Pio pya a naa buū e’ɛma ama leere, ebiba dua ebip a le deenyɔɔ a yah. Kerewo, dɔ ama kɔ nu akiiloo baɛ nɛɛ wa bee kura Mefiboshet, e i dap nɔ nu aāloo lo i sikɛ̄ tɛɛ̄nyɔɔ nu a bee sira ama.

Mɛnɛ a bee bɛɛ Izrɛl a kura Sɔɔl bee ɛrɛ ɛrɛba miɔŋɔ nɛɛdam le baɛ miɔŋɔ nɛɛwa. Saaro Sɔɔl bee le Jonatan. Sɔ̄ esaa, Sɔɔl bee ɛrɛ dɔɔ̄na nwiīnɛɛdam a kura Mefiboshet, tɛ̄maloo ye gā a kura Rizpah. A bee siranage kɔ, Jonatan bee ɛrɛ nwiīnɛɛdam ye bee kura Mefiboshet. Nyɔɔwo, ziī nwiīnɛɛdam Mɛnɛ Sɔɔl bee kura Mefiboshet, e nwiī ye nwiī bee kuranage aba lo bee.

A ɛrɛ sɔ̄ Mɛnɛ Sɔɔl bee baaloo pya Gibeon lo ba bee le yɛɛ pya Izrɛl sa gbī efɛ dɛ̄dɛɛ̄ aba lɛɛ. E a bee sira kɔ a bee lu efɛ gbɛnɛ-edo aba. Lo ama bee lu nu a bee piya kaāna. Ena anua ani? Nyɔnɛbee bu dee Joshua, pya nɛɛbee loo tɔ Izrɛl bee nyɔɔnɛ pya Gibeon doo yii-bɔmadum efɛɛloo.—Josh 9:3-27.

Lo yii-bɔmadum bee lege aa si tam mmɛ bu dee Mɛnɛ Sɔɔl. Kerewo, mɛnɛ ama bee gbī ekpagiri dɛ̄dɛɛ̄ pya Gibeon lɛɛ, e lo ama bee lu kiiyasī loo nu lo yii-bɔmadum bee kɔ. Nu a bee gbī edoo ama bee doo kɔ, “beebee ue mii [a] le nyɔɔ Sɔɔl le ye tɔ.” (2 Sam 21:1) Sɔ̄sɔ̄ aa kiisī, Devid bee lu mɛnɛ. Pio pya Gibeon a bee tɛɛ̄ yeebah bee kpɛa gbɛnɛ pɔrɔ nu a bee sira ama ye nɛ. Devid bee wa bip nu elu edoo loo gbɛnɛ pɔrɔ nu Sɔɔl bee doo ama, lokwa Jɛhova dap sikɛ̄ nɛ leelee kɛnɛkɛ̄ pya Izrɛl. Taā pya Gibeon bip kpugi, ba bee kɔ alu enɛe wa ɛrɛba miɔŋɔ nɛɛ a “bee bura [lo] egbee” wa a, lokwa ba wa fɛ. Devid bee doo nu ba bee bara ama.—2 Sam 21:2-6; Buā 35:30, 31.

Lɛɛ a gae lu lo sɔ̄, Sɔɔl le Jonatan ebee u bia uwe nɔ̄, kerewo, nwiīnɛɛdam Jonatan a kura Mefiboshet bee lege dum. A bee lu kɔgah nyɔɔbee bugia siranu a bee ye siraloo sɔ̄ a bee lege etera, nyɔɔwo, a naa bee le loo ye nama tɛ sɔ̄ a bee gbī egbeesī dɛ̄dɛɛ̄ pya Gibeon lɛɛ. Devid ebee nyɔɔnɛ Jonatan doo yii-bɔmadum, lo a doo kɔ pya ye manamana a ɛrɛ biī aāloo, gbaānage loo nwiī Jonatan a kura Mefiboshet. (1 Sam 18:1; 20:42) Lo e’ɛma kɔ: “Mɛnɛ [Devid] bee lɛɛbaloo Mefiboshet, nwiīnɛɛdam Jonatan, nwiī Sɔɔl, nyɔɔbee yii Jɛhova lo a bee wa le yɛɛ, yɛɛ Devid le Jonatan nwiī Sɔɔl.”—2 Sam 21:7.

Nyɔɔwo, bu mɛ sīdee na Devid bee doo nu pya Gibeon bee kɔ a? A bee wa nɛ baɛ miɔŋɔ nɛɛdam Sɔɔl, lo bee ziī aba bee kura Mefiboshet, le o’oo miɔŋɔ nɛɛdam ba lu nwiī ye nwiī. (2 Sam 21:8, 9) Nu Devid bee doo ama bee doo kɔ alu elɛɛ beebee ue mii bu lo buɛ̄.

Nu a bee sira ama naale kunɛ eloh. Lok Bari ebee kɔ taɛ nu ba edoo. A kɔ: “Naale elunage efɛ gbomiɔŋɔ nyɔɔbee pya wa tɛ.” (Deut 24:16) Jɛhova naale ebee yiga kɔ alu efɛ baɛ miɔŋɔ nɛɛdam Sɔɔl le o’oo miɔŋɔ nɛɛdam ba lu nwiī ye nwiī, lo ba naa bee suātɛ̄ nu a bee sira ama. Lo lok kɔ yereloo kɔ: “A gaa le lu efɛ ɛrɛgeba nɛɛ nyɔɔbee ye doo gbee.” A bee bee kɔ ɛrɛba miɔŋɔ nɛɛdam ama, bee suātɛ̄ nu Sɔɔl bee nɔɔ lo egbeesī pya Gibeon lɛɛ. E nu a bee sira aabu na bee, nu bee wa zia nyɔɔ pɔrɔ ba bee si a.

Nu a bee sira ama tɔgɛ kɔ a naa lee kɔ lɔgɔ nɛɛ a leere ue aba ɛɛ sɔ̄ a si pɔrɔ, sa kɔ ale kɛɛrɛ kɔ ɛɛ nyɔɔbee a bee lu ekɔ a dooe wo na anua a doo a. A ɛrɛ kam a kɔ: “Ɛp nwīdee o baɛ ekaɛtɔ leere, lo sɔ̄ dɛ̄dɛɛ̄ o dee gaa le lu kaka.”—Kam 4:24-27; Ɛfɛs 5:15.