Ena anua gbara alu ekure “Nɛɛ a ye lu loo” bee kɔ e “gbee” ye nu e’ɛrɛ lo a le a ii’e Rut a? (Rut 4:1, 6)

Bu sɔ̄ a bee lu e’ɛm Baibol, sɔ̄ ziī nɛɛ a bee ii wa u sa naa ɛrɛ nwiī a ɛrɛ pya ebip a wee aakɛ̄ lo a gbī ture, doodoo: Ena esiraloo pya kɛnɛkɛ̄ a bee ɛrɛ a? Ekɔ ye bee ezim ni? Lok Mozis bee agara pya ebip ama.

Ena a wee siraloo kɛnɛkɛ̄ nɛɛ a u, ale a bee lu kporo sa bee oo ye kɛnɛkɛ̄ a? Ye wuga nɛɛdam ale ziī ye manamana dap agara, ale sikɛ̄ yaɛ lo kɛnɛkɛ̄. Lo ama edoo kɔ lo kɛnɛkɛ̄ a lege aa lu lo pya ye tɔ.—Lev 25:23-28; Buā 27:8-11.

Edoodoo wa sa bee nɛɛ a bee u ama naa zim ni? Ɛɛ na lo a le ziī manamana nɛɛ a bee u a, ii wa ye wuga dookɛ̄ a bee sira loo Rut doo. Nɛɛ dap sikɛ̄ ii wa ye wuga lokwa ye wuga ebee u ama dap ɛrɛ nwiī eyiga ye bee sa su ye zɔ. Nɔɔnɔɔnu a tɔgɛ wereloo ama edoonage kɔ wa ye dam ebee u ama a ɛrɛ nɛɛ a ye kuūdɛɛ̄loo.—Deut 25:5-7; Mat 22:23-28.

Naa kɛɛrɛbu edoba Naomi. A bee iya ziī gbara a kura Elimelek. Sɔ̄ Elimelek le baɛ ye miɔŋɔ nɛɛdam bee u, Naomi naa bee ɛrɛna lɔgɔ nɛɛ enɛ ye pya nu a ye bɛɛ̄. (Rut 1:1-5) Sɔ̄ ba obia ina Juda, Naomi bee kɔ Rut alu wa ye nwiī a si loo Boaz kɔ a agara wa kɛnɛkɛ̄. Boaz bee le manamana Elimelek. (Rut 2:1, 19, 20; 3:1-4) Mɛ Boaz bee suā kɔ dɔɔ̄na ye manamana a ye waɛloo ee alɛ lo Baibol kure “Nɛɛ a ye lu loo,” le. Nyɔɔwo tua alɛ na a kuu kɔ alu nɛɛ e agara ye nu a.—Rut 3:9, 12, 13.

Tua sɔ̄, lo “Nɛɛ a ye lu loo” bee gbī eyerebah. (Rut 4:1-4) Kere a kura kɔ esu ye pio nu bah, a bee suā kɔ Naomi naale edapna maɛ nwiī lo esu kɛnɛkɛ̄ lɛɛ bah Elimelek. Nyɔɔwo, Nɛɛ a ye lu loo na e’ɛrɛ lo kɛnɛkɛ̄ a, e a bee kɔ a bɔloo doo wo.

Mɛ Nɛɛ a ye lu loo bee nyaana nyiɛ ye sɔ̄ a suā kɔ Rut le ekpɛ̄naloo esikɛ̄ iya dam. A bee kɔ: “Mm le dap ye agara nɛ na loo, taā a doo m gbee mdaa nu e’ɛrɛ.” (Rut 4:5, 6) Ena anua a bee nyaana nyiɛ ye a?

Lo Nɛɛ a ye lu loo a, ale dɔɔ̄na nɛɛ ii Rut sa a maɛ̄ nwiīnɛɛdam, lo nwiīnɛɛdam na a e’ɛrɛ dɛ̄dɛɛ̄ kɛnɛkɛ̄ Elimelek a. Bu mɛ sīdee na a e “gbee” nu e’ɛrɛ Nɛɛ a ye lu loo a? Baibol naa kɔ, kerewo, a ɛrɛ pio nu anua a bee dap kɔ doo wo.

• Tuatua, ebee kɔ kpugi a bee kpɛ pe, nyɔnɛbee a naale elu enɛ ye lɔgɔ kɛnɛkɛ̄ Elimelek. Nwiī Rut na a e’ɛrɛ a.

• Eree baɛ, elu toh a ye le bee lo ekuūdɛɛ̄loo sa nɛ nuede Naomi le Rut.

• Eree taa, lo Rut sikɛ̄ maɛ̄ pya dɔɔ̄na miɔŋɔ nɛ Nɛɛ a ye lu loo ama, ba enyɔɔnɛ pya ye miɔŋɔ ebee dasī ɛrɛ ponia pya nu a ɛrɛ.

• Eree nia, lo Nɛɛ a ye lu loo naa ɛrɛ lɔgɔ nwiī bu dɔɔ̄na wa, nwiī Rut ye maɛ̄ nɛ na e’ɛrɛ bah ekpo loo kɛnɛkɛ̄ Elimelek le lo Nɛɛ a ye lu loo a. Lo a kura kɔ sɔ̄ e’u, nwiī a yiga bee Elimelek e a naale alɛɛ bee na e’ɛrɛ ye kɛnɛkɛ̄ a. Nɛɛ a ye lu loo ama, naa bee gbī epeere ye nu e’ɛrɛ lo eyerebah nɛ Naomi. A bee gbī kɔ Boaz alu dɔɔ̄na nɛɛ a kuu lo e’agara lo nu e’ɛrɛ a, a su ye dɔ. Boaz bee doo doo wo, nyɔnɛbee a bee gbī “edoo kɔ nɛɛ a e’ua a kiisī bu ye nu e’ɛrɛ.”—Rut 4:10.

Nyɔɔwo, a sirapie leere kɔ Nɛɛ a ye lu loo a, naa bee gbī kɔ ye bee le ye nu e’ɛrɛ a pe. A bee le nɛɛ wiibu. Mɛ taā ye bee kiisī, bee nɛɛ a ye lu loo a, zim mmɛ nii’ee. A bee peerenage keebee dee Boaz ɛrɛ, lo ele yɛɛ etaā mɛmɛā Mɛsaia, lo a le Jizɔs Kraist. Mɛ dua piya nu a ye sira loo nyɔɔbee a naa bee yerebah nɛ nɛɛ a le bu ebɛɛ̄ sɛh!—Mat 1:5; Luk 3:23, 32.