alu enɛ a doo. O egbiā ewonu wa muɛ̄ kɛ̄sī.—1 Jɔn 2:14.

18. Dookɛ̄ kpa Kam 27:11 kɔ doo, a tɔɔ̄loo Jɛhova doodoo wa sɔ̄ pya zege nɛɛdam ye si tam nɛ ni?

¹⁸ Pya zege wuga nɛɛdam, aa i ibere kɔ Jɛhova were i loo sa i dɛrɛ nyiɛ nyɔɔ. A bee kɔ sere kɛ̄ kɔ bu kpɛdumɛ dee, pya zuguru gaa le su loo wa nɛ doodoo gbo nɔ̄. (Yɔɔ 110:1-3) A suā kɔ bui weree ye loo sa gbī esu dɛ̄dɛɛ̄ bui ekpo ye siātam nɛ. Nyɔɔwo, waa bege ue pya dɔɔ̄na, e o aa bege nage ue aba ɔɔ yeekɛ̄. Sɔ̄ o tɛɛ̄ ekwɔ, su kākāmɛnɛ le zuurabahtɔ̄ alu enɛ a, sa ɛp kɔ a aabah Jɛhova. (Hib 12:6) Piiga lo esi ɛrɛgeba tam alu enɛ a leere. E lo a kuī eera, doo kɔ bu o Tɛ a le li bunyɔɔ a ɛɛ loo dɛ̄dɛɛ̄ nu o doo.—Buū Kam 27:11.